ZKIZ Archives


鷹美國際(2368) 文仔

http://hk.myblog.yahoo.com/siuman1986/article?mid=2

今日下晝最後都做唔切個分析,留返夜晚做。基於近日訓得麻麻地的關係,做功課都hea 過人,山埃無限量供應。

言歸正傳,今次要分析的是鷹美國際(2368),初步留意此股原因如下:

1. 公司現金充裕,零負債,財務穩健

2. 近五年派息慷慨 (派息比率超過60%,現價計五年平均息率超過6厘)

3. 品牌情意結 (Nike),其餘的亦是高質素牌子(Converse、The North Face等)

4. 公司於6月23日出業績

根據研究習得,價值投資源於兩大方面:1. 公司資產 2.公司盈利能力。所以分析亦應由此二地而入手。老師尊的PE x PB<22.5大法,大柢就是由此而創。(ps*詳見精工兄文章)

鷹美現時 PE 7.2倍,PB 1.205倍,PE x PB = 8.676,同老師尊的22.5相較,真係低到無朋友,抵到爛。

就收息而言,基於公司零負債,坐擁現金3.28億,以去年派息每股0.2計,唔賺錢都夠派3年,所以6月的全年業績應該會維持派息,以現價計全年息率達9厘以上(但個人認為派息應該會減少,可能末期息維持派7仙,全年派0.19),息率回報非常吸引。

至於業務方面,固定資產上升,表示公司正在擴張,於未來或會增強盈利能力。流動資產及流動負債均上升,公司應該比去年做多左生意。但應收帳升 35.6%,應付帳升9.7%,存貨升6.5%,應該留意應收帳大幅上升的問題。以往見各前輩所說,應收帳和存貨上升,對於滯銷/生意難做有所相關(客仔 唔想找數住,又無條件迫佢),呢方面應該要小心。

用流動資產同流動負債講左咁多廢話,但無講過營業額,其實係咪好本末倒置?補返隻鑊先。營業額較去年同期下降,其實咪即係做少左生意囉,頭先分析咁 大輪都好似走錯晒方向。不過我又會諗,咁係咪意味住下半年將應收帳收返返黎就會令盈利上升呢?如果咁睇,其實下半年可能會好返少少。

不過買野唔打折又點對得住自己,提高安全邊際,寧枉莫縱幾時都有著數。當公司下半年營業額持平,預計佢今年全年業績倒退13%,盈利1.3 億,EPS0.26,用8倍巿盈率計,每股值2.08。以資產淨值1.792計,PB1.2倍,每股值2.15。平均估值2.12,與現價差不多。(咁樣 估值會唔會hardish左少少?)

其實,從中期業績管理層的展望,都不太令人有意外收穫的期望:

「現時集團擁有326,700,000港元現金,並無任何借貸,然而集團需就上述數項投資投放龐大資金,投資初期回報率難免偏低,對集團未來幾年之現金流及盈利無可避免帶來一定的壓力及影響。」

由此可見,這一兩年鷹美的業績應該不會令人感到振奮。幸而下文所說:

「然而,集團深信現時的投資能為集團再創高峰提供充分條件,將來必定能為股東帶來豐盛的回報,於發展期間,管理層會盡力把負面影響減到最低,並按當期利潤提供合理的回報予支持鷹美的投資者。」

這樣看來,捱過了黑夜就會是Leon,相信未來此股或會成為10厘股。

上述的投資項目,是於江西和印尼設廠,據說產能可提升超過一倍云云,但未說何時竣工。近日,公司又公佈了投資費用提升了1.35億,真係未見官先打左30。

分析完一大輪不知所言,礙於其盈利增長有限,鷹美現價唔見得抵,但從其質素及潛力所言,2.1 的現值於長線投資來說理應不會昂貴,只是要等新廠落成方能爆發小宇宙。感覺上情況與各前輩之前對中國動向的評語類似,此股有6厘息以上,不妨守株待兔。

 

寫到咁長,重要內容無見地,真係搵鬼睇囉。奈何功力有限,要不停瞎子摸象。孔老師話:「終日不食,終夜不寢以思,無益,不如學也」,但係原來學,都真係唔係咁易.... 如果各路大哥能上來插下我的分析,指點一二,你話幾好呢。

我期待有朝一日,寫到個 blog 可以等各位前輩睇得上眼,黎寫返兩粒字。相信當時就會係我股壇上有收成之時。唔好心急!呢四個字係價值投資的最核心價值。加油加油!


