ZKIZ Archives


炒股輸身家 陳錦鴻:我信李嘉誠!

2000-9-7  NM




  陳錦鴻現正忙於拍攝《電視風雲》劇 集。   個多月前,陳錦鴻「意外地」加盟「中國星」,他一直聲稱簽「中國星」的原因是因為人工高,可以與女友早日結婚。但外面流傳的卻是另一版本。   據稱,陳錦鴻早前向人透露,過檔的原因是因為在股票市場「沒頂」,多年來積蓄在科技股爆煲期間一鋪輸清,無計可施下簽約「中國星」,並向公司借下一大筆錢作周轉。

 

出入股票行

▲縱使外間傳言陳錦鴻曾私下呻炒股輸掉成副身家,要簽中國星攞筆錢應急,但錦鴻對此矢口否認:「我只係蝕一半啫。」上圖為錦鴻朋友介紹他買股票之興旺證券。

  近月來,有人多次目睹陳錦鴻出入位於金鐘統一中心的證券行,並在行內長開一房炒作股票,一日上落銀碼龐大。

  陳錦鴻對此,直認不諱。

  陳:我係同朋友上(股票行)嘅,因為我覺得朋友好叻好有智慧,未有工開時,我上股票行聽佢講嘢,睇佢財技。

  其實,好似我兩年前拍《愈墮落愈英雄》咁,上夜總會搵舞小姐體驗生活。上股票行都係體驗生活,睇人點樣可以輕描淡寫,滋滋油油買賣股票。嘩,一日上落,我拍六十集電視劇都冇咁多錢。

信李嘉誠

▲亞視電視劇《電視風雲》探班當日,陳錦鴻剛巧感冒未清,故未埋位時除了與其他藝員對稿外,便會匿埋一邊休息。

  壹:有人說你在股票市場上輸了很多錢。

  陳:我知道外面有好多傳聞……我好坦白同你講,我朋友的確輸咗好多,當然佢以前都贏過。不過,唔緊要,上市公司主席都輸錢啦。

  壹:你有沒有買科技股?

  陳:點為之科技股呢……我都只係信李生(李嘉誠)啲股票,個個都信佢㗎啦!

  壹:有沒有買tom.com ,StarEast.com (東方魅力)?

  陳:我唔想答你,如果我話有,我唔知你會higlight 乜嘢出嚟。

  壹:你有沒有輸錢?

  陳:……我將自己一半資產放落去……

  我有個優點,贏得就要輸得,就係咁簡單,我信命,我唔會有乜嘢問題。

  而且,輸贏都未知,有日,如果我要「洗倉」,就叫做輸,但我一日未賣,都唔可以叫做輸!

  壹:你驚唔驚……

  陳:唔驚,驚就開唔到工!

  我朋友話,隻股唔係睇今年,係睇兩年之後。

唔止蝕

  壹:有冇止蝕?

  陳:我唔會擺止蝕盤,我唔會止蝕㗎!

  我買死一隻,理得佢點啫?總之,我買十蚊,佢升到二十蚊就放,一日唔到二十蚊都唔放,買十蚊,得番五蚊就死都唔放!

  我朋友同我講,而家隻股好抵買,有錢我仲會買多啲。

  壹:有冇借糧?

  陳:我梗係唔會。唔信你可以問「中國星」。

  簽約時,「中國星」的確俾咗「嚿」錢我,我將啲錢借晒俾家姐間公司周轉,做生意,資金流通好緊要。

  我簽「中國星」,唔係因為周轉不靈,係因為我要三年內賺五百萬。

  而家,我逐月支薪,平均每個月人工比無綫多三倍。

  好坦白,我陳錦鴻只可以賺多幾年錢,如果我屋企好有錢,我一定唔會離開無綫。

死守

  壹:你女朋友(杜雯惠)知唔知你現在處境?

  陳:佢知,梗知啦!

  佢冇乜反應,可以點反應呢?

