廣告經綸：年又過年 廣告賣不完
1 :
GS(14)@2016-02-04 17:23:09賀年廣告接踵而來，當中變化，都不外乎三四招式：載歌載舞：上周看到尹光拍攝的保健食品賀年廣告《囉嗦媽媽×尹光》。家陣做廣告，要爆（即要有viral effect、有話題性），仲要平、要快兼有效益。這個廣告，雖有一定娛樂性，讓我由頭到尾睇完一次，但只感到爆又唔係好爆，話題性又到喉唔到肺。善存要阿媽去買保健品畀仔女，宣傳「亞健康」，有一個清晰嘅出發點，但起用尹光同唱首咁嘅賀年歌能否收效，真係有啲保留。我再三思量，如果主要受眾係阿媽到底會有幾吸引？而家啲阿媽都識韓系小鮮肉啦！假若受眾及influencer同時係啲仔女，歌詞係可能有啲笑位，但共鳴感就差啲。新年橋唔怕過時，扭開電視都係狂唱《迎春花》同《財神到》，年年如是。手法大同小異嘅賀年廣告，仲有大人細路都喜愛嘅能得利。自去年用咗李光洙同魯芬，今年再接再厲，照dup條formula，唱法演法都幾乎一模一樣。新意欠奉，但都仲係有啲百看不厭。聽聞啱啱換咗廣告公司，下次唔該諗過第二條橋啦。吉慶連場：講起賀年廣告，非九十後定必記得九十年代初嘅經典萬寶路「長城鼓舞」賀年廣告，不但走遍長城、故宮、天壇，製作何其精煉、動用演員之多、投資有幾龐大，真的今非昔比。屬於同類的小本製作就少不了TVB八萬八賀年廣告，我時常問自己，這些如分類廣告的廣告真係有效？似乎畀啲老闆自娛多過宣傳。回家團圓：一直以來，汽水品牌可口可樂、百事可樂，生活產品P&G描繪年輕遊子趁過年趕着回鄉與父母家人團聚，路途之遙，非三天兩日可以到達。時而至今，二三十年後，回鄉回家過年仲係一個好好的題材，趕火車、壞巴士、有牛有羊、攀山涉水、last minute終於趕及，團圓，齊吃齊飲，歡欣滿載。送禮祝福：由麥提莎到瑞士糖、樂家、積及、金莎、藍罐以至白蘭氏，都圍繞住夠睇面、表關懷、傳心意、送祝福。每年提提你，生怕送禮同收禮嗰個太善忘。文廸晞
mailto:
[email protected]
來源:
http://hk.apple.nextmedia.com/financeestate/art/20160204/19478409
廣告經綸：亞視永恒 執笠冇義氣
1 :
GS(14)@2016-02-11 10:09:30拜年時有朋友問我，如今亞視搞成咁，啲廣告咪轉晒去益咗無綫？非也，就算亞視唔係只剩低50日命、香港夠有多個電視台、加上無綫啲劇變得越來越膠，然而啲電視廣告，一直以來，都已經俾無綫壟斷，近呢十年，根本無留過亞視手裏。雖說甚麼越來越多人投放social media、digital廣告，電視仍是覆蓋最廣、最快的宣傳渠道。主流終歸主流，並非一時三刻可以取代。可喜還是可悲，自然心中有數。唔講你可能唔知，亞視曾在2007年改用橙紅色的小楷「a」，話說靈感來自無限符號∞及Möbius strip，希望其後電視節目創意無限。自此「ATV」改為「aTV」。「a」字既代表「Asia」亦代表A級。Logo及branding準備好邁進數碼的時代，但好可惜，管理及規劃卻未見同步。許久以前，我也去過幾次亞視主辦的年度十大廣告頒獎典禮，還記得與客戶上台攞獎時的心情。都可算係隆重其事，置飲衫、背講稿、對鏡採排以至手掌冒汗、心跳加速，轉眼又十多廿年了。那些年，雖然比起本地的HK4As廣告創作大獎（金帆獎的前身）仲差幾皮，見到咁多同業及客戶上台，借免費廣告時間替廣告公司及客戶品牌、商品宣傳一番，都算有啲睇頭同talking point。如今哪有呢支歌仔唱！
睇麗的電視劇大