PermaLink: https://articles.zkiz.com/?id=28215

昆人能源? 文仔

http://hk.myblog.yahoo.com/siuman1986/article?mid=5

今次用習得方法研究昆侖能源(135),但由於瞎子摸象情況仍未擺脫(我諗都要過得三五七年先可以寫返份可信的文章......希望快快學識,唔駛放咁多山埃),所以題目特登加個「?」

寫呢隻野的原因,係因為早排佢12.8左右聽到人話好野叫入,從技術上分析不斷破頂節節上升,就江恩理論創新高買入的要點,的確是會續升的,而事實亦證明佢升左上去14蚊。不過作為價值投資者,用呢個方向去分析又會係點呢?

黎個活學活用,用從味皇偷師的方法,查查佢盈利~

2010年公佈全年業績如下:

營業額90.68億、盈利24.26億、稅10.15億、現金流24.62億、已付利息3.32億、折舊9.07億、已付稅項7.59億

損益表的稅項和現金流量表的已付稅項有34%偏差,用已付稅項及23.1%稅率逆算除稅前盈利該為32.86億而不是43.93億。 就咁睇盈利水份應該唔少

據味皇所言「現金流-已付利息-折舊=稅基」,24.26-3.32-9.07=11.87億,咁比起頭先32.86同43.93都要少好多

24.6億現金流無論對33還是44億的盈利都是不正常的,但係佢又真係有稅交架喎....

ha,咁即係點呢?

疑點利益歸於被告 (不過買股票有懷疑可以唔睇,所以到此已經可以一擊必殺),先擱下再睇

流動比率分析法,毛利率高過25%,流動比率無返3都唔好見人。今期流動比率急跌到得返1.33,舊年同前年都重有3.86同7.11,我寧願信佢上兩年業績都唔信今年個份。

營業額升71%,存貨升14%,比例會唔會誇張左少少?

存貨周轉率181=1個月清15次貨=2日清1次貨,快過日本核電廠灌水降溫。睇返其他同業(中燃氣18倍、華燃35倍、港華燃氣20倍、鄭州燃氣70倍),最堅個隻都重要輸2.5倍比佢,呢啲咪叫做屈機囉

長期負債同其他長期負債急速上升,好恐佈

之前睇過味皇好似提過下呢隻股,佢本身同中乜油中乜化好似有關係,可能因為咁所以導致佢有超乎常人的業績。不過,如果可以搵人寫下解釋比我睇,等我學下野,咁就最好喇

講到尾,其實我投資方向唔同,隻野升到900蚊我都唔會買。


PermaLink: https://articles.zkiz.com/?id=28216

金利來(533) 文仔

http://hk.myblog.yahoo.com/siuman1986/article?mid=7

本來諗住前日寫呢份分析,但由於時間關係所以今天先寫完。本來前日想寫恒指已經六連跌,根據周易「七日來復」的道理昨日會轉跌為升。去到中午曾一度倒升,諗住自己無寫日記豬左之際,收巿最後都係跌左,今日重要八連跌,結果興幸自己當日無寫到篇野。

果然炒來炒去最後都終歸難免一錯。賭錢唔啱我,我都係鐘意價值投資。

言歸正傳,今日分析早幾日買了的金利來(533)

金利來(533) 過去十年派息有加無減,由於貪方便先用5年作分析,0.21、0.18、0.18、0.12、0.093。06年08年盈利倒退,但係派息無倒退,因為公司有極佳現金,零債務,所以可以派息。只係呢點,我已經買左喇 XD 每年6厘喎~。