  如果大家係夫婦,或者可以講得深入啲,但男女朋友,就只可以講關心或支持,已經好足夠。

  雖然,我都想過同佢結婚,但而家冇急切需要。

  錢係我賺番嚟嘅,我贏咗,妳如果開心嘅話,輸咗妳冇理由唔開心。

  而且,輸贏都未知。

  賬面係冇咗一半,但,我可以點樣呢?我咪將啲股票擺埋一邊囉。

  我覺得我同以前冇分別。

  我對隻股票有信心,而家不過是timing (時機)問題。

  壹:係咪心情好惡劣?

  陳:……唔係。

  我會守住,如果有一日清場計數,蝕嘅,我會好失望。

  我真係會好失望。

陳永陸:盲目炒股

  據資深股評人陳永陸分析,陳錦鴻這種投資策略,亦是大部分股民犯的通病。

  「我諗香港有八成嘅股民都係盲目咁買,後尾沽又沽唔到,溝(淡)嗰時再繼續盲目,呢段時間完全係賭博成分。」

  陸叔認為,以下四點是大忌,切記莫犯。

  

第一忌:聽消息買股

  除非你真係好短炒,贏輸都係一日或者兩、三日搞掂,咁先可以聽消息。完全唔知自己買緊乜嘢,已經係第一大忌。

  

第二忌:冇時間睇走勢

  買嗰時唔知唔緊要,但買咗之後都要知,唔可以淨係靠出面嘅消息,後來發覺自己冇時間去睇,當啲股票跌落嚟嗰陣,都唔知救得邊隻。

  

第三忌:溝淡

  買股票輸咗或者蝕啲都唔緊要,千祈唔好去溝(淡),再溝係你將自己個風險越加越大,你永遠唔會知道,以為係個平均價。如果隻股唔反彈再跌番落去,你係雙重損失,輸得仲多錢。

第四忌:死守搏升

  如果你諗住佢會升番,呢樣嘢係最錯誤嘅諗法。個泡沫根本上就冇可能再吹脹番嘅。全部係啲股民一廂情願話會升番啫。呢啲叫做鴕鳥政策,一日唔沽就一日都唔係叫輸。但呢啲冇track record 科技股根本冇可能浮番起上嚟。

  

  故此,陸叔忠告各位股民:「唔識嘅股票,如果係概念嘅話,只可以愛嚟投機,只可以短線,識得止蝕你先可以去投機。」

杜雯惠:買樓唔係要結婚

▲陳錦鴻購入的銀主盤位於何文田,根據田土廳資料顯示,戶主名確實只得女友杜雯惠一個。

  雖然陳錦鴻股票失利,但八月中旬,女友杜雯惠卻在何文田買下一個銀主盤。

  陳錦鴻與杜雯惠這間位於何文田的愛巢,只有十一年樓齡,外觀不俗。兩人選擇低層單位A 座(建築面積四百七十呎,共兩房一廳)自住,最適合二人世界。

  由於上述單位本是銀主盤,故售價比一般物業平,只為$185 萬。

  當記者致電Ada (杜之洋名)時,對於男友送樓一事,她只是堅稱,「我自己買嘅,但佢就幫手供樓。」至於幾多錢,Ada 笑言,「佢供大部分囉,我淨係俾啲燈油火蠟,都要幾千蚊㗎。」

  不過Ada 卻否認這是愛巢或結婚先兆。「嗰度好細㗎咋,實用面積得三百幾呎,所以一定唔係買嚟結婚。其實個個女仔都要男朋友照顧㗎啦,落邊個名都冇乜所謂,因為咁唔代表層樓係我擁有。」

  (雙方係咪有默契非卿不娶,非君不嫁?)

  「暫時都有嘅。總之佢講結婚嘅嘢,佢都淨係同記者講咋,佢就從來冇對我提過『結婚』呢兩隻字。我唔係講笑,我講真㗎,佢絕口冇提過結婚呢樣嘢。我亦都唔會問佢,費事俾壓力佢啦!」

  (妳知唔知錦鴻炒科技股失利嘅事?)

