📖 ZKIZ Archives

馮仁昭四圍超：《我結婚了》網上任聽鍾嘉欣甩老公處女黨嘆啡

1 : GS(14)@2016-03-01 18:57:31

■嘉欣為咗答謝姊妹團，甩開老公同一班姊妹去飲下午茶。微博圖片








鍾嘉欣（Linda）同相識10個月、拍拖半年、貴為無綫集團前主席梁乃鵬嘅脊醫姪仔Jeremy閃電結婚，佢仲默認有咗BB。嘉欣喺香港時間前日為單身日記畫上完美句號，佢喺facebook上載同老公深情對望嘅婚照，然後簡單寫上一句：「謝謝大家的祝福！」本報記者喺嘉欣加拿大愛巢門外日夜守候，仍然未見新婚夫婦蹤影。鍾嘉欣揭開人生新一頁，噚日佢喺微博留言再次向所有人致謝，又守承諾公開咗自己為婚禮所作嘅歌曲《我結婚了》分享喜悅，鍾嘉欣話：「之前應承過會將我自己作曲的新歌《我結婚了》放上微博同大家分享結婚心情，希望大家會鍾意！My new chapter in life begins……lovelovelove。」



■本報記者喺嘉欣愛巢外守候，但仍未見佢哋蹤影。記黃曉程溫哥華傳真

■嘉欣同Jeremy閃婚，揭開人生新一頁。資料圖片

■婚宴嘅回禮盒，全部都由嘉欣親手製作。微博圖片



親手製回禮盒

一班處女黨姊妹團岑麗香、李亞男、苟芸慧、王君馨將各有各忙，佢哋喺臨別前再次茶敍，噚日王君馨上載合照話：「原來可以在公眾地方，簡簡單單一齊飲咖啡可以咁開心……」之後香香轉飛美國，李亞男留喺溫哥華探親，苟芸慧喺加拿大拍嘢。另外，主播何詠雯前晚出席婚宴之後，上載咗一張婚宴回禮盒嘅相，上面寫上LJ英文字樣，盒邊更鑲有閃令令嘅碎石，何詠雯話全部都係嘉欣親手做，Linda同Jeremy嘅英名簡寫LJ都係由嘉欣親手寫上去，真係極之有心思同誠意。撰文：馮仁昭





來源: http://hk.apple.nextmedia.com/entertainment/art/20160301/19510784
PermaLink: https://articles.zkiz.com/?id=296468

馮仁昭四圍超：杜Sir操刀海報被消失

1 : GS(14)@2016-03-01 18:57:37

杜琪峯監製嘅電影《樹大招風》入圍柏林電影節「新電影國際論壇」，同時又被選中成為今年香港國際電影節嘅開幕電影。套戲下個月會喺香港上映，之前杜Sir就親自操刀拍攝宣傳海報，3位主角任賢齊、陳小春同林家棟接到通知就即刻埋位。


杜琪峯


不過，《樹》片最後竟然用咗另一款海報，問杜Sir介唔介意？佢霸氣回應：「唔用咪唔用囉，使乜點解！」撰文：馮仁昭





來源: http://hk.apple.nextmedia.com/entertainment/art/20160301/19510795
PermaLink: https://articles.zkiz.com/?id=296485

馮仁昭四圍超：無綫改頻道搞亂收視

1 : GS(14)@2016-03-01 18:57:37

無綫噚日出收視報告，淨係得無綫冇咗亞視，唔知仲以為佢估到亞視有可能熄機㖭！睇埋佢啲劇集嘅收視，居然全部比上星期升咗10點以上，原來係同佢改頻道有關。因為上星期一開始85台J5台同81台翡翠台完全分家，之前要兩邊睇劇嘅觀眾就歸番晒去81台，所以《公公出宮》收視先至會勁升15.1點至28.6點，而無綫以後只會有自己台嘅收視報告，其他台就變晒內部參考資料，唔再公開啦。撰文：馮仁昭





來源: http://hk.apple.nextmedia.com/entertainment/art/20160301/19510797
PermaLink: https://articles.zkiz.com/?id=296486

馮仁昭四圍超：美棋BB瞞男友認愛

1 : GS(14)@2016-03-01 18:57:37

黃美棋（左）、唐寧、泰臣同張堅庭噚日為港台劇集《辦公室生存之道》宣傳，美棋情人節貼相公開同鍾健威戀情，被問到此事臉都紅晒，佢話只係拍咗兩個月拖，美棋又話唔知男友需要啲乜，所以冇準備情人節禮物，有記者問男友係咪需要名份？美棋就笑住否認。美棋話係趁住男友瞓覺嗰陣靜靜雞公開戀情，男友知道後都嚇親，咁係咪視男友為結婚對象？美棋話睇男友造化。撰文：馮仁昭





來源: http://hk.apple.nextmedia.com/entertainment/art/20160301/19510791
PermaLink: https://articles.zkiz.com/?id=296487

馮仁昭四圍超：潘燦良想拍電視劇

1 : GS(14)@2016-03-01 18:57:38

余安安同潘燦良噚日喺香港大會堂出席香港話劇團宣傳今年劇目嘅記者會，余安安將會喺內地重演上年作品《最後作孽》，近月會集中火力做好15場舞台劇，依舊會出私伙服裝，名正言順出錢又出力。潘燦良之前有份拍港視劇集跳入公仔箱，下個月ViuTV開台，潘燦良直認對拍劇有興趣，仲話自己係電視初哥，不過暫時就未有人好認真同佢傾合作。撰文：馮仁昭





