二五中環 萬南 輝立出新招 IPO易博大霧
1 :
GS(14)@2016-11-28 00:07:48http://www.metrodaily.hk/metro_c ... %e6%98%8e%e6%b4%9e/
有留意新股(IPO)嘅散戶，都會發覺每逢新股上市前一日都有暗盤交易，呢個平台並非港交所(388)搞，而係新加坡資金嘅輝立證券搞，近年雖然土炮耀才證券(1428)都有樣學樣，砌咗個暗盤平台，不過論規模及認受性始終不及輝立，所以好多時見頂頭槌飛都來自輝立。
抽新股呢瓣生意，據萬南了解，大行睇唔上眼，細證券行亦冇乜肉食，因為借畀客人做孖展嘅錢，其實係向銀行拆番嚟，叫做人有我有，好向客人交代。不過，喺輝立做嘅高層老友爆料，由於公司長期水浸(金鐘總部寫字樓更係自置物業)，所以有閒錢借畀客人抽新股，叫做山大斬埋有柴，亦成功幫公司響朵。
新股通常有4日認購時間，券商通常第3日中午就截飛，但輝立一直將死線定喺遲過其他行家兩粒鐘，所以好多時大戶都係趁呢段「空窗期」落飛，令到散戶跟唔切。近日佢哋再推新招，再將死線延後至公開截止日嘅早上，如果抽廿萬銀，倉內有貨底更免按金免息，只收一嚿水手續費，啱晒包括我在內嘅「博大霧一族」。