📖 ZKIZ Archives

大班鄭經翰自上週五起，一連三日 在政府總部為一手創辦的數碼廣播電台（DBC）舉行「義播行動」。恰巧，真的很恰巧，就在週六晚，網上突然流出DBC董事局會議錄音，裡面有一段中聯辦干 預電台運作的談話，結果成功引來過萬名市民在週日齊集政總，把事件演變成反國民教育的一場「小翻版」。大班在上月底還對外澄清，指股東關水喉，「應該唔關 中聯辦事」。言猶在耳，一干人等又突然再將矛頭指向西環。大班一夥引爆手上最後一個政治炸彈，牽引群眾情緒，策動市民力量，逼政府介入。一場股東間的注資 糾紛，被升級為政治打壓，緣於大班與拍檔何國輝瞓身投資，不能一鋪輸身家。黃楚標不忿被迫泵水，向本刊大爆：「佢一早知我哋係全國政協，叫我哋搞電台嗰陣 曾蔭權仲在位，有政治任務嘅唔係我哋！」

DBC在十月十日因資金短缺關門大吉，但一眾主持如鄭家富、林旭華等捱雷氣，搞足七日義播，上週五更一連三日包圍政總舉辦「復播集會」，叫着維護言論自由 的口號，希望政府介入迫使其他股東履行牌照承諾。DBC的鬧劇，在去年底揭開序幕。當時本刊發現胡漢清把手上約一成股權，悉售給大班套現，變相令大班成為 最大股東。然而，大班不久又被免去公司主席一職，只保留台長職銜。當時有指股東不滿大班 燒錢能力驚人，但電台卻遲遲未能開波，於是聯成一線向大班開火。至今年初大班的好友唐英年在特首選舉中墮馬，股東爭拗更白熱化。一眾股東看定政治形勢，在 梁振英上台後，於今年五月投入最後一筆五千萬元資金，便閂水喉。自此大班接二連三出招，控訴電台被「打壓」，然後在上月提出以半價賣出手上股份。雖然他肯 蝕一半離場，但未獲其他股東回應。大班陣營於是使出最後撒手鐧，流出董事會議錄音，播出聲音疑似為黃楚標的董事，在會議內講明不滿李慧玲主持節目風格過 激，警告會惹怒中聯辦阿彭（彭清華）。雖然錄音經剪接，沒有前文後理，但足以令這場風波由股東糾紛升級成中聯辦打壓言論自由的政治事件。上週日晚九時多， 過萬名市民穿上黑衣齊集政總，有家長帶同子女到場，高舉「寧鳴而死，不默而生」的標語，DBC主持樓南光更絕食抗議，學民思潮的黃之鋒走到台上、連民主黨 之父李柱銘也為DBC站台，頃刻場景恍如回到反國教集會現場。有阿婆得知DBC執笠，竟連家中櫃底的一兩黃金也捐出，最終DBC從民間成功籌得約四百萬 元。

撐電台唔撐大班

泛民人士到場聲援，連當初被大班公開怒罵唔夠火而劈炮唔撈的前DJ陳景輝亦力撐電台，但他言論間仍與大班劃分楚河漢界：「不同意大班，但也要捍衞大班發言 權。」眾人直言喪鐘不為大班而敲，因為大家心知肚明，當初正是大班邀請這群紅色大孖沙一齊搞電台。大班私下大呻：「初初我搵十個股東，係希望無人可以話 事，點知呢班契弟……，佢哋而家夾埋一齊！」他口中的契弟，即是指有「深圳李嘉誠」之稱的黃楚標、前教統局局長李國章、東亞銀行大股東李國寶及偉易達主席 黃子欣，他們合共擁有五成多股份，能操控DBC生死。而大班與何國輝及夏佳理陣營，只有四成股份，處於下風。本刊找到黃楚標，他本來說事件進入法律程序不 便講太多。但對於被指政治打壓，他大訴怨屈：「佢搵我哋嗰時，都知我哋係全國政協啦！」說罷又暗寸被諷為「煲呔針」的大班：「唔知係邊個政治任務，嗰陣阿 Donald都仲做緊特首！」

