ZKIZ Archives


糖王謙厚太子女起身

2010-05-13  NM





大王郭鶴年位掌珠惠光坐鎮《南華 早報》六年,現今更係成間公司之唯一執行董事。不過從種種迹象睇嚟,佢可能係時候唱其離別歌矣。

乜嘢迹象?《南早》業績了無起色也。○九年 集團純利得番一億三千八百萬港元,比前年下挫兩成。與此同時更又裁減人手近一成五。此又豈為大展拳腳之象?既非發大嚟做,咁又何須太子女坐鎮呢?

再 者,早前佢哋已經由《華爾街日報》撬咗祖籍星洲之蔡祈翔嚟做老總,跟手再又有位星馬《星報》猛人進駐,人才濟濟,勞煩太子女嚟做乜?

仲有, 佢哋剛啱搵咗高盛之大中華主席胡祖六做獨立非執董。胡博士係哈佛經濟專家,做開併購等大買賣,一向同出版業無涉。搵佢入局,有乜微言大義?大家腰攬腰啦!

上 個禮拜,雪茄鄧喺佢《信報》嘅地盤議論各大傳媒老闆;咁又豈少得糖王?佢話以糖王之身家,幾多私人飛機都買得起,但佢老哥則周不時喺往返北京之班機上見到 糖王,足見佢為人謙厚云云。《南早》唔多醒神,同糖王謙厚過頭是否有關呢?考起。

郭氏兄弟百無禁忌

哨牙通為債所困,賣屋、賣 飛機、賣遊艇,早已唔係新聞。但空出嚟嘅遊艇泊位又點呢?

最新資料顯示,填補其空檔者,並非別人,正是新地郭氏兄弟隻新遊艇也。哨牙通運 滯,而新地郭氏兄弟有上主照住,填補其空檔亦百無禁忌也!

金牙大狀講嘢林主席未有料到

新科平機會主席林煥光聲大大咁話吃奶罵 娘先至叫文明,而佢嘅責任就係唔俾面大商家同政府。

呢番說話擲地有聲,但就唔等於有料到噃。煲呔表態話516唔投票,明顯係俾壓力班下屬, 叫佢哋識do,何以又唔見林主席唔俾面政府,禁制煲呔呢啲不負責任嘅言論?仲有,有高官話唔投票至係履行公民義務,此又豈非陶傑所講,剝奪候選人之被選舉 權利?林主席真係咁有種,又唔見佢做嘢?

當然較諸功能組別之設,呢啲都係濕碎料而已。喺六十名立法會議員當中,直選議員係幾十萬人選出嚟 者,但有啲功能組別代表則一兩百名選民就搞掂矣,有乜唔不公平得過呢樣嘢呢?仲有,功能組別之設,有啲選民有兩張甚至三張選票在手,足見佢哋的而且確平等 過人。林主席咁口響,做嘢啦,OK?

英文差陀累新地

新地旗下有間叫Goodfaith嘅公司。個零月前官家通知佢哋,話佢哋 用呢間公司名義買咗塊骨灰龕用地。咁大鋪頭都做呢啲生意?

骨灰龕亦係土地用途之一,新地做開地產,做埋呢一瓣亦屬平常,係咪?弊係弊在佢哋 冇買過塊咁嘅土地,亦冇打算做呢瓣生意,咁何以無端端有人送塊地上門呢?佢哋搵經手賣地之律師行,問佢哋搞邊一科?

卻原來買咗骨灰龕用地之 公司名為Good Faith,雖則都係九個字母,而串法亦如一,只不過新地之公司名稱係兩隻字放埋一齊,中間並無空位者;而骨灰龕公司則係兩個獨立單字。

搞 出單咁嘅雙胞胎,皆因土地轉名之際填表位仁兄仁姐大細草不分,亦唔知一隻字同兩隻字之分別,以致誤中副車。過渡後英文水平下降,有眼見o架!長此下去,後 果當又唔止送錯塊地俾新地咁簡單,更大單之交易分分鐘同樣搞錯。唔搞好教育,提高英文水平,又何以繁榮香港?

人民幣悶聲升值

花 旗財長蓋特納喺北京機場同財金沙皇王岐山作旋風式會面後成個馴晒,再唔似得舊時咁指控大陸操控匯率,亦冇說三道四,要人民幣升值。靜雞雞,完全冇件事咁嘅 款。中環資深觀察家咬完一輪煙斗,覺得事態發展並不尋常,絕非大家肉眼見到咁多嘢也。

江澤民主席教落,悶聲發大財。花旗佬粒聲唔出,仲唔係 蓋特納同王岐山傾掂數,俾人民幣升值乎?果如此,資深觀察家認為有義務提醒大家,獅子、揸兜及寶哥哥間鋪頭喺內地各自有過千億人民幣資產。唔好講多,只要 人民幣升值兩三個巴仙,已經係講緊多幾十億元資產矣!

果如此,買股票又豈不好過走去銀行存人仔?人民幣升水當又唔止惠及呢三間銀行而已,無 論國企、民企皆有着數也。如何揀法,傷神也。



PermaLink: https://articles.zkiz.com/?id=15585

Next Page

ZKIZ Archives @ 2019