  「首先我自己就冇炒股票嘅,因為我都唔識股票嗰啲嘢。我唔知佢究竟投資咗幾多錢落去,佢自己用佢啲多餘錢去炒。佢去做任何投資性嘅嘢,我都唔會過問。但據我所知佢唔係蝕咗好多錢,只不過係啲人話佢蝕咗錢。」

  (佢成日話要儲夠錢先結婚,今次炒股係咪因為佢心急娶你?)

  「我諗唔係喇,呢啲嘢都冇得急啦。」

明星愛股 損手爛腳

▲冇咗一百萬, 好慘!

   還記得踏入2000 年,每個想發達的香港人都對科技股趨之若鶩。到了四月,科技股泡沫戳破,圈中不少炒股藝人損手,有些更做了「蟹民」。首當其衝的黎耀祥在一、二月期間用了 過百萬投資科技股,當中佔數最多的是東方魅力(198 )、錦興集團(275 ),怎料在四月科技股陸續下沉,祥仔初時還打算死守等反彈,後來他在七月中旬斬倉止蝕把所有科技股放清,勁蝕一百萬。

蝕入肉

▲唔好提!

  「起初靠睇報紙信一班所謂專家教路,初時有些斬獲,後來就真係俾班專家害死。買這批股票前後半年,已經蝕了近百萬。後來明白股仔係唔可以玩長線,一大筆錢無晒,就梗係要勤力些,除拍劇外,咪辛苦些接多兩部戲囉!」黎耀祥說。

  此外黃子華亦花了百萬股投資科技股,當中以$18 入了盈科數碼動力(1186 )及$21 入了香港電訊(008 )(已合併為電訊盈科)。對於今次在科技股的損失,黃子華認為過去的事已無謂再講,現在最緊要是奮力向前。

損手一族

▲我蝕咗十幾萬!

▲我冇咗廿幾個!

   損手的藝人相當多,當中有的是以跟風試玩的藝人,如黃智賢以十七萬入了$2.4 東方魅力,及呂良偉以二十萬入了$2 的東魅,由於投資不大,損失了亦不會太心痛。此外姚樂怡、張達明則是誤信友人流料招致損手,姚樂怡說:「我朋友叫我買679 (亞洲聯網)我咪立即去買,到依家乜名都未知就無咗廿幾萬。」而張達明就抱怨道:「我信錯咗吳鎮宇,佢話掂我就梗係信啦!邊隻股票唔講,總之蝕咗十幾 萬。」

撰文:李志豪、蔡惠芬、蔡婉儀攝影:李溢敏 資料:徐嘉琳 nextb@nextmedia.com


炒股 身家 陳錦 錦鴻 我信 李嘉誠 李嘉
PermaLink: https://articles.zkiz.com/?id=25030

禾稈珍珠陳錦年

2013-02-28  NM
 
 

 

「陳年,邊位?」這是酒樓界的習性,把中間的名字省掉,陳錦年變陳年,如是者叫李國寶的就變了李寶、許世勳變許勳,郭炳聯便是郭聯。李許郭當然不是幹酒樓的,卻是陳年的忠實粉絲,要食飯便撥個電話給他,讓他拍板寫菜單,只歡喜由他招待。陳年的手機裡,儲存了七百幾個富豪名人的電話號碼,令這款已停產的摩托羅拉,廢鐵生光。他在福臨門打工三十幾年,三年前因徐氏兄弟爭產成為磨心而辭職。但徐氏五哥捨不得這個福將離開,另外開一家國福樓要他掌舵,好留住一班富貴客人。陳年大半輩子客客氣氣服侍有錢人,誰想到他自己也手持十五萬股礇豐,自住太古城另有豪宅單位每月收租一萬七千五。做掌櫃他會拿起筆桿,計一條龍躉能起幾兩肉,如何用盡條魚的鰭翅、魚骨、魚肉和魚扣,一蚊也不少賺;在家仔細老婆嫩,他開覑股票機由1號仔長實開始往下scroll一千三百幾隻主板股票,專研陰陽燭建獨門數據庫,從而推敲買哪隻股票能賺最少一個開。這位阿四禾稈軃珍珠,發達自有因:「我要養老婆兩個仔,以前住灰泥樓日日漏水,跑狗跑馬買股票,贏錢求個安樂窩,搵夠就要離場。無一個賭仔夠我狠,又夠我忍,所以我永遠叫人唔好賭。」