李慧玲惹爭端

有董事補充：「大班對外話我哋有政治任務，但係當時有人刻意做工作，私下話希望我哋請咗李慧玲就滅咗商台把聲，話我哋（DBC）攞咗佢（李慧玲）對你哋 （一班股東）都好呀！因為佢就唔可以喺商台度鬧政府、鬧北京！」該名董事更愈講愈㷫：「你話我哋同中方關係好，我哋未入去做董事未投資，做全國政協身份你 已經知，咁點解你仲要搵我哋呢？」據悉，當時大班未經董事會同意，以年薪約二百萬聘請李慧玲過檔，引起一群大孖沙不滿，最後DBC要賠一個月人工給李慧玲 作罷。記者向大班查詢，問他有否講過請李慧玲過檔，就可以滅了商台聲。他立即反擊：「唔係，對唔住。我話俾你知，你講呢句說話我就反面！嗰句此消彼長唔係 咁嘅意思嘅。李慧玲係商台icon，你拉佢過來可以吸引更多聽眾。」對於為何向政協埋手籌組電台，他說：「我啲朋友就係嗰啲人（政協），咁我有咩嘢辦法 啫？咁人哋做特首人哋做大官我唔睬佢呀？」但他不得不承認與曾蔭權的關係，影響了電台工作。「我做得電台就六親不認，點解我五月先開咪？就係因為我避免尷 尬唔想鬧Donald（曾蔭權）！我一做實鬧佢，我講唔到咪唔講，呢個就係風骨喇！」他對着記者連珠炮發半句鐘，一向叫着「還聲於民」、堅持言論自由的 他，對向他求證的記者拋下一句：「呢段說話我隨時播出嚟o架！我錄咗你音o架！會放埋你張相上網！落地獄o架你會，火燒o架！我係你老細師傅嚟o架！」

原為政協平台

今日上萬名市民包圍政總，希望撐DBC保衞香港的言論自由，然而大班當初成立DBC時，其實離不開一盤生意。接近何國輝及大班的朋友稱，大班○六年搞電台 時滿腔熱血，一心認為以自己以往的叫座力，至少找來一億廣告，扣除每年五千多萬的營運開支，一年最少賺五、六千萬。他於是與好友何國輝自掏荷包搞電台。他 恃着是特首好友身份，高官都要俾面上電台為政策解畫，而其他商業機構如地鐵、國泰等，也很可能俾面落廣告，情況就如昔日在商台一樣。翌年底大班更成功找來 紅色富豪大孖沙埋班，包括三名全國政協黃楚標、李國章及胡漢清；基本法諮詢委員會委員蒙民偉；時為行政會議成員的夏佳理等，個個都有建制背景。誰知電台一 波三折，只獲批AM頻道，建發射站又被居民反對而擱置，最後被迫申請數碼廣播牌照。有董事透露：「當初大班同我哋講搞電台，第一係話有廣告，佢話以前商台 一年收入有四億，淨係佢自己已經有一億廣告！第二係話我哋一班全國政協，希望多一把聲音可以為民發聲、為政黨發聲，左中右政黨都可以上去開咪！」今日的 DBC在股東反目後成為了反梁基地，在反國教及新界東北事件中，都跟大隊一起鬧政府。但去年八月電台試播，大班曾公開說想待曾蔭權卸任後客串開咪，最後因 爆出黃楚標賤價租出深圳大宅予曾蔭權，才不了了之。曾是股東的胡漢清更曾跟好友說，期待在開台後「處男下海」，以基本法研究中心主席的身份宣揚理念，但他 去年中因電台開台無期而退股跳船。

