聞「起晒家人底」 港鐵站內衝突 梁天琦斥左報狗仔隊挑釁
1 :
GS(14)@2016-08-15 22:51:32■梁天琦前晚在港鐵站與疑為《大公報》記者拉扯，有人上前勸止。讀者提供片段截圖
【本報訊】本土民主前線梁天琦周六晚在港鐵太古站與一名男子爭執，雙方衝突。梁天琦在衝突前於網台節目稱被《大公報》記者追着拍攝，對方挑釁「起晒你屋企人底」，他承認當時想打對方，但因對方拿着攝錄機拍攝因此未有行動，惟節目後雙方在港鐵站相遇起衝突。事後該名記者被網民「起底」，《大公報》沒有正面回應。記者：紀靜雯
前晚11時許，穿棗紅色T恤的梁天琦與一名穿灰色衫的男子在港鐵太古站B出口大堂爭吵。片段中二人以粗言互罵，兩名港鐵男職員及數名男女上前勸止，將兩人分開，當時梁的孭袋及眼鏡跌在地，T恤背後遭扯爛。梁及後拿手機拍攝該男子，對方大叫「梁天琦打人」，梁亦指罵對方是《大公報》狗仔隊，「幾廿歲人，有嘢唔做，做共產黨隻狗？」該男子突搶去梁的電話並擲向地上，雙方擾攘近5、6分鐘後，灰衫男子先行離去，梁其後亦離開港鐵站。
梁天琦
涉事男子報警稱遇襲
梁天琦前晚在網台節目表示，曾在街頭被該名《大公報》記者追着拍攝，對方不斷挑釁，「話你屋企人點點點，你有幾多個屋企人，你屋企人喺邊度喎，起晒你屋企人底，同講晒你啲嘢，不斷挑釁，叫你有冇乜回應」。他坦言當時想打對方，但因對方拿着攝錄機拍攝，「冇計啦，惟有認番佢哋個樣，跟X番佢哋，唔係可以點？」他直言現時已沒有私人生活，「食個飯都要匿埋」。據了解涉事男子姓盧，綽號「金毛」，曾任職《FACE》，其後轉職至《大公報》。該名記者事後隨即被網民「起底」，公開其facebook賬戶及手機號碼等，但其後賬戶及手機已停用。本報昨午致電《大公報》查詢，一名女職員表示：「我哋都要了解一下，遲少少覆你。」但記者還未留下聯絡電話，對方便匆匆掛線。及後記者再致電，另一名女職員則稱：「佢暫時唔方便答你。」其後亦掛線。本報昨多次聯絡梁天琦，暫未獲回應。警方發言人稱，一名42歲姓盧男子昨晚報稱於13日晚在港鐵太古站被一名男子襲擊，現將案件暫列「在公眾地方打架」，交東區警區刑事調查隊第8隊跟進，暫未有人被捕。
來源:
http://hk.apple.nextmedia.com/news/art/20160815/19736851
【起晒雞皮】撒嬌的男人好命啲？港女：乸型！打佢囉！
1 :
GS(14)@2016-10-27 06:02:43Jota向珍京撒嬌勁可愛！（《我們結婚了》截圖）
【三個粉絲追韓劇】戲都有得做，話《撒嬌的女人最好命》！但係睇《我們結婚了》嘅假想夫妻Jota同珍京，竟然係老公撒嬌氹老婆，連Jota自己都頂唔順連番大叫，不過觀眾就覺得Jota好可愛。如果你身邊嘅男生們撒嬌，會唔會好命啲？會冧死女定係想煎把佢？
Biu（左）話男仔撒嬌好乸型，Alex話自己唔會撒嬌，好核突！
阿愁（左）話唔buy撒嬌，鍾意強勢男，阿仙話只係接受到男朋友對自己撒嬌。
韓國新晉男團APL成員Seoin示範撒嬌...bb聲...高八度...
事實上，港男港女都唔buy男人撒嬌，女話：「明星就得，普通人會好乸型、想打佢囉！」，男話：「好核突囉！男仔應該有返啲性格！」動主播阿仙話只係頂得順男朋友同自己撒嬌，Viu韓劇導賞員阿愁就話鍾意強勢男，撒嬌呢家嘢咪搞！的確同人唔同命，韓星撒嬌先稱得上係可愛，冧到fans暈陀陀！今集就請嚟韓國新晉男團APL四位成員Seoin、Hyuk、Tin同Daniel（同時係Viu韓劇導賞員）示範點樣撒嬌，bb聲、高八度、扭扭擰擰...出埋「飛機餵飯飯」，可愛定起晒雞皮？你睇片咪知囉！
成員Daniel就話如果撒嬌會講嘢慢啲...扭扭擰擰咁...連佢自己都頂唔順呀！
成員Hyuk話會使出「飛機餵飯飯」呢招！
Hyuk話o依家興「傲嬌男」，表面上唔理你，但係喺背後默默付出。（《奶酪陷阱》截圖）
APL成員Hyuk話，因為韓劇嘅關係，出現咗「친대래남자（傲嬌男）」呢個形容詞。傲嬌男即係表面上扮哂cool，唔理自己鍾意嘅女仔，但係喺背後默默為佢付出。簡單啲講，就好似《太陽的後裔》第二男主角徐大英（晉久 飾），成日擺款、扮cool、扮型，其實勁緊張尹明珠（金智媛 飾）！又好似《奶酪陷阱》嘅男主角劉正師兄（朴海鎮 飾），對洪雪（金高恩 飾）愛理不理，其實處處為佢著想。
就好似徐大英對尹明珠咁，愛在心中。（《太陽的後裔》截圖）
不過，近排最興都係「暖男」。
好似朴寶劍對金裕貞愛護有加，冧死女呀！（《雲畫的月光》截圖）
不過，近期最hit嘅一定係「暖男」，因為《雲畫的月光》拍到男主角世子李韺（朴寶劍 飾）係超級暖男，對洪樂瑥（金裕貞 飾）愛護有加，佢嘅關心同痴情迷倒萬千粉絲！有港女都話鍾意「暖男」多過「傲嬌男」，至少唔使估男朋友諗乜，只係接受佢對自己好就得喇！有港男又話自己係「暖男」，話女朋友病咗會照顧佢，知道戲院凍又會帶定外套畀女朋友着咁話喎！
Kimmy話鍾意「暖男」，好似太陽咁溫暖。
有時撒嬌都有潮流跟，好似早幾年興「귀요미(撒嬌頌)」（右），今年就興TWICE首歌《Cheer Up》中嘅「shy shy shy」。
如果Seoin做嘅話......
主持：動主播阿仙、Viu韓劇導賞員阿愁和Daniel記者及繙譯：卓惠媛(Joyce)攝影：陳家文、李錦鏵《我們結婚了》片段由Viu提供：
https://goo.gl/Yx13PE【三個粉絲追韓劇】
http://hk.apple.nextmedia.com/enews/animation/kfans/
來源:
http://hk.apple.nextmedia.com/entertainment/art/20161027/19813074