ZKIZ Archives


一線變七線心灰轉行蔡淇俊數無綫 亂用主角

1 : GS(14)@2017-06-25 09:31:25

■目前仍是單身的蔡淇俊,自言隨時有成家立室的準備。攝影:葉君海



【《蘋果》專訪】蔡淇俊17歲時憑6呎身高及俊朗外形,贏得無綫旗下周刊「至型bug仔」比賽入行。沒多久就被監製錢國偉看中,04年擔任青春劇《赤沙印記@四葉草.2》男主角、07年獲無綫高層曾勵珍欽點,演出處境劇《同事三分親》演關詠荷兒子,事業運順暢,將同期出身的胡定欣、鄭俊弘比下去。


太謙失機會

不過今年33歲的蔡淇俊已經退出幕前,在佛山開設雲南米線店,回想當年曾經風光,其實他有想過將拍戲作為終身職業,但性格決定命運,他說:「可能太細個入行,自己又係比較內向怕醜嗰類人,本身我係好care人哋點睇自己,例如有人搵我演識溜冰或者打功夫嘅角色,我就算識,都會預先打定底同人講『我麻麻哋咋喎,試吓啦』,太過謙虛,miss咗好多機會。又同好多人唔熟,變咗人哋見到面時認得你,但轉個身就唔記得,即係冇乜存在感。慢慢同公司嘅幕後、監製、導演都唔熟,開始覺得幾難行。」



■蔡淇俊(左四)在《赤沙印記@四葉草.2》中擔任男主角。劇照

■由一線變七線,蔡淇俊在《宮心計》中只能演太監。劇照


借外援感觸

到13年情況越見難堪,蔡淇俊在劇集《仁心解碼II》中,只在第25集演報道員一角出過場。由一線跌落七線,他坦言有曾經不開心:「有檢討過,但見到人哋開始上,當時係諗極諗唔通,其實大家做戲都差唔多喎,都係做咁多年啫,唔通我有啲乜做得唔好?到我呢幾年出去做生意,識得人多,發覺可能係性格上或者待人處事上做得唔夠好,再加埋你做戲又唔係叫叻,只係一般般,導致冇人哋咁成功。」但此刻他仍然不忘當日錢國偉及珍姐的提攜,亦相信以目前狀態,有朝一日可以重返幕前。



■蔡淇俊目前在佛山經營5間米線店,凡事都親力親為。

■蔡淇俊的生意已上軌道,希望操弗後可以再拍劇。

對於近年無綫借助外援拍劇,蔡淇俊特別感觸:「當然會唔開心,點解有啲人突然走入嚟,都仲未知邊個,就做到男一、女一嘅?」但作為老闆的他亦明白有高層過檔,自然會起用一班自己人。對於舊愛陳自瑤已經結婚生女,蔡淇俊強調大家是朋友,雖沒聯絡但真心祝福對方。採訪:王梓嫚




來源: http://hk.apple.nextmedia.com/entertainment/art/20170624/20066574
PermaLink: https://articles.zkiz.com/?id=336776

Next Page

ZKIZ Archives @ 2019