營業額方面,14.97億、13.95億、14.29億、10.73億,四年來都持平或微升,非常穩定。

固定資產由07年的17.38億,升至2010年的20.63億,公司一直在擴充,業務烝烝日上。

今年公司增加固定資產有1,700萬,公司仍在擴張,相信於可見未來公司業務/盈利能力仍會上升。

流動比率3.21,非常之好,財政的確係極度良好。

再睇返大家最注視的東西,盈利。五年來盈利分別為4.01、2.98、2.91、3.25、1.66億,平均盈利2.962億,除股數982,114,035,五年每股平均盈利0.3016。

之後到估值:

味皇估零售股用15倍PE,但係金利來都好似有做廠,又有地產收租等業務,其實應該分開估值,不過由於懶(好喇喎,又懶,下次唔准呀~),所以都係直接計數算 =p

我用12倍PE 估值,0.3016*12=3.619

而資產方面,用1.2倍PB估值,2.695*1.2=3.234 (ps*數字由aastock查出來,實際的未學點計 =p)

平均估值(3.619+3.234)/2=3.4265,現值3.3,其實無咩折讓。(不過我估價都已經打左折)

都好,3.3買都無買貴貨~

by the way,味皇曾經評過呢隻股,今日用返佢的說話仍然合用,一於無視版權,用黎做總結都好 (我知道味大叔唔會咁小器的~~)

金利來現金9.29億,固定資產20億,淨流動資產8億,減長期負債2.79億,其他資產一概無視,共34.5億,即每股3.513蚊

而現價3.3,市值32.4億,10年息率6厘,隨股附送曾憲梓一個


PermaLink: https://articles.zkiz.com/?id=28217

服裝零售股小評 文仔

http://hk.myblog.yahoo.com/siuman1986/article?mid=11

近來多左留意服裝零售股(及工業股?),原因當然同味皇一直買開呢類股有關,不過同時係一為神功二為弟子,平時同女朋友行街點都要行下時裝店,而家做埋呢類分析,都唔駛咁悶嘛 =D
先做左少少資料搜集,搵左幾隻服裝股出黎,之後再慢慢分析。
no
名稱
品牌
存貨周轉率
PE
PB
息率
458
聯亞
Jack Wolfskin, Nautica, Ben Sherman
10.17
5.53
0.92
7.41%
393
旭日
Quiksilver,Roxy, Jeanswest
6.74
9.62
1.359
6.24%
533
金利來
金利來
9.42
8.51
1.291
6.03%
130
慕詩
MOISELLE,mademoiselle,imaroon
7.91
11.47
1.295
5.50%
483
包浩斯
BAUHAUS,TOUGH Jeansmith,SALAD, 80/ 20,ELITE, attachment
6.37
13.07
2.549
5.13%
330
思捷
Esprit
13.74
9.16
2.456
4.60%
709
佐丹奴
Giordano
11.71
16.61
3.714
4.52%
592
堡獅龍
bossini
7.68
15.44
1.926
4.20%
589
寶姿
PORTS, BMW Lifestyle
3.15
21.42
6.168
2.74%
448
漢登
Hang Ten, H&T ,Arnold Palmer
8.38
14.79
2.794
2.55%
238
長興
Testantin, v e delure
3.02
13.83
2.153
1.98%
891
利邦
Cerruti, Kent & Curwen
4.78
37.41
5.702
1.86%
1234
利郎
LILANZ, L2
11.31
26.67
5.999
1.83%
999
IT
IT,izzue,b+ab
7.59
27.22
4.832
1.70%
647
JOYCE
JOYCE BEAUTY,Rick Owens
5.53
37.73
2.669
1.20%
122
鱷魚恤
Lacoste
6.19
2.72
0.496

