走過22年灰色軌迹家強以駒為傲
1 :
GS(14)@2015-06-06 09:05:39下周三是黃家駒的53歲冥壽，雖然Beyond的光輝歲月已成歷史，但黃家強對哥哥依然念念不忘，在家駒忌辰的前夕，家強將推出比喻人生的新碟《沉香》，沉香是樹木受傷後分泌樹脂療傷而結成，家駒離開帶給家強的「傷口」仍忍忍作痛，一直以身為家駒弟弟為傲的家強說：「我人生最大挫折，就係家駒離開我！」撰文：余燕儀
黃家駒走了22年，還有4日就是他的53歲冥壽，日前黃家強在新蒲崗接受本報專訪，於家駒生忌前夕推出新碟《沉香》，家強說：「其實唔係刻意，只係咁啱呢個期，我覺得呢隻歌幾代表到自己人生，呢種樹木係受傷後釋放液體保護自己，沉香係受咗傷嘅樹先會有，可以比喻人生，當你遇到唔如意、崎嶇嘅路或攻擊，如果可以自己同自己療傷，人生可以昇華，咁就更加香。」
家駒變成信仰
問到曾受過那些傷？家強說：「其實唔同時期都會有遇到唔同挫折，我人生最大挫折，係家駒離開我，我由嗰刻到而家都唔係咁接受到。」時光飛逝，家駒的忌辰又將至，家強說：「每次佢忌辰日子，好多團體、玩音樂嘅朋友、內地歌迷，搞好多自發性活動紀念佢，無論大大小小音樂會或歌迷聚會，佢畀我感覺仲好似生活喺我哋身邊，比我哋活得更加精采。」雖然家駒已經遠去，但他的精神卻永遠不死，家強說：「佢啟發咗我好多嘢，佢嘅音樂精神唔單止影響我哋呢代，甚至可能延續下一代，我感覺好欣慰，對佢熱愛從來冇減過，甚至有過之無不及，記得佢在生時，我覺得其實Beyond冇而家咁紅，而家全中國老中青都識黃家駒，已經去到一個信仰，佢嗰份精神唔單止喺音樂上，更令所有行業都有理想有堅持，只要有夢就可以代入黃家駒精神去做，我覺得身為佢細佬好驕傲！」
■如果家駒仍在生，家強坦言唔敢和阿Paul反面。
■家強成家立室育有兩子，希望家駒精神能延續至下一代。資料圖片
Beyond緣盡
近年家強和黃貫中（阿Paul）兄弟反目，今年葉世榮有意重組Beyond，但家強直言Beyond已經緣盡，令歌迷十分失望，問為何不能替歌迷做一次？家強說：「Beyond歌迷分咁多批，為得邊個箒。」問他會否為錢重組Beyond？家強坦言：「我一直覺得自己做Beyond唔係為錢，講真句當然我都要食飯，以前夾Beyond絕對令我哋幾安落㗎，我其實嗰時好滿足，到分開咗亦冇乜嘢，都搵到食喎，咁去睇嘞，你覺得Beyond搵得錢多定你搵得錢多？如果你話唔計㗎，生活到咪得囉！我而家就係咁狀況，原來都生活到，係咪可以唔搞啦，咁咪唔搞囉。」如果家駒沒死，Beyond會否搞到今日反目局面？家強說：「梗係唔敢啦，我可以用唔敢嚟形容，邊個敢啫，佢一腳伸你出去囉。」如果家駒見到Beyond弄至如斯田地，會有甚麼感受？家強肯定地說：「叫我哋唔好玩囉，佢一定會咁講：『拆咗佢啦，玩嚟做乜？』完全冇保留地反面，仲玩！」化妝：Maggie Lee髮型：Matthew Kong of Headquarters
來源:
http://hk.apple.nextmedia.com/entertainment/art/20150606/19173989