財經CAREFREE - 順叔 買樓自由行(下) (2011年12月14日)
1 :
GS(14)@2011-12-14 23:59:48http://www.am730.com.hk/article.php?article=85310
早排有位神秘人，捐咗幾十本遠古「樓書」俾香港博物館，大家攞住近年的新盤銷售資料，入香港博物館對比一下，就會知道近二十年，香港地產商賣樓手法的轉變，變得愈嚟愈離譜愈搵笨，「預售」之前仲有「預留」，牛池灣變成清水灣，垃圾堆填區變園林美景，有時仲出現疑似股票莊家式搭棚托市的手法，44樓變88樓可以話風水，收800方呎價錢，賣600方呎單位俾消費者，就唔單止係呃秤，而係明搶。
立法規管樓花銷售呢家嘢，大大話話講咗最少廿年，絕對冇誇張，早在1992年，法律改革委員會，已經成立專責小組研究有關問題，先後在1995年及2002年，提出有關規管樓花及售樓說明的立法建議，但最後都係不了了之。
物極必反，拖足廿年，公眾對新樓市場種種混帳現象忍無可忍，政府終於被迫出招，上個月，終於推出「有關規管一手住宅物業銷售的建議法例諮詢文件」，進行公眾諮詢，搞得嚟，如無意外，有關法例最快要由下年選出的新一屆立法會通過。
政府今次講明，目前香港一手住宅市場，買賣雙方「地位並不對等」，地產商有「較大優勢」(措辭太婉轉了)，「社會上有強烈意見」，要求立法規管銷售，提供清晰準確的物業資料，以保障消費者。幾項重要立法建議，包括有關「實用面積」及「價單」的規定，要發展商「須讓買家參觀有關一手已落成住宅物業」、以及引入「冷靜期」等，基本上同去年6月推出的所謂「9招12式」相若，算係幾認真，經過立法會變成點就有待觀察，希望香港政府及政客，今次真心要在一手住宅市場，還香港置業人士一個公道及「自由」。
就住呢個拖咗廿年的立法諮詢，順叔作為外行人，都有幾句嘢想講，仲未講完，下回再續：完結篇。