📖 ZKIZ Archives

馮仁昭四圍超：收3卡鑽戒訂婚蔡雪瑩做猴年新娘

1 : GS(14)@2016-02-16 08:11:07

■蔡雪瑩喺Ig貼相宣佈結婚，見到佢手上嘅3卡求婚鑽戒好耀眼。互聯網圖片








有高登「至索主播」稱號嘅無綫前新聞小花蔡雪瑩，以及宅男女神黃美棋喺情人節齊齊「封盤」，雪瑩BB同上市公司太子爺朱威霖（William）訂婚，美棋BB就公開承認同有線主持鍾健威（Ray）嘅戀情，對唔少宅男嚟講，呢一個情人節肯定雪上加霜！


■William食住燭光晚餐，以鮮花鑽戒抱得美人歸。


雪瑩BB同William拍拖未夠一年，但William就好心急咁同雪瑩BB求婚，以3卡鑽戒同鮮花攻勢打動女友下嫁。前晚雪瑩BB同男友喺尖沙嘴半島酒店食西餐慶祝，其間佢喺facebook上載戴住3卡巨鑽嘅拖手相，仲有張雪瑩BB攞住鮮花同男友合照相，笑住留言話男友會愛佢一世，冇耐雪瑩BB仲喺Ig貼相宣佈訂婚。馮仁昭噚日打畀雪瑩BB恭喜佢，問到男友求婚過程，佢話：「都係嗰啲行嘢啦！我哋食西餐，食食吓佢話：『其實有啲嘢想同你講……』之後求婚。」咁幾時結婚？佢話：「應該今年會擺酒！」求婚戒指係咪3卡？雪瑩BB就話唔知：「我哋好認定對方，佢問我如果汽水蓋嫁唔嫁？我話我都會嫁嘅！」撰文：馮仁昭





來源: http://hk.apple.nextmedia.com/entertainment/art/20160216/19492301
PermaLink: https://articles.zkiz.com/?id=296023

馮仁昭四圍超：坤哥為母親詛咒賊仔

1 : GS(14)@2016-02-16 08:31:26

吳業坤噚日新年流流喺fb鬧人不得好死，佢嬲爆指媽咪唔見咗部電話，佢話：「我媽媽在屯門醫院，日間，5/f唔見了電話，如拾到重酬。是粉紅色case，偷的人不得好死，拾遺不報不得好死。」有網民話佢唔應該咁詛咒人，坤哥亦都好快咁刪走「不得好死」呢四個字，但就繼續話偷嘢同拾遺不報都係唔啱。撰文：馮仁昭





來源: http://hk.apple.nextmedia.com/entertainment/art/20160216/19492305
PermaLink: https://articles.zkiz.com/?id=296033

馮仁昭四圍超：周杰倫哈仔　魔法對決

1 : GS(14)@2016-02-18 08:55:51

電影《非常盜》（Now You See Me）2013年上映時非常賣座，以魔術作為題材風靡全球，片商開拍續集《非常盜2》（Now You See Me：The Second Act）已定今年6月10號喺北美上映。除咗原班人馬謝西艾辛堡（Jesse Eisenberg）、活地夏里遜（Woody Harrelson）、Dave Franco、麥克雷法路（Mark Ruffalo）之外，續集仲加入咗「哈仔」丹尼爾拉德克里夫（Daniel Radcliffe）、Lizzy Caplan同埋周杰倫。


■「哈仔」丹尼爾喺《非常盜2》預告片大施魔法。劇照

舞動甫士型爆

電影喺上年拉隊到澳門取景，月前已公開首個長約一分鐘嘅預告片，除咗謝西艾辛堡等人上演魔術表演，麥克雷法路喺澳門亦有打鬥戲份，但就唔見周杰倫，有傳佢只係客串扮演古董店老闆。不過，噚日公開一系列宣傳海報終於解開謎團，同時推出美版及內地版，唔止有齊幾位主角嘅單人照，周杰倫亦以魔術師造型亮相！幾位主角喺藍色燈光折射到玻璃鏡面下，盡顯魔術奇幻世界，周杰倫擺出型格舞動甫士，而演學院派魔法師嘅丹尼爾就單手飛起啤牌，有如魔術老手一樣。時隔三年，神秘「天眼」再次出現喺海報右下角，上集每位魔術師都收到一張啤牌邀請卡，「天眼」標誌似暗藏玄機。撰文：馮仁昭





來源: http://hk.apple.nextmedia.com/entertainment/art/20160218/19494881
PermaLink: https://articles.zkiz.com/?id=296134

馮仁昭四圍超：李玟唱《臥虎二》主題曲

1 : GS(14)@2016-02-18 08:55:54

李玟（CoCo）曾經喺15年前為電影《臥虎藏龍》唱主題曲，今年佢同鋼琴家郎朗及蕭敬騰合作為電影《臥虎藏龍二之清冥寶劍》唱主題曲，CoCo話：「其實今次都差啲錯失機會，因為我接咗內地歌唱節目《我是歌手》，最初擔心時間上配合唔到而推咗。」最後喺荷李活電影公司老闆Harvey Weinstein親自游說，CoCo最終應承咗。撰文：馮仁昭





