📖 ZKIZ Archives

香港人最愛抄橋，哪裡有錢賺便一窩蜂鑽到哪裡去。是ABC的曾國鈴（Joyce），說美國流行影相攤位（Photo booth），當年她嫁來香港，發現香港竟未流行這門生意，於是成立hk photobox，製作一部如貼紙相機的攝影箱，在婚宴或公司派對上，幫客人拍即影即有相片。不過，由於生意性質太過簡單。開業不足一年，同類公司四起。Joyce一方面提升hk photobox的照片質素，一方面碼實大企，如Dior、YSL、Lane Crawford等，長做長有，月賺八萬。

上週五晚，摩根資產管理（JP Morgan）在會展舉行每年一度的員工派對。晚宴正式開始前，宴會廳前有一個雞尾酒會，JP方面安排了四、五個攤位遊戲讓早到的員工熱熱身。攤位包括擲飛鏢、Xbox結他機、掟乒乓球和由Joyce負責的攝影箱。Joyce早在下午四點已親自到場打點，由搭建布景、設定影相系統、燈光校對到道具安排，全部一腳踢。六時雞尾酒會開始，有員工已率先到來，Joyce主動邀請他們上前拍照，並請他們在四、五十款道具中選幾款著上，然後站在相機前擺pose。一班平日一本正經的男人在電腦上見到自己，即時影帝上身，又騷肌肉，又chok樣。相機連拍四次，他們的pose換了又換，如入無人之境。數十秒後，相片打印好，一班人圍成一圈睇相，個個笑得面紅耳赤，「嘩！呢個好玩喎！趁無咩人快啲玩多幾次啦！」然後又繼續表現誇張興奮。旁觀者被笑聲吸引着，攝影箱附近迅即聚集起人群，成為最受歡迎攤位。有員工玩過後，即場問Joyce取卡片兼問價，「真係好好玩呀！嚟緊結婚都想租一部俾啲朋友試。」一名員工說。直至八時，Joyce任務完成，短短兩小時，便賺了七千八百元。不過Joyce謂其實工作仍未完結，「仲會返公司將啲相入落手指（USB），送番俾JP留作紀念。」

結構簡單易俾人抄

攝影箱和即影即有的證件相機，或是曾流行的貼紙相機概念類似。Joyce在一個接近六呎高的大箱內，放有相機及閃光燈，並連接一部電腦及打印機。她會按客人要求，設計好相框。攝影箱一小時可拍最多七十至八十張相，以每張成本三元計算，兩小時只需五百元，便收費七千八百元。就是因為毛利高，概念又簡單，Joyce說開業一年，就有六、七間同類型公司出現。「都無辦法啦，做生意預咗有競爭，唯有自己做得好啲。」因此，她「揼本」搞好質素。其中一部攝影箱用的相機是Canon，電腦是HP，而最關鍵的打印機及相紙，她用了DNP，這個牌子打印機平均就要二至三萬元。然而這牌子在香港已少見，加上Joyce說找不到想要的型號，故要由美國運回來，她說：「我試過好多牌子，印出嚟嘅相質素硬係差啲o架。」由於運輸費貴，一部攝影箱成本約六萬元。上週記者以顧客身份，到其中兩間位於觀塘的即影即有攝影箱公司。記者先問他們是用哪個牌子相機，他們都不願意回答，而試用過他們的即影即有相機，拍出來的相片，紙質較為粗糙，影像的銳利度亦比較低。另外一間則以光管代替閃燈，試拍出來的相片中，人的面色偏藍。反觀，Joyce除了選用貴價相紙外，更特別緊張每張相的光暗度，在上週五摩根的酒會上，單是調校燈光已花上十分鐘，而且親自試過拍照出來的效果，才放心讓客人試。