來源: http://hk.apple.nextmedia.com/entertainment/art/20160301/19510799
PermaLink: https://articles.zkiz.com/?id=296488

馮仁昭四圍超：松崗參演小丸子扮野口

1 : GS(14)@2016-03-01 18:57:38

汪東城（大東）、松崗李那同埋師妹林芯蕾噚日喺台灣出席櫻桃小丸子真人版電視劇嘅記者會，汪東城今次做花輪同學，松岡就做野口同學，而小丸子就由林芯蕾擔任。汪東城話今次會用好多電腦特技加強動畫式效果，王友良仲話：「最初同作者櫻桃子老師提議用大人演繹小朋友角色，佢唔係好接受，不過佢見到大東之後覺得佢同花輪好似，所以佢決定接受。」撰文：馮仁昭





來源: http://hk.apple.nextmedia.com/entertainment/art/20160301/19510810
PermaLink: https://articles.zkiz.com/?id=296490

馮仁昭四圍超：麥家瑜否認公司偏心

1 : GS(14)@2016-03-01 18:57:38

麥家瑜（Keeva圖）噚日去咗商台宣傳新歌《給自己的命書》，相隔兩年幾先再出歌，被問到係咪公司將資源投放喺其他歌手度？佢話：「其實唔係，之前我忙舞台劇，用咗整整一年時間演兩個舞台劇，所以冇時間揀歌，今次再派歌，心情好似做新人咁緊張。」同場嘅丁悅話日前喺網上節目被歌迷點唱，點知佢完全唔知首歌係自己作品，佢話可能出碟時改咗歌名但冇人通知。撰文：馮仁昭





來源: http://hk.apple.nextmedia.com/entertainment/art/20160301/19510818
PermaLink: https://articles.zkiz.com/?id=296491

馮仁昭四圍超：陳庭欣瞞翟威廉　硬撬大狀

1 : GS(14)@2016-03-05 01:12:11

■陳庭欣不時同唐偉倫一齊出席飯局。互聯網圖片








現年28歲嘅前港姐冠軍陳庭欣（Toby）雖然一直唔認，但同港男冠軍翟威廉拍拖已經係公開嘅秘密，兩人仲發展成半同居關係。不過噚日有雜誌報道話Toby瞞住男友，暗交楊恭如舊愛、有米大狀唐偉倫，而男方亦已經有一位穩定女友Candice，因而發展出一段四角戀。



■陳庭欣一直唔承認同翟威廉係男女朋友關係。資料圖片

■早前陳庭欣明明係大狀屋企留宿，但就喺Ig貼咗一張準備瞓覺嘅相。互聯網圖片



明目張膽攬頭攬頸

雜誌報道指上月22號Toby趁唐偉倫個正印Candice唔喺香港，兩人雙雙去數碼港嘅戲院睇戲，一出戲院門口Toby就戴番口罩遮樣，兩人前後腳去攞車，之後就返咗男方喺附近碧瑤灣嘅寓所。其實數碼港戲院已經成為佢哋兩個人嘅密會勝地，月前佢哋又約係嗰度睇戲，Toby又係包到實現身。最高招仲係明明事後Toby去咗大狀屋企留宿，但就喺Instagram貼咗一張準備瞓覺嘅相，被指製造假象畀翟威廉睇，扮喺屋企。報道又話，正印Candice舊年已經知道Toby呢位小三存在，亦都捉過幾次佢同自己男友約會。最後Candice選擇原諒，唔知係咪咁，Toby試過喺一個春茗飯局明知Candice在場，Toby仲特登同唐偉倫攬頭攬頸挑釁，又試過將唐偉倫嘅愛犬相放上自己Ig示威。撰文：馮仁昭





來源: http://hk.apple.nextmedia.com/entertainment/art/20160303/19513580
PermaLink: https://articles.zkiz.com/?id=296720

馮仁昭四圍超：鍾嘉欣婚紗杏兒出品

1 : GS(14)@2016-03-05 01:12:11

鍾嘉欣上年底秘密嫁咗畀脊醫老公Jeremy，日前已經喺溫哥華補擺喜酒。雖然結婚消息事前好保密，但而家唔使再收埋，所以又有一套pre-wedding着婚紗相出爐，嘉欣着住性感露肩款式婚紗，手拎花球，遮住個肚又遮住個胸，似乎有啲刻意。而呢條白紗裙，正是出自好姐妹胡杏兒有份嘅婚紗公司。撰文：馮仁昭





來源: http://hk.apple.nextmedia.com/entertainment/art/20160303/19513619
PermaLink: https://articles.zkiz.com/?id=296721

馮仁昭四圍超：G.E.M.被傳搭上華晨宇

1 : GS(14)@2016-03-05 01:12:11

資料圖片








鄧紫棋（G.E.M.）早排被爆同中國《快樂男聲》歌手華晨宇蹺手同遊深圳世界之窗，唔夠兩個月，G.E.M.又俾內地傳媒偷拍到出入華晨宇屋企。報道話G.E.M.早前深夜現身華晨宇喺北京新居，疑似為對方慶祝生日，到第二朝早，華晨宇仲親自送G.E.M.出機場，佢哋一齊行冇乜避忌，華晨宇仲摸G.E.M.個頭，佢哋兩個人嘅新戀情呼之欲出。撰文：馮仁昭





來源: http://hk.apple.nextmedia.com/entertainment/art/20160303/19513590
PermaLink: https://articles.zkiz.com/?id=296723
Next Page
ZKIZ Archives @ 2019