四太三代同堂捧畢業禮猷君三年拎麻省理學士 趕住創業
1 :
GS(14)@2016-06-06 03:17:40【全家慶祝】■賭王四房孻仔猷君昨日於美國麻省理工大學畢業，四太梁安琪罕有地率領母親、胞兄禤偉祺夫婦現身觀禮。
【《蘋果》越洋專訪】賭王四房幼子何猷君自小被封數學天才，昨日在世界排名第一的麻省理工大學理學士畢業，可謂人生勝利組，四太梁安琪率領三代成員撐愛子場。猷君透露自己以三年時間完成四年的學士課程，是希望可以早一年畢業返港展開創業大計。
賭王何鴻燊的子女，事業上各有成就，二房長女超瓊是香港女首富、兒子猷龍是澳門小賭王，四房近年勢頭勁，大女超盈開藝術拍賣行躋身《福布斯》榜注目新生代，而21歲孻仔猷君自小被封為數學天才，學業成績超卓，昨日更於世界排名第一的美國麻省理工大學（MIT）畢業，絕對是尖子。
已獲取錄金融碩士
猷君昨日於香港時間凌晨在波士頓出席畢業禮，四房一家總動員現身支持，四太率領母親、甚少露面的兄長禤偉祺與太太、子女超盈、猷亨及超欣一同前往，連一手湊大猷君的老工人珍姐都有飛去見證，可見四房對猷君畢業十分重視。猷君行完禮後，全家興奮拍照留念，他更向阿媽送上肉嘴，又攬實妹妹超欣合照。能在MIT縮減一年時間完成理學學士課程，連大學校長也笑猷君破壞了宇宙最難入的大學形象。猷君透露其實早前已獲取錄金融碩士，他現考慮繼續進修或返港創業，去年他已小試牛刀以利是錢創業搞夜店app。本報昨日越洋致電猷君做獨家專訪，談到三年苦讀終見成果，他自言興奮亦辛苦：「平時一個學期係讀四、五堂，我就喺第二年每個學期讀八堂，即係一年讀兩年嘅堂，因為想返去屋企創業，想努力快少少，早一年畢業，上八堂搞到冇時間食飯，忙到唔知幾時交功課，所以用咗三年汗水趕呢個畢業禮，係好興奮，好感動，排隊上台嗰時諗，三年幾艱難，喺呢度真係唔容易，好多謝朋友精神上同功課上支持。」賭王的子女，大部份都是大學畢業生，猷君更是從世界排名第一學府MIT畢業，學術成績超班，他謙虛表示：「咁多家姐、阿哥都非常優秀，大家都咁叻。」猷君在香港讀傳統小學時，已參加世界數學測試邀請賽，獲獎兩次被傳媒封為數學天才，他自言榮幸：「我細細個你哋叫到而家，由攞獎、考會考、A-Level，入MIT到畢業都好榮幸，係唔係天才？梗唔係愛因斯坦，講吓笑就OK，不過由細到大都多咗個責任，一定要數學考得好。」
【興奮舉V】■猷君戴上四方帽，等待上台攞證書時已甚感興奮。
【數學天才】■猷君小學時代已參加世界數學測試獲獎兩次，被傳媒封為數學天才。資料圖片
「一年讀兩年嘅堂」
父母出名做生意叻，相信猷君亦遺傳了他們的基因，他表示：「爸爸成日講笑，我數學好係遺傳阿媽數口好，聽爸爸同媽媽朋友講，爸爸細個對數字已好敏感，一個電話簿所有電話都識背番出嚟，可能有少少遺傳，天才又好、愛因斯坦又好、愛丁堡又好，我覺得係80%努力，20%係天賦。」數學天才的他雖未試過考試不合格，但自言讀書也曾遇上困難：「細細個去英國讀中學，嗰時英文唔好，覺得讀歷史好難。」賭王父親與四太理所當然成為猷君的偶像及學習對象，他表示：「從爸爸身上，學到永遠對no係say no，好有毅力嘅性格。喺媽咪身上學到好謹慎，佢好多嘢似望一望就決定，其實佢喺個腦入面，個思維兜咗好多次。仲有Iron Man都係我偶像，個角色都係MIT畢業。」採訪：唐如
■猷君（左）以NBA球員流行的Dab方式，與校長握手。