靠履歷吸大企

開業初期，hk photobox主要做婚宴生意，但由於愈來愈多行家頂爛市，她遂開拓大公司市場，「我第一間公司客係Joyce boutique，係屋企人的朋友介紹，佢喺Joyce入面做，租我哋去佢公司個party擺檔。」雖然這單生意靠的是「幸運」，Joyce發現原來大公司生意更易做，「結婚一生人一次，新人所有嘢都要完美，相框設計、顏色總要轉幾次先滿意，但公司客就通常自己設計好再俾我哋，話一就一，簡單啲，而且只要質素好，俾多少少錢都無問題。」吸公司客的第一步，是免費跟八至十間慈善團體合作，打響名堂並豐富履歷，包括奧比斯、母親的抉擇、救狗之家等，「哈哈，做善事之餘又當宣傳囉。香港好細，一間公司活動通常有好多唔同公司嘅員工喺度，佢哋玩過一次覺得好玩，下次自己公司有party都搵我哋。」Joyce曾合作過的公司，她都會如數家珍般寫在網站上面，也會邀請曾幫襯的大公司負責人寫推薦書（testimonials），直接登在網站上，方便其他有興趣的大企業公關查閱其履歷。開業三年，大企業如Tiffany & Co.、Lane Crawford、Ralph Lauren、Adidas、YSL等曾幫襯。去年八月，Swarovski於希慎廣場的新店開張，亦租來攝影箱在開張派對上，讓客人影相留念，負責策劃活動的公關助理Janice說：「當時搵hk photobox係因為其他生意伙伴介紹，咁我哋都做過research，見到好多大品牌用過佢哋，好似專業啲、有信心啲！」其後，Swarovski與美容雜誌《Cosmopolitan》舉行頒獎典禮，以及在秋冬季產品發布會上，都再找來hk photobox，「用過一次覺得好就會繼續用，唔會花時間搵第二間，又唔知其他好唔好呢。」Janice說。事實上，以同類生意相比，hk photobox收費其實偏貴，市面上其他同類型店，便宜至每兩小時六千元都有，但原來對公司客來說，價錢其實次要，反而質素才算首要。「我有特別睇過佢output，印出嚟顏色係亮澤啲、畫面清晰啲。格價？無喎，質素先係first priority。」Janice說。

諗埋客人個份

Joyce指湊公司最重要是不要令他們覺得麻煩，「客人唔滿意，好多時係因為現實同想像有距離，所以控制expectation（預期）好重要，我會白紙黑字寫好晒提供邊五項服務，好似運輸、set up等等，咁我做好晒呢五項，佢哋覺得OK啦，我再額外做埋第六項，好似幫佢哋搵特別嘅道具，佢哋就會好開心。」製作公司on stage過去一年，租用hk photobox超過十次，項目統籌主任Aska就大讚hk photobox的服務質素好，「之前新年party，我想搵啲新年主題的道具，佢全部搵俾我，連部機嘅外殼、相框都跟足晒新年主題設計，嚟緊要搞個hero主題嘅party，佢哋又會幫我搵道具、設計好，咁我唔使煩！」Joyce是正宗ABC（American-born Chinese），在美國生活二十多年，說得一口流利英語的她，也會說唔鹹唔淡的廣東話，很多時與不少大公司的公關或人事部阿頭同聲同氣。她聘用的員工亦多是她的親戚朋友，一樣說流利英語。記者所見，在摩根酒會上，其員工甚懂搞氣氛，與一班老外高層打成一片。五年前Joyce嫁來香港後，本來幫老公做貿易生意，直至三年前，去過朋友婚宴，等入席時除了打麻將便沒事可幹，想起可引入美國流行的photo booth，才自己成立hk photobox，現時，公司客已佔生意額六成，高峰期試過一個月接三十四張單，故Joyce已由一部機增至七部機。生意在香港算是站得住腳，Joyce在半年前便開始在上海開設辦公室及置有五部攝影箱，「揀上海係因為嗰邊比較國際化，好多外國名牌喺嗰邊都有分店。我有朋友喺嗰邊工作，可以幫我搞。」Joyce指，上海業務現時在試業階段，但已接了四、五單生意，「有Lane Crawford、Joyce Boutique，多數都係香港試過，到佢哋喺上海、北京有活動，就問我哋做唔做。」

