投資港股：鐵江現貨(九) 阿牛
http://hk.myblog.yahoo.com/yomagyomag/article?mid=2930
讓阿牛歸納一下過去幾天的新股上市策略，來厘定我對鐵江現貨上市的炒賣策略。
首先，亂炒基金已經花了一半買入297中化化肥，所以只剩一半，即喺porfolio嘅2.5%。阿牛亦沒有意圖抽調其他錢加碼。
到下星期三，上市前一天，密切留意暗盤價。如果開紅盤，即喺暗盤價高過HKD1.8，咁就全部錢買入893中國鐵鈦。
前兩天有Blog友問，如果暗盤出得遲，買唔切鐵鈦，咁點好。呢個問題問得好，因為阿牛本身大把鐵鈦股票，自己借俾自己就攪掂，根本唔駛買；只要借幾多，過兩日補反幾多便是。如果閣下冇鐵鈦在手，我贊成睇到暗盤價，喺去馬先至好入鐵鈦；遲遲睇唔到，就寧願放棄左呢第一part算數；唔值得一早買定。
好喇，到上市嗰日，一開市就立即入貨，喺用鐵鈦嘅等值買入；跟住坐喺度睇戲。呢個時候，即喺有鐵鈦，又有鐵江，但喺錢就得一半；如果炒過股票嘅朋友就知道，只要同一日沽出鐵鈦，咁就三日後自動會對數，冇所謂嘅。
隻鐵鈦，就以下午收市前，三點九，賣出就最有可能賺錢。亦即喺話，當日全日唔須要做嘢，行行企企，可以做吓其他嘢唔駛咁緊張。
買左之後就等第二朝一開市，趁佢開高少少，頭嗰十分鐘；最好疊正第八分鐘就立即出貨。賺多賺少就要睇個天錫唔錫我地喇。
如果暗盤跌破底價，咁就坐定定，乜都唔好郁，等上市再算。
上市第一天，亦唔買貨，隔岸觀火；到第二日，一開市小裂口開高，就立即入市。然後到當日下午三點半，不問價沽出；完成整套動作。
有賺嘅，好彩時20%都有可能，唔好彩時，蝕1%至2%亦未可知。
簡單嚟講，就喺用暗盤價高低分開兩種玩法；而兩種都喺睇住個時間做人，唔喺睇股價做人。
咁玩法，喺咪新奇好玩呀？
投資港股：四環醫藥(一) 阿牛
http://hk.myblog.yahoo.com/yomagyomag/article?mid=2949
460四環醫藥，以HKD3.88至HKD4.6上市，從十月十五日起至二十日招股，二十八日上市。
呢隻股票引起阿牛注意，喺因為溫總位公子，溫雲松的私募基金，新天域於接近上市前入股，以每股RMB1.01的超筍價買了公司9%，結果該交易給香港聯交所否決，認為交易太接近上市，質疑觸犯《上市守則》有關「上市證券的所有持有人均會受到公平及平等對待」的原則。結果四環賠償溫雲松先生RMB3.7億，取消交易。
四環的基礎投資者還有國壽，建銀，阿里巴巴，和索羅斯的Quantum，粒粒都是巨星。
但如果計市盈率，四環就只有PE = 33，非常貴。
究竟四環喺做乜嘅呢？
佢話自己做心腦血管藥物，國內市場佔有率約喺7.4%。至於國外佔有率，阿牛揾勻全本招股書都冇，我估怕且都喺0%囉。
四環主要做生產，然後經2000個分銷商，賣去31個省份，10000間醫院。其中心腦血管藥物佔銷售量83%，其餘17%就是賣抗生素，羊癇症，止暈等等的二線藥物。
83%的『揾食傢伙』，包括十四隻心腦血管藥物。當中的皇牌是三隻藥：克林澳，安捷利，和鹽酸川芎嗪。
三隻藥都是國家注冊，領有生產專利的藥物，專利會一直達到2024年。即喺仲有14年。專利期限，在藥物業喺重要資產，因為專利一完結，任何其他廠家都可合法生產，產品簡稱『雜廠』generic medicines。一般藥物的零售價，都會在專利完結時下跌七、八十個%，所以專利一過，產品就無利可圖，僅足糊口。呢三隻皇牌，據說現時佔全國醫治心腦血管病的17%市場，而且銷售連續三年，以每年30%逐年遞增。2010年，銷售額約三億元人民幣。
