你有兩隻母牛 左丁山
http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20140610/18751537老友JR平時收到歐美傳來不同嘅幽默電郵，得閒就轉送俾我地分享，最近期呢個（創意），令人笑中有淚，不妨做一次文抄公：
社會主義：你有兩隻牛（cows），你送一隻俾鄰居。
共產主義：你有兩隻牛，國家攞走晒，回贈牛奶。
法西斯主義：你有兩隻牛，國家攞走晒，向你賣牛奶。
納粹主義：你有兩隻牛，國家攞走晒，跟住向你開槍。
官僚主義：你有兩隻牛，國家攞走一隻，槍殺一隻，搵一隻牛榨奶，然後倒掉牛奶。
傳統資本主義：你有兩隻牛，賣一隻，換回一隻公牛，公牛與母牛配種，生完仔女又賣之哉，收入不斷擴大，之後可以退休。
蘇格蘭皇家銀行資本主義：你有兩隻牛，向上市公司賣出三隻牛，跟住利用L/C（信用狀），債權／股權掉期（debt/ equity swap），卡曼島避稅方法進行一連串冇人明白嘅衍生工具交易，最後公司年報話公司有八隻牛，向外集資買一條公牛。
美國公司：你有兩隻牛，賣走一隻，強迫餘下一隻榨奶似四隻牛咁嘅生產力。最後搵麥肯錫研究隻奶牛嘅死因，提交顧問報告。
法國公司：你有兩隻牛，唔駛做，實行罷工，設公路路障，引起騷動，要政府送你第三隻牛。
日本公司：你有兩隻牛，重組牛隻基因配種，生出一隻細十倍，榨奶能力高二十倍嘅新種牛，跟住畫漫畫創造吉祥物卡通形象，行銷全球。
意大利公司：你有兩隻牛，唔知啲牛去咗邊，決定去嘆茶。
瑞士公司：你有五千隻牛，牛主唔係你。你向牛主收倉租。
中國公司：你有兩隻牛，由300名工人榨牛奶，向外宣稱工人充份就業，生產力高，以及拘捕報導你只得兩條牛嘅記者。
英國公司：你有兩隻牛，兩隻都係瘋牛。
澳洲公司：你有兩隻牛，牛奶生意好好，索性閂門去飲啤酒慶祝。
印度公司：你有兩隻牛，你日日向佢地跪拜。
左丁山一路睇電郵一路笑，突然想起，假如香港公司有兩隻牛，應該會發生乜嘢事呢？歡迎讀者提供「創意」答案！