ZKIZ Archives


忽然發咗達,跟住點?(上) 人在中環

http://manincentral.blogspot.hk/2013/01/blog-post_29.html

想寫這個題材一段日子了。

我有三個朋友,兩男一女。近幾年因為不同既原因,響極短既時間之內,佢地既經濟環境都有極大幅度既改善。以我心目中既標準黎講,佢地其實算係發咗達,而且仲係忽然發達果隻。不過幾個朋友響發左達之後既生活態度,卻又折然不同。

*****

三個朋友當中,達仔出身最差,細個既時候家庭環境最惡劣。

佢好俾心機讀書,畢業之後考咗個會計師牌,憑住努力,算係脫咗貧,進身中產階級。2007年,我唔知佢買中咗乜嘢股票(總之據佢自己講,財富來源係來自炒股,信不信由你。),賺左一大筆錢。今日既達仔,揸住接近成億元既物業收租。以佢現時既身家,要印印腳「唔駛做」其實係卓卓有餘。

發咗之後既達仔,除咗買咗一大堆物業收租之後,生活同之前幾乎係冇改變過。佢有不只一間豪宅物業收租,但佢自己一家四口就仍然住返響一直住開,七百呎既中產樓;揸既車,亦係多年都未有換過既二手日本小房車。衣食住行既習慣同未發達之前,幾乎毫無分別。而發左達之後,佢仲繼續做緊之前果份工,跟住同一個上司,而佢公司上下,冇一個人知道佢其實「已經」發咗。

我問達仔:「賺左咁多錢,莫非你唔想享受一下咩?」

達仔既答案係咁既:「CK,你環境比我好,你未試過好似我細個果陣咁窮,你未必會feel到我既感受架啦。我呢一刻,其實已經非常享受。我享受緊既果樣嘢,叫做『安全感』。」

達仔話,以前未發達之前,過緊一般香港中產既生活。兩公婆每人搵幾萬,人工其實已經算唔差,好過好多好多人啦。不過中產通常要供樓又要供車,再加供養兩個細路,又要俾錢阿爸阿媽,兩公婆加埋搵十萬有多,七除八扣之後其實所剩無幾。佢話自己都唔知點同人解釋,十幾萬既家庭收入,居然仲會係掹掹緊,食餐飯貴些少都要計實條數唔好用突。

實情係咁既,當一個人搵幾千蚊個月既時候,你自然會過「月入幾千」既生活。當你每個月有十萬八萬收入既時候,你又會過「月人十萬」既生活。結果係,搵得多又駛得多,到最後得到既報應係:「成日都驚自己唔夠錢。」

我望住達仔點了點頭,示意明白佢既說話。

「到今次真係叫做發咗,我就同自己講,唔可以再俾自己放肆…」達仔笑住回應:「如果唔係,我發咗其實又等於冇發到?」

「起碼依家偶然去食餐貴既晚飯,找數果一刻我唔駛拎個計數機出黎,擔心月尾會掹掹緊啦。淨係咁樣已經賺晒啦我!」

嗯,邏輯我基本上是明白的。只不過,當你發咗,賺咗咁多錢之後,你忍受得住你所享受嘅,只能夠係精神上既「安全感」,而非物質上既奢華,我覺得總有多少違反人性吧?

「當你曾經試過好似我以前咁窮…」達仔微笑:「你就會明白架啦。」

「安全感」係精神上既快樂,呢種快樂既層次,比物質上能給予既快樂來得高。每個人既過去都唔同,當面對突如其來既財富時,反應自然亦會有所分別。出身較差既達仔選擇犧牲奢華,讓財富「全力」去換取「安全感」。換轉係你,選擇又會唔會一樣?