小時候，以至成長中，有邊個唔係睇亞視大？由麗的（亞視前身）中途易換男主角的《天蠶變》、大受歡迎想重拍而因監製蕭笙叔去世作罷的《大內群英》、喊濕幾個枕頭的《大地恩情》、《大俠霍元甲》再追《陳真》、《秦始皇》的劉永睇到馮寶寶的《武則天》、續集及重播都完不了的《我和殭屍有個約會》、連發夢都怕俾虎頭鍘侍候的《包青天》、長壽遊戲節目帶挈做主持做到全城人氣爆燈的陳啟泰的《百萬富翁》……試問有咩風風雨雨高高低低未見過，正所謂「亞視永恒執笠嘅係你」，誓估唔到，來到今天，就如一個大劫，最終逃也逃不掉。文廸晞
mailto:
[email protected]
來源:
http://hk.apple.nextmedia.com/financeestate/art/20160211/19486600
廣告經綸：Sorry，單job我唔接！
1 :
GS(14)@2016-03-05 01:09:38最近為一班入職不到三年的同事做培訓。開始前，同佢哋熱身玩個遊戲。每組枱面各擺放了幾本雜誌，當中有時裝、育嬰、汽車、生活乜都有。只給他們兩分鐘，每人拿起是但一本選出佢認為做得最差的一個平面廣告，同時向所有人說明，到底差在哪裏。對於這班新秀，呢個task，不費吹灰之力，位位都振振有辭，七情上面，兼踩多兩腳，被抽出的廣告通通變得一文不值。例如：呢個賀年朱古力跨頁廣告，肯定全世界都唔會有人睇得明；呢個三間波鞋封面好明顯太趕仲未做完；咁嘅角度影架新車、凸顯唔到最特別嘅線條同個鬼面罩、個男model個樣又唔知想點、顏色又娘，仲賣成卅幾萬，搵人買都難；呢個奶粉廣告張BB相想點？又out of focus，死得啦……勢估唔到，我下一個問題，係要佢哋想像：「下一分鐘，你就要出門口，拿着呢隻廣告草稿，去sell畀你最重要嘅客戶，你會點？」全場頓時鴉雀無聲，然後互望。惟有硬住頭皮，有一個同事話：「之前嘅嘢，當粉筆字抹咗佢！」隨即口若懸河，差唔多連樹上面嘅雀仔都氹落嚟。又或用一招引蛇出洞，在先前講過嘅部份，加上一些新觀點合併去再賣一次。仲有個Art Director即時手起「筆」落，才半分鐘，喺隻草稿上面加咗幾筆，即時將醜小鴨變天鵝，簡直化腐朽為神奇。總之就各出奇謀，手舞足蹈，三寸不爛之舌，使出渾身解數。呢個遊戲，其實都有些啟發。有時踩人，唔使咁盡，可以留一線。又或者，如果對自己做事有信心，大可以理直氣壯咁同我講，咁劣質嘅廣告根本唔會係我哋公司、或經我手可以出到嚟，冇可能會發生。仲有，有冇諗過可以打個電話畀客戶，更改會議。不見得人，就不要硬來。做人同做sales、做廣告，都有條底線，就算你係金牙大狀，明知你要幫一個真係殺咗人嘅殺人犯脫罪，雖有能力，但你有得揀，接唔接呢單job。有些廣告，明知騙人，過唔到自己、過唔到人，係咪都照賣？文廸晞
mailto:
[email protected]
來源:
http://hk.apple.nextmedia.com/financeestate/art/20160303/19514011
廣告經綸：美麗點只自信咁簡單？
1 :
GS(14)@2016-03-11 00:49:48好多人對Unilever（聯合利華）旗下的個人護理品牌Dove由2004年一直推廣至今的Real Beauty廣告系列都讚不絕口。Real Beauty的廣告不斷進化，捉緊大部份女性永遠都覺得自己不夠完美這一個心態，由推崇「真正的美」、「最真的美因你而生」去到「你比你想像的還美麗」。2013年Dove的廣告簡直就係一個成功的心理實驗。找來一位專業肖像畫家，替多位女性分別畫下由自己口中描述的自己（畫家由始至終都看不到她們的長相）以及經朋友口中所描述她們的樣貌，比較之下，他人口中形容的都要比自己眼中的自己美麗得多。「美」、「醜」、「不夠美」都來自衡量的眼光，同樣一張臉，用人哋把尺同自己把尺去度都會唔同。時代、年紀、心態、感受、情緒、關係唔同，度上去都會唔同。