開業成本

（11/2010）租金$20,000入貨$20,000裝置$65,000雜項$10,000總投資$115,000

營業資料

（12/2012）營業額$150,000租金$20,000入貨$15,000人工$30,000*水電$5,000盈利$80,000*三個員工，不包老闆薪金

上個月，YouTube、facebook及各大飲食論壇均熱傳一條短片，片中廚師將一大碗熱辣辣芝士淋在一份熱狗上，金黃色的芝士與鮮紅色的番茄醬混合時發出「吱吱」聲，令人「食指大動」，這條短短九秒的短片，令到紅磡的小食店「Iconic H」大排長龍。情侶檔老闆、三十二歲的尹佩琪（Karena）及三十三歲的張君行（Brian），亦大感意外。兩人開店時本以香腸做主打，但短片熱爆後，熱狗變成主要收入來源。現時日賣三百份，上月已賺八萬元，今個月生意額更有望升多一倍！不過熱狗簡單易煮，熱狗潮未必興得耐，Brian亦坦言：「應付唔到。我哋婚禮都要推遲，又驚之後生意不保。」記者找來有兩家小店的串皇老闆Wingo，他傳授長做小食檔的秘笈。

Iconic H去年九月在紅磡必嘉街開店，隔一個街口就是賣漢堡包非常出名的「時新快餐店」，兩店都是售賣以麵包底為主的食品，打對台得來又各有各做。Iconic H主打十八款香腸配熱狗，售價由廿五至廿八元，另外配料如熱溶芝士或黑松露雞蛋則加十元，特色醬汁另外加收三元，一款熱狗閒閒哋要賣超過四十元，與十六元一個漢堡包的價錢相比，貴一大截。熱狗走貴價路線，初期每日只售出十多份，直到上個月拍了只有九秒的短片放上網，真正時來運到，生意急升。記者上週四早上十一時到鋪頭，發現還未開鋪，已有十多人在門外排隊，但因為雞蛋還未到貨，被迫遲了半小時才營業。排頭位的客人林小姐足足等了四十五分鐘才能買到熱狗。另一個飢腸轆轆的陳同學，試食過後表示：「好值得，芝士好好食，一定會再幫襯。」門外長期有人排隊，擠得行人路水洩不通，接單接到手軟的Karena開始做唔掂，男友Brian於是辭去工作，二月份全職落鋪幫手：「上個月十九號先放條片上網，之後嘅十日生意已經倍升，做咗廿五萬生意，我估今個月應該會做到五十萬生意！」雖然生意表面風光，但背後卻隱藏危機。現時兩人除了日做十五小時外，連婚期也被迫推遲，店鋪也因受困於面積及電壓所限，未能增聘人手煮食，更重要是他們擔心熱潮過後生意不保。

危機一：煮食太慢流失客人

記者現場觀察三日，雖然很多客人貪新鮮來幫襯，不怕等足一小時「朝聖」試食，但由於排隊時間太長，不少理工大學生專程來試食後向記者吐苦水指：「等得太耐，下次未必再嚟！」有部分客人亦希望增設送外賣或打電話預訂取貨服務，減少等候時間，但Karena無奈地表示很難做到：「試過俾客人打電話落柯打先，但因為唔夠人手，根本做唔切。」事實上，Iconic H鋪頭面積太細，廚房只能企四個人，要增加人手非常困難，而且也很難添置爐具去加快煮食：「當初揀鋪頭時太快決定，結果間鋪嘅電壓唔夠高，唔可以放多個炸爐去炸腸仔。」他們曾花數千元加設一個爐，希望加快製作速度，但鋪內電壓不足，最終要以十蚊賤賣。現時只有一個炸爐與鐵板爐，效率甚低。Brian每次只能炸八條香腸，每條炸十分鐘，一小時最多只可以炸四十八條香腸，連同煎蛋及燒芝士，每份熱狗製作需時十五分鐘。現時每個鐘能賣出三十多份熱狗，生意增長已差不多飽和。記者曾提出過可預先將香腸煮熟加快出貨，但Karena認為很難做到：「一來新鮮好食啲，二來我哋有十八款香腸，個個客人口味都唔同，好難話預先煮熟邊款腸先，所以要即叫即煮。」