(待續)
忽然 發咗 咗達 跟住 住點 人在 中環
PermaLink: https://articles.zkiz.com/?id=43660

忽然發咗達,跟住點?(中) 人在中環

http://manincentral.blogspot.hk/2013/02/blog-post.html
世界上有一種人,叫做「失匙夾萬」。「失匙夾萬」既意思係:表面上你有好鬼多錢,但實際上,呢啲錢一毫子都唔到你控制。這種人我認識一個,而我亦見證左佢,由「失匙」到「搵番條匙」既轉變。

我小學既時候認識Austin。同學仔對佢既理解係一個「有錢仔」。原因係,高佢一屆既「師兄」當中,有一個頗為招搖既「名門後人」,同Austin既中文名只差一點點。而跟據呢個「名門後人」自己講,低佢一屆既Austin,係佢堂細佬。

三十年前既小學雞對本地富豪既名字並唔熟悉,聽到有關Austin既傳聞之後,紛紛番屋企同阿爸阿媽講:「原來Austin同阿邊個邊個係來自同一個家族架!」阿爸阿媽告訴我們,咁Austin應該好疊水,同我地應該係屬於唔同世界既人。

但係響一個小學雞既眼裡面,Austin同我地查實真係唔覺有乜分別。樸素,平凡,內斂,而且有點其貌不揚。響同學仔面前,佢亦從來唔會提起自己既家族背景。阿媽話佢係有錢人,我一直記在心中,直到有一日,佢請我到佢屋企玩。我以為佢屋企應該係啲大到冇影既山頂豪宅,殊不知原來係坐落山腳,冇電梯兼要撐四層樓梯上樓既五百呎唐樓。

長大之後既Austin同我講,所謂名門望族,總係唔知點解會有幾房人。幾房人當中,總係有人得勢有人失勢。得勢既果房人控制家族資產,有頭有面可以風光無限;沒有得勢既果房人,冇機會分享家族既財富,儘管未至於要餓死訓街,但實際上與你我他無異,都係要努力工作賺錢賺生活。有錢人家族裡面既紛亂,怕且我此等凡夫俗子,一世都無辦法睇通睇透。

我記得Austin同我講過,細個既時候,佢既身份令到佢有點精神分裂。佢有一啲招搖既親戚,呢啲親戚既招搖,令到絕大部份既人都以為,來自同一個家族既Austin係同等地富有。佢唔知點樣向人解釋,真實既情況其實同旁人所理解既有好大出入。香港地係個憎人富貴厭人窮既地方,佢媽媽果邊既親戚出身相對比較差,對Austin呢個「疑似有錢仔」親戚並唔係太友善,甚至經常指指點點,武斷地認定佢必係個「死敗家仔、二世祖」。(對此Austin既comment係:如果我真係咁疊水,俾你插我「敗家仔」都叫做抵丫,但我其實仲窮過你哋,咁樣仲要俾你地插就唔x抵啦!)至於佢爸爸果邊既叔伯,由於知道佢地響家族內並唔得勢,對佢地亦唔多俾面,反正在佢地眼中,Austin一家只個係黐飲黐食,同自己完全唔同級數既「窮親戚」。

幾年之前,佢家族唔知起咗乜野變化。Austin忽然分到巨額遺產。據Austin自己所講,呢筆錢,佢真係從來都冇諗過有機會得到。一夜之間,Austin既身家,由叔伯眼中既窮親戚level,暴漲到同果班一向招搖既富貴親戚幾乎平起平坐。

*****

問題黎啦。Austin忽然發咗達,之後佢點樣過佢既生活?

最大既變動,大概係換咗間樓。面積比從前既大咗一點,其餘既,同達仔一樣,生活習慣跟「未發達」之前,原全冇改變過。

達仔刻意唔改變生活習慣既原因,係因為需要「安全感」。我認為Austin既諗法完全唔同,事關響未發達之前,佢Portfolio裡面一直有唔少風險相當高既投資,追求安全感既人絕對唔會咁樣選擇。而且佢同我一樣,有自己既生意。追求安全感既人,打份工就算啦,點會咁笨拋個身出黎搏?

Austin由細到大既尷尬家族身份,俾左一份無名既怨氣俾佢。佢討厭佢果啲「睇佢唔起」,當佢係窮親戚看待既叔伯。佢亦好嬲佢媽媽果邊,一口咬定佢係「冇鬼用、死敗家仔」既姨媽同舅父。兩面不是人既Austin,心裡面一直好想吐出呢口烏氣。佢想搵好多錢,所以做生意佢好搏命,佢亦都好清楚,單單係「有錢」,並唔能夠幫佢吐左呢回烏氣出黎。佢要贏,而且要求自己贏得漂亮。佢要讓人知道,佢係靠自己而變得富有。

