艾威拍ViuTV搵女遊埠林熹瞳睇錢挑機飲尿
1 :
GS(14)@2016-03-09 16:26:02【ViuTV開台】以粵語廣播為主的免費電視頻道ViuTV將於下月6日正式開台，該台前晚在奧海城舉行節目巡禮，強勢宣傳《G1格鬥會》、《跟住矛盾去旅行》和《慳啲啦！Honey》3個自家製作的節目，藝人艾威、林熹瞳、鄧洢玲（阿旦）、柳俊江、陸詩韻齊齊出席撐場。大會先後播出該3個節目的精華片段，在《慳啲啦！Honey》中，安排了4對素人情侶或夫婦參與，他們要分別完成任務，包括男方幫另一半揀內衣褲，女方又會幫另一半揀寫真集，當中鬧出不少笑話。而在《G1格鬥會》，播出了阿旦對劉燕妮、鄧穎芝對黎美言等賽事，鏡頭前個個表現兇狠，鏡頭後的訪問片段亦出現火藥味；至於《跟住矛盾去旅行》主要播出《100毛》「腦細」林日曦和議員蔣麗芸的一集的精華片段。
■阿旦前晚出席ViuTV節目發佈會，她有份參與重頭節目之一的《G1格鬥會》。
■柳俊江對自己在《瑪嘉烈與大衛》被易角感可惜。
■在《慳啲啦！Honey》中，女友穿上男友所挑選的內衣，再看看是否合心水。
不怕辛苦戰極限
活動後艾威大讚節目很有創意，他說：「我之前都上過《G1格鬥會》同其他啲綜藝節目，佢哋啲內容同製作都好特別，畀咗好多年輕人一展所長，有啲形式喺香港都未試過。」笑言正等待通告的林熹瞳，表示很想拍旅遊節目，笑問她會否介意飲尿？她笑說：「咁睇吓畀幾錢我先喇！以前啲人話拍旅遊特輯好辛苦，但我試過又覺得冇問題，我好鍾意呀，可以挑戰自己極限。」艾威亦聽聞《跟住矛盾去旅行》的內容頗吸引，問到「矛盾拍檔」的人選？林熹瞳搶答：「你咁愛妻，搵個索女全程挑逗你啦。」艾威笑言：「好喎，我都想有咁嘅安排，老婆睇住都唔緊要。」
柳俊江嘆遭易角
另一方面，本來柳俊江有份參與開台劇《瑪嘉烈與大衛》，不過因為林保怡和周家怡加入而被換角，柳俊江直言：「都可惜嘅，我都係同大家同一時間先知，冇辦法喇，冇緣！好多嘢唔係擺咗心機就會有結果，現實就係咁，香港觀眾都係鍾意睇有卡士，就算幾創新都好。」問到ViuTV方面有否補償？他說：「冇，大家都係合作關係啫，我亦都收足酬勞，我覺得冇話邊個啱定錯，講緣份。」採訪：黃曉妍
來源:
http://hk.apple.nextmedia.com/entertainment/art/20160309/19521354
【馮仁昭四圍超】黃宗澤搵女陪逛工廈
1 :
GS(14)@2016-09-07 21:46:16■黃宗澤同女性友人以全黑裝束現身觀塘工廈覓食。DV圖片
【觀塘】黃宗澤（Bosco）加入無綫17年，近年開始萌生去意，主要都係內地發展潛力好，市場又大，電視台競爭力又大減，所以Bosco演藝事業轉戰內地，喺香港佢就開拓其飲食王國市場。Bosco之所以放心北上，香港嘅餐廳有得力媽咪幫手睇住，Bosco不停為自己增值，難怪身邊不乏異性追求者，主動向佢投懷送抱。今年3月被爆同日籍女模Jun撻着發展異地戀，最近又傳佢背住日模女友，撻着澳門賭場女揸fit人，但Bosco聲稱係識咗十幾年嘅契家姐。
■黃宗澤同女友人喺韓式食店門前睇餐牌。DV圖片
■黃宗澤最新緋聞女友係日模Jun。資料圖片
全黑打扮
日前馮仁昭喺觀塘發現Bosco蹤影，今次佢又係同個女友人一齊，仲喺一座工廠大廈，當時Bosco戴住口罩，兩個人都係襯到絕嘅全黑打扮，似乎喺度周圍搵食，最後停咗喺一間韓國食店前睇餐牌。喺呢棟工廈入面除咗食店，仲有唔少批發商，賣凍肉、生蠔等等嘅食材，本身開蠔吧嘅Bosco，都睇中呢度有好嘢，唔知係咪時候再入貨呢！撰文：馮仁昭
來源:
http://hk.apple.nextmedia.com/entertainment/art/20160907/19762613