 
大家睇到呢個排序,心水清都應該知道我睇息率最重。以我保守作風,息率低過3厘者,可以一擊必殺,因為文仔係息魔。
其實睇息率真係可以避開好多鬼怪股,例如122管理層花碌碌,647與連卡佛,利邦利郎 IT 爆炸PE,雖然並不代表呢堆鬼怪股一定唔好,但唔揀佢地安全程度會較高。
一hit就解決左一半選擇,淨返的之後再慢慢分析。

PermaLink: https://articles.zkiz.com/?id=28218

旭光(67) 文仔

http://hk.myblog.yahoo.com/siuman1986/article?mid=13

旭光(67),一隻我唔會買的股票,但近來有點特別,所以寫寫~

話說早一兩年我於電視台返工,當時隻股票上巿無幾耐,聽到財演們稱之為「輸光」,覺得個名幾過癮,所以留意過,好似賣芒果個朋友芒銷,一些講左我都唔明的產品。

就係咁,佢被我遺忘左一兩年。

近日在香港某酒店大堂聽到二人對話:

某君A:近來有咩心水呀?

某君B:買左67旭光,3.x,而家4蚊,都幾好丫。

文仔(心想):輸光?係咪真係咁堅呀?

就係咁,我返到屋企走左去睇隻野。

round 1:財政狀況

幾多現金,可以應付短期債。但係總債項多過現金,個人唔係咁喜歡。流動比率年續兩年超過2,唔似有上巿壓低流動比率提高盈利的情況。

round 2:業務及盈利

營業額及經營溢利穩步上揚,稅項亦與現金流報表的已繳稅項相約,似乎係真野。現金流無見紅,雖然好似唔係好穩定,不過都一直上升。

round 3:資產

固定資產一直上升,折舊亦有增加,似乎在擴張。存貨今年急跌一半,應該無滯消情況,不過似乎好誇張。

隨便睇,數字似乎好靚仔,不過有一樣野好礙眼,就係存貨周轉率。

244.08、99.12、137.89、46.86、37.88

嘩,244.08,除返365日,咪1.5日清1次貨?咁睇賣芒銷真係好賣過白粉喎。

135昆侖能源又係咁,67旭光又係咁,究竟可唔可信?衰在兩隻野都有交稅呢下抵死。

不過,近日有個消息爆左出黎,就係有位股東巿場外半價減持,都咪話唔驚。結果今日就跌足10%

隻野剛上巿,又發CB集資,感覺上都唔係幾好。

 

講到尾都係呢句,做自己能力範圍以內的事。既然覺得隻野怪怪地,就不如唔好買,買些正正常常的好過。

 

(ps* 發帖後睇左湯兄等各高人的討論,旭光果真老千也,數字太靚都係要小心為妙。而且,唔深入分析真係好易中招,原來佢毛利率70幾%,真係恐怖囉.....祝酒店兄台好運,走左就好,未走就好快嚕~)


PermaLink: https://articles.zkiz.com/?id=28220

包浩斯(483) 文仔

http://hk.myblog.yahoo.com/siuman1986/article?mid=17

早排諗住寫個橫評,評下一眾買衫股,但原來要做好多功夫,以我而家的懶散同分析能力,似乎未係時候,所以決定逐隻黎,先了解多點~

第一隻開火的是包浩斯(483)

點解揀佢呢?因為最近睇到Webb 哥哥 3.104增持24萬股,持股超過5%,所以就揀佢~

事實上,公司數字都唔錯架~

文仔買股先睇股息,有安全保證嘛。最近派左特別息,有成5厘,都算幾好。五年的情況分別是0.155、0.105、0.135、0.11、0.1075,平均派息0.1225,現價計都有4.25厘,雖然未到好吸引,不過都唔錯。

公司係淨現金公司,0債項,派息應該可以維持,不過由於上期係特別息,特別有唔安全感。

業務方面,公司主要經營地點在中港台澳四地,尤以香港為主。幾鐘意佢年報入面的各部細項(p.05),清楚列明各地情況。呢四個地方,經濟都頗為理想,所以公司處於好的馬場上,可以放任馳騁。

