ZKIZ Archives


中環在線:方卓如唔撈CEO選議員 李華華

2008-07-25  AppleDaily



財 經專欄作家、以筆名方卓如行走江湖嘅龔耀輝(Ronald),由於要競逐今年立法會選舉會計界功能界別議席,噚日辭去中國金融租賃集團(2312)行政總 裁兼執行董事,專心為嚟緊立法會選舉拉票,公司通告指佢嘅職務仲未搵到人接手,暫時由執董陳志鴻做住署理行政總裁先。Ronald辭職唔難理解,事關04 年佢亦有參選會計界功能界別議席,對手同樣係今年有參選嘅譚香文同陳茂波,當年Ronald輸個馬鼻得第三,今次捲土重來,不容有失,佢出書自揭方卓如身 份都係為咗提高知名度。

棄15.3萬月薪

會計出身嘅Ronald舊年先放棄做咗十幾年嘅老本行,辭去均富會計職務,轉去中國 金融租賃做CEO,華華記得當時佢出席公司記者會時,對新工作雄心勃勃,將公司轉名(前稱金豐21投資),業務亦由證券投資,轉型主攻中國金融租賃市場, 估唔到家陣做唔夠1年就唔撈。華華睇番中國金融租賃07年年報,由於Ronald 10月先過檔,做得3個月,以月薪計袍金連薪津,1個月約15.3萬銀,同立法會出年嘅6.5萬蚊人工相比,真係差一大截,雖然話立法會議員有153.4 萬銀實報實銷津貼,但都只係用嚟畀議員請助理同租辦事處,今次Ronald放棄一切擁抱立法會,仲未必得緊,佢都算好大勇氣,睇嚟政治真係有莫大嘅魔力。 電郵:[email protected]
PermaLink: https://articles.zkiz.com/?id=1490

CEO性格害死雷曼 左丁山

2008-09-19  AppleDaily

金 融風暴掛上十號風球,此颱風名為雷曼,吹到全世界股市散晒,星期一早上睇彭博網站,已知美林會賣畀美國銀行,而雷曼兄弟則求救無門。到了中午,收到記者消 息,話香港雷曼兄弟嘅僱員開始返公司執拾私人物件,雷曼彎梗咯,全個亞洲股市(香港、日本、南韓都放假休市)跌倒一仆一碌。

星期一晚上睇CNN,美銀主席 劉易斯與美林總裁John Thain見記者,立即打電話畀美林一位老友,安慰幾句,老友話:「好消息係美林唔使執埋。壞消息係畀美國銀行買咗!聽天由命啦。」老友C在美林認股權上 損失慘重,好彩仍然睇得開,保持幽默感。美國銀行呢三十年來努力退出國際市場,好似喺香港咁,極少極少人士知道美國銀行今天在香港做緊乜嘢生意。

中環「美 國銀行中心」只係一個名字,美國銀行在「美國銀行中心」嘅唯一資產聽講係一個車位而已。美銀咁鬼內向,幾乎係美國鄉下人家,趁低價買入一家國際化到極嘅美 林證券,公司文化方面有好大衝突,磨合期間會有不少磨擦。雷曼申請破產保護令,其市場交易地位已被凍結,對左丁山冇直接影響,但一位在雷曼東京嘅老友已達 退休年齡,因鍾意工作,鍾意東京,唔想退休,點知今次一煲蹺起,佢啲退休金如何呢?

教左丁山為佢唏噓不已。星期一早上碰到靚女L,佢晨早就面黑,原來佢積 累一批雷曼擔保嘅迷你債券作收息用,不知可否收回本金。跟住收到女士Y電話,好緊張咁問AIG Accrual Notes以及雷曼嘅結構產品。唉吔,唔識噃,啲老友好杰呀。雷曼總裁Richard Fuld,做咗十五年CEO,對雷曼忠心耿耿,而且做咗近四十年,認為雷曼好有價值,所以點都唔肯承認雷曼有問題,更認為貝爾斯登與雷曼冇得比,雷曼唔會 變成貝爾斯登,故此與南韓KDB(韓國開發銀行)談判時,堅持售價不能低過book value(賬面淨值),韓國人梗係唔制啦,於是拉倒。

Fuld(富爾德)嘅寧死不屈,寧為玉碎之作風害死所有夥計,於是《金融時報》專欄一個標題係 「Hubris - is thy name Richard Fuld」,自大狂、自戀狂、自負過高,CEO個人性格可以害死公司,害親全世界!
PermaLink: https://articles.zkiz.com/?id=2230

中環在線:楊致遠膺IT界最差CEO 李華華

2008-11-25    AppleDaily


 

雅 虎(Yahoo)創辦人楊致遠(Jerry)上個禮拜二黯然下台,辭咗行政總裁。歐洲IT網站Vnunet最近仲幫Jerry贈興,選佢做10大最差IT 公司CEO之首,仲潤佢「好少人可以喺咁短時間搞垮間公司」,都咪話唔『火羅』。「好彩」有人陪,上手CEO塞梅爾都榜上有名,排名第8。