咁咪好發！
究竟啲藥醫乜嘅呢？
投資港股：四環醫藥(二) 阿牛
http://hk.myblog.yahoo.com/yomagyomag/article?mid=2952
乜嘢叫做心腦血管病呢？
原來，心臟同腦部嘅血管，size喺差唔多闊窄嘅，屬於中小型血管。佢地一個共通嘅疾病喺『閉塞』。如果個心嘅血管閉塞，就叫做心肌梗
如果個腦嘅血管閉塞，就叫做中風。
或者有人會問：乜中風唔喺爆血管咩？點解喺閉塞呢。原來我地平常見嘅中風，80%都喺血管塞左，只有20%真喺爆左火管。
咁點解無啦啦啲血管會塞呢？答案就好複雜。有時因為血管俾膽固醇塞左大半，跟著有血小板黐左落去，塞晒佢，有時因為高血壓令血流量改變，所以血小板凝固，塞左，有時因為心律不正，引至塞左。總之最終都喺條血管俾凝結嘅血塊塞左。
塞左血管，個損害喺乜呢，就喺條血管供應的心臟肌肉，或者腦部細胞，冇左血液供應，冇氧氣，冇營養。跟住幾個鐘之後，就會漸漸壞死，咁個人就喺咁先喇。
所以雖然兩個器官風馬牛不及，醫起上嚟，其實個目標都相近，就喺盡快通番條血管，俾啲血過番。
四環賣嘅克林澳，同安捷利，基本上喺同一樣嘢嚟，就喺：馬來酸桂哌齊特 (cinepazide)，兩隻藥嘅唯一分別，就喺一隻含有80mg一瓶，一隻含有320mg一瓶；喺含量的不同而已。隻藥嘅作用喺令到血管壁嘅肌肉放鬆，血管抗張，讓原本俾血塊塞到實嘅地方鬆開番少少，俾啲血液盡量流過，回復番氧份供應俾啲細胞，等個器官唔好壞死；咁個病人有望生存。
另外一隻王牌藥物，鹽酸川芎嗪嘅作用喺減少血少板凝固，唔俾個血塊增大。減少閉塞，令血流量得以保持。
幾隻藥都喺西藥，在中風同心肌梗塞，都喺以西藥為主。因為個病人都已經危怠，就嚟死，如果慢慢去煲苦茶，喂佢飲，睇怕都窄窄地喇！所以招股書話，西藥佔呢個市場接近九成，中藥僅佔一成。
睇到呢度，呢間公司喺咪幾好呀！
投資港股：四環醫藥(三) 阿牛
http://hk.myblog.yahoo.com/yomagyomag/article?mid=2957
阿牛問得大家喺咪幾好，答案通常都喺 : no
喺好嘅話，點解國外市場嘅佔有率喺：
0%
你可能會話，鬼佬歧視我地中國嘢啫。
又錯喎，阿牛七月七號講到創業板嘅海普瑞，佢嘅肥仔老闆李鋰，又喺做藥，佢隻heparin行銷全球，雄覇環球市場。
http://hk.myblog.yahoo.com/yomagyomag/article?mid=1336&fid=-1&action=prev
點解四環唔得呢？梗有啲嘢嘅。
答案原來喺，中風同心肌梗塞，今時今日，已經唔喺咁醫法嘅喇！
原來而家標準療法，病人一到，確診之後，就會打一劑抗血小板凝固劑，選擇通常喺最便宜又最有效的亞士匹靈，跟住就要在4.5小時黃金時間內使用Alteplase，一隻萬萬聲價錢，但絕對有效嘅溶血劑，將塞住嘅血塊立即溶化，直接通番條血管。同四環隻克林澳，放鬆些少條血管，過番少少血，效果差天共地。
喺病人執番條命之後，接住再跟進的抗血小板劑，亦發展成熟，有各種牌子的藥品，可以調節血的凝度，由輕微減低血凝，都令到啲血完全唔凝，適隨專便，絕無難度。鹽酸川芎嗪，都無人用嘅。
究竟鬼佬喺咪唔識呢幾隻嘢，遲啲不如做吓推廣得唔得，話唔定我地啲嘢得呢？
