【打工仔必備】似爆未爆粗之間 三個女生黐膠紙
1 :
GS(14)@2015-10-30 07:45:11為保飯碗，阿Tam、阿花與阿卜不便上鏡，只好用膠紙自我打格。
老細腦細，總係講過唔記得；部門阿頭識少少，硬係扮晒代表。辦公室小人幫，是血管天敵，惟有幽默感才能疏通疏通，免卻爆裂之危。三個自稱文青，訛稱非麻甩系的女生（好似係），設計了四款好治癒的粗口諧音膠紙，遇上谷鬼氣之事攞出來左黐右貼，怒氣速速退，難怪一周已賣出過千卷。記者：葉青霞 攝影：許先煜、伍慶泉
四句分別是一堆「雕」的同音字與諧音字、戇99、柒少陣當幫忙及訓醒未李露眉。
品牌叫「丟那星」(Diu le sing)，也是玩粗口諧音。膠紙一套四卷$95，一卷$25。
返工條氣唔順，十常八九，跟同事笑吓呻吓，乃上班時間必備環節。阿花、阿卜與阿Tam在同一家公司任職平面設計師，工作壓力達十級，覺得齋用口罵已不足以洩憤，於是決定出埋雙手打……字，創作怨氣膠紙。阿卜說：「工作上遇到好多火滾事，呢四句幾乎日日都要講。」Lunch time的吹水說笑，竟然越搞越認真，做埋設計，兼找來有設計膠紙的台灣朋友找廠訂製。原本心聲膠紙只是自用送人，後來放上facebook試試反應，搞了個叫Diu Le Sing的品牌，啲like竟然多到個心離一離。阿花笑說：「第一日好快已經有過千like，定單可以話係湧入嚟，證明香港打工仔真係好大壓力。」超乎預期的反應，令膠紙再度加印仍然供不應求。阿花：「有啲人訂好多卷，估計係集合成個部門同事一齊訂。」自問爛口，覺得遇上同道中人。她們竟然笑着否認，不與我為伍，嗚呀。「我收放自如嘅。」、「其實我哋都係文青」、「本人真係好斯文，點嬲都講唔出嗰啲字。」真實接觸，的確覺得有人斯文，有人對粗口open。膠紙上寫的是粗口諧音，徘徊在似爆粗與未爆之間，其實只為發洩得幽默一點。阿花：「廣東話粗口係抵死嘅，但直接寫冇咁多想像空間，唔使事事畫公仔畫出腸嘅。」所以facebook有人留言提議她們做真粗口膠紙，她們都暫不考慮。
專頁有這樣的介紹：「膠紙經過特別處理，字上面都會有一點凹凸感，讓你怒火中燒時甩一甩，都可以作寧神定驚之用！」笑了。
圍住仇人公轉，用膠紙纏住佢個頭，諗吓都大快人心呀！
對付小人貼咗當講咗
膠紙得手後，到底要唔要有特別的使用技巧？阿Tam:「你鍾意點用就點用，可以喺自己本notebook係咁貼，貼咗當講咗。」阿卜補充：「或者趁嗰個你好憎嘅同事放假，偷偷哋黏滿佢個mon、佢張枱。」我覺得對付小人要think big……幻想嗰陣。「咁我哋都諗過貼落佢塊面，再圍住佢個頭係咁黐，再綁住佢個身嘅。」嘩，光想就覺得心涼了。她們認為膠紙除適用於辦公室，各行各業都要有一套。阿卜：「香港每個人都要有。」的確只要你與人接觸，就有可能遇上氣頂之事，出門必備也。膠紙設計，模仿了小時候寫的習字字帖，刻意勾起童年回憶。阿花笑謂：「寫大字感覺好正經，但我哋偏偏寫啲唔正經嘅詞語。」膠紙有濃烈本土味，廣東話粗口諧音，廣東道上的人未必懂，親切的共鳴感正是賣點。阿卜：「呢幾年大家追捧台灣小清新，但我哋覺得香港有好多本土文化都好值得大家鍾意。」係囉，如果啲膠紙寫×你娘，你買唔買先？
來源:
http://hk.apple.nextmedia.com/su ... t/20151030/19352698