嘉玲之之美人飯局街頭傾唔停
1 :
GS(14)@2015-05-26 08:43:45【意猶未盡】■劉嘉玲同關之琳飯局，離開時仲同大班朋友喺大廈門外傾偈。
【中環→灣仔】關之琳舊年8月為鍾鎮濤（阿B）同范姜喺峇里嘅婚禮擔任證婚人，但大前日佢因為要去歐洲出席雙年展，所以冇出席二人喺香港補擺嘅婚宴。不過，原來之之日前已經返抵香港，前晚更相約老友劉嘉玲喺中環荷李活中心食晚飯，同行仲有近十位男、女朋友，相當熱鬧。
嘉玲拉隊去灣仔
嘉玲大前晚孖老公梁朝偉出席阿B同范姜嘅婚宴，前晚就選擇撇甩偉仔，同之之一齊出席飯局。當晚約10點半左右，分別以牛仔look打扮嘅之之同嘉玲，與大班朋友由中環荷李活中心行出嚟嗰時，見到二人臉上均泛紅，明顯係飲咗酒，而大班人行出大廈之後，似乎喺飯局入面仲未傾夠，佢哋分成兩堆企喺大廈門外繼續傾偈。由於入夜後街上比較寧靜，各人暢談期間傳出嘅笑聲亦頗引人注目，傾咗十多分鐘之後，眼利嘅嘉玲終於發現有記者拍照，佢就即時提醒朋友：「小心啊！有記者！轉頭見啦！」經嘉玲提醒後，各人隨即四散上車，而嘉玲及之之則分別坐上兩架七人車離開，原來佢哋食完飯轉場，與友人相約喺灣仔香港萬麗海景酒店會合，繼續狂歡。而嘉玲同之之當晚心情亦相當好，落車時見到記者亦全程笑笑口。採訪、攝影：畢紹基、潘冠恩、徐錦池
【眼利醒目】■眼利嘅劉嘉玲前晚飯後，喺大廈門外發現有記者拍照，即通知友人離開。
【笑容滿臉】■關之琳得悉有記者即嗱嗱臨上車，但就全程保持笑容，心情不俗。
【轉場灣仔】■晚飯後，臉紅紅嘅劉嘉玲同關之琳及其他友人轉場到灣仔酒店再飲。
來源:
http://hk.apple.nextmedia.com/entertainment/art/20150525/19159143
偉仔懶理嘉玲之之不和
1 :
GS(14)@2016-12-06 03:56:09■梁朝偉昨日出席電影《擺渡人》宣傳，全程笑臉迎人。
梁朝偉、陳奕迅（Eason）和張榕容，昨日在紅磡碼頭出席電影《擺渡人》宣傳，該片將於本月23日上映，電影公司安排他們為一艘帆船命名「擺渡人號」，三人在船上調酒時，偉仔喝了一啖即面容扭曲，十分惹笑。
偉仔表示要返上海為電影《歐洲攻略》開工，本周四未能陪老婆劉嘉玲過51歲生日，對於嘉玲跟關之琳不和，偉仔淡定說：「而家冇乜嘢可以嚇到我。」嘉玲是否仍不開心？偉仔說：「我唔知喎，呢啲我都冇乜好講，佢亦冇同我講。」有指之之有意復出拍戲，偉仔指拍戲遇上對手講緣份。Eason被問到老婆徐濠縈是否仍為何超儀一事不快？他說：「好耐啦，都唔使講啲乜嘢，我都冇乜嘢可以講。」Eason又大讚偉仔唱歌好聽。採訪：張俊銘攝影：仇志德
■（左起）Eason、張榕容及偉仔示範調酒，偉仔喝後即面容扭曲。
■偉仔、張榕容及Eason昨登上帆船宣傳，吸引大批巿民圍觀。
來源:
http://hk.apple.nextmedia.com/entertainment/art/20161205/19855359