【《蘋果》專訪】一講仔女即喊張兆輝獻唱冧妻「一生中最愛」
1 :
GS(14)@2017-06-10 13:09:27■自爆被老婆彈似一碌木的張兆輝，拿起結他即變型佬。
現年54歲的張兆輝是行內公認的好男人、好老公和好爸爸，日前他應《蘋果動新聞》邀請在鏡頭前獻唱《一生中最愛》送給太太郭碧妍，認真冧死人。
■張兆輝即場獻唱《一生中最愛》冧太太，輝嫂開心拿着手機不斷錄影。
輝嫂
■張兆輝十分疼錫太太及子女，直言曾因不捨離港拍劇而落淚。
每朝陪女食早餐
張兆輝跟太太結婚20年來一直恩愛，不過輝哥受訪時透露，原來輝嫂覺得他像「一碌木」，他說：「成日都話我木無表情呀，或者又唔浪漫呀。?家知道呢樣嘢唔啱，就慢慢改變啦，有時見到啲歌詞好冧，咪唱畀佢聽表白一下，咁佢真係我一生中最愛嘛！」除太太外，一對仔女亦是輝哥的命根，雖然拍劇時間日夜顛倒，但輝哥稱會爭取「親子時間」：「咪入去房望吓佢哋，見到佢甜睡嘅時候，已經好安慰㗎喇，有時又幫佢冚吓被，索吓佢啖味咁樣囉！」講到以前首次要離港拍劇，臨走前想起要離開家人，輝哥更講到眼泛淚光。細女張卓姿下年會跟哥哥張焯鏗去留學，輝哥直言不捨，惟有盡量抽時間陪伴：「?家每朝都6點半起身陪個女食早餐，抱抱、傾吓偈維繫感情。」
下定決心Keep Fit
82年完成訓練班入行至今超過30年，輝哥近年除工作外，會更珍惜跟家人相處時間：「我哋喺呢一行日拍夜拍，日做夜做，突然間有一日see you，好似曾守明，我之前都有同佢WhatsApp，點知會突然間發生呢啲事？經歷多咗，做人要珍惜時間。」輝哥透露劇集出街後迷倒少女觀眾，他表示：「之前我去一個活動，有啲小妹妹叫我大莊生（劇中名字），又讚好靚仔，真係多謝大家支持。」他指以前曾有段身形暴脹的時間，直到六年前才下定決心keep fit，更鼓勵新一代藝人，努力做好角色，裝備好自己。採訪：何慧斯、懷鈺攝影：沈健程服裝：Ted Baker化妝：Frances Ho of jessicachan_make-up場地提供：Big Echo
來源:
http://hk.apple.nextmedia.com/entertainment/art/20170608/20047960
【唔捨得個女】54歲張兆輝一講即喊半夜入房聞陣味
1 :
GS(14)@2017-06-10 13:09:27一講起女兒之後將離港升學，本來一直健談風趣的輝哥突然眼泛淚光。
張兆輝除咗識得唱情歌冧老婆，查實講到佢17歲嘅囝囝張焯鏗同13歲嘅張卓姿，輝哥都一樣咁鬼冧！講到以前拍劇搞到日夜顛倒，親子時間自不然唔多，之不過睇你點樣分配時間啫，輝哥話就算佢哋瞓晒覺，都會爭取時間「親子」：「咪入去房望吓佢哋，見到佢甜睡嘅時候，已經好安慰㗎喇，有時又幫佢冚吓被，索吓佢啖味咁樣囉！」
仔女o依家都17同13歲，輝哥諗番佢哋細個就最開心。(被訪者提供圖片)
輝哥講起個女就唔停口。(被訪者提供圖片)
收工返到屋企，仔女瞓晒覺，輝哥要聞吓佢哋陣味「親子」吓。呢個係妹妹BB(被訪者提供圖片)
其實聽落一啲都唔重口味，如果你哋都係工作型父母，都一樣會咁做，你懂的！之後輝哥講到第一次要離開香港幾個月拍劇，見唔到家人嗰種感覺，講講吓仲眼濕濕話：「我有個電腦入面有好多佢哋細個嗰啲相同短片，我太太唔俾我睇㗎，因為怕我會感觸，佢話：『嘩！你睇埋呢啲咁嘅片，仲聽埋呢啲咁憂怨嘅歌，梗係唔開心喇！』」仔女細細個時就最得輝哥鍾愛，因為成日都喺自己身邊嘛，尤其囡囡呀：「細女細個好得意㗎，譬如佢自己好輕鬆行咗去前面都好喇，咁我喺後面，佢行吓停吓又望番轉頭，見到你又走番埋嚟捉住你對手拖，即係永遠都係喺身邊。見唔到我，又會猛問daddy喺邊度呀，成日都daddy、daddy。」又諗番起件冧爆事件：「個女兩歲時，夏天好熱㗎嘛，我着鞋嘅時候，已經一頭汗，佢就行去攞張紙巾幫我抹汗，嘩…仲唔值呀，超值啦！嗰陣時兩歲咋喎。」人哋話女兒係爸爸嘅前世情人真係冇講錯。
唔捨得。真係好唔捨得。
有時要離家幾個月去拍戲，輝哥掛住啲仔女就會睇相，然後好感觸。(沈健程攝)
不過細女下年會跟埋哥哥去留學，輝哥都話唔捨得，但係諗深一層都希望佢學多啲，惟有自己抽多啲時間飛去探佢哋，又話好彩近排都係喺香港工作：「咁咪可以留喺屋企，又可以去拍嘢，拍完辛苦又可以見到啲家人，如果呢幾個月又離開屋企，咁咪又少咗幾個月見面。」珍惜同家人嘅相處嘅輝哥，o依家每朝都6點半起身陪個女食早餐，抱抱、傾吓偈維繫感情。唔知輝哥遲啲又會唔會做「呷醋外父」呢？「我唔敢諗咁遠喎！呢啲嘢順其自然喇！如果佢真係搵到一個好好嘅男仔照顧佢又愛佢，冇所謂，最緊要佢開心快樂喇！細個嘅時候喺daddy身邊好快樂，大個嘅時候喺佢愛人身邊一樣要好快樂！」
哥哥已經去咗外國升學，下年到妹妹喇，輝哥兩老當然唔捨得。(被訪者提供圖片)
妹妹細個好得意，唔怪得輝哥咁錫佢。(被訪者提供圖片)
採訪：何慧斯、懷鈺攝錄：馮峰、Neo攝影：沈健程服裝：Ted Baker化妝：Frances Ho@jessicachan_make-up場地：Big Echo
來源:
http://hk.apple.nextmedia.com/entertainment/art/20170608/20047946