「陳年,邊位?」對方原來是蘇施黃。阿蘇約訪問搵陳年講食經,公司規矩所有訪問必須經公關公司安排,阿蘇聽罷在電話另一端發牢騷:「點解要搵公關,阿年我係要搵你!」陳年一迭連聲得得得得得,他是生招牌,客仔個個叫他阿年,伙記人人稱他年哥。他做的是富豪食肆,經手最大一張單,是佳寧案主腦陳松青,僅一張䒷就食了十六萬。四叔李兆基正月廿九生日,在麥當勞道複式頂樓宴請十八圍,他領軍做到會,盛惠五十七萬幾。他十五歲開始在告羅士打餐廳做侍仔,月入七百蚊,某日給福臨門老闆五哥光顧時看上,覺得他話頭醒尾,以千元月薪邀這個侍仔過檔,一做三十四年,結果當上御用食神。陳年是個小個子,站在富豪身邊,不會搶了人家氣燄;不起眼的傢伙,卻精辟得緊要,眼睛看見什麼,心裡就計起算術來。做後生時龍躉他見得多,每有大魚上桌,便細細觀察,記下有用數據,在簿上做算式。很多條龍躉葬身油鑊之後,他計出了一個答案,一條龍躉能起肉四成幾,起碼做出四道菜:炆翅、炒片、煲湯,再加碟豉汁炒魚扣。「用到盡條魚,開到十份餐,便call十個客來食,數要計得準,剩一份肉賺少一份錢,call多一個客你卻得失鰦一個客!」用清水浸燕窩,這些燕子的口水浸泡後發成半透明,晶晶亮亮。但看在陳年眼裡,這也是一串數學:「買一斤燕窩回來,我要發到八十八兩賣出去。一個椰盅用三兩,如果只發得六十兩,那我賣少好多個椰盅!我們一買便買五十斤燕窩,六十幾萬生意,你斤兩唔足我利潤不夠呀!」他是掌櫃,講的是一套食物的密碼。

0.0165

那人捉覑他的手說:「你四十歲會出頭。」當時他還是侍仔,客人中不少是馬主,常常有意無意給他幾隻名駒的大名,他如獲至寶跟貼士落注,買一次輸一次。「信貼士輸死你未天光,有咁多貼士香港就冇窮人啦。」因此天未光,他便覺悟,那時四十未到。像看穿一條龍躉那樣,他要從一匹馬中,理出個邏輯。遂走到香港殯儀館隔籬街一幢工廠大廈,上了廿幾樓,走入《大勝馬經》的寫字樓,想補購過去一年的馬經。有全年的綜合年鑑他嫌資料粗疏不要,職員拿他沒法,便讓他到樓梯底的暗角去找,在鋪上厚塵的一堆舊書報中,他翻出了六十幾期的《大勝馬經》:「廿蚊本呀!」花大半個月人工買馬經,夠狠。可接下來的兩年,他半次馬仔也沒有買過,只是期復一期掏錢買馬經,賭仔中他算異數:「我不斷計數,逐隻馬反覆比對牠不同場次跑出的成績,我覺得只要計出牠真正的實力,便無往不利!」跑馬有人為因素,那跑假馬條數便計不準了?「什麼為之跑真馬,就是最後八百米入直路,落晒纜,騎師推呀打鞭呀!你睇得出。」他不賭短途,因為容易爆冷;也不賭長途,皆因路遙知馬力,唯一有數得計的,是千四和千六米的中長途賽。花了兩年,研究了三年的數據,他算出一個數目:「0.0165秒。隻馬每重一磅,跑慢0.0165秒!」事隔廿幾年,其中幾場馬他一講起情緒便迸發,也真有點賭仔性情:「我賭單式三重彩,買三隻馬跑回來是第二、三、四名!跑第一那隻是新馬,第一次出賽,冇數計,我當場踏地喊,本來中晒有二百幾萬,我真係喊!」另一場他買win、Q,一場贏了三十幾萬,好事傳千里,由福臨門到磘香園、富臨飯店、富華酒家,人人未落場已知道福記阿年贏了大錢:「那兩隻馬是雄豐和晨鋒。通晒天,因為忍唔住口,太開心便周圍講,覺得好威!全部自己研究的呀。」