零售店入面,2010年比2009年多左11間,部份係特許經營(都係在內地),而從公司店鋪增長情況,好明顯係想擴大內地巿場。而個人由細到大都唔係幾鐘意的TOUGH增加得反而最多,除左證明公司最出名的係呢個牌子,重證明左我品味係好有問題。

有一個地方引起左我注意,就係公司固定資產跌左。似乎公司新店係租鋪機會率比較大。不過呢個都唔係重點,最緊要係搵到錢,當然加租會係影響盈利的要素,呢個要注意一下。

營業額方面,年年上升,流動資產同流動負債都一樣上升,係生意越做越大的情況,值得加分。存貨周轉率亦年年擴大,除左09年跌左丁多,而家升到1年清6.37次貨,越賣越快,好理想。

盈利方面,2010年創左新高,之前四年都差唔多,五年平均盈利係6,380萬,每股平均盈利0.18,情況都幾穩定。公司年年都有交稅,現金流報表同損益表數字差唔多,應該可信。

公司經營現金流年年上升(不過唔知點解中期有兩年係見紅架喎),值得加分。

總括黎講,包浩斯各項數字都好好,無咩特別地方批評(可能有我未夠能力指出,所以好想各高手寫幾隻字教下我)。

跟住到估價,資產淨值1.185,由於公司租鋪,所以資產較少,比高少少PB,乘個1.5比佢,1.185 x 1.5=1.7775

盈利能力,比12倍啦,0.18x 12=2.16

平均(1.7775+2.16)/2= 1.968

咦....點解而家賣緊2.88咁貴的?係咪我估值太孤寒呢?放大少少先

用2倍PB同15倍PE

1.185 x 2=2.37

0.18 x 15=2.7

(2.7+2.37)/2=2.535

嘩,2.88 仍然係好貴喎.......似乎巿場先生好肯比錢買公司前景。

咁都難怪,公司數字又咁靚,前景又咁好,加上熱炒左一段時間,都好正常。而且我用的盈利數字又係五年平均,計開又真係差咁截。

結論係,我覺得唔係平,不過公司係好,所以密切留意,股災時可以考慮考慮。


PermaLink: https://articles.zkiz.com/?id=28221

超大現代(682) 文仔

http://hk.myblog.yahoo.com/siuman1986/article?mid=18

其實呢篇野個心情,係期待,不過搵來搵去都搵唔到個類似,唯有揀驚喜。(有人驚有人喜,持股驚;睇戲喜)

超大現代(682)呢隻野,好耐之前叫一位親戚8.x賣左,之後爆上去9.x,重諗住累佢賺少左,而家level提升左,睇返轉頭真係做左一項功德。

今日,超大現代爆炸,唔見左20%,真係high high,重新睇返隻野,先知道原來係幼萬。

不過咁,好多人話佢唔係幼萬,場交嗌左好多年都無定論,不過時日可以證明,呢點我都信。

以我今日的學識,我會用以下幾點去理解呢隻股:

1. 數字好靚又對口,基本上睇唔出佢做假數。不過當年味兄買魚同罐頭,情況一樣,最後爆左煲,全因3個字,福建股。

以我理解,福建股就係一種數字好靚,好似無做假的幼萬股。佢地會派息,賺錢,交稅,而且維持一段長時間,總之從帳目上睇唔出奇怪野的股。不過都有特 點可以搵佢地出黎,就係核數師唔係四大、係福建民企。而超大現代,就係呢個情況。有先賢(喂,味兄生勾勾!)經驗,加上個人係讀中史,我相信歷史係會不斷 重演。