犀利的地方，呢個咁有feel嘅idea，其實早在此廣告推出前聯合利華的一個市場策劃會議中恰好用上作為一個熱身遊戲，當其時大家都覺得太正，最後就將其實行。廣告行銷，賣靚、賣style、賣潮流。再準確啲，係賣乜嘢叫靚同style兼何謂潮流。賣的是標準，嘗試影響顧客心中嗰把尺。從事廣告嘅男男女女，大部份都貪靚。唔知點解，就好似做娛樂圈咁，啲人雖然一方面捱更抵夜、通晒頂；另一方面又日蒲夜蒲、去到盡，但望落去，總好似係潮啲、省鏡啲、越做就越型、越睇就越後生。你一定會問，邊有咁神奇㗎？吳婉芳就話養尊處優箒。答案可能係，佢哋懂得裝扮、化妝、肯使錢落facial、護膚，好似有位曾選過港姐後來入行的同事，不論佢幾點收工，第二朝都係化全妝、靚爆鏡，佢個位仲有個小雪櫃，裏面長期放嘅除咗燕窩就係面膜。此外，更重要嘅係心態。做得呢行，由20到50歲，一律大細路、長不大，一件無聊小事可以笑餐飽，一個海嘯巨浪可以話之佢，一直keep住貪玩、貪飲、貪靚、貪新鮮，除了自信，呢啲好可能都係美麗的秘訣。文廸晞
mailto:
[email protected]
來源:
http://hk.apple.nextmedia.com/financeestate/art/20160310/19523248
廣告經綸：就同嚴冬鬥長命
1 :
GS(14)@2016-03-31 13:49:35嚴冬寒風何日去？暖春煦陽幾時來？點解突然咁傷春悲秋？距離立夏只有差不多一個月，真係好想問吓，到底今年凍夠未？經濟嚴冬又何時終結？喺而家咁嘅時勢，要突圍，做啲一般品牌諗唔到、非常規性嘅嘢，才有運行。好似遠在1975年百事可樂推出的Pepsi Challenge，造就了一個劃時代嘅廣告戰。簡簡單單邀請受試者在沒有品牌標誌嘅兩杯可樂（一杯係百事可樂，另一杯當然係可口可樂啦），單憑口感味測去分辨及選出你較喜歡的一杯可樂。最後，調查結果顯示，揀百事可樂較好飲的比可口可樂優勝一大截。百事可樂盡收廣告效益嘅同時，對於可口可樂的廣告公司，更說明品牌效應的舉足輕重。沒有品牌，其價值立即備受打擊。這個局面，對於廣告公司，有價有市，冇得輸。兩年多前，在新加坡上演咗一場SingTel's Hawker Heroes Challenge（新電信的米芝蓮三星名廚鬥「小販檔」大廚挑戰賽），比起幾廿年前可樂的那個，這個變奏式challenge來得更有時代感及社會相關性。國際名廚Gordon Ramsay與三家本地「小販檔」大廚比拼三道新加坡熱門菜式：海南雞飯、胡椒蟹、叻沙。千人排長龍試食，SMS投票，社交網絡狂like兼瘋傳。結果Gordon Ramsay只贏在胡椒蟹而「小販檔」大廚則贏了另外兩味菜。然而，最終贏家，梗係SingTel，贏番近年一直插水嘅顧客好感，不但帶來了國際名廚製造一時佳話，真正成功的藉着O2O平台大大聲宣傳其企業精神：通過一些難得的經驗為新加坡人帶來樂趣，也重拾其與新加坡人之間日漸褪色的感情。今日，與其不停做減價促銷去跑數、達標（這個當然也重要，不然你下個月可能會冇咗份工……），搵一些出奇制勝嘅方法衝破困局、扭轉乾坤可能更為重要。挑戰常規，就有如Ice Bucket Challenge（冰桶挑戰）、老麥同Burger King嘅McWopper挑戰。要打一場漂亮的持久戰，唔好再坐定定，要跟從大市走。唔係嚴冬未過，你已凍死了！文廸晞
mailto:
[email protected]
來源:
http://hk.apple.nextmedia.com/financeestate/art/20160331/19551556
廣告經綸：人生如壽司
1 :