原來馬來酸桂哌齊特，並非中國原創，外國在70’s及80’s年代已成功制成，但因效果欠佳，加上有副作用，藥品本身已半廢棄。(招股書P.123)
即喺，我地執二攤。
二攤執得過，通常都喺一個理由：價平
克林澳一劑僅RMB61.5。而且藥物受國家管制價錢，不准加價，不准炒賣嘅；RMB61.5個價錢，賣左四年喇。呢樣嘢大家唔駛指以有得放鬆；民生，乃國之本也，不能供一小撮人圖利。
阿牛估計，隨住國內生活水平上漲，好賣嘅應該喺萬幾蚊一針嘅Alteplase，而唔喺RMB61.5嘅克林澳。大家睇吓四環個銷售網，就會見到最富裕嘅上海，四環啲藥喺冇乜人幫襯嘅。
如果俾得起錢，你閣下中左風打邊隻藥吖，阿牛就當埋底褲都打隻貴嘅喇。即喺刻薄啲講，半島Gaddi's食個午餐，盛惠四百；
半島酒樓食個午餐，盛惠四十。冇錢真喺好慘；大家Blog友，努力加油！
招股書都講明，進口的心腦血管藥，今年是RMB370億
但喺四環嘅銷售僅RMB9.4億。
總括嚟講，四環嘅業務：產品老舊，價錢便宜，加價受限，業務雖有增長，但主攻落後地區，不過投資者猛料。又喺一隻fundamentals麻麻地，但會有人炒起嘅股票。
總結論：阿牛都唔知佢會點。
33倍PE買啲咁嘢，阿牛都喺唔入飛，照早幾日咁做，炒一轉，薄切一塊算數，如果佢有得大升，就等人地發達算喇。
我地都喺：『唔該凍奶茶走甜，薄牛多走風險』
投資港股：鐵江現貨(十) 阿牛
http://hk.myblog.yahoo.com/yomagyomag/article?mid=3005
阿牛今日番到香港，睇到鐵江招股，最後招左個大頭佛出嚟，正一流口水嘢。
啱啱Blog友kit2010君報料：
<匯港通訊> 鐵江現貨(01029)將於明早掛牌,輝立證券原會於今日收市後,即下午4時30分,提供暗盤交易,但該行已決定今天只做華地國際(01700)的暗盤交易,沒有鐵貨份兒。
輝立證券企業融資主任陳英傑解釋,主要因為中央結算(CCASS)要在今日下午3時40-45分,才能供應鐵江的股份,該行未有足夠時間處理,所以趕不及在4時30分進行交易,因此便不提供鐵貨暗盤交易。
另外aastocks話：
大幅削減IPO規模鐵江現貨<01029.HK>公布最終配發結果，公開發售接 獲3192.4萬股認購，即約0.24倍，及發售總數3.07%，未獲認購股份重新調整，國際配售最終數目為10.08億股，佔發售總數96.93%。每 股定價1.8元集資淨額17.22億元。股份預期明(21日)掛牌。
所以唔好講暗盤，公開發售都賣唔晒，明日街貨得3000萬股，另外有10億股喺國際配受買家手中。個形勢變得好得意，因為幾乎冇街貨咁滯，貨已經歸晒邊。
如果講反應，咁就核突到嘔，但喺如果有人打庄，得咁少街貨，炒到升一倍都一啲唔難。
阿牛覺得：
1) 先忘記893鐵鈦嗰截，嗰截切左唔要。
2) 可能有得炒都未定。
3) 明日唔郁手，作壁上觀。
4) 後日如果高開，後日星期五一早入市。
5) 後日如果低開，全部拉倒，當睇左場戲，學左嘢就算。
6) 如果入到貨，後日下午三時半出貨。
祝大家好運！
投資港股：鐵江現貨(十一) 阿牛
http://hk.myblog.yahoo.com/yomagyomag/article?mid=3108
