ZKIZ Archives


飯盒打孖上 張玉珊搶救無效 欣宜自暴自肥40磅

2013-1-10  NM  
 

 

曾經係「肥人偶像」的鄭欣宜,親身示範由二百三十磅大肥妹,變成一百三十磅標準身材。長達九年的減肥歷程,欣宜自信心日漸爆棚,除hea住做機,飲食亦唔節制,早前拍攝曾志偉執導的賀歲片《2013我愛香港恭喜發財》,在片場試過一餐吃兩個飯盒,又跟大隊食消夜,短短開工十日脂肪嚴重失控,體重回彈到一百七十磅,腰圍脹到四十吋;原本跟修身堂去年拍攝的泳衣廣告,合約被迫爛尾,經理人陳淑芬亦忍唔住開口鬧欣宜唔生性。自認苗條

早前出席新城頒獎禮的欣宜,一條雪紡短裙加窄身短褸仔,粗腰象腿想遮都遮唔住,嚟緊還有兩個樂壇頒獎禮要出席,令幫她搵衫的形象師十分頭痛。「其實要幫欣宜搵衫唔容易,佢本身好鍾意著雪紡裙,覺得有公主feel,但係佢家陣咁嘅身形,只可以做肥公主,盞俾人笑!」知情人說。減肥成功初期,欣宜一直渴望可以變成銀幕索女,可惜心願至今未達成,早前與黃宗澤拍無綫劇《隔離七日情》,雖然角色重戲,卻要扮男仔頭記者,加上近期體形回彈,即使在電影演出,亦只能扮後生版肥姐的搞笑角色。「以前知道有大騷演出,欣宜會好積極減肥,等自己瘦啲上台靚啲,但依家佢無咗呢股動力,最弊嘅係佢經常同人講話自己根本唔算肥,喺加拿大,佢呢類身材叫苗條。」欣宜身邊人說。

暴飲暴食

肥姐在生時曾經講過,因未能給予欣宜健全的家庭,故縱容女兒暴飲暴食,欣宜體重從此一發不可收拾,高峰期達230磅,腰圍60吋。

連吞兩隻雞髀

曾經有人目睹只有幾歲的欣宜,跟隨肥姐返電視城工作時,一口氣連吞兩隻雞髀兼狂飲五支益力多。

鮑魚做早餐

欣宜體重全盛期高達230磅,當時的她以卡路里極高的鮑魚做早餐,每餐食三個人分量,膽固醇嚴重超標。

歎萬元富貴餐

03年,16歲的欣宜一心進軍樂壇,搵來張玉珊幫手減肥,但減肥期間,欣宜被發現忍唔住到富豪飯堂偷食逾萬元一席的富貴餐,菜式包括天九翅、吉品鮑等。

擦大碟意粉

一度成功控制體重在130磅的欣宜,因為忍唔到口又懶做機,導致體重翻脹,試過被拍得與男友到中環蘇豪區撐枱腳,獨吞一大碟意粉,放工時與助手到佐敦食火鍋。

唔逼得

肥到爆錶,欣宜所屬的唱片公司、幫她的張玉珊以及經理人陳淑芬,齊齊開聲叫她勤力減肥。「同輩之中,同佢鬥得最激烈係巨聲幫林欣彤,今年欣宜成績的確唔錯,但身形輸晒,陳太一路都想幫欣宜喺紅館開演唱會,所以好緊張要佢keep好身形!「唔知係咪壓力太大,每次公司同欣宜傾,提佢控制吓體重,總之一講到『肥』字,欣宜就喊晒,搞到大家都唔敢逼佢。」一名唱片員工說。在曾志偉執導的賀歲片《2013我愛香港恭喜發財》中,欣宜角色要暗戀戲中的謝天華,戲份不輕。「因為肥姐關係,志偉好睇欣宜,開賀歲片都有預埋佢,仲比之前多咗好多戲,上年嗰部只係客串兩日,今次就開足十日工,可以同謝天華做對手。但因為佢嘅身形,角色好有限制,志偉唯有安排佢扮肥妹,走佢媽咪後生時嘅戲路。」

