拍拖三年四圍飛林峯千語生日必去旅行
1 :
GS(14)@2016-11-23 07:53:22林峯同女友吳千語公開認愛只係三年時間，但其實成日都被影到出埠去旅行，冇法啦，鬼叫佢哋平時工作咁忙，冇乜機會隨時見面，索性每次拍拖都夾個時間去旅行，仲易增進感情啦。好似13年農曆新年，林峯專誠由上海飛到東京搵千語BB，拍住拖過年，仲順便過埋首個情人節，但玩一次未夠，返咗香港兩日，佢哋又再飛多次去日本沖繩，玩多五日四夜。去完日本無耐，林峯同千語BB就轉地方旅行，有人就影到佢哋一齊喺米蘭坐飛機返香港，林峯仲錫咗千語BB面珠一啖。到咗13年底，千語BB再次同林峯去東京，目的係幫男友慶祝34歲生日，呢次旅程就長囉，玩足九日，正日當晚，佢兩個仲喺酒店閉關，留足18個鐘！到咗翌年11月，又係佢哋嘅生日檔期，有人喺倫敦見到佢哋撐枱腳食韓式燒烤，林峯可能嫌冬天未盡興，接住個農曆年假就帶咗千語BB去北海道滑雪。講咗咁多，終於講到今年，5月嘅時候千語BB帶林峯返悉尼見家長，接住再到9月，佢哋又俾人見到去完旅行返香港，仲買到一袋二袋，原來係去咗法國shopping。嗱，講咗咁多，其實都係想講，千語BB同林峯分別喺10月同12月生日，最近係佢哋嘅旅行高峰期，如果大家呢排會去旅行，話唔定會見到佢哋坐你隔籬位㗎。
來源:
http://hk.apple.nextmedia.com/entertainment/art/20161123/19842589