危機一解決方法

既然煮食爐具不可以增加，唯有從款式方面着手，我覺得十八款香腸太多，應該減少款式，如每週推出其中八款香腸，每週都轉款，除了可令客人保持新鮮感，亦可以縮短煮食過程，因為只係煮八條香腸，咁就可以預先煮熟，加快整熱狗的過程，同時可以令生意額繼續上升。

危機二：香腸成本高

鋪頭現時最熱賣的產品是芝士熱狗，但其實兩人原本是想主打出售歐式風味的香腸，二人反覆試過五十多款熱狗腸，才篩選出十八款腸，但每條香腸成本卻高達十元：「我哋搵啲腸係貴嘢，如蘋果雞肉腸、辣味羊肉腸，主要供應俾酒店用，出面好難買到，都冇人肯用咁貴嘅腸做熱狗。」而招牌菜熱溶芝士，更是Brian精心調製：「我十二歲去過新西蘭讀書，喺當地餐廳做嘢偷師學返嚟再改良，用咗三種唔同嘅美國芝士混合煮成。」香腸連同芝士及雞蛋等配料，成本高昂，毛利只得五成。於是，Karena想出增加套餐，如客人買熱狗後，再加十二元，便提供汽水及薯條：「薯條同汽水成本低，拉上補下，一個套餐毛利可以升到六成幾。」不過一份套餐售價差不多要五十元，記者現場所見，只有一半客人會選擇套餐：「一份熱狗已經好飽，再叫薯條會食唔晒！」

危機二解決方法

現時香腸向不同供應商取貨，成本效益非常低，應該集中向同一間供應商買貨，同時大量入貨，從而降低食材成本。

危機三：易被同行抄襲

Iconic H獨沽一味賣熱狗，但其實當中的香腸、麵包甚至醬汁均是由供應商入貨，只得黑松露雞蛋及芝士是自己原創，很容易被人複製，就像過去幾年的急凍乳酪及愛爾蘭瘋薯熱潮一樣，開得快執得快。由於Karena擔心芝士熱狗的熱潮會很快冷卻，於是從款式上落手，例如選擇不同肉類的香腸，「一般香腸都係用豬、牛、雞混合，但紅磡區好多人有宗教信仰，所以我特登搵咗款羊肉腸，遲啲會搵埋素腸，咁就行埋素食路線。」但這樣同時將款式多、製作時間長的問題惡化。目前除了芝士熱狗外，亦推出了黑松露雞蛋熱狗及蘑菇熱狗，她故作神秘指，下個月會推出一款新產品，保持顧客新鮮感。Brian就認為不怕被人抄襲，更笑指：「做熱狗唔使學師，最重要係開鋪要好有毅力，日做十幾個鐘，而且最難係同供應商打好關係。」兩人目前每天提早一小時落鋪準備食材，收鋪後亦要花兩小時清潔，每天由中午做至凌晨才收工。其實這盤生意相當難請人，Karena試過出月薪一萬三千元連花紅，都請不到人工作，她無奈地指出：「每日凌晨兩、三點先有得瞓，我連婚期都要押後，想花多啲時間喺菜單同搵鋪。我覺得芝士熱狗係可以長遠咁賣落去，我想開多間分店，同埋可以喺鋪頭同客人一邊食嘢一邊傾偈。」

危機三解決方法

後生仔唔願捱，可以考慮縮短工時，咁會易啲請人。另外，租金貴，冇咩空間加人工。不過，教員工熟食心得，塞錢落佢哋袋，都係留人方法。

開業資料（9/14）租金^：$96,000裝修：$200,000入貨：$8,000雜費：$3,000總投資：$307,000^兩按一上

營業資料（1/15）營業額：$250,000租金：$32,000人工#：$45,000食材：$83,000雜費：$10,000盈利：$80,000#兩名老闆、一個全職員工、兩個兼職