■親友訂做MIT立體蛋糕賀猷君畢業。
來源:
http://hk.apple.nextmedia.com/entertainment/art/20160605/19641674
想生白羊B趕住六月要行房陳柏宇孖未婚妻餐廳調情狂嘴
1 :
GS(14)@2017-06-26 03:22:032017-06-22 NM
現年33歲陳柏宇（Jason）與31歲model女友符曉薇（Leanne）拍拖六年，兩人將於下月（七月二日）拍拖紀念日正式拉埋天窗，並會在九展筵開40席宴請親朋戚友，兩公婆仲講到明因為想生白羊座BB，所以提前在六月就不設防造人！
日前，Jason就拖實未婚妻現身中環拍拖，雖然同行有朋友做「電燈膽」，但仍然無阻二人晒恩愛！閒逛完商場，一行四人去露天餐廳醫肚，難得等到朋友離坐去廁所，兩個就即刻按捺不住變身「接吻魚」瘋狂嘴嘴！七月結婚
有「隱世歌手」之稱的陳柏宇與未婚妻符曉薇拍拖六年一直非常恩愛，今年二人正式入紙註冊結婚，在五月遠赴倫敦拍攝婚照，下月將會拉埋天窗的二人除咗忙着籌備婚禮，亦不忘抽空拍拖。
上週二（六月十三日），Jason就同未婚妻孖公仔現身中環拍拖，同行仲有兩個女友人做「電燈膽」，「準妻奴」Jason 一見到未婚妻就忍唔住動作多多，出盡招數氹「老婆」一笑，雖然身邊朋友應該見慣晒這些場面，為免冷落兩位朋友，Jason都好識做暫停一下打情罵俏，分別陪朋友邊行邊傾。
跟住一行四人就去餐廳醫肚，食足一粒鐘後，朋友終於行開「放水」，喺呢個時候，忍咗成晚嘅Jason同未婚妻就即刻對望玩手擊掌，然後情深對望一眼，最後仲情不自禁在大庭廣眾下變身接吻魚連環嘴嘴，等唔切返屋企先錫，心急到呢。
筵開四十圍
距離婚禮不足一個月，將會在九展筵開四十圍的Jason曾透露準備花費約六位數字搞婚禮，希望俾未婚妻一個難忘回憶，雖然二人對婚禮都各有意見，但出名錫女朋友的他，一早就和未婚妻傾好有共識，為咗二人長遠嘅將來，婚禮開支實行應使則使，唔會一味死充要豪。「Jason同Leanne一早已經有結婚呢個計劃，以前Jason對儲錢冇乜概念，但自從同咗Leanne拍拖之後就識諗咗好多，呢幾年佢兩個都好努力一齊儲錢，起初聽佢哋講都係諗住細細哋搞，不過朋友太多喇，好似同期出道嘅小肥、江若琳等等都堅持想參加夜晚婚禮，所以搞吓搞吓最後就決定係九展大搞四十圍，但係其他門面嘢佢哋都盡量應慳則慳，度蜜月機票都話慳住坐經濟位就OK！」陳柏宇身邊人說。
婚禮唔使豪
下月即將拉埋天窗的陳柏宇及未婚妻符曉薇近日努力籌備婚禮，早前二人揼本包團，化妝師、形象指導、攝影師，一行十多人赴英國影pre-wedding婚照，更諗住去夏威夷度蜜月，整個婚禮一百萬有找，符合他們應使則使宗旨。
婚禮基本開支
結婚戒指7萬
九展40圍酒席53萬
倫敦結婚照25萬
婚紗二套1.4萬
度蜜月6萬
婚禮場地布置2萬
約94.4萬
不設防造人
七月做「老襯」的陳柏宇一直喜歡小朋友，而Leanne早前仲自爆度好晒期，計好晒行房時間，要在六月未正式結婚前就「開工」造人，因為他們想生個白羊B。「其實佢哋已經同居咗幾年，生活上好多嘢已經好夾，為咗將來生BB，一早已經做晒婚前檢查，又成日同我哋講話要生夠兩個，佢哋仲有計劃到買咗教育基金，希望等到將來小朋友讀小學嗰陣，一家人返加拿大生活！」陳柏宇身邊人說。
撰文：娛樂組攝影、攝錄：楊紫、李玄設計：何嘉慧