四十出頭

他住太古城,是三十一年前買的樓花,七百幾呎單位四十八萬元買入。上岸前他住在謝斐道的灰泥樓,落雨天漏水黃梅天則長滿霉菌。「靠做侍仔如何改善到生活?我便去賭錢,但只賭有把握的局,我計過晒數才落注。」買樓花那份首期,用的還是母親的錢,年半之後,他用馬場贏得的錢,向銀行悉數清還樓價。到太古城收樓那一年,他三十八歲,相士之言不中亦不遠。買入太古城後十年,他再買海怡現樓,囑經紀只找印巴裔人承租:「業主多嫌他們一陣味,我唔怕。但不要挖路的印巴人,只挑來港做教授和行政人員的,他們個個有房津,這族人家庭觀念重,一住就老婆仔女媳婦整個家庭住,不容易斷租。」那時候他不再是散仔,工作吃重而疏於鑽研馬經,落場節節輸錢。那是九十年代中,有陣子連輸七場馬,一共蒸發了六十萬:「隨時全部輸番晒,所以我即刻再買多層海怡來供,等自己沒錢賭馬。」從此他金盆洗手,但連續五年期期都買《大勝馬經》,收納在一個大電視的紙皮箱裡:「免得一日我癮來,買不回這批馬經研究。」儲了五年,卻一本沒有翻過,他確定自己不需這些美沙酮,整個大箱交給垃圾站幹掉。

七十二式

有一段日子,這個城巿如中了咒,人人瘋狂抽新股。陳年看在眼裡,賭仔神經蠢蠢欲動,捱到二○○五年建行上巿,三個幾月後股價三個一毫二仙半,淪陷香港師奶,陳年終於出手,這次是牛刀小試:「我入了八十萬股。」持貨十個月後賣出,他進賬一百萬。其實沒賭馬那幾年,他道聽塗說買入不少股票,只是全部變了牆紙:「又衰信貼士,酒樓聽那些老細講,輸了好多錢。」還是建行給他靈感,股價大半個月沒上落,短線散戶心慌日日掟貨,但幾億貨竟全部有人接,「散戶哪接到咁多?肯定是庄家和基金接貨,只要我跟庄家上車,便不愁沒錢賺。」他的計數癮全速啟動,今次不是買馬經咁簡單,他先開戶訂一台股票機,再買部Minolta全彩打印機,加多部手提電腦,由1號仔長實開始,一直研讀打後千幾隻主板股票,翻查它們過去兩年的每日成交價,專攻其異動:「睇陰陽燭,睇成交,兼每日最低最高點變化,突有大額異動,必是庄家儲貨造巿,我就抽出來深入研究。」他每晚十二點幾落班後,便在家專注計數做股票分析,往往做到天光才上床,兩年幾下來,他歸納出七十二種變化模式,其中一隻又愛又恨的股票是中國建材(3323):「我○六年四月尾買五十萬股,八個月後放,賺了一百萬。如果沽遲三個月,隻股開始飆升,升到十一月,我就會賺足千六萬!我三蚊買六蚊放,豈料沽貨後它一直狂升到$35.8!我恨一世。」他只攻細價股,深圳高速(548)、匯盈控股(821)、湖南有色(2626)和創維數碼(751)等,都留有他的腳毛。