香港唱片業式微人所共知，明星夢「發吓就算」。當港姐冠軍都要做「魚蛋妹」，不少藝人已面對現實，密鑼緊鼓開店做老闆，用盡知名度彌補娛樂圈僅餘的收入。

○九年參加大台《超級巨聲》的劉威煌（Ryan），比賽後事業曾順風順水，與許廷鏗等藝人合組「Super 4」，出商場show「搵真銀」。但成績漸被隊友追過，許廷鏗簽約做歌星出碟，坤哥更「喊到上紅館」，Ryan卻「愈唱愈霉」，被大台投閒置散，更試過半年幾乎零收入。

他深知演藝圈「有料都未必紅」的道理，早在三年前密謀創業，先後與「巨聲幫」開密室遊戲及音樂教室，全部有錢賺。今年更決定傾盡身家，與拍檔Stephen以加盟店方式在葵涌廣場蚊型鋪開珍珠奶茶店「清玉」。

由歌手轉到平民商場賣奶茶，Ryan坦言「自己喺呢度大，搵錢最實際」，幸獲老婆全力支持，開業三個月即月賺八萬，更創日賣七百杯紀錄，他揚言：「冇人保證到我演藝事業會點，但喺呢度保證到我日日有工開！」

記者在平日下午到葵涌廣場視察，發現二時多人流十分興旺，媲美不少大型商場假期時間，附近居民及上班族紛紛走進商場覓食，到下午茶時間部分食肆仍要排隊。到了三時多中學下課時間，由於附近學校極多，大量學生湧進商場，人潮到晚上七時仍未有減少跡象。

採訪當天，見Ryan由運貨到煲茶都不假手他人，之後更到前線收銀，拍檔Stephen笑指：「鋪頭無假期，佢一有時間就會落場，非常幫得手，唔會話有嘢介意就唔做，仲試過幫手通渠。」現場所見，由於附近有知名度較高、鋪位較大的歇腳亭，生意暫時以對手領先一籌。但當Ryan負責收銀，明顯吸引途人眼望望，紛紛問：「係唔係上電視嗰個？」更有不少初中生光顧後主動要求與Ryan合照，可見明星效應有一定作用。

珍珠奶茶雖在港發展多年，早前更受到塑化劑事件影響，但Ryan稱不怕到「水尾」：「珍珠奶茶的確係有幾年停滯不前，我見呢個牌子講明純天然、唔落化學嘢，喺台灣有自己製茶工場，我覺得有佢嘅競爭力，所以我對前景都係樂觀。我一年最少到台灣兩、三次，咁啱拍檔嘅朋友就喺嗰度傾咗個代理返嚟，問我有冇興趣，我就特登去到台中視察，試過真係覺得好先至決定去馬！」中學生Miky就指，該店售價雖然比隔鄰五元一杯飲料貴，但仍覺得值得，「今次揀咗抹香珍珠奶綠，唔算太甜，都幾香茶味。」店鋪標榜用台灣茶葉即場煲煮，絕不使用廉價茶精，記者試過鐵觀音珍珠奶茶，發現茶味的確與其他連鎖店不同，甜度不算太高，但店鋪採用綠色紙杯，看不到喝了多少，而珍珠分量佔近半杯，感覺「愈啜愈有」，整杯喝掉難免有點「頂胃」。

