ZKIZ Archives


中環在線:秋官拜拜大市升返晒 李華華


2010-12-15  AD




 

港股近呢兩日個勢唔錯,有人話芬佬粉飾櫥窗,又有人話阿爺收手等大家開心收爐,不過華華個拍檔榮少噚日就畀咗個更強而有力嘅理由─因為鄭少秋(秋官)套劇播完!

《刑警》收爐唔使聽盈警

榮少話,原來秋官10月喺二奶台播嗰套《書(輸)劍恩仇錄》,上個禮拜五已經靜靜雞大結局,而大婆台嗰套個名唔多老利嘅《刑(盈)警》亦同日收爐,股市鬼見愁消失、盈警冇埋,個市自然有得彈,聽落去又好似幾有point。

當然,升咗嘅已經追唔返,咁仲有冇水位呢?為咗用較科學嘅角度去睇「秋官效應」,華華做咗個小統計,得出嚟嘅結果係,秋官嘅劇一播完,港股真係有運行!

好似最近五套秋官劇集落畫之後,港股喺隨後嘅1至3個月,只有一次意外下跌,即係升市嘅機會高達90%,粗略計平均一個月內升3.8%,三個月更升夠10%,最勁就係09年播完《桌球天王》之後,恒指一季內竟然彈咗30%,真係好邪!

《書劍》播完兩日彈268點

講返近啲,前排喺央視播完《神醫大道公》,個市亦開始上返嚟,今次《書劍》播完,大市兩日彈268點,只得1.2%,如果信秋官良好往績,o依家入市仲有大把水位,所以大家記住以後賺到錢,唔好再怨秋官。近排秋官拍緊套古裝劇《紫禁驚雷》,應該未有耐上,大家唔使擔心。

秋官近年劇集落畫後港股多上升

劇集:神醫大道公播出日期: 5/2010

1個月恒指表現:+6.99%3個月恒指表現:+6.10%

劇集:桌球天王播出日期:3/2009

1個月恒指表現:+12.21%3個月恒指表現:+30.96%

劇集:潮爆大狀播出日期:4/2006

1個月恒指表現:-4.19%3個月恒指表現:+1.76%

劇集:御用閒人播出日期:3/2005

1個月恒指表現:+2.69%3個月恒指表現:+2.18%

劇集:非常外父播出日期:0/2003

1個月恒指表現:+1.04%3個月恒指表現:+9.02%

李華華

LiWaWa@AppleDaily.com


中環 在線 秋官 拜拜 大市 升返 返曬 華華
PermaLink: https://articles.zkiz.com/?id=20324

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019