| ||||||
| 蒙民偉博士逝世，於七月三十日舉殯，相信到場致祭的各界人士，必然擠滿香港殯儀館，左丁山到時仍然身在外地，未能到場，不無遺憾。 蒙 博士多年以來，直至他進醫院治療之前，每年必定招待傳媒老總與專欄作家午宴或晚飯。而且無論在信興集團的大廈還是在酒家、酒店，必有蒙氏o架喱奉客。記得 某年在信興工廈，o架喱剛放上枱面，蒙先生先嚐一口，立即叫廚師出嚟，對廚師講：「你漏了蘋果……」廚師滿面尷尬之色，連忙認錯。一位老總問：「蒙先生， 點解你咁快知道？」蒙生答：「我做o架喱與吃o架喱幾十年，乜嘢材料漏咗，我試一啖就知。」原來蒙生有一年到大阪研習松下電器之產品與經營之道，為期幾個 月，周末得閒，一位印度朋友請佢到神戶住所食o架喱，一食就上癮，叫印度朋友教路，印度朋友話：「你邊會有時間學o架！幾花時間o架。」蒙先生係要學，個 個周末到神戶學師，印度人見佢咁執着咁勤力，於是傾囊相授。左丁山唔食得辣，唔敢吃蒙氏o架喱太多，淺嚐即止。但嗜食o架喱嘅老總Ｌ年年就係為咗食蒙氏o 架喱，先至肯撥時間年年捧場。 蒙生學做o架喱嘅精神，也就是佢經營信興，代理樂聲牌（現稱Panasonic）嘅精神，一定要將事情學得透 澈，做到最好，永不自滿，年年求進步，不容怠懈、後退。信興與松下之生意關係，全憑牙齒當金使，兩間公司五十七年來並無簽署代理合約，只講個信字，實在係 世間少有。蒙先生生於一九二七年，求學時期碰上抗日戰事與國共內戰，由小學到大學，都不能在平穩環境中讀書，目睹不少同年朋輩顛沛流離，失學者無數。故此 信興集團在商場站穩陣腳，盈利不愁之後，蒙生就成立信興基金，大力捐輸教育，本港八間院校之內，間間有一座蒙民偉樓，近十幾年亦捐贈內地大學，造福內地學 子。香港啲大學校長，極少極少到馬場，但起碼每年一次，就係畀面蒙生，每年在Panasonic Cup之日，到沙田馬場賽馬會廂房，左丁山就在此場合，年年見到徐立之校長。七月三十日到香港殯儀館致祭者，不限於商界學界人士，公眾人士到場向蒙生靈前 鞠躬者，相信亦有不少。 | ||||||