📖 ZKIZ Archives

太子女做打工仔，予人感覺是賺錢 買花戴，所以一些企業家的後人鍾情自行創業以證明自己能力。以米粉打響名堂的本地品牌超力食品，太子女莫傑琳一畢業就接手超力，同時另闢床上用品生意 Rapee Living，老父為教她做生意，將她由細鬧到大，令她明白搵食艱難；常掛着「搵食就係咁」口頭禪。

而來自羅氏針織家族的羅可 欣與羅可旋姊妹，她們開鋪純粹講「feel」，在老父打本下創立時裝店Ztampz和bread n butter，讓她們有機會把時裝設計和做生意的天分發揮，其父羅蜀凱並無要求二人要做到什麼成績，蝕錢也只當攞經驗。兩個家族的太子女，兩個不同的故 事。

父親莫國安中學畢業後在怡和洋行任推銷員，首次創業經營假髮生意，後來於一九七二年經銷台灣超力即食麵。至七八年全面收購台灣超力米粉的股權，成為超力米粉大老闆，是白手興家企業家。

莫傑琳

1995

畢業於澳洲昆士蘭大學工商管理系，同年加入超力食品當出口部經理。

1996

加入利鳴企業（Rapee Living）任總經理。

2004

購回超力股權後，出任Rapee Living及超力食品總經理，Rapee Living現有九間分店及十九個百貨公司專櫃。

三 十四歲的超力米粉老闆莫傑琳，上月底與超力食品和經營床上用品Rapee Living的利鳴企業下屬，齊齊到白石燒烤場燒烤。一到場，她便通場飛和員工打招呼，對每位員工都能直呼其名，「喂，豪哥，廠務嗰邊咁忙，都幫手搞呢個 BBQ，真係唔該晒你。」跟着，大家一邊燒烤一邊猜拳，她又加入戰團，「十五，二十，開晒……」即使猜輸，也絕不賴賬，全杯啤酒飲乾。其後的刨西瓜大賽， 她出盡力同員工鬥快刨，縱然西瓜汁濺滿面，也絕不介懷。連市場部的員工April 也說：「老闆好玩得㗎，平時又鍾意講笑，有時喺屋企整甜品都會預埋我哋。」

與莫傑琳於九八年剛接手生意時相比，超力食品和Rapee Living的生意翻了三倍，現時Rapee Living除了在百貨公司設了十九個櫃台，更在豪宅區山頂及赤柱等地開設分店，每年的營業額估計逾億元。

莫 傑琳一年大概須出差四、五個月，不是搞美食展覽攤位，便是出外見客找貨源。忙碌的工作令她一直不敢要小孩子，「我有太多時間唔喺香港，如果有小朋友，都無 時間陪佢，我唔想第日生咗細路，佢親近工人唔親我。」她坦言自己年紀也不小，是時候認真考慮生孩子的問題。但她的確很享受自己的工作，見她一落分店，除了 和員工寒暄，便立即周圍視察店中環境，有時候更幫手招呼客人，平時逛街也會特意到其他床品店了解市場，「自己生意好難唔上心。」她說。

花錢革新老父大罵

九六年莫傑琳接手利鳴企業，她直言被公司嚇了一跳，「第一次踏入個office，只係有一至兩部電腦，出入單全係人手，真係呆咗一呆。之後，我就為每一個同事買部電腦，將個辦公室裝修得光猛啲，加多咗個大Pantry，等員工食飯食得舒服啲，又買個存貨系統方便打理廠務同出入貨記錄。」

安裝電腦系統她用了三十萬，又花了二十萬在赤柱廣場開了首間Rapee Living，還未幫公司賺 錢便大開水喉，支出比平時多了三倍，下屬以為她是「洗腳唔抹腳」的千金小姐，「次次用錢的時候，佢哋就會問我係唔係有必要，好似將cushion用膠套包 住咁，因為佢哋以前唔用膠套一樣賣得。我就要慢慢將我個理念教番佢哋，同佢哋講加咗包裝，不但只衛生，而且定價都可以高少少。」

莫傑琳以為 樣樣知會爸爸，攞定聖旨搞改革就無問題，誰知父親一見赤柱Rapee Living新鋪，便大發雷霆，認為陳列疏落絕對是浪費空間，用掛鈎陳列貨品「簡直不知所謂，有失大體」，只有在貨倉才會用掛鈎，而且售賣一些新穎家品， 好像四千元的花形大風扇，「完全無聊」，莫傑琳的爸爸在電話罵她四個小時，她本着「鬼叫佢係我爸爸」的心態，邊哭邊讓他鬧；新鋪開張時，父親更生氣得沒有 出席。