2. 公司稅率低得出奇,雖然話有國家政策,但係有評論話其實佢早應該交25%稅,都唔知信邊個好。

3. 公司不停換核數師,由4大之一的羅永咸變陳葉馮變均富,股東遲早就均貧。

4. 以我股壇淺資歷,都覺得二十億現兜兜千幾萬債都重要集資係反智的行為。由上巿至今,集資左成百億,除左研究可以原爆的西瓜之外,應該係要研發可以自動繁殖的波菜。

5. 公司年年賺大錢,但係股東年年分得丁咁多,當佢老頂孤寒算數。

6. 主席郭浩03年持股量51.49%至今得返19.23%,佢真係好愛佢公司架。

7. 有葉政志、馮豪堅、譚明志等管理高手,一定可以令公司業務蒸蒸日上。

綜合總結:等睇戲

因應行動:買花生

個人0偏財,一向賭親都輸,所以六合彩都唔多買一次,而家開個盤。

爆煲1賠x、狂跌1賠x、無事1賠y、爆升1賠n。

我買爆煲,變相祝福各位持股朋友仔。


PermaLink: https://articles.zkiz.com/?id=28222

金山軟件(3888) 上集 文仔

http://hk.myblog.yahoo.com/siuman1986/article?mid=21

好多日無寫過個Blog,係時候出擊一下。

近來留意到一隻野,叫做金山軟件(3888),睇落盤數都幾好,個朵又幾響,息口又好,所以都留意下。不過今次唔玩數目字,先玩業務分析。

簡單講下隻野,顧名思意,係做軟件生意,不過不在金山在中國。公司生意主要係國產 MS Office 同 金庸群俠傳online。以下是公司舊年的年報點滴:

娛樂軟件(即係遊戲),佔收益66%,營業額下降6%,公司話係因為2010年無出新遊戲,加上水滸Q傳又唔Q繼續玩,所以就跌左喇。每日平均最高 同步人數有80萬人,比去年少左32%。有成80萬人一齊打機,都幾Happy 架喎,好明顯其中有好多外卦人士,但咪理,總之有人玩就有人要比錢。打機平均41蚊人仔一日,都幾貴架喎,我細個玩老正41蚊可以玩幾個月。

應用軟件(即係Office啦~),佔收益33%,營業額跌2%,因為網絡安全服務變左免費,所以無錢收。不過公司話祖國同胞同日本武士買多左Office, 所以有返少少渣拿。

毛利率87%,高定低?除左賣老翻之外,要搵到另一隻更高毛利率的股票都幾難,不過科網呢家野就係咁,所以個人認為都無野好講,重想點丫,賣老翻毛利率99%咩?

研發成本多左36%,本來係一件好事,不過睇真原來係員工福利同加人工,咁對研發係咪真係有幫助架?呢點真係值得懷疑,加上人工加左,唔該錢都賺返多先得架....

睇返各項業務,首先係防毒

公司賣左25%廣州金山股權,同時又買返Conew。據說間野係搞「雲安全」技術,特登上網查下,雲端技術呢種唔受好似文仔呢類古人所認識的火星科 技,睇落真係一舊雲,不過於未來日子相信會大行於天下(可能而家已經係,不過我唔識),而「雲安全」就係其中的防毒。公司話,佢地的防毒技術得到國際權威 認可,係國家網絡上先進的防護品牌。咁呢點我都信,話晒國家都有比錢資助佢,而且佢防到毒,同防到人在網絡搞squence有正面的幫助。

至於軟件呢

金山WPS Office 得到老爺的垂青,於政府機構大行(梗係,無土製成日要用美國佬的窗口奧弗士,陣間美國佬搞事咪企左係到),所以實賣得。據講重有知識產權保障,咁我都覺得全中國可以減少到1隻金山Office老翻的出現,1隻咁大把啦。

打機方面

公司話舊年無推出新遊戲(但係公司有66%收入係遊戲架喎....咁同在糧倉唔防士兵防守有咩分別?)不過公司話,買左20%西山居工作室股權,進 行重組,咁即係話派返新兵上去守住,咁都係好事黎。2011年,公司會有五隻遊戲上場,分別係月影傳說、熱血戰隊、蒼穹之怒,同埋兩隻唔知乜水。聽到個 名,都唔知係咩,不過時下小朋友玩唔玩,又真係試過先知。