Jerry 係13年前創立Yahoo,一度成為全球最多人用嘅互聯網站,被譽為矽谷傳奇,可惜Google後來居上成為互聯網搜尋器一哥。為重振 Yahoo,Jerry舊年重掌帥印,當時市場都寄予厚望,諗住佢會係另一個蘋果喬布斯或者Dell嘅戴爾。結果事與願違,Jerry拒絕微軟嘅超筍收購 方案,跟住想同Google結盟又失敗,仲要撞啱百年一遇嘅金融海嘯,最終黯然下台。

雅虎、惠普一門兩「傑」

呢個至差IT公司CEO榜,除咗Yahoo一門兩「傑」外,惠普亦有兩位CEO上榜,前女舵手菲奧里納緊隨Jerry排第二,被批評與Compaq合併,為惠普帶嚟災難性後果,至於公司前主席Patricia Dunn就排第9。

十大IT界最差CEO

第1位雅虎CEO:楊致遠

第2位惠普CEO:菲奧里納

第3位AOLCEO:祈思定

第4位Pets.comCEO:Julie Wainwright

第5位SCOCEO:Darl McBride

第6位蘋果公司CEO:John Scully

第7位BroadcomCEO:Henry T. Nicholas III

第8位雅虎CEO:塞梅爾

第9位惠普CEO:Patricia Dunn

第10位Est.DomainsCEO:Vladimir Tsastsin

註:全部已離任

資料來源:Vnunet
PermaLink: https://articles.zkiz.com/?id=4142

中環在線:渣打CEO嚇親員工 李華華


2008-12-02 AppleDaily


 

銀 行裁員傳聞不絕,渣打(2888)噚日炒人傳聞都甚囂塵上,咁啱呢個時候,集團行政總裁冼博德嚟咗香港,而且行色匆匆,噚日下晝到,今晚就要走。其實外界 唔使揣測太多,事關今次集團「二班」訪港,只係同一班中高層員工,齊齊預早慶祝聖誕;舊年適逢渣打香港前行政總裁蘇利民榮休,冼博德都專登趁舉行 Party機會,歡送佢老人家。今年雖然遇上金融海嘯,不過冼博德依然冇甩底,趕及夜晚同一班管理層喺金鐘港麗酒店開聖誕Party。據華華了解,冼博德 會喺晚宴上發表講話,相信都係激勵士氣同穩定軍心。

匆匆來港非關裁員

渣打早前宣佈以大折讓價供股,睇怕佢會趁機解釋呢次集資計劃,順便講解吓供股價有幾筍幾正,事關唔少員工參加咗集團股份儲蓄計劃,所以預計冼博德都會同呢班「特別」股東交代吓。
PermaLink: https://articles.zkiz.com/?id=4298

中環在線:WorldCom前CEO望特赦 李華華


2008-12-05  AppleDaily


 

唔講唔知,原來花旗國都興「大赦天下」。根據花旗憲法,總統有特赦罪犯權力,總統一般會喺任期結束前,特赦囚犯或給予減刑。

據CNBC報道,布殊總統仲有唔夠兩個月就離任,坐緊監嘅前世界通訊(WorldCom)行政總裁埃貝斯已經申請減刑,90年代名噪一時嘅「垃圾債券大王」邁克爾更希望獲特赦。

埃貝斯05年因造假賬110億美金,俾紐約法院重判入獄25年,坐監唔夠3年,就趁布殊即將離任申請減刑6年半。同樣因詐騙而坐監嘅邁克爾,因為患咗前列腺癌,更希望得到布殊皇恩浩蕩特赦。

其實每次花旗總統特赦都惹嚟非議,好似2000年克林頓離任前,就特赦咗花旗國史上逃稅最多嘅芝加哥富豪里奇。後尾傳媒爆料話,克林頓任內收到里奇前妻大筆政治捐款,搞到克林頓鬼咁尷尬。
PermaLink: https://articles.zkiz.com/?id=4400

中環在線:渣打CEO話《蘋果》"one of the joy of HK" 李華華


2008-12-08  AppleDaily


 

一場金融海嘯,令全港銀行從業員由天堂跌落地獄,唔少加入咗失業大軍,高唱入雲嘅裁員聲已取替聖誕鐘聲,四處響起。不過,銀行係百業之母,始終要留住人才,繼續上路,所以唔少派完大信封嘅銀行,轉頭又對無被叮走嘅員工派甜頭,算係年尾安慰獎。

裁員聲中「安慰獎」

好 似上星期一,渣打集團(2888)行政總裁冼博德飛咗嚟香港,喺金鐘港麗酒店同中高層員工舉行年度聖誕party。會上佢欣然公佈為慶祝明年渣打150周 年,超過5000員工會有一日有薪生日假。呢位渣打二哥仲好風趣咁話,渣打員工可以收到呢份禮物,睇怕都要「多謝《蘋果日報》」。

何解?皆因今年7月底,本報報道,渣打香港正諮詢員工對享有牛一假嘅意見,咁筍嘅福利,問勻全世界都唔會有打工仔反對,所以《蘋果》喺小心求證大膽假設下,預期諮詢工作順利結束後,明年推行機會極大。

