2011-4-28 AD
噚日，「一群中環金融從業員」喺香港4份主要報章，落咗一個題為「唔該大家公道啲！」嘅廣告。洋洋千幾字講述呢兩年嚟，佢哋返工嗰陣，飽受雷曼苦主各式各樣示威造成嘅滋擾，情況有啲失控，甚至侵犯他人自由，喺忍無可忍下，決定不再沉默。
「一群中環金融從業員」份量非輕
廣告批評雷曼苦主嘅抗議模式，喺中上環好似癌細胞咁擴散，越嚟越激，除咗喺中環各大銀行、主要街道張貼有人身攻擊嘅旗海同橫額，又披麻戴孝將認為要為事件負責嘅人張相，整成靈堂相，搞到國際金融中心變成殯儀館集中地。
咁， 呢則廣告究竟係邊個落嘅呢？華華八到，係由公關公司宙輝落嘅，至於宙輝老闆，就係城中名嘴之一「香帥」香樹輝。華華第一時間問香帥做乜咁激？到底邊一幫人 咁有米，請佢哋登廣告，用錢筆伐雷曼苦主？香帥死都唔肯透露半點口風，仲話自己作為專業公關，唔可以爆客仔私隱，否則，點可以細水長流撈咗廿幾年。
至於邊個請得郁香帥出手？華華八到，「一群中環金融從業員」應該係一個重份量嘅人，至於邊個咁睇班苦主唔順眼？你話呢！
李華華
一年一度書展，財圈中人呂志華今屆亦出書應市。佢同華華講，連埋今次，唔經唔覺原來寫咗超過20本書。由過往寫富豪列傳，到家陣教人睇技術分析、認識投資工具都有。至於今次本大作──《香港無得救》，題材諷刺時弊。佢以早年窩輪造市案判刑為例，認為當局只顧保障投資者，但判例反映未能保障市民投資自由。 留意電子書市場商機 佢話o依家搞出版比以前難，如果搵唔到贊助，根本同「蝕本」僅一步之遙。佢期望今次書展，可以殺出重圍。就算搞出版隨時無啖好食，佢仍然密切留意電子書市場同財經工具書行情，睇吓有冇商機。
2011-7-25 AD