陳茂波寫網誌，提及可否討論（其實係引述他人意見）開拓郊野公園，立即被環保團體人士圍攻。陳茂波因民望低，講乜嘢都會俾人鬧嘅嘞。公眾討論，雖云「對事不對人」方算正確，但今時今日，一般評論員、傳媒往往是對人不對事，林鄭月娥講嘢，別人對她還算留有餘地，但陳茂波講嘢，則人人得而毆之，真慘情，佢呢個發展局長，不知如何捱落去。
以事論事，開拓郊野公園係可以討論嘅，閒閒地講十年至十五年都未能夠開工啦，林超英好霸道，話諗都唔可以諗，你估你係毛澤東咩，唔准人諗。香港土地寶貴，雖不致有七成係郊野公園，但都有四成吖，加埋綠色地帶、濕地等等，據地產分析專家王震宇嘅資料，總共佔去香港土地67%，接近七成。七百萬香港人嘅住宅、商業大廈、酒店、工廠、公園、醫院、學校、公共用地、公路、馬路、機場、農地、球場、馬場等等就擠逼在餘下之33%土地上，照比例計，點講都係少一啲，故此酌量在可能範圍內縮減郊野公園、綠色地帶之範圍，並無不可，並非犯下彌天大罪。贊成反對兩方，可提出數據及社會目標，公開地理性討論，最後最好就係學瑞士或加州咁，來一次公民投票，如此方是理性公民行為，方是真正民主。可惜呢，在目前制度下，政府不准有公投，公眾意見難以真正得到反映，反對派一開始就擺出打仔格（如林超英），毫無妥協餘地，這是今日香港政治、經濟、社會僵局之寫照。
眾人反應之中，大富豪李兆基有一句講得幾有意思，佢話拔一毛以利天下，社會應予遷就，用1%郊野公園近市區部份起樓，可住十萬人。有環保團體批評李兆基，不足為奇，李氏係老人家，隨口而出，就係楊朱之言，可見古語嘅影響力。《孟子．滕文公》章句下有云：「天下之言不歸楊，則歸墨。楊氏為我，是無君也，墨氏兼愛，是無父也。無父無君，是禽獸也。」孟子駡楊墨如此撞火，因為思想不同之故，其實春秋時代楊朱講：「古之人損一毫利天下，不與也，悉天下奉一身，不取也。人人不損一毫，人人不利天下，天下治矣。」簡直就係自由放任主義（laissez-faire）先師，早阿當史密二千幾年，可惜中國古代之自由思想在漢代起就被打殘了！ 