鐵江今天上市，以HKD1.75開市，二十分鐘內大量沽盤，排山倒海質至HKD1.6。跟著漸漸剷上HKD1.7，守住HKD1.65至HKD1.7的區間，收市時略低，收於HKD1.65，比招股價折讓8%。
上午開市後，11:00AM，公司有公佈，重申業務前景良好云云：
『對於今早上市跌穿招股價，鐵貨<01029.HK>主席Jay Hambro表示，不能以短期股價反映公司前景，應要視乎長期基本因素。公司目前每噸鐵礦石價格約145美元，而成本僅約42美元，擁有較大獲利空間，而美元疲弱亦利好商品市場。
他指出，集團與內地簽署長達15年的供應合約，相信業務前景穩健，內地對鐵礦石需求會陸續加大。』
明天照原定計劃，如果開市高於HKD1.65，最好是HKD1.67至HKD1.70；然後觀察大半小時，如果10:45AM左右能穩守，就將入市，買入亂炒基金的一半錢。
到三時半，不問價沽貨離場。
現在又多了一個變數，就是萬一下午掛八號風球，下午休市，就唯有把貨持有至星期一。
今天上午的公告，阿牛隱約覺得是一早預備好的，因為招股不足，準備定今朝給拋售時，立即發稿。阿牛不相信是上午十一時，公司應變得如此快，可以發一段咁『平穩』，『老練』的東西出來。
個人覺得公司『不甘心』，有後著的機會很大。
投資港股：刀口上舔血 阿牛
http://hk.myblog.yahoo.com/yomagyomag/article?mid=3508
星期一從報紙上，拜讀黃國英先生的周記；『以快打快的賺錢良方』。
黃國英先生利用比亞迪的中期劣績消息，買了貼水的認沽期權，一日之內，用46萬，贏了47萬。
大家估唔估到，阿牛睇完之後有乜感覺呢？
就喺『十分不安』，『手心冒汗』。
之所以咁驚，喺因為黃先生喺有料之人，阿牛向來佩服；佢話得贏左，雖然喺馬後炮，但我就信佢一定真確，真喺咁買賣過。所以阿牛睇見到咁樣揾命搏，就不禁心驚肉跳。
驚嘅另外一個原因，唔喺因為四十幾萬，銀碼略大。四十幾萬對黃先生來說，肯定唔到阿牛個亂炒倉嘅5%準則，即喺輸得起嘅錢。如果有一千萬投資，5%就已經喺50萬。你估黃國英先生止唔止一千萬吖？所以四十萬對黃生嚟講只喺少少錢。
驚嘅理由，喺因為當日比亞廸HKD53，買HKD50嘅認沽期權就真喺貼水到冇得再貼水，仲要喺十一月嘅，直情喺背水一戰。用兩蚊買，唔好講話隻嘢第二日唔跌，連跌少啲都唔掂，一箭定輸贏。如果玩猜枚，即喺『一拳猜晒成支XO』。
呢種賭法，阿牛完全反對。
舉個例，阿牛在20500揸期指，如果個市唔就，起碼都有幾百點走棧，而且有個強大嘅股票倉在背後，可以做保證金；真喺跌起上嚟，如果衡量過認為有得守，喺可以保得住玩落去，而不至於立即打靶。
更重要喺個大市走勢醞釀多時，已經睇清睇楚，估錯的機會唔大。但喺比亞廸，只喺即市消息，壞消息一出，就要決定去唔去馬。比亞廸業積唔好，個市場未必睇得太淡，可能震一震，第二日已經上番。更重要喺比亞廸後面有位芭菲特先生，如果香港收市後，佢老人家喺美國瞓醒，一句說話，話中期業積不佳可以接受，長遠隻比亞廸喺『價值投資』；咁我包你第二日止跌回升10%。啲期權就立即變晒廢紙。
『價值投資』四個字，比『升職加薪』四個字，肯定更多人啱聽。
今朝食早餐，牛嫂問阿牛：點解籠蝦餃咁耐都唔嚟？
阿牛話：『蝦餃呢樣嘢喺價值投資，梗要耐啲嘅喇！』
牛嫂條氣都即刻順晒，繼續睇報紙。
投資港股：刀口上舔血(二) 阿牛
http://hk.myblog.yahoo.com/yomagyomag/article?mid=3533