愈食愈失控

試過同許廷鏗開餐,兩個人食五人分量,自暴自棄的欣宜,愈食愈好胃口。「可能唔使再扮靚女,欣宜更加放肆,加上呢排天氣凍,佢胃口更加大,喺片場放飯,試過一餐食兩個飯盒,佢份人好有衣食,一粒米都無剩,兩盒飯食到乾乾淨淨,有時拍完戲收工,欣宜又會跟大隊去食消夜,唔係打冷就係火鍋。平日欣宜鍾意飲咖啡,以前一定用脫脂奶,但依家連cream都照落,唔肥就假!」由十六歲開始減肥,欣宜最高紀錄試過減走一百磅,只可惜近年的她反叛性格再次現形,長輩說話更左耳入、右耳出,即使體重脹番到一百七十磅,欣宜亦懶懶閒,book了時間上修身堂做機,亦經常臨時甩底。「減肥本來就有平台期,減到一定磅數,想再減落去係唔容易,同樣如果體重升番上一定磅數,一樣一發不可收拾。」知情者說。原本跟修身堂簽下二○一二年拍攝泳衣廣告合約,因欣宜體重有升無跌,已經胎死腹中。「個廣告期已經改咗幾次,Shirley(張玉珊)又唔想逼佢,咪由份合約不了了之!」

有人跟唔敢食

本週一(一月七日)下午三時半,欣宜由列提頓道寓所坐的士到中環,她在文華酒店落車,行了兩條街去到環球大廈一間手機店鋪,幫手提電話黐保護貼。幫電話扮完靚,欣宜行過隔鄰的鴻福堂打算買嘢食,但由於發現有記者,最後欣宜買了一支豆漿就走人。之後去到中環修身堂樓下的Starbucks,欣宜想再入內買嘢食,見記者仍尾隨,唯有打消念頭,餓肚上修身堂做機。

慣性反叛

自小在單親家庭成長的欣宜,性格一向反叛,剛滿18歲已經唔理肥姐反對,日日掛住瘟仔,仲做埋煙民,肥姐過身後就更加無王管,auntie陳淑芬亦管唔掂。

晚晚瘟仔

剛滿18歲的欣宜,唔理肥姐反對,跟「童星」林寶麟拍拖,當時仍在溫哥華留學的她,日日放學唔願返屋企,同男友周街蕩,肥姐更試過棒打鴛鴦,兩母女因此吵大鑊。

台北扯煙

05年,欣宜隨肥姐到台北公幹,晚上趁媽咪返酒店休息,即相約友人夜蒲,其間更煙癮大發,當街扯煙,而且手勢相當熟練。

豪放啜仔

08年,肥姐過身,欣宜與男友Mark同居,二人更不時將情慾親密照放上facebook,相中的欣宜衣著性感,跟男友又攬又錫,相當豪放。

激嬲陳淑芬

10年,欣宜拍《隔離七日情》期間,將自己的低胸照,以及玩Bosco腋毛的相片放上網,當時身兼欣宜經理人及監護人的陳淑芬,一怒之下踩上欣宜屋企訓話,後來她索性玩失蹤,唔聽陳淑芬電話。

暗藏危機

長期暴飲暴食,除令欣宜體重急升,身體健康同時響起警號,高血壓、高血糖、高膽固醇,令小小年紀的欣宜已暗藏「三高」危機。

滿面暗瘡

15歲本值青春期的欣宜,唔肯戒口狂食煎炸垃圾食物,搞到滿面青春痘,直至開始減肥療程,飲食變得清淡,面上暗瘡才漸漸減退。

幾十粒膽石

04年,17歲的欣宜與肥姐到新加坡旅遊時,突然感到腹部劇痛,半夜入院,經醫生診斷後,發現膽部嚴重含膿,生了幾十粒膽石,要即時做割膽石手術。

三高人士

曾經以鮑魚做早餐的欣宜,年紀輕輕已成為三高人士,包括高血壓、高血糖兼高膽固醇,6歲的欣宜膽固醇已達30歲成年人水平,嚴重超標。

飯盒 打孖 孖上 張玉 玉珊 搶救 無效 欣宜 宜自 自暴 自肥 40
PermaLink: https://articles.zkiz.com/?id=42557