收到遺產之後,我問佢:「Austin,你都已經咁有錢啦,仲咁搏命搵錢,有意義嗎?」

Austin從來冇正面回答過我呢個問題。

Austin既人生係矛盾既。當有巨額遺產跌落你身上,莫非你會拒絕?但係Austin既前半生,一直都係堅持「靠自己」去搵錢,「靠自己」去變得富有。佢擺咗好多心機落自己檔生意上,而且做得唔錯。當佢既「吐烏氣」大計漸見曙光既一刻,巨額遺產忽然跌落自己身上,旁人眼中或者覺得佢行大運;但我眼中既Austin,其實好迷失。

或者咁亦解釋到,為何Austin響忽然發咗達之後,一切生活習慣同駛費,都刻意跟未發達之前保持原狀既原因。舊既習慣唔想改變也許係原因之一,但我更傾向相信,要佢動用呢筆「並非透過自己努力」所得來既財富去吃喝玩樂,Austin跟本係過唔到自己。不變,係因為心中有結。

我都唔知,咁樣其實算唔算係有骨氣。

(待續)

忽然 發咗 咗達 跟住 住點 人在 中環
PermaLink: https://articles.zkiz.com/?id=43744

【動畫】窮夫妻送孖女畀人養17年後發咗達苦尋骨肉

1 : GS(14)@2016-11-10 07:39:39

江西一對姓溫的夫妻17年前,因生活困苦,將生下的一對雙胞胎姐妹送給人撫養。兩人隨後到廣東東莞打工,發跡成為企家長,不斷四出找尋骨肉,兩年前遠赴四川,終於找回細孖,但大孖至今仍下落不明。心力交瘁的溫先生說:「我只想知道大女兒的下落,如果過得好也就放心了,過得不好自己希望有機會彌補過錯。」這對夫婦在大朗鎮開設毛衣廠,兩人從當年衣食住行都艱難的打工仔,到如今擁有一間工廠,但與自己雙胞胎女兒失散的痛苦卻一直無法解脫。夫妻回憶說,18年前,當時才19歲的他們在家鄉擺完婚宴,便到惠州園洲鎮一家毛衣廠工作,每月工資只有幾百元,每天工作十多個小時,住的是擁擠的集體宿舍。偏偏在這個時候,妻子懷孕,去醫院檢查被告知是一對雙胞胎。1999年,溫太生下一對女兒。幾天後,在鎮上開理髮店的「胖大姐」黃X跟溫先生說,自己無兒女,願意領養其中一個;另外她認識的一名醫生,也有領養孩子的願望。就這樣,剛剛滿月的雙胞胎姐妹被黃X領走。隨後,夫妻迫於生計,從惠州轉到東莞打工,原本許諾保持聯絡的黃X也突然失蹤。迫於生計,溫先生也沒有精力去尋找。經過十多年努力,兩人終於捱出頭。期間,夫妻又生了一名兒子,卻無法忘記一對女兒。「我們經常在夢中見到她們,夢境中兩個孩子有時候好,有時候很差,醒來後就更加的傷感和後悔。真的希望能夠找到她們。」2013年夏天,溫先生在東莞街頭偶到當年工友小龍,得知黃X居住在四川南充村,幾經艱苦,終於找到已14歲的細孖洋洋。但當時也不敢相認,只說是洋洋養父的朋友。在密切聯絡和來往1年後,洋洋的養父鑑於生活條件和實際情況,答應將細孖送還溫先生。而今年10月,黃X才指當年表示,把大孖送給惠州醫生其實是說謊,實情是她將大孖送給在惠州市博羅縣打工的湖南人。上月,溫先生找到這名男子後,對方卻指,他當日接過大孖後,又被人抱走。心力交瘁的溫先生,唯有暫時回東莞。如今17歲的孖雙洋洋,依然沒有完全適應新的環境。她指,當日聽到四川的養父說並非她的親生父母時,完全崩潰,曾長時間沒胃口、失眠,也沒有心思上課。後來,在養父母的勸說下,才慢慢接受事實。目前她正在一所美容培訓機構學習技能。大洋網




來源: http://hk.apple.nextmedia.com/international/art/20161109/19828026
動畫 夫妻 送孖 孖女 女畀 畀人 人養 17 年後 發咗 咗達 達苦 苦尋 骨肉
PermaLink: https://articles.zkiz.com/?id=314693

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019