一路一帶：香港人唔係茂利
1 :
GS(14)@2016-08-18 06:01:14七月十四「鬼節」，有兩件事觸動香港人心；遠在巴西的奧運會，「牛下女車神」李慧詩繼凱林賽撞車後，喺爭先賽八強遺憾出局，帶住傷上陣嘅李慧詩比賽後痛哭，「冇諗過會攞唔到啲咩返香港，我個心好痛」。能夠團結香港人，提高正能量同歸屬感，除咗體育我諗唔到另一樣嘢。李慧詩，你已經唔需要再用任何成績證明自己，四年前你已是香港人的驕傲，並非某人口中的「茂利」，亦唔係喺鬼節生日嘅689口中「體育無經濟貢獻」，因為體育精神能掀動人心。喺女子5,000公呎預賽就出現咗一幕動人場面，美國嘅Abbey D'Agostino同新西蘭嘅Nikki Hamblin跑到3,000公呎咗右，兩人發碰撞，雙雙倒地，D'Agostino自己先企番起身，但佢冇立即追隨大隊，而係扶起Hamblin；後者終於起番身，但D'Agostino卻因為撞傷膝頭，痛至倒地不起，Hamblin重新比賽後不斷回頭關心同鼓勵對方，D'Agostino都忍痛繼續跑，結果兩人都以包尾成績衝線，賽後相擁而泣。兩人展現嘅體育精神非同少可，賽會最終都「特事特辦」，讓兩人晉級決賽。賽場上嘅動人時刻，奧運會帶來的經濟及文化效益，並唔係每個思想狹窄、只係識得貪污收5,000萬嘅人都明白的道理。就正如同樣喺「鬼節」宣佈通車嘅「深港通」，同樣觸動香港人心，但呢個係痛心同傷心。正所謂，世間上所有相遇，都是久別重逢，舊年滬港通將香港變成提款機，市好時炒高H股，市差時就盡沽港股，香港人坐過滬港通呢架「溫州高鐵」，睇怕唔會再有人肯坐多次深港通呢架「國產飛機」。何況，中央政策朝令夕改，三個月前就開大水喉，上個月就突然收水，經濟冇起色，又要靠股市谷起全國，主張「放水」嘅克強BB，同成日扮演「權威人士」、「央行主管」，鍾意「收水」習大大互相就經濟政策角力，究竟深港通，係邊個拍板話事呢？斯郎
https://www.facebook.com/oneroadonebelt/本欄逢周四刊出
來源:
http://hk.apple.nextmedia.com/financeestate/art/20160818/19740266