搵錢大計落空

預計DBC能每年最少賺五、六千萬的大班，還借機獅子開大口。據了解，大班曾要求董事跟他簽下一份十年的管理合同：「當時李國章聽見即刻話，你做一日話唔 做，我哋都賠十年俾你咩！黃楚標當時仲話，你咁樣我破產都唔夠俾你！」大班討價還價，大讚自己八年前在商台做《星期日大班》時已收十萬元一集。最後，雙方 達成協議，DBC只跟大班簽五年管理合約，至於他替電台開咪，則以分佣形式收錢。然而電台開台至今只得四百多萬廣告，根本無肉食。大班至今仍對未能簽成的 十年長約耿耿於懷，更私下大罵李國章：「佢係全香港最『×』嘅人，你睇佢教院搞到個Morris（前教院院長莫禮時）要賣樓同佢打官司！黃楚標額頭係寫咗 『×』字，但估唔到李國章仲『×』過佢，好眉好貌！」外面一直傳大班和何國輝背後可能另有金主，但據認識二人的消息人士指，今次大班與何國輝均真金白銀用 自己錢投資，何更於去年一月把曾與外父外母及老婆一同持有二十年的西貢單位，以七百多萬賣出。所以今次連何太也好緊張，怕「一個仙都攞唔番！」大班亦曾公 開明言，自己投資電台近四千萬。兩派股東自從割席以後，黃楚標自八月起不停派人查數，並向法庭申請由兩名會計師接管公司賬目。何國輝亦自爆公司欠債近六千萬，加上股東已投資的一億五千萬，共燒了二億多，現在DBC處於清盤邊緣，股東將於十月底開會商討，有股東不忿道：「而家唔係錢嘅問題，係忿唔忿氣，如果係朋友嘅，唔會一開始處心積慮錄音，有咩嘢咪傾囉！佢想逼我哋半價賣股份之嘛！」

大陸貪腐之風吹遍特區，曾蔭權擔任特首時其身不正，既上富商遊艇玩，又接受「深圳李嘉誠」黃楚標提供超豪出租單位，惹來貪污指控一身蟻。同樣係曾班子成員嘅李少光，退任保安局長後撈咗個港區人大代表嚟做，反而同政協委員黃楚標愈走愈近，毫不避忌。

舊年聖誕，李少光伉儷同黃楚標共遊澳洲，去咗唔少港人熱門景點，有香港旅行團團友幾次目擊佢哋喺食肆大吃大喝，最後都係黃楚標埋單，李少光拍拍屁股走人。十二月廿六日夜晚九點幾，佢哋抵達塔斯曼尼亞一間叫Saltshaker嘅餐館，由於last order已過，餐廳員工禮貌地婉拒眾人入內，就算李少光費盡唇舌都不得要領，無癮地返回七人車。黃楚標派出一名隨從同餐廳交涉，仍然食白果。過咗一陣，隨從手上多咗一疊澳幣，入到餐廳先派錢俾老闆，跟住派俾樓面侍應，仲走入廚房繼續派，人人有份。有錢使得「鬼」推磨，澳洲人改變初衷，熱情招呼眾人用膳。當時一位身處現場嘅香港遊客同記者講，黃楚標隨從派嘅「唔係細面額澳幣，張張都係一百蚊」，估計折合港幣超過一萬蚊。餐廳女員工Louise透過長途電話接受記者訪問，佢對派錢事件印象深刻，從記者傳送嘅黃、李相片亦確認，當晚佢哋先俾貼士，餐廳先至彈性處理，特別延長咗晚餐時段。李少光先後兩次接受本刊查詢，第一次佢承認上年十二月曾與黃同遊澳洲，亦有喺Saltshaker食飯，但矢口否認有派錢事件；呢個星期記者再搵佢，佢先話「唔記得」有人派錢，跟住修訂為「覺得冇」。除咗貪腐惡習，語言偽術歪風亦橫掃香港，梁振英「居功至偉」。