王國英先生的文章，開頭說：手上有10萬元本錢，最多可以輸兩萬，而想三個月搏贏兩萬元………
呢個開場白，證明兩件事。
第一，王先生人品好，為人設想，同阿牛一樣，知道好多初心朋友都喺幾萬蚊起家，如果一開波整個一百萬倉，其實喺好唔實際嘅。有好多『無賴』仲等熊市跌到攤攤腰，先去撈底，話建個100萬倉；儍嘅都知道跌到底，是旦買乜，將來都會升幾倍嘅喇，呢啲咁100萬倉講到明揾笨嘅！
第二就喺知道初心者心急，所以黃先生推介啲Call輪，Put輪，二、三線股。
喺呢個層面上，阿牛就麻麻地同意。阿牛覺得大錢，小錢，都一樣要有個尊嚴。好似打麻雀咁，就算同細路仔玩，唔打錢，淨打手板，都要有個『功架』，打嘅牌路、手法，應該同打錢時一模一樣。千祈唔好諗，我錢少少，輸喺應該，贏喺好彩，唔敢問咁多，驚俾人笑。
錯晒嘅。
少少錢都只准贏，唔准輸。不准自卑。
正如阿牛早兩日炒新股輸左，都要攞番出嚟討論。本來就只喺好少錢，兼用5%亂 炒基金玩玩吓，講明呢部份喺會輸，喺用嚟平衡心理；輸左其實就大可以隻字唔提，關人了事。但喺阿牛都覺得應該講番，因為當時嗰種野性之心態，個個兄弟都耐 唔耐都會經歷過，提出嚟參詳吓，大家將來多個警惕。因為牛三要揸實啲貨唔放，大把呢啲外來誘惑，唔警惕住，分分鐘『賴嘢』。
阿牛甚至時不時睇到啲同自己相反意見嘅，都攞出嚟講；講得通嘅，自然有人信服，將來講中，就更加令人相信，如果見到啲相反意見，就叫人唔好睇，又或者當睇唔見，連攞到出嚟討論都冇膽，攞出嚟講都未講得贏人地，咁不如收旗，去聽人講算數喇。
炒燶左嘢又喺；唔可以幾日唔出Blog，玩失蹤，或者發爛渣，又或者做縮頭龜，等佢淡化，呢啲全部都唔喺辦法，要主動收拾個爛攤先得。久而久之，個Blog固然冇人睇；呢個都唔喺最重要，因為寫Blog冇錢揾嘅；攪到自己盤投資立立亂，呢個先喺大問題。
話說回來，黃國英先生個目標，三個月賺兩萬，其實都唔喺好難；阿牛五個月都賺九萬喇！不過唔好限梗三個月一定要有兩萬，否則個市唔就要夾硬嚟，又喺死梗。
上次五月，阿牛個HKD60000倉而家已經變左HKD115000，但阿牛知道，初初寫Blog，一定冇人跟住買，唔會有人賺到嘅；所以遲少少一有機會，盡量又建一個幾萬元倉，從頭嚟過，希望有一個得一個Blog友，跟住揾到錢，向住一億呢個數字進發。
HKD100000000
喺得嘅，幾年就攪掂晒。
快喇！
投資港股：一億 阿牛
http://hk.myblog.yahoo.com/yomagyomag/article?mid=3536
講到一億，就真喺一個好尷尬的數字，因為銀碼偏大，好少人吹牛吹到咁大，又從來都未聽過有人試過。不過，試喺真喺有人試過，而且唔少添，阿牛都見過，但喺就肯定冇人攞出嚟講，更璜論清楚由頭到尾點攪法講出嚟。
假如呢半年阿牛做到一倍，如果照計，再多半年就喺原本嘅四倍。兩年就十六倍。三年就六十四倍。所以如果有幾十萬本錢，三年就有機會變一億。咁有冇可能呢？
如果大家睇吓個恆生指數嘅往績，又是但攞幾隻股票睇吓，就知道絕對有可能，甚至無須要極有眼光，或者最低買，最高賣，都已經可能成功。只需要掌握兩個東西。
1) 大方向唔可以錯。
2) 有咁大買咁大。
大方向唔錯，都尚算容易，但喺有咁大買咁大，就絕對困難。阿牛可以話俾大家聽，一過左一兩千萬，再上就好困難。因為個心會有『過氣黑社會大佬』嘅心態，就喺：
『想收手』
『以和為貴』