GS(14)@2016-05-08 01:53:13元氣壽司最近首次使用「代言熊雄一」賣廣告。以迴轉壽司輸送帶，估不到下一碟將於眼前出現的壽司比喻人生多變及難以預測，充滿驚與喜。除了壽司師傅，誰可預測到底跟着下來的是三文魚、甜蝦、抑或是盛夏燑鰺？在如今多變難以捉摸的香港市場，的確有所感照。對於一個人人熟悉但漸漸感情淡卻、失去新鮮感的迴轉壽司品牌，落力地再次引起共鳴，增加喜愛度。迴轉壽司的經營秘技，真的可能不說不知。很多迴轉壽司店，都會在碟底放置了IC晶片，客人甚麼時候拿了甚麼壽司，以至客人想吃的保證不會斷貨又或做得太多某款壽司而大量囤積，師傅都盡在掌握。更厲害的是以大數據形式更清楚了解客人的習性，就例如大部份人進店後都會偏愛先吃鮪魚握壽司，而又會於頭十分鐘吃掉起碼一半的餐量等等。吃壽司的人除了會按照慣常吃甚麼種類外，有時更愛驚喜，偶爾奉上一款平時未必會點而又賣相好得的壽司，在你剛剛七、八成飽的時候出現，很多時都會抵擋不住那種「送到你面前」有何不吃的理由？一碟突如其來的壽司款式，就如玩扭蛋機，在未曾聽到扭蛋清脆掉下的聲音之前，你總是抱着一種奇妙的心情去等候那個小小的驚喜從頭頂掉下來。人生就像一盒朱古力，你永遠也不會知道你將拿到甚麼。這句說話，在電影《阿甘正傳》裏聽過。一大盒朱古力，內裏一定會有自己喜歡和不喜歡的，然而未曾品嚐就根本不會知道自己是否喜歡。人生也一樣，會經歷許多快樂與不快樂的事，日子天天的過，何不努力過好每一天，回憶更豐盛。假若人生好像吃迴轉壽司那樣，你只要坐着，自然有人安排了下一碟壽司的出現，喜歡就拿，不喜歡就讓它溜走。心裏一想起劍魚腩，它就真的在你眼前出現，你說多麼美好！文廸晞
mailto:
[email protected]
來源:
http://hk.apple.nextmedia.com/financeestate/art/20160505/19598435
廣告經綸：情深咖啡有誰沖
1 :
GS(14)@2016-05-21 13:38:15Nescafé極品白咖啡在《100毛》的廣告歌《情深咖啡未曾飲》達到超高收視及在fb洗晒版是毋庸置疑的一個事實。今日我想簡單分析一下《100毛》的廣告製作及此廣告對雀巢咖啡的市場效應。先談《100毛》，利用fb平台直接由消費者（其實是一般市民你我他與她）互相傳播，跳過了一般通過在《100毛》或廣告商的官方網頁或campaign site，確是一個先河。成功關鍵在於廣告片的viral effect（病毒式影響），而viral effect主要來自題材的話題性，有幾爆，有甚麼明星，做啲乜，一切時間、內容、人物、地點合於一身，都會影響viral effect的强度。今次用黎明，這個時間，不理賣甚麼、有沒有劉江、歌詞唱乜都會跑出。敏銳的創作眼光、果斷的決定都是成功因素。然而，你有沒有察覺最近《100毛》的幾個廣告，包括今次黎明及上次《萬千呃Like賀台慶》實惠的林雪，都將以往較軟性的植入式廣告變成更赤裸的「賣廣告」？上次除了唱廣告歌，更不停教人讀實惠英文名（Pricerite）及介紹各款傢俬；今次就唱同show咗幾十次產品名，全因有黎明，所以沒有人會太留意或challenge廣告hard sell。我不相信這是廣告公司或《100毛》的主意，好明顯，是廣告商要去盡些，唔好怕醜。如此一來，大概與《100毛》原來的廣告製作方向出現了落差，長遠來說，除了唱歌仔的方式要求變外，太過硬銷的賣法會帶來反感，減低viral effect及廣告效應。再講雀巢即沖咖啡。由幾廿年前，玻璃瓶裝咖啡粉配合咖啡伴侶一羹羹沖來飲，去到市場都講求方便，推出各式各樣的3合1包裝，亦流行ready-to-drink的罐裝。此外，雀巢自己都有推出利用密封鋁質咖啡粉囊包裝連咖啡機，包括高檔的Nespresso及中檔的Nescafé Dolce Gusto。走在不斷進化的咖啡文化洪流，Nescafé對外要抵抗咖啡連鎖店的「飲咖啡除了方便、好飲、提神，更為白領上班族塑造全新有型生態」；對內則消耗自己多年主打的即沖即溶咖啡產品。這個全新即沖白咖啡，到底能帶來多少佔有率，我怕並非黎明或廣告可以輕易幫到，對於消費者生態與行為上的改變，有時是很難走回頭路呢。文廸晞
