十倍股該是什麼樣子?
又重新研究一下十倍股的特徵
這次很簡單,市值,市盈率兩個因素去睇
我只選3個時期去研究,因為重覆時段,很大部份都是同一間公司
這次睇2002-06,2007-11,2011-15
分別是大牛前期,大牛+金融海嘯股災,近期中國牛市
市值市盈率數據不公開了,可自行上網找,GOOGLE FINANCE都有相同功能可以自己拎數據
2002-06年中有160間公司,起點時市值0-5億的有131間,5-10億有4間,10-20億11間,20億以上13間(數據略有出入)
2007-11年中有215間公司,起點時市值0-5億的有163間,5-10億有20間,10-20億14間,20億以上10間
2011-15年中有190間公司,起點時市值0-5億的有151間,5-10億有17間,10-20億11間,20億以上10間
很明顯,多段時期升幅10倍以上的公司,初始市值介於0-5億,那麼,這些是什麼公司,爆升原因是什麼?
當中有好多都是借殼類,例如336華寶國際, 2006年借殼, 公司市值由2003年6月的800萬升至2006年12月132億
2002當時有數間借殼賭股,例如200新濠,2002年市值1.4億,2006年283億.....
部份公司是2003年沙士低潮出現極低價,所以構成10倍,例如592堡獅龍,2003年4月市值不足1億,2004年11月已經回升至33億
市值較大的10倍股與盈利/業務關係較明顯,例如思捷環球330,2002年時市值104億,2006年年底1060億
港交所同樣是2003年4月最低只有82億市值,2006年底升至909億...
中鋁2600市值2002年10月76億,升至2006年底939億....
紫金2899由28億升至593億,中海外發展688由33億升至677億....
另外,市盈率統計方面
2002-06年中有160間公司,起點時市盈率低於0,即虧損公司有100間,0-10倍PE有42間,10-20倍PE9間,20-30倍PE2間30倍以上3間
2007-11年中有215間公司,起點時市盈率低於0,即虧損公司有67間,0-10倍PE有118間,10-20倍PE16間,20-30倍PE0間30倍以上14間
2011-15年中有190間公司,起點時市盈率低於0,即虧損公司有83間,0-10倍PE有67間,10-20倍PE16間,20-30倍PE9間30倍以上15間
虧損公司普遍較多出現10倍升幅,可能借殼,可能轉盈,可能係大家所講老千妖股
低PE公司亦都較多10倍,可能是股災出現最低估值,例如2007-11那段時期,0-10倍市盈率公司多於虧損公司,可能有短期壞消息影響,或者行業低潮等因素
高PE佔比較少,因為多市場人士留意才會高PE,公司再有持續高增長較難,只會是少數公司可以做到例如騰訊
簡單D總結下,借殼股,莊股,基本上無咩可能最低位買到,邊個可以2003年就知2006年華寶會借殼上市,除非你可以預知未來,揀第一日爆升異動股都未必知果間有10倍可能
可能要升一輪,先有風聲傳出借殼,轉新業務,又或其他解釋唔到既原因,因此,基本上無人可以有把握低位買得到這類10倍股
合埋眼買隻撞,會唔會撞得中?而家香港市值低於5億既公司有121間,點撞? 基本上間間公司都差唔多樣, 要每間研究都好大工程, 而且可以獲得既資料唔多,大股東會唔會賣,你點估?佢自己都未必知,今日唔想賣,可能第2日就突然想賣。而且多數成交都唔會多
假設你有10萬,有D公司1日成交都無10萬
如果只用10%可投資額例如1萬去買中1隻10倍股賺10萬,
同訓身100%投資額10萬買中1隻1倍股,回報都係一樣,真係有必要冒高風險去買?投資唔係只係睇升幅, 高回報率低風險策略更重要....揸得安心都是重點.....
睇完這次統計,我仍然認為低市盈率+低市值策略是有效,但只有市場情緒差果時出現低市盈率才值搏,有時有D公司可以幾年都係低市盈率,通常間公司有問題先會咁,例如2010瑞年,亦都有D公司一次性收益造成低市盈率假象....公司所處行業低潮,市場唔看好才會有低市盈率機會,另外高增長是必要條件,無論高低市盈率,都需要高增長,而且是持續,低市盈率但無增長,都唔會有數倍升幅
投資有盈利業務既公司風險,只是較虧損既公司風險低一點點...其實有盈利公司都可以有好多陷阱,不少於虧損公司,每次選擇投資目標都要小心,因為投資誡律只有一條:不要虧損
10倍股是不常出現,降低一點要求,100%買1倍股或更可取.....
對於10倍股研究,相信暫時可以完結...
未來更集中以基本因素(包括公司內在因素與市場環境因素),尋找低風險倍升股,才是更值得研究的方向