諗左一陣,其實我好唔明。公司講到最把炮的防毒同埋軟件有幾堅,但係主要收入又係遊戲,而舊年又無新遊戲推出,個情況詭異到詭異。

睇埋個季度業績,其實都係咁上下野,跌左20幾%都唔係重點,因為無本質上的改變,都係要等新GAME 出。不過個季度報告,有幾句話我好Like:

「於二零一一年五月六日,金山快盤雲存儲服務被列為中關村九大雲服務平台之一。二零一一年五月十一日,金山辦公軟件Android 版本正式發佈。」

雲端技術同智能手機乃係大勢所趨,公司有呢兩方面的發展,即係代表未來唔會落伍,好似諾基亞咁脫晒節。換言之,即係有未來,唔係死胡同。

 

講左咁耐,其實我幾鐘意隻股票。


PermaLink: https://articles.zkiz.com/?id=28223

信星鞋業(1170) 文仔

http://hk.myblog.yahoo.com/siuman1986/article?mid=31

昨晚打得咁辛苦,竟然成篇野無晒,有點無奈,不過都無計,人生就係有好多無奈。

其實諗返昨晚寫左乜,都係幾樣野:

1. 偉哥寫返blog,簡直係蒼天保祐,對於我呢類剛開竅的小朋友,又多一個極佳學習地方,實在感激,我相信好多讀者都會對呢件事感到無比開心,希望偉哥會一 直寫落去。我都好明白要成日寫自己買左咩賣左咩咩價位的確會帶黎好多壓力,尤其越成功越大壓力,希望佢可以唔駛咁大壓力,繼續寫啦^^ 其實畢竟投資講到最尾都係個人的事,無論誰寫甚麼誰說甚麼,到最後下決定的都是個人選擇,負責任的都是做決定的人,與評論者無關,相信深明大義的人都會知 道。另一方面對於唔經大腦跟人買蝕左錢又賴人的投資者,我認為係絕對應該比個dislike 佢的,同時我都相信咁樣都可以投資成功的話,咁一定係一命二運三風水,同技術無關。

2. 近來七一的事,一直都無時間寫野,連睇巿都無睇,股巿發生咩事完全唔知,淨係知道好似跌左好多。過左七一,終於有機會寫下野,同時因為好多公司都出左業績,所以金山(3888)續集又要遲少少,有拖無欠啦各位讀者( btw,都無讀者.....)

3. 偉哥剛剛寫返blog,就寫左我半開竅買落的信星(1170),買個陣梗係貴啦,剛剛出左業績,無理由唔寫返幾隻字~

 

信星鞋業(1170),當初買的時候主要係識少少唔識少少,結果買左貴野都唔知。呢次出業績,大家覺得強差人意,但其實係預期之中的強差人意。偉哥寫左一段解釋,係關於稅項回撥的原因,學藝未精的我需要時間消化消化,不過都初步明白下半年發生緊咩事。

基本上全年盈利有增長,事實倒退,在高成本的衝擊下,公司可以保持到不過不失的情況,相信於好景的時候定會發展得更好。當初買信星的其中一個原因, 除左佢個名同喪升有些相似,就係佢公司係淨現金公司,無借貸。對於無借貸的公司,我會感到份外安全(當然我都知道超越now都係0借貸....)同時基於 公司無借貸,所以即使業績麻麻,都有條件派息。今次全年業績都係一樣,派多左息,呢個對於我黎講係一件值得開心的事。

不過令我唔like呢間公司的地方除左佢無做like鞋之外,就係佢的零售業務。偉哥都好實在地評論過,而唔實際的我就用數字去計計。全年蝕左 3,700萬,相較起全年盈利1.22億,真係一個大數目。換句話講,如果佢摺埋零售業務,盈利可以升30%,重未計佢拎左個3,700萬買一個舖位可以 收租升值的回報。阿Q一點從好的方面睇,即係信星有潛力大幅增加盈利能力。

其實點解搞左咁多年失敗的零售都重搞,據說係因為做oem係搵唔到食,得十零個巴仙毛利,好似當年Timberland 一cut單就雞毛鴨血,所以如果開拓左自己品牌,一條龍服務,就可以將毛利提升幾十個巴仙,條數好好計。不過搞還搞,唔好搞到咁會令人感到開心一點 囉....

