內銀業績期剛過, 債轉股未有細節難定好壞, 在無咩消息既一個中午, 上市只有一星期的天津銀行, 旋即爆出違規事件, 成為內銀炸彈
七億幾既風險事件, 話多唔多、話少唔少, 同農行三十幾億比較, 當然只佔少數, 但已佔天津銀行上市集資額超過一成, 佔盈利兩成幾
翻查上市文件, 天津銀行披露投資於金融工具的「非標準化債權資產」, 在2015年9月已高達1264億人民幣, 較三年前急升三倍。同一時間發行承兌匯票手續費有1億7500萬, 按年大增近2.8倍
其實天津銀監會早在2012年, 已經警告天津銀行的承兌匯票業務風險管理不足, 結果最終都出事
天津銀行個案絕非單一, 另一間周日上市浙商, 資金業務亦超多, 涉及債務工具投資由2013年200億人民幣, 跳升至去年4200億, 規模佔總資產超過40%, 衍生既盈利就佔總數80%
路透有篇分析相當值得一看. 就係所謂既「鍊金術」, 小型銀行、特別係城商行都學識重新包裝, 將高風險債務工具、信託或理財產品, 包裝成低風險產品, 然後由貸款或發債支持。形容呢啲招數, 正係中國金融新興的DARK ART!
天津銀行令人費解係, 同類出事的票據逆回購安排、早在一月農行同信行都已經出事, 當時銀監會已要求銀行自查, 何解事隔幾個月要到銀行完成晒上市, 先來自爆?
招股期間、三大保薦人中銀國際、農銀同建銀, 同埋一眾核數師, 真係唔知會出事?
不過話說回來, 天津銀行招股只有7%公開認購, 其實市場反應已經話比大家知，發生左咩事!