肥姐冥壽欣宜自揭嬲錯媽咪:由細俾妳打大

1 : GS(14)@2016-07-06 08:11:30

歌都有得唱:「世上只有媽媽好,有媽的孩子像個寶」,萬一好不幸咁冇咗媽媽,好似鄭欣宜咁,又會變成點呢?昨日欣宜喺Instagram度貼咗張相,入面係一張佢媽咪「肥姐」沈殿霞嘅黑白照,然後佢以《給她的道歉書》為題,寫咗篇約700字嘅長文,回憶起往事,去懷念,以及祝肥姐嘅71歲冥壽生日快樂。節錄部分內容,欣宜話記得16歲嗰年,佢可以喺溫哥華一個慈善表演中演出,肥姐做大會司儀,到咗一個難得嘅綵排日子,點知欣宜發高燒、失聲,仲鼻塞,抱恙上陣嘅佢照去綵排,點知跳極都學唔好啲舞步,一飛返當地就趕去睇囡囡綵排嘅肥姐睇唔過眼,鬧爆欣宜,話佢:「你做乜跳極都跳唔到o架?我坐喺側邊睇都已經識跳喇。你根本唔用心。」欣宜話好hurt、好嬲,事後佢知肥姐好戥自己開心,又將自己啲表演係咁播畀啲uncle auntie睇,事後欣宜終於對肥姐講出心底感受,先知原來肥姐係用心良苦,想激勵自己,等自己表演得好啲,欣宜到嗰陣時先知道自己嬲錯媽咪。所以欣宜就趁住媽咪生忌(註:肥姐生於1945年,農曆六月初一)嚟提番起呢件舊事,感激媽咪養成佢份不死心之餘,亦順便祝媽咪生日快樂。欣宜,肥姐見你咁生性,o依家又咁有成就,一定會好戥你高興,在天之靈都會感到安慰。加油啊!欣宜Ig全文:由細到大都俾妳打大。因為我實在太曵喇。但喺我過咗16歲生日之後妳就再冇打我了。那年16歲。喺溫哥華有個慈善表演我要唱歌、跳舞的。妳當然就係會做大會司儀啦。呢啲表演通常唔會俾好多時間我哋彩排o架,有機會今日排聽日表演,我心諗:冇問題!咁啱唔洗返學又可以做我最鍾意嘅野。我不知幾期待!排舞日來臨了!……………我卻發高燒。無奈程度超過一百。失聲、鼻塞、頭輕輕。但我知道我幾病都要做,因為我不能失場。排舞嗰日,妳搭完長途機由香港飛去溫哥華,其實妳可以選擇好好休息。但妳選擇坐喺排舞室內睇我跳。其實我好辛苦…但我知道答應咗唔可以唔做。所以我繼續跳跳跳,但跳咗好多次都記唔到啲Step。妳突然站起來走來我身邊。「你做乜跳極都跳唔到o架?我坐喺側邊睇都已經識跳喇。你根本唔用心。」當時妳這句話傷得我有幾痛妳知唔知?我心裡好嬲。妳係咪忘記咗我係發緊燒o架?我已經盡咗力o架喇!但我冇講到出來。嗰日返到屋企我匿埋喺房到一路重複再重複地睇嗰日排舞嘅片段。第二日雖然依然失聲仲要咪嘴跳,但都總算係演出成功!我知道妳還替我高興,錄低咗我嘅演出DVD妳都成日會攞出來睇番。朋友來到屋企妳又一定要播俾妳啲朋友睇。我諗起個時白痴嘅我仲要發妳脾氣,我記得我同妳講,喺排舞室裡面妳同我講既說話好Hurt我。之後妳話我知「BB,呢啲係叫激勵!唔係你點跳落去呀?」今日係妳冥壽,亦係Alfred出新MV嘅一日。喺呢個MV入面鮑姐個角色令我好掛住妳。我發現我以前嬲錯妳,我唔識企係妳個角度去睇。多謝妳嘅激勵。讓我練成不死嘅心。讓我面對困境時都能把它化為力量去追尋我嘅夢想,達成#我的志願。媽咪,生日快樂!





來源: http://hk.apple.nextmedia.com/entertainment/art/20160706/19683271
肥姐 冥壽 欣宜 宜自 自揭 揭嬲 嬲錯 媽咪 由細 細俾 俾妳 妳打 打大
PermaLink: https://articles.zkiz.com/?id=302717

欣宜自嫌見識少

1 : GS(14)@2017-05-18 01:10:59

鄭欣宜昨日到商台接受訪問,透露今日出發到法國參加康城影展,逗留三日便返港再去上海拍戲,之後再返港為爸爸演唱會綵排及到內地宣傳電影《29+1》,月底三十歲生日亦會在東莞工作中度過。去年生日於峇里度過,欣宜曾於一條後巷見到一位赤腳小朋友拿着膠袋、棍仔及繩當風箏玩,她說:「我哋言語不通,不過佢示意叫我一齊玩,當佢不停來回跑時,中途回頭好開心咁笑,呢種快樂係免費,所以我好想去一個體驗旅行,人生去到三十歲,過去九年都忙工作,來來去去幾個地方見幾個人,其實世界好大,好想去睇多啲。」欣宜又說跟慈善機構探訪也可以,但短時間內難以實行。採訪、攝影:馬建華




來源: http://hk.apple.nextmedia.com/entertainment/art/20170517/20023352
欣宜 宜自 自嫌 見識
PermaLink: https://articles.zkiz.com/?id=333170


ZKIZ Archives @ 2019