來源: http://hk.apple.nextmedia.com/entertainment/art/20160218/19494891
PermaLink: https://articles.zkiz.com/?id=296135

馮仁昭四圍超：霆鋒亂噏奇隆婚期

1 : GS(14)@2016-02-18 08:55:58

謝霆鋒同吳奇隆前日喺澳門為電視劇真人騷《蜜蜂少女隊》舉行記者會。奇隆受訪時被追問婚期，佢半笑住反問：「我為甚麼要告訴你！說了我還有甚麼驚喜。」但隔籬嘅霆鋒就搶答話3月5號，原來係想宣傳節目播出日期，但霆鋒連日期都搞錯，要由助手更正係3月12號。節目中奇隆同霆鋒要各自訓練一隊歌唱女團，作最終PK戰。撰文：馮仁昭





來源: http://hk.apple.nextmedia.com/entertainment/art/20160218/19494901
PermaLink: https://articles.zkiz.com/?id=296136

馮仁昭四圍超：童童自覺唔啱父母風格

1 : GS(14)@2016-02-18 08:56:02

王菲囡囡竇靖童最近決定加入樂壇做歌手，大家對佢嘅舉動都好關注，童童喺內地接受專訪，講到爸爸竇唯：「我每次回北京都會給他打電話，然後我、他、爺爺，我們三個聚，喝喝茶，聊聊天，最近怎麼樣啊甚麼的。」雖然佢父母喺音樂方面係頂尖人物，但童童話好少向佢哋請教：「我覺得那是他們的風格，只適合他們，我更感興趣的是找到自己的一套方案。」撰文：馮仁昭





來源: http://hk.apple.nextmedia.com/entertainment/art/20160218/19494908
PermaLink: https://articles.zkiz.com/?id=296137

馮仁昭四圍超：鄧達智書法差要拜師

1 : GS(14)@2016-02-18 08:56:14

時裝設計師鄧達智（William）噚日喺中央圖書館出席羅澄波書法展開幕禮，William話自己書法一直都好差，認識咗羅校長幾年，過年前忙完私房菜餐廳嘅手尾，終於下定決心上堂學書法，仲自嘲係個老學生㖭，講到會唔會將書法放喺設計上面？William話：「都希望，曾經有人問我點解要用九龍皇帝啲字？你啲字都夠衰。」撰文：馮仁昭





來源: http://hk.apple.nextmedia.com/entertainment/art/20160218/19494918
PermaLink: https://articles.zkiz.com/?id=296138

馮仁昭四圍超：JW慨嘆冇人追

1 : GS(14)@2016-02-18 08:56:17

JW（王灝兒）噚日喺商台宣傳新歌《多少年》，佢話首歌係《矛盾一生》嘅延續，仲話好多女仔聽完會有感受，希望佢哋能終成眷屬。唔知佢有冇擔心好友何超蓮同鄧紫棋（G.E.M.）嘅感情生活？佢話：「佢哋咁靚唔使擔心，超蓮又靚又聰明，G.E.M.又有才華，反而我自己矛盾一生，要多少年先可以終成眷屬，但而家冇人追，不過屋企人冇催婚，反而希望我多啲陪佢哋。」撰文：馮仁昭





來源: http://hk.apple.nextmedia.com/entertainment/art/20160218/19494926
PermaLink: https://articles.zkiz.com/?id=296139

馮仁昭四圍超：汪峰舊愛被阻見女

1 : GS(14)@2016-02-18 08:56:20

汪峰舊愛葛薈婕不滿章子怡貼拖住佢女兒同汪峰合照上網，喺網上向子怡發炮，結果俾汪峰寫千字文鬧爆，前晚佢又再更新微博，雖然冇再撩交嗌，但就爆自己一年冇見過囡囡，留言暗示係汪峰嘅問題，佢話：「超過一年未見蘋果（其女乳名）幾次致電表達想見女兒都未果。我只想見女兒，剩下的你們幸福就好！」隨即引咗成二萬人留言，但好多都係鬧佢。撰文：馮仁昭





來源: http://hk.apple.nextmedia.com/entertainment/art/20160218/19494934
PermaLink: https://articles.zkiz.com/?id=296140

馮仁昭四圍超：紅姑56歲生日狂收花

1 : GS(14)@2016-02-18 23:32:36

微博圖片








前日係大美人鍾楚紅（紅姑）嘅56歲生日，喺呢個重要日子，梗係有唔少朋友同佢慶祝，紅姑噚日喺微博貼相兼留言，佢話：「謝謝大家的祝福！感恩！」原來佢啲朋友知道紅姑係愛花之人，所以除咗送蛋糕之外，梗係唔少得靚花喇！睇見佢一口氣晒咗七紮花出嚟，仲露出一臉冧爆嘅笑容，似乎好滿意朋友嘅心意。撰文：馮仁昭





來源: http://hk.apple.nextmedia.com/entertainment/art/20160218/19494885
PermaLink: https://articles.zkiz.com/?id=296226
Next Page
ZKIZ Archives @ 2019