雖然心裡不好受，但莫傑琳仍然堅信自己的一套，事實上那花形風扇在開業五天便售出，而新店的生意額亦較在百貨公司的櫃位多出三倍，老父見新鋪有成績，都只可跟她慨歎「依家真係年青人嘅世界」。現時，利鳴企業人手由當初只得廿人增至一百二十人，分店亦增至九間，父親已不再過問她公司的事，全盤放手交給她打理。

選科無自由

現時父母過着退休生活，閒來到世界各地旅行，雖然她有一姐姐，但其浪子性格對營商全無興趣，繼承爸爸生意的責任自小落在莫傑琳身上。小時爸爸已常帶她出席生意飯局或結婚喜宴，「我六歲便成日要陪爸爸應酬，認識啲uncle。有時爸爸返公司又會帶埋我去，佢可能想我習慣吓公司嘅 氣氛，又想啲員工認識我啦；嗰時我大學想讀化學，佢都要我讀工管（工商管理系），為接手生意鋪路。」在澳洲讀書時又要每月為自己的開支和父親在當地的酒樓 生意，做財政報告，仔細紀錄支出及收入事項，「爸爸差唔多一兩個月便到澳洲，有次我遲咗file啲單，俾佢知道咗，又俾佢鬧咗成個鐘，鬧到喊。」九五年她 在昆士蘭大學工管系畢業後，便立即被爸爸召回港打理超力食品，並沒有像其他太子女般到大機構打工，她苦笑道：「入大公司見識我梗係有諗過，不過嗰時爸爸都差唔多六十歲，我唔通say no咩。」

辛苦無人可憐

當時她在父親的安排下出任超力食品出口部的經理，有機會出外見客傾生意。「開頭都好開心，有份參與公司重要會議，不過連出口嘅程序，好似點落shipping（船期），要去貨倉點貨，連米粉係點整等，都要同事教番我轉頭。」到歐洲見客，因公司對 海外公幹的使費有限制預算，她只能住在廉價酒店（B&B）。平時有司機車出車入的她，一日要走到十個不同地方見客，回酒店本想打電話給爸爸撒嬌， 爸爸卻只問她工作上的事務，還叫她有多餘時間也要多出外尋找客人，她收線後淚如雨下，「以前梗係唔慣咁辛苦，嗰時想搵人呻都無，唯有喊出來等自己舒服吓， 之後咪繼續見客，搵食就係咁。」她聳聳肩說。

經常將「搵食就係咁」掛在嘴唇邊的莫傑琳，雖然自小生活無憂，有工人司機服侍，但家中也曾經歷 起與跌，讓她明白幸福不是必然。「大概五歲嗰年，原本一家住在廣播道，因為爸爸周轉不靈，而要搬到荃灣；嗰時年紀很小，唔知乜事，只記得屋企細了一半，爸 爸媽媽跟住好忙工作，由朝七做到晚九、十，一年後我哋一家就搬去賽西湖，我就知爸爸嘅錢唔係由天跌落嚟咁易賺。」她說爸爸永遠很節儉，平時衣服也不多買一 件，卻處處為家庭着想，堅持要住得舒舒服服。

十年前，老父為部署把超力上市，把手頭股權轉到另一拍檔；但見搞了多年上市未有眉目，兩年前，父親再次把超力的股份全盤買回，亦同樣把這間公司交給她打理，「佢一直都好記掛住呢盤生意，所以希望我可以睇番。」她就撐起超力和利鳴兩間公司了。

姊妹花賣時裝

父 親是羅氏針織創辦人羅定邦的五子。羅定邦於五十年代開始從事製衣業，七五年成立羅氏針織，八十年代羅定邦與麗新林百欣、萬泰田元灝及肇豐方肇周齊名，被稱 為配額「四大家族」。七十年代起，羅家進軍地產，購入多幢長沙灣的廠廈及地皮。羅蜀凱由七十年代尾便掌管家族的羅氏針織業務。

羅可旋

1998

畢業於多倫多大學經濟及市場系。

2000

紐約Parsons School of Design時裝設計系畢業，讀書期間曾於Marc Jacobs當兼職設計師助理。

2001

加入Gucci當採購員。

2002

由父親羅蜀凱打本，創立Ztampz，現有7間分店。

2004

創立bread n butter，現有12間分店。

羅可欣

1997

加拿大Queen's University電子工程系畢業。

1998

史丹福大學管理碩士畢業，並曾分別在所羅門美邦、貝爾登斯和百富勤工作。

2004

加入bread n butter任董事。

採訪羅氏針織家族的太子女 —— 羅可旋（Victoria）及羅可欣（Edith）前，與她們的公關聯絡後，才知道她倆做專訪，是需要安排化妝及髮型服務，否則二人「會皺眉」；於是記者也要打破一向部門慣例，為她們張羅髮型及化妝師。