睇晒成份報告,最令我感到意外的係公司話有Timberland 的訂單,呢點偉哥亦都指出左。new balance其實我唔意外,因為之前上佢公司網頁都已經見到有呢個 logo,其實一直有做開,只係近來接多左單。反而Timberland 在上世紀90年代同信星反晒面,令當年信星無左幾十巴仙營業額,而家又黎返,真係估佢唔到。做生意真係昨日係敵人今日可以係朋友。不過咁都好,反映到信星 係有質素的公司,唔係人地都唔會返黎。

總括黎講,呢隻股票之前雖然買貴左,但係仍然值得期待。偉哥話值1.48,1.3考慮買,如果見到1.3x,我都一定加入行列~

漏左寫,公司近兩日回購股份,雖然得區區四十萬股,不過我鐘意管理層呢種表現~


PermaLink: https://articles.zkiz.com/?id=28224

中遠國際 (0517) 文仔

http://hk.myblog.yahoo.com/siuman1986/article?mid=39

姣婆守唔到寡,今日終於買左中遠國際 (0517) @4.25。

各位讀者請小心,文仔買股票,你地一定要記住以下忠告:

明燈出手,即時漏油,無貨唔好買,買左小心蟹。

好喇,講完笑,認真講,千祈唔好睇人頭買,因為文仔真係唔係咩資深投資者,而且有一句野一定要記住,買股票邊個都唔好信,信自己。

言歸正傳,點解買517?

1. 高息,9厘喎,不過上期有好大部份係特別股息,佢呢期派唔派就睇管理層點做

2. 現金多,成4蚊喎,比0.25佢買傢私,要派息都有條件派丫

3. 話晒都國企一份子,唔會執笠掛,幼萬股機會都較細,點都唔會係喪機那類向下炒

好喇,分析多少少~

公司做咩生意架?

1. 船舶貿易代理、2. 船舶保險顧問、3. 船舶設備及備件供應、4.塗料生產及銷售、5.航運服務

去年營業額升432%,升到好似做假咁,事實係唔係做假都唔知,不過據說係因為做左船舶燃料及塗料銷售兩項業務大幅上升所致。

全年毛利7.15億,較去年的4.23億上升69% 減埋遠洋地產的來來去去賺賺蝕蝕,核心盈利2.87億,都升左18%

公司的毛利率跌25.9%跌至8.3%,原因係塗料同燃料業務毛利率較低,但就做多左爆多呢類生意,所以就導致呢個情況。其實,咁咪即係由高毛利率生意轉做低毛利率生意?有易錢唔賺賺難錢?

計數

資產淨值反正無咩,豪比佢只計現金,(64.67億-2.07億)/15.14億股=4.13,4.25買pb=1.03

盈利能力 2.87億/15.14億股=0.1896,4.25買 pe = 22.42倍

咁搞法,文仔都無咩頭緒。就盈利能力黎講,22倍巿盈率的物體,我係唔會參與,但係近乎淨現金公司,我係好嚮往。如果用15倍pe去計變成股價值2.844,咁係反智的行為,因為公司淨係現金都4蚊,用2.844來買4蚊係猩猩做的事。咁...即係點?

現金,拎去做生意,就可以有新盈利能力,而做咩投資,暫時係「?」。之前都講過,從炒的角度黎講,一打舊野入去,相信巿場點都會炒炒,到時再睇下有無油水抽下~

結果,本來諗住買的數目,最後決定減少,學各位大大的分散風險策略,唔令一隻股票擁有太大比重。

用自己做白老鼠,睇下最後會點~


PermaLink: https://articles.zkiz.com/?id=28225

Next Page

ZKIZ Archives @ 2019