報道成真皆大歡喜

冼 博德仲語帶雙關咁話,《蘋果》係城中喜悅(one of the joy of Hong Kong),事關佢哋「有時會報道啲正確嘅事實」,有時會報道啲好值得成真嘅事實(facts that it would delight to be true),有時更會走得快過人哋個大腦,等睇完報道嘅人,會猛然認同話:「條橋好正,應該將佢變成事實」,渣打有薪生日假就係例證。

年僅44歲嘅冼博德,係渣打歷來最年輕CEO,02年加入渣打,4年後升為集團二號揸fit人。喺城中有啲人眼中,《蘋果》係有毒資產,唔係驚喜,呢位二哥嘅演詞,華華都覺得受寵若驚。

[email protected]
PermaLink: https://articles.zkiz.com/?id=4423

中環在線:美林CEO扭千萬花紅 李華華


2008-12-09  AppleDaily


 

金 融海嘯令企業盈利銳減,華爾街唔少高層自願放棄花紅,同公司共度時艱,但唔係個個都咁順攤,好似成功帶領美林免步雷曼後塵嘅CEO塞恩,近日就同董事局因 為花紅問題拗緊數。《華爾街日報》報道話,舊年12月臨危授命嘅塞恩就要求1000萬美元(7800萬港銀)花紅,事關佢喺雷曼出事前,已傾妥公司同美銀 成親,幫美林成功避過破產一劫,可以話為股東爭取咗最大利益,冇理由冇獎勵嘅。雖然美林薪酬委員會都認同塞恩勞苦功高,但對手高盛一班高層今年都冇花紅, 加上外界對華爾街高層豐厚bonus諸多不滿,佢哋擔心如果照批花紅,隨時會成為戰靶,故傾向對塞恩say no。
PermaLink: https://articles.zkiz.com/?id=4465

中環在線:中原CEO暗示裁員未完 李華華


2008-12-18  AppleDaily


 

經 濟環境惡化,物業代理感受最深,因為減薪、裁員同埋收縮分行呢啲動作,佢哋已經做齊,但遲啲會點呢?中原地產噚日開記招講09年樓市展望,講起人手問題, 中原港澳行政總裁黃偉雄就帶記者遊花園,話雖然經濟環境不斷變化,但估計經濟數據最差、樓市最動盪嘅時刻已經過去,公司明年會維持現有嘅規模、人數同分行 數目作平穩發展。

咁係咪唔會減行裁人呢?又唔係噃!佢話樓市當旺嘅時候,同一個屋苑會有多間代理舖,到市靜時,間舖嘅租約期滿就應該關門,因為舖租係成本 控制中最重要嘅一環。佢又暗示話人手變化好視乎成交宗數。中原喺記招上估計明年樓價仲要跌多一兩成至有支持,預期買賣宗數會跌一成二,得番10萬宗。咁即 係點?前線代理自己慢慢參詳吓嘞。
 
PermaLink: https://articles.zkiz.com/?id=4723

中環在線:寶哥哥兩公子升副CEO 李華華


2009-03-06  AppleDaily





 

東 亞銀行(023)幾名元老級高層先後請辭或退休,呢間由寶哥哥掌舵嘅本港第5大銀號,噚日股價收報14.06元,單日插咗4.48%。對於市場憂慮東亞交 接斷層,李國寶噚日接受電視訪問時就話,財務總監尹焰強兩個月前已經向佢請辭,佢有挽留但唔成功。至於領導中國區嘅主帥余學強,就因為健康問題辭職,佢又 補充話余生已經病咗兩年。寶哥哥話唔擔心管理層交接問題,事關已經交接妥當,佢仲向記者保證:「唔會有問題……我同你講。」據了解,東亞首席核數師鄭則民 會接替尹焰強職位,東亞(中國)副行長關達昌就接掌余學強帥印。寶哥哥兩位公子民橋同民斌,會由總經理升副行政總裁,現任副行政總裁兼執董彭玉榮就會5月 榮休。上述種種人事變動,聽聞最快下周公佈。



PermaLink: https://articles.zkiz.com/?id=6397

中環在線:思捷疑似CEO到位 李華華


2009-04-02  AppleDaily





 

前前後後差唔多搞咗5日嘅「誰是思捷環球(330)下任行政總裁」遊戲,噚日終於有少少眉目。

Gunn做北美副總暖身

思 捷噚日公佈,聘請Tommy Hilfiger嘅北美零售業務副總裁John Gunn,嚟做思捷美洲業務總裁。根據公佈,Gunn先生會喺下個月4號上任,估唔到今次又幾快手喎。份公佈雖然冇講到明,Gunn會唔會坐埋思捷CEO 個位,但從開晒聲只會做到2010年嘅行政總裁高漢思先前嘅講話睇,Gunn哥若果表現理想,唔排除最快可以喺今年底再升一級。希望下次思捷高層再變動 時,街上流通嘅資訊唔好再咁混亂啦。
 



PermaLink: https://articles.zkiz.com/?id=7104

Next Page

ZKIZ Archives @ 2019