兩位羅氏姊妹花準時到化妝室，二人一身自家品牌bread n butter的打扮，妹妹羅可旋二話不說便坐在鏡前等化妝整頭髮，而姐姐羅可欣則將HERM贙S手袋放在一旁，坐在梳化細細道出兩姊妹打理公司的情況：「Victoria負責設計買辦及品牌建立方面；而我數口比較好，負責行政及營運方面。」問到會否因大家都是老闆，做事及決策上會有爭拗，她地說：「都話分開做嘢，唔分得清又點做，即使係有，我哋都會尊重大家嘅expertise（強項）。」

極速開鋪

妹 妹羅可旋的強項就是時裝設計，她畢業於紐約時裝名校Parsons School of Design，返港後在Gucci當買手，她說：「Bossini都好好，不過唔係我想做嘅時裝，所以讀完書之後都一直諗開Select shop（即店中售賣多個品牌）。喺Gucci做咗一年便同爸爸講想開鋪頭賣世界各地有特色品牌嘅衫，好似儲郵票咁，所以Ztampz讀音同Stamps 差唔多。」記者再問她之前有沒有計劃過，她又皺皺眉說：「我呢個人無話計唔計劃，當時我真係有feel想開鋪，爸爸便打本俾我開。」

○二年 羅可旋首先在銅鑼灣開了專賣貴價女裝的Ztampz，其後於兩年內擴充到七間，到了○四年，又一次過在大型商場開了六間主攻中價服飾的bread n butter。羅可欣說開業初期因為家族背景，容易贏取大商場的信任，「我同佢哋講想入佢哋場開鋪，兩三個月就肯見我哋，若果唔係家族背景關係，我諗都要 等半年左右。」

改行中價路線

由於Ztampz以Select Shop經營，代售歐洲、日本等高檔時裝，開鋪後，羅可旋忙於四出買貨，由找貨源到店鋪營運都要自己做，即使去年懷孕大肚，坐月期間便已開始工作，而盤數 則交予會計師打理，同時每兩至三個月把財政報告交給父親羅蜀凱過目。「多國名牌時裝貨源好唔穩定，有時靚，有時唔靚，船期唔係你控制，有時入一兩季之後又 俾人高價搶走個品牌，所以唔係自己個品牌，做得幾好都冇用。好似Joyce當年入Armani，幫人開晒鋪都有十年八載，最後人哋都係自己做番。」

售 賣人家品牌，話事權不在自己手，有些品牌更會過橋抽板，於是她改賣較大路的時裝。「大路嘅需求一定多過奢侈品牌，羅氏針織係GAP最大嘅供應商，你哋話 GAP大定Gucci大？所以三年前我就去巴黎，搵到走中價嘅法國品牌bread n butter，要自己擁有一個品牌，設計、生產同管理都可以自己睇實。」

出身羅氏針織世家的羅可旋（右六）於○一年下嫁同是來自成衣界大家族福田集團的夏錦安（右七），當年在會展中心筵開百席宴請親朋，堪稱世紀婚禮。

旁為爸爸羅蜀凱（右四）。

自由政策無壓力

bread n butter嘅衣服設計較簡單，而其中品牌強項的針織衣物則由家族的羅氏針織供貨，產品的質素較易控制。

○ 四年，姐姐羅可欣想離開投資銀行，便與妹妹一起發展bread n butter。「可能我係來自企業家的家庭，投資銀行嘅project-based（逐一項目）工作唔係好適合，完全睇唔到成件事發展。」她們二人閒時也 會和開鞋店Mocca的堂妹羅穎怡一齊傾生意經。林建明女兒林煒珊亦與她們稔熟，Ztampz有時裝展亦會捧場。

「我以前做投資銀行，樣樣都要Benchmarking（標準化），將事事都Quantify（數量化），我就正好將呢一套運用喺營運上。」羅可欣說。她管理bread n butter每兩星期要開一次例會，報告及檢討公司各部門的情況，前線銷售人員不論是每日、每月、每年都有銷售額追，她對同事要求極高，羅可欣說有壓力才會進步。不過兩位太子女的老父從無給予她倆壓力。

兩位太子女的父親羅蜀凱，從小至大，也沒有規定她們要走什麼的路，亦沒有規定她們要繼承生意。「爸爸打本俾我開鋪都沒要我做一定成績，做得好固然理想，唔好咪當一次經驗，當係自己的Portfolio（作品）。」

據羅可欣稱，Ztampz及bread n butter總營業額已由○四年的四千萬跳到逾億港元。被問及是否已歸還了當初的開業成本給爸爸時，她只說：「爸爸係我哋的長期投資者，所以我定期都要向他匯報呢。」