九十有五

見慣大魚大肉美酒佳餚,陳年覺得人間美食,是二百幾蚊買條三文魚,淨要腩位,和老婆兩人撐䒷腳。在他眼中沒有一家食肆比得上他的新舊東家,既然如此,便寧願不吃。「真係想食餐好,就去西灣河那家合時,家庭小菜我俾佢八十分呀!」提起老婆,陳年這樣形容:「我太太好純品,揀女人要挑純品的,千萬別要個生對鳳眼的,只會叫你戴綠帽。」除了龍躉、燕窩、跑馬和股票,偶爾他也會用數字看老婆:「她好幸福,結婚時110磅,現在足足160磅呀!」陳年以賭起家,靠磚頭增值財富,所以特別覑緊兒子買樓。做樓面跟客人吹水,一聊之下對方說去謝斐道睇樓,他醒起媳婦娘家住駱克道,便立即打電話問她是否喜歡,落場後趕去睇樓並付廿萬落訂。最後兒子申請首次置業計劃借得五十幾萬,其餘的老豆包底。幾年後阿仔換樓,這個老豆再給他一百萬轉樓:「錢攬住無用,兒女寫意父母就開心,大家放假可以一齊飲茶去玩。否則仔女要供樓,邊得閒同你吃喝玩樂?」細仔打政府工,分得宿舍幾百呎月租僅一千元,明明是好事,這個富爸爸卻頻頻嘆氣:「佢有樓住就沒心思買樓,所以我買唔成俾佢!他住了廿年宿舍,有瓦遮頭但無樓在手,唉,就係咁衰鰦!」出入上流社會圈子,有些人刻意不攀附權貴,但陳年看得開,覺得若不強人所難,買個方便又何妨。因此哪個樓盤開售,如果睇中他會給某地產公司高層打通電話,取個內部認購名額;好多年前他住長洲,寓所屢遭爛仔搞事,他往警署報案警察又敷衍了事,他便搖個電話給李君夏,由李Sir直接叮囑當值伙記專心工作。「有關係當然易辦事,又不是一些令對方好難做的事。」兩年前陳年一覺睡醒,隻腳拖住行,手指不曉得按燈掣,老婆大驚把他送入養和,應診的醫生也是他的熟客仔。「陳醫生一摸我隻手,就話阿年你中風,要轉腦科。」之後他留院一個月,醫生說腦中風一百個沒一個如他好彩,行得走得,囑他出院後好好休養,但他翌日已經趕返工,「五哥開這個檔讓我搞,我不能得失他啊。」客人再見他,知他死過翻生,紛紛送上祝福:「阿年,錢搵唔晒,身體要緊!」倒是今年六十五歲的他,意志篤定,覺得自己會活到九十五,縱使三十幾歲他已把身體捱壞,割了小半個胃。「三十年前我捱到胃潰瘍,嘔了幾桶黑血,醫生話我隨時失血過多死!」說覑他突然拉開襯衫,給記者看那條蜈蚣一樣的疤痕,果然凡事都有個價:「當日推入手術室時我突然好澄明,我話我仔細老婆嫩,唔死得。我的意識同我講,過到這關,陳年你有九十五歲命。」

禾稈 珍珠 陳錦 錦年
PermaLink: https://articles.zkiz.com/?id=52030

[貼圖]陳錦艷

1 : GS(14)@2011-07-28 21:32:20


貼圖 陳錦 錦艷
PermaLink: https://articles.zkiz.com/?id=275560

盛世仁傑現代考狀元 陳錦鴻穿崩封王

1 : GS(14)@2012-04-07 15:12:02

http://hk.apple.nextmedia.com/te ... 462&art_id=16224147



套劇前晚播第三集,劇情講陳錦鴻演嘅宋庭玉考武狀元,其中一幕要考生騎馬射箭,陳錦鴻出場時,鏡頭左上方突然出現咗間類似學校嘅物體。而陳錦鴻之前嘅考生都有拍呢個鏡頭,但就唔見間學校,明顯有人唔記得執走間學校!不過陳錦鴻之前喺《萬凰之王》嘅一場戲都有支烏龍茶旁身,古裝劇出現現代嘅學校有幾奇?
盛世 仁傑 代考 狀元 陳錦 錦鴻 鴻穿 穿崩 封王
PermaLink: https://articles.zkiz.com/?id=278646