mailto:
[email protected]
來源:
http://hk.apple.nextmedia.com/financeestate/art/20160519/19618088
廣告經綸：2016怪談之見工
1 :
GS(14)@2016-06-06 03:00:00剛踏入6月，又是另一年廣告公司招聘暑期工的季節。仍記得以前都寫過前來見工的畢業生或實習生的一些難以想像的趣事、如何估佢唔到的奇聞。去年有位以為自己懂讀心術的小鮮肉，今年才剛開始面試兩星期就碰上一些「極品」，也就跟大家分享分享吧。有位美國名牌大學讀工管的三年級男同學來應徵，樣子一看便知道是ABC，坐下來面試的第一件事、說的第一句話，你知道是甚麼？我相信就讓你估十次、廿次你也無可能估到。他在自我介紹之前很casual地說：「我仲有個friend喺外面reception，佢陪我來，你一陣可唔可以見埋佢？」除了360度反眼，險些從椅子直掉地上，還可以怎樣？心想：到底是你來應徵還是你個friend呢？話晒都看過你張CV用心揀過下才叫你上來interview。竟然把interview視作可以如此即興，就像去海洋公園般享受「二人同行，一人免費入場」？今日是你生日嗎？實在厲害！
另一位美少女，答問環節因無甚麼可取故此省略該部份。她的特色在於接近尾聲時反開出的一連串條件，比有些私人貸款的T&C更長、更不合理（通常都是出晒面保障甲方，這裏即是前來見工的這位美少女啦！）她提醒我：「我7月4號可以返工，但7月中要陪媽咪去歐洲旅行個半星期，因為已plan晒買咗機票book埋酒店，所以改唔到。8月最尾個星期要提早回學校出席有關秋季交流團的會議，所以呢，last day最遲係8月19號，仲有……」咪住先！由7月初起計，所有上班日子加起來都唔夠30日，返來做乜？我想問問，這份工，到底是你請我，還是我請你呢？又有一次，來見工的大學實習生，在面試途中，不斷buffering，就如wifi網絡突然唔夠快，我問她為何想入廣告公司？她說：「因為廣告……成日……有新鮮……」臉色由蒼白，如卡通片般，三秒間變成火紅。生怕她暈倒在會議室，只好安慰她，斟了杯水給她。到最後送她離開時仲話：「下次有機會再傾過。」其實我想講：不如你換咗間網路供應商啦，以後咪唔會再講下又停下囉！文廸晞
mailto:
[email protected]
來源:
http://hk.apple.nextmedia.com/financeestate/art/20160602/19637548
廣告經綸：打份好玩的工
1 :
GS(14)@2016-07-09 06:33:08廣告公司講求創意，做創意的人講求樂趣。樂趣這回事，不要看輕，要為工作間帶來real fun，尤其90後，要求殊不簡單。一定要來得random，不需太有計劃，即有時「估你唔到咁都得」就最殺，既不能墨守成規、也不能人做乜你做乜。例如以前寫過，有些廣告公司可以養貓帶狗帶寵物返工，與至愛「囝囝囡囡」齊開工、同OT。狗狗習慣了工作環境，可以自由走動，一時與其他狗狗玩吓，一時又可伴在主人腳邊，試過開咗成個鐘頭會，不是聽到狗狗打了個噴嚏，真的不知道多了位成員在會議室參加creative review。最近與同事一起想想又有甚麼新搞作，當中有些員工提了有趣的建議。他們最想要的，再不是免費早餐，而是公司可以無限量供應零食。你知道零食有多重要嗎？