得葵廣得天下

Ryan笑指商場平日時間人流已經算少，笑稱「依家簡直係小兒科」。他直言決定開店時已優先考慮該處，「呢度真係可以講係奇跡之地，我由細喺度大，知道呢度啲人嘅性質，一想掃街就到三樓先，所以二樓有鋪招租我哋都唔要，足足都等咗半年。」他透露店鋪租金比上一手貴兩成，但仍覺得值得，「基本上葵涌廣場一有放租就有人承接，仲記得嗰晚agent夜晚打俾我，依家有間鋪話唔做，嗰時要兩個鐘內覆要唔要，我哋諗都唔使諗即刻飛去搞手續！」他指甫開業就試過日賣七百杯，成績比兩間旺角店更佳，「唔夠一分鐘就賣到一杯，喺香港暫時得我哋做到！試過冬瓜茶一日就賣晒一星期嘅貨，成個禮拜都冇得賣，杯都可以用到無，呢度嘅人流真係好恐怖！」

加盟創業有掣肘

由於Ryan與拍檔均沒有做飲食的經驗，加盟方式的確令他們省去不少功夫，「個品牌喺台灣已經有十年，上年開始喺香港發展，有好多經驗上嘅嘢分享到。」但他認為加盟有利有弊，「規矩一定要跟，簡單至飲管、檸檬，講到明唔可以自己用第二樣代替。所以入貨數量一定要控制得好好，好似香港人偏少糖，同嗰邊講糖比例可唔可以少啲，佢就講一變台灣都要統一，好難就得一間，所以每次都要同客講多聲要唔要少甜。」由於台灣方面對品質要求甚高，甚至要考試，「裝修晒之後公司會嚟鋪頭試飲，唔pass就唔俾開，我哋都等咗成個月！」Ryan直指加盟及裝修費佔了大部分開業成本，「一次過要俾三年加盟費，同埋裝修都指定咗邊間，啲位點放都要跟佢哋，自己搵應該唔使咁貴！」

坐足半年冷板凳

兩年前Ryan離開TVB後，隨即跟新的唱片公司簽約，他直言五年間「愈唱愈霉」，「我嗰屆要出位嘅都出晒，我一開始又抗拒拍劇，依家諗番起都幾傻！最可惜就係之前上過內地歌唱比賽後，有唱片公司向我招手，但最後因為TVB條款關係唔可以簽，我知道未必係公司問題，但係嗰時真係好失望，就決定提前同公司解約。」他稱以前每個月有幾次「商場show」，有數萬元收入已十分滿足，但最辛苦莫過於「坐冷板凳」：「啲人問我近排做乜，要答人等緊嘢做，試過幾個月都係咁，我就好驚，所以就即刻決定做生意。」Ryan結婚近兩年，與太太都經歷過「坐冷板凳」的日子，他感激太太對他的支持，「見我有時喺屋企睇吓電視，做吓自己嘢又一日，佢都想我出多啲街。」對於有指「靠老婆開鋪」，他反駁指：「如果真係，我就唔使喺度賣珍珠奶茶啦。一早同老婆環遊世界，依家要靠自己嘛，我問心無愧就OK。」他稱雖早已做好心理準備，歌手賣奶茶會招來閒言閒語，但當真正落場售賣時，難免感到尷尬，「有人同我講，咪幾好囉，腳踏實地。」口吻似叫他「咪再發明星夢」，他坦言心裡感到難受，「我自己都想繼續演藝事業，但係好多嘢我都控制唔到，好彩依家都有唱片公司支持我，依家都習慣喇，最少都有人認得我先啦！」對於會否放棄演藝事業，他就斬釘截鐵地說：「一定唔會，依家叫做keep住有歌派台，雖然CD賣一隻蝕一隻，公司都打算幫我出，我兩邊都唔會咁易放棄！」

開業資料（05/2016）

租金*：$159,000裝修及器材：$600,000品牌加盟費：$245,000首月入貨：$100,000其他雜費：$51,000總投資：$1,155,000*兩個月按金，一個月上期

營業資料（08/2016）

總營業額：$280,000租金：$53,000人工*：$53,000入貨：$80,000雜費：$14,000盈利：$80,000*兩名全職及五名兼職店員，不包括兩位東主

撰文：梁延宇攝影：關永浩、鄭樹清攝錄：鄭樹清[email protected]