9年拍劇逾30套「牙佬」袁偉豪一劇翻生
1 :
GS(14)@2016-09-28 05:04:26曾經風光一時嘅大台，捧過唔少小生花旦，好多男女藝人都借呢個機會有跳板，返大陸搵銀。未儲夠知名度嘅，留低都唔係冇發圍，好似「牙佬」袁偉豪咁，就趁住空檔成功上位喇。查實袁偉豪07年參加第三屆港男入大台，當選港男冠軍對佢事業係有啲幫助嘅，08年就拍住當紅嘅鄭嘉穎、馬國明演出第一套劇《法證先鋒II》，但只係其中一個章節嘅閒角，之後幾年都冇乜點發圍，演咗大約20部戲都冇留到印象俾人。好彩嘅係，12年袁偉豪喺《ON Call36小時》做醫生Benjamin、同黃智雯演男女朋友，一年後又大台添食開拍第二輯，係佢入行以嚟第一個有得添食嘅角色。之後佢事業先叫上到軌道，今年就嚟個大爆發，喺《鐵馬戰車》、《EU超時任務》同《城寨英雄》入面都有出色表演，贏到觀眾歡心。講到《城寨英雄》就威水囉，袁偉豪喺入面做男主角「牙佬」，喺城寨入面打打殺殺，拳拳到肉，睇得打得，又真係抵你上位嘅。
來源:
http://hk.apple.nextmedia.com/entertainment/art/20160928/19783892