| ||||||
| 富士康 （2038）呢隻股票，近日收市報每股5.68元，歷史市盈率高達132倍，息率等於零（見「財華網」資料），計番轉頭，富士康在2009年賺約四千萬美 元，發行71.43億股，即係每股盈利0.434仙左右。通常一隻科技股能夠有咁高嘅市盈率，係因為高速增長之故，例如騰訊（700）嘅市盈率就有52 倍，但係，富士康嘅○九年營業額比○八年減少咗二十億美元，稅前盈利下跌64%，何來增長呀？股市有好多奇妙事情，富士康至今仍然維持一個三位數嘅 P/E，實在係奇蹟中之奇蹟，笨人如左丁山冇法子諗得明，照推算，富士康股價連一蚊都唔值。但如果在2010年富士康嘅純利可以變魔術，彈升十倍八倍嘅 話，咁就係人哋精夾醒咯！ 左丁山唔係富士康股東，以前對呢隻股從無研究，只因近日呢隻股成為新聞焦點，驚動北京台北香港，先至上網睇一睇， 好奇怪呢隻股票仍然有人捧場，或者人哋知道好多好嘢，而我哋係門外漢都唔定。 買股票要買富士康，不如問吓風水大師紫微楊好過。以前左丁山在 本欄提過紫微楊即將出版新書《紫微徑》，引起讀者興趣，接二連三咁寫信嚟投訴話周圍冇得賣，要左丁山搞清楚。於是膽粗粗打電話向紫微楊查問，紫微楊哈哈大 笑：「左仔，我本書未出版呀！我對住疊打稿，硬係唔滿意，改完又改，有啲大幅刪除，有啲重新寫過晒，又有全新材料加入，總之搞到編輯頭都暈晒。現在卒之改 完咯，六月下旬可以出書。」嘩出版商碰到紫微楊呢類腌尖、要求高嘅作者，真係有排煩，佢老人家仲唔交稿清樣嘅話，點可以趕到印刷日期，在七月書展前推出市 場呀。趕唔到書展，出版商要喊一場都似。好彩，紫微楊話啲稿件校好晒咯，大家要買嘅話，等住六月尾七月去書局買啦。 每逢書 展前，有大量新書出版，希望能夠在書展打響頭炮。呢日出席李純恩攝影展（天、地、人），在海運大廈舉行，方知李純恩啲攝影咁專業，咁投入，唔怪得佢臨時用 手機影維港霧景，企在舊北角碼頭都可以企一個鐘頭。問佢出唔出版新書，佢話工作太忙，冇特別衝刺。當日認識咗佢嘅襟弟律師Y，三日後就見到律師Y、李純 恩、夏佳理夫婦等在馬場拉頭馬影相，原來律師Y與夏佳理等係「戰河」馬主，不禁大嘆走寶。 | ||||||