📖 ZKIZ Archives

英皇老闆楊受成自沙士後密密吸納銅鑼灣及尖沙咀地鋪，配合旗下英皇鐘錶，食盡過去十多年自由行的cream of the cream，最近傳出英皇棄租銅鑼灣羅素街鋪王，大有收韁之勢；不過條韁繩就揮到去沙頭角禁區；楊受成旗下公司用咗廿幾萬買咗近未來蓮塘口岸，位於香園圍七十六至七十八號三間老屋；今時今日，即使禁區內嘅爛屋哪有咁筍價呀？查實，英皇楊早於八九年六四前一個月，大陸風雨飄搖之際，同老婆陸小曼已買入呢間由巴拿馬華僑萬福璋起嘅大宅，只不過近排轉到BVI公司名下咁啫；英皇楊喺佢本自傳《爭氣》提到八九．六四時「正當許多人對中國前途感到灰心和挫折的時候，楊受成反而沒有移走資產，相反在地圖上打量；香港永遠是中國珠江口岸南大門的一個法治、理性、文明的標準位置」。

蓮塘口岸將於二○一八年落成，英皇楊廿六年前喺沙頭角種落呢口釘，價值終於反映出來，不過可能唔係做商貿城，聽村民報料，英皇似乎有意搞骨灰龕喎！

豬肉佬被困

幾年前，小宗嘅手足踩上雨潤（1068）大陸豬欄，搵唔到豬，家陣連豬肉佬——祝義材都唔見人，皆因由上週一起，佢已被檢察機關監視居住，何解？所謂人怕出名豬怕肥，話說雨潤○五年上市，股價彈升快過飲肥仔水，由$3.7升到$33，時任雨潤主席、現為高級顧問嘅祝義材喺高位不斷減持，套現六十多億，豬肉佬繼而變身做地產佬，喺國內攻城掠地，仲識得「分散投資」，喺香港中銀大廈五十三樓開咗間投資公司，名為Cheer Global International，聘請金融界精英揸鑊鏟，聽聞回報幾和味o架！睇個公司名就知幾想國際化，祝義材老婆吳學琴揸澳洲護照，報住新加坡豪宅區Paterson Hill，一個單位閒閒哋千幾萬坡紙；你話肥唔肥先？祝嫂唔使太擔心，早排雅居樂（3383）主席陳卓林同樣被監視居住，後來劫後餘生仲返港主持業績大會，話說祝義材同中央政治局委員李源潮好熟，打個手機就能找到對方，今鋪就睇吓雙方交情有幾深囉。

中環寸嘴

工廈大王楊耀松長子，是各大有名食肆之VIP，喜歡研究已故及城中有錢佬對食之喜好，強調「貴」唔等如識食，自詡分享食經乃是提升讀者之水平。

楊少加伍少踢正少

行過跑馬地以前聖安娜餅鋪個位，有間新食肆開咗，搵啲窗簾遮住晒，唔知仲以為係鴨店，哈，個名好寸喎，叫「正少食棧」，鬼唔知係隔籬「正斗」個太子爺開嘅咩。好，我「楊少」約埋美記「伍少」（Victor）就齊齊去「正少」踢竇：嘩，開張冇耐去食晏，好似包場咁，成場得我一枱，嗰陣仲未推點心，家陣有埋點心食，$36一籠，唔使吓吓叫小菜；試咗「煎釀土鯪魚」、「正少家廚雞」，嗰日飽滯無乜胃口，反而個燉蘋果湯幾鬼潤喉；吖，個部長都唔識介紹吓樓上有間VIP房嘅，好彩我哋識問多句啫，同啲紅酒腳聚會，包間房吹水，都唔怕俾隔籬枱知嘛！「正少」食客唔多，啲食材流轉慢，不過唔怕嘅，佢老豆間「正斗」喺隔籬，賣唔晒可以「隊」去隔籬，如果唔係，包場我都驚呀！唉，今日睇電視見四叔出嚟噏嘢，唔好話我呢個做世姪唔糾正佢，叫人唔好買樓喎，計埋稅收、差餉，兩三年未必有得賺，買股票好過，仲話恒地肯定跑贏大市，但佢個邏輯都唔啱，應該話唔好買樓「收租」，可買樓自住；如果樓價唔掂，地產股都無運行啦；基金佬睇到佢咁講嘢就