寧等港視發牌 不肯解約陳錦鴻拒TVB引誘回巢

1 : GS(14)@2014-09-09 12:10:11

■陳錦鴻日前在中環受訪,坦認被邀回巢無綫,但他拒與港視解約,認為要尊重合約精神。



無綫人才流失情況嚴重,尤其一線小生個個搵路走,連親生仔林峯都心灰意冷離娘家往外闖。如今能出得大場面,撈得起做男一簽無綫經理人合約的演員,只剩下鄭嘉穎、陳豪、陳展鵬、郭晉安、馬國明和黃宗澤,十隻手指數得晒。不想演員重複又重複,無綫亦需急謀對策,早前便主動邀請已過檔港視的陳錦鴻回巢拍劇,但被婉拒。陳錦鴻和林嘉華日前在中環一棟商業大廈拍攝信貸公司廣告,錦鴻在去年12月跟港視簽了四年合約,是最後一位合約藝人,他笑言好想簽長一些:「我想簽夠十年㖭!但人哋梗係唔肯。而家港視發唔到牌,做演員惟有等,平時喺屋企照顧患有自閉症囝囝、買餸煮飯,星期日就同老婆主持港台《訴心事家庭》節目。」



■王維基力爭港視發牌,可惜仍然未有好消息。資料圖片

■陳錦鴻為分配更多時間照顧患有自閉症的兒子,放棄返大陸發展。資料圖片

■港視發牌落空,陳錦鴻(右)和林嘉華合作拍廣告,但暫無緣在港視劇合作。


尊重合約精神

錦鴻曾在無綫拍過《創世紀》、《天地豪情》等高收視劇集,他直認無綫早前主動邀回巢,他說:「佢哋曾經搵過我去傾,了解咗我同王維基張約係點,而家工作情況點?探討點樣可以再合作。探討完就問我可唔可以解咗張約,然後再簽番無綫,咁我梗係話唔得啦!」錦鴻直認擔心四年後生活,但現在仍希望尊重合約精神,他說:「其實同王生張合約,去無綫拍劇都冇問題。但我唔想解約,連錢都冇講,做人應該要有原則。」



■錦鴻坦言不介意放下身段為港視網上平台做模特兒。

「港視絕對優先」

問可擔心無綫小器?錦鴻說﹕「三年半後再諗啦!人生有好多個可能性,我要處理好呢三年半嘅事先,演員要調節好自己心態,等待(拍劇)我都好盡力,每日保持最佳狀態,總之你聽日叫我開工我就開工,我唔排除返大陸或有其他工作,但港視絕對優先。」早前港視藝人黃芷晴、李雨陽等要為網上平台做模特兒,錦鴻亦願放下身段,笑說:「唔介意,人哋每個月出緊糧畀我㗎!」已為港視拍過五部劇的林嘉華,原本都期待與錦鴻在港視劇碰頭,嘉華說:「因為我哋都係好鍾意不停口講嘢,錦鴻花名叫花灑哥,我就完全唔停嘴。」問劇集播映無期,可會失望?他說:「大家喺呢年幾裏面付出咁多血汗、辛勞,梗係希望觀眾睇得到啦!」採訪:嵐山攝影:仇志德




來源: http://hk.apple.nextmedia.com/entertainment/art/20140908/18858922
寧等 等港 港視 發牌 不肯 解約 陳錦 錦鴻 鴻拒 TVB 引誘 回巢
PermaLink: https://articles.zkiz.com/?id=285466

陳錦鴻渴望囝囝獨立

1 : GS(14)@2017-01-14 12:25:44

陳錦鴻昨日於灣仔出席「來跑一場親子障礙賽」家長教育網站啟動禮,他為照顧患自閉症的兒子駕樺休息多年,目前9歲的駕樺雖然還要做語言治療,但情況已進步不少,錦鴻說:「個仔唔需要我,叫我出去做嘢,係開心嘅,我都想佢快啲獨立,唔需要我就好。」錦鴻指永遠都會對着囝囝展現微笑,最緊要是讓他知道標準,最近他便教囝囝男人工作緊要,不要餓死老婆瘟臭屋,他說:「佢8歲時情人節帶佢接觸外界,同佢講男女朋友,有心儀女仔,要準備禮物,佢仲話想結婚,做爸爸,生個男仔,佢連名都諗好,叫陳小虎,Little Tiger Chan,我話畀佢聽想做爸爸就要努力,我感覺已經抱咗孫㗎嘞。」採訪、攝影:羅慧敏




