中環在線：做百麗小股東要長命 李華華
2008-11-14 AppleDaily
深 圳市南山區後海金融投資說明會噚日喺金鐘某酒店舉行嘅一個活動，請咗唔少金融界名人，包括恒生（011）一姐薛關燕萍、羅兵咸永道合夥人雷添良，由 TOM（2383）過檔美國德太增長基金做合夥人嘅王兟等。不過大家似乎都怕咗傳媒，鬼咩，呢輪嘅大熱問題，一係關於雷曼迷債苦主，一係講股市跌，再唔係 就問「有冇玩Accumulator呀？」冇樣好嘢，就連賓架同啲主席之間嘅問候，都好易出事！
好似百麗（1880）主席鄧耀同東亞（023）中國副主席 陳棋昌交換卡片之際，陳棋昌口快快話：「我係百麗小股東」，鄧耀似乎有啲尷尬。咁好易理解，舊年5月上市嘅百麗，噚日股價跌剩招股價一半，得3.19蚊， 鄧主席真係唔易面對小股東。至於陳棋昌係喺百麗上市時認購嘅，揸住幾多就唔講嘞，但會長揸唔止蝕，佢話：「個市梗會起番，夠長命就得。」