工作忙要打氣、悶要充實、睏要提神、OT更要自我慰藉。有間公司直情成立了零食committee，專責管理入甚麼貨，如何帶來一些新口味、新意思，又需注意供應要充足，絕對不能有缺貨的情況。嘩！這比起做7仔經理更加傷腦筋、負擔更重。以前只要一個wine corner放滿一支支紅、白酒、威士忌，每天定能吸引好多員工在那裏brainstorm、吹水加聯誼。今時今日，鬼佬的數目於廣告界變得越來越少、90後不是不飲酒，而是要飲酒也未必想在公司跟一班「老餅」吹水（其實普遍35歲以上、在廣告公司的平均年齡線來說已經可以被視為「老餅」）。除了PS4、街機、桌球、足球機那些預期中的「普通料」之外，他們更想要樂器及band房。其實也不無道理，廣告公司哪能沒有音樂的熱情？的確，好像每間廣告公司都一定找到些打得一手好鼓、結他彈得出神入化、唱歌可以勝過「巨星」的未來小天后小天皇。要令90後鍾意一份工，就先要令他們從中找到工作的樂趣。Motivation並非再由上司或老闆去推，而係由員工自己發掘。他們不會甘心因為你是老闆，所以就乖乖地遵從指示工作，他們要自己覺得堅好玩有趣，才開心幫你做事情。這個道理，我也不斷更新和學習。文廸晞
mailto:
[email protected]
來源:
http://hk.apple.nextmedia.com/financeestate/art/20160707/19684058
廣告經綸：孩子，不要長大！
1 :
GS(14)@2016-07-14 08:07:02做父母的，見到孩子長高、長大、長聰明，應該感到很開心和安慰。但很矛盾，又時常抱着「真係唔捨得他們大得咁快」的心態。很多廣告，都用上了這個爸爸媽媽的洞察。尤其在一些defining moment及重要的milestone，如讀書畢業、兒子第一場校際籃球賽、女兒出嫁之類，特別見到孩子的成長蛻變、踏入人生的另一階段，感動之餘又很不想他們長大得那麼快。孩子，總是年紀小的時候可愛些、窩心些。最近認識了一位攝影師。他以前在廣告公司工作了廿年，大概因為看膩了太商業化的廣告，創意好多時都並非基於最純粹的意念或反映最真實的人性，於是他後來轉行去了做攝影師。他拍攝的並不是商業產品或靚靚模特兒，而是人物，最多的是結婚當天的拍攝工作。但他一直拒絕拍攝那些擺出恩愛姿勢、有型到冇朋友的對望等結婚照片。他堅持要拍攝一些最真實的moment，就如photo journalist（攝影記者）。他認為只有婚禮才會有這麼多的親朋戚友共聚一堂，人生之中，大概除了葬禮，就只有這一天。所以，更應該投入感受每一個動人的moment。我問他在他拍攝過那些婚禮當中，有沒有特別感人的照片。他跟我分享了以下的一個故事。有個爸爸，他的女兒要出嫁了。這邊廂女兒在酒店房間忙着化妝set頭，那邊廂他獨自在房間一角用酒店的小筆記本埋頭認真的寫着密密麻麻一行又一行的東西，攝影師偷偷的拍了一張那筆記本的照片。他給我看時，我怎也看不懂那些一串串如豬腸般的英文是些甚麼。爸爸就一直苦着臉、毫無笑容的低頭寫完又寫那些如醫生開藥的文字。直到婚禮結束後幾天，女兒到影樓揀相，當她看到這張筆記本的照片，她哭了。原來她爸爸患了柏金遜症，他寫的是他的名字，他苦苦的練習簽名，只希望在見證當刻為女兒在婚書上簽一個好看的名字。女兒長大成人要出嫁了，當然既開心又不捨，從小到大，爸爸為女兒做的每一件事情，無論大事或小事，都一貫認真、全心全意。世上沒有不會長大的孩子，只不過在父母心中，他們永遠都是一個長不大的孩子。文廸晞
mailto:
[email protected]
來源:
http://hk.apple.nextmedia.com/financeestate/art/20160714/19693445
Next Page