來源: http://hk.apple.nextmedia.com/entertainment/art/20170114/19896118
陳錦 錦鴻 渴望 囝囝 獨立
PermaLink: https://articles.zkiz.com/?id=322661

倉底貨出籠 陳錦鴻嗌驚嚇

1 : GS(14)@2017-05-06 11:38:43

無綫昨日公佈待《不懂撒嬌的女人》播完後,將緊接推出2007年製作的倉底貨《蘭花劫》,此劇於10年前發行過海外,演員有蘇玉華、田蕊妮、唐寧、胡定欣及陳錦鴻等。已離巢的陳錦鴻昨透過電話回應謂:「最驚嚇係我哋個樣同十年前一樣冇變,只係唐寧變咗做媽咪,我都做咗人阿爸。?家睇呢個配搭好新鮮,我同阿蘇,仲有兩屆視后田蕊妮,可能佢憑呢套劇做到三屆視后呀!」田蕊妮則表示該劇是她入無綫的第一部戲,她說:「我最初聽到呢個消息都有啲驚奇,我第一個諗法就係好彩我冇整容,如果唔係就穿崩喇!好彩呢套係民初,冇乜時限。」採訪:嵐山、唐心悠




來源: http://hk.apple.nextmedia.com/entertainment/art/20170506/20012108
倉底 出籠 陳錦 錦鴻 鴻嗌 驚嚇
PermaLink: https://articles.zkiz.com/?id=332296

世邦魏理仕陳錦平:低收入家庭難繳市值租金

1 : GS(14)@2019-05-27 16:50:33

https://www.mpfinance.com/fin/da ... 8202&issue=20190527
【明報專訊】對於是次活化工廈計劃可讓業主改裝工廈為過渡房屋,世邦魏理仕大灣區及香港研究部主管陳錦平認為,這未必是多數業主挑選的發展方案,雖然改裝成本不高,但間隔上可能會出現「黑廁」、「黑房」等問題,未必受市民歡迎;再者,有關過渡房屋租期不超過5年,當租期過後,已改裝的工廈可作什麼發展尚存疑,加上選擇入住過渡房屋的多是低收入家庭,未必能支付市值租金,於業主而言,難計數之餘,投資亦具風險。

陳錦平又稱,新一輪活化工廈政策鼓勵業主改裝,將工廈加入非工業用途,如較受歡迎的寫字樓、零售及酒店等,雖然當中10%樓面需要劃作政府要求特定用途,但改裝工廈所花費的時間較少,料受業主歡迎。至於業主若選擇將整幢工廈重建,可增加20%發展地積比率,陳錦平指,雖然增加額外樓面,業主或要費時跟政府磋商補地價,但這能提高項目發展彈性,成為推動工廈重建的一個誘因。對於投資者而言,這是一項正面措施,預計可進一步帶動舊工廈買賣。世邦魏理仕香港顧問及交易服務–工業及物流部資深董事黎尚文表示,數據中心需求殷切,預計亦是業主考慮重建方案之一。

料今年工廈租金橫行或微升

對於工廈市場今年走向,黎尚文表示,活化工廈計劃於2010年首次推出時,政府共接獲248個申請,目前已釋放逾2000萬方呎樓面;另一邊廂,網購發展日漸成熟,科技、電訊、中央廚房等行業對工廈的需求亦日漸增長,故工廈的空置率少於5%,預計工廈租金今年橫行或有約5%的升幅。
世邦 邦魏 魏理 理仕 仕陳 陳錦 錦平 低收入 家庭 難繳 市值 租金
PermaLink: https://articles.zkiz.com/?id=352758

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019