ZKIZ Archives


幫彤叔40年畀機會後輩新世界開國元老梁志堅榮休 李華華

2010-12-8  AD





 

家族式大型企 業,規模仲大到上市嗰隻,絕對係需要一個開國謀臣幫手打江山。香港老牌地產商新世界發展(017)嘅掌舵人─鄭裕彤(彤叔),咁多年東征西討,全靠背後有 個「殿堂級」嘅謀臣梁志堅(堅叔)幫忙。唔好搞錯,呢個唔係奸人堅,而係喺地產界打滾40幾年嘅老江湖,佢經驗老到,由新世界未上市,做到o依家集團市值 近600億,可謂功不可沒!不過呢位開國元老,噚日就宣佈明年退休嘞!

作風硬朗 紅灣一役經典

講到堅叔,人如其名,堅到 爆!佢70年代已經同彤叔打工,幫彤叔手建立新世界,雖然40年嘅青春就咁畀晒彤叔,但係睇住新世界一日一日長大,一定好有成就感同歸屬感。至於戰績喇 喎,新世界搞地產起家,堅叔既然係彤叔頭馬,又係公司參謀大臣,所有同土地有關嘅事,無論收購地皮、併購舊樓、官地拍賣、買賣現成物業,統統都關佢事。聽 聞89年落成嘅荃灣海濱花園塊地皮,就係當年堅叔親自飛去美國同油公司加德士傾返嚟嘅。而新世界唔少品牌豪宅,好似西半山學士臺、中半山嘉富麗苑、前身係 學校嘅俊傑花園等,都係佢一手打理。近年最經典嘅,就非04年新世界有份參建嘅紅磡紅灣半島(現稱海濱南岸)重建風波莫屬。當年,堅叔一句話「廁所(紅灣 半島)連大肚婆都入唔到去」一度成為城中佳話。近年政府諸多留難地產商,多多規條要地產商遵守,堅叔不時代表地產界出頭,狠批政府各樣花招,作風硬朗。

噚 日華華去新世界總部樓下等堅叔,佢話:「退休之後仍然係公司顧問,只係日常嘅工作唔跟,假期唔會返工。不過,一個星期仍然會返5至6日工,我個人喜歡返 工。」佢仲話:「喺新世界已經做咗40年,咁啱今年新世界又係40周年,我都覺得係時候(退休),其實公司法定退休年齡係70歲,我已經超過咗年幾,而公 司(業務)已經上軌道,亦都有好多人跟(工作),所以選擇退休。」

「o依家選擇退休冇乜特別嘢,我已經超過70歲,公司畀咗好多機會我,o依家係時候畀返啲機會後輩,等後輩上,而事實上公司工作量亦都好大,但係我仍然會每日返工,直至工作完全有人接手,arrange好啲嘢先告別,特別係joint venture嘅嘢會先交代清楚。」

至於顧問無任期,佢話:「我鍾意做到幾時就幾時。」佢仲話有同老闆傾過,彤叔話:「我都80幾歲,都未退休。」不過佢都尊重我嘅選擇。」而地產建設商會就因為就快遴選,「到時再睇吓大家意向,商會嗰邊唔成問題。」

李華華

[email protected]

 


PermaLink: https://articles.zkiz.com/?id=20084

Next Page

ZKIZ Archives @ 2019