之所以阿牛今日仲同大家吹緊水，而唔喺搬左去南極歸穩，起番間洋樓，養番兩隻 企鵝，都皆因以前未掌握到有咁大買咁大嘅原理。呢樣嘢唔怪得大家，尤其有三，兩千萬，應該夠過世唔駛再點捱；大家難免越來越多疑惑，覺得投資策略會唔會 『唔穩陣』。雖然開頭嘅錢都喺同一個原理揾番嚟，但喺起初錢唔多，正所謂『死就X就』，但如果啲錢已經夠過世，有乜依郁，閣下就會好後悔，於是乎越嚟越多疑。
就算閣下唔後悔，萬一輸晒，你睇到阿嫂痞喺度飲泣，你交唔交代到吖？大佬，捱大排檔嗰陣阿嫂就喺你身邊，到上左岸你又跳番落去，咁點呀大哥！
阿牛就深切體會到呢個壓力喺會越嚟越大嘅，呢個亦喺阿牛要寫Blog嘅重要原因之一，因為白紙黑字寫得出嚟，啲嘢就一定要四正，行得通先得，唔可以呢呢
投資港股：一億(二) 阿牛
http://hk.myblog.yahoo.com/yomagyomag/article?mid=3538
所以大家唔駛懷疑，阿牛唔喺飲大兩杯，亦唔喺short左，更加唔喺贏少少錢，意氣風發。
一億，唔一定喺錯覺。
再計清楚啲條數：
如果牛二未完，應該再上落兩、三次。我地照版煮碗，賺多四至八倍。五月到而家當賺一倍，如果一模一樣再嚟一次，就變四倍。再一次就八倍。
如果牛二已經玩完左，咁就冇左呢幾倍。到左牛三，就應該有三倍。就攞隻南航嚟講，我地乜都唔做，牛三喺度呆坐，佢升番上次高位，都有三倍，仲未講今次會高啲。當然牛三又有啲花臣，唔同玩法，到時再詳細討論。
好 喇，到爆煲，熊市會有一年到年半，一味靠賣空，都應該有三倍。再到冬去春來，又到牛一，即喺阿牛最鍾意嘅階段，最好賺嘅一期，賺五倍一啲都唔難，大家隨便 揾隻股票睇吓，熊市低位升到牛一，幾倍閒閒地，都未計期指，乜乜物物。例如隻2689玖紙，最低嗰陣HKD0.81，今日HKD13.16，點止五倍呀， 十六倍呀。放七百萬落去，而家剛好一億。如果之前牛二，牛三可以賺二十倍，咁即喺當時用三十五萬，今日就變左一億。由2005年至2010年，剛好五年。
仲有喎，呢兩年適逢百年一遇嘅量化寬鬆，咁樣夾硬吹大個波，個週期又會短晒。正常2007股災，冇2013都唔好諗牛三，但今次咁搞法，尋日QE2又印6000億美金，分分鐘過完農曆年已經開波牛三。一啲都唔出奇。
阿 牛其實好似開茶水檔咁，早餐做一輪；跟住就午市；忙完就到下午茶；跟住到晚市，消夜。瞓醒第二日又做過。至於做到幾多錢生意，只喺大約估到，但實數唔知， 總之有客就做，亦唔好估個客開邊瓣，佢入嚟先算，落單話丁麵就煮丁麵，奶茶就冲奶茶，只要唔好亂陣腳，啲茶客食完自然會俾錢，咁又執多少。最終做幾多錢生 意，估唔到嘅，亦無謂估，廢事心煩。
所以你問阿牛，而家個市跟著點，會調整定喺進入牛三，我真喺唔知；淨喺知道，有得做就做，跌市就咁咁咁做，升市就咁咁咁做......
例如呢幾日，就好似中午飯市做做下落雨；咁究竟雨會越落越大，定喺過雲雨呢？唔知㗎，個天想點咪點囉。
所以阿牛話：『山雨欲來』。欲者，想也；只喺『可能』，冇把握嘅。結果落唔成雨，仲出太陽添。
天 氣轉，唔知個天點樣，咪停吓手等一等，去後巷吹番口煙先，但喺啲爐頭就梗喺開著晒，唔好熄。如果晴番天，啲客又嚟，咪又入去做囉，接到落去下午茶，好生意 咪密啲手做，冇生意就又等吓；再落雨咪又等吓。又唔好話驚到收檔避雨，最多揾定大膠布，雨勢轉大時遮住個檔口仔。但亦無謂炸定十磅雞脾，以為下午茶一定會 停雨，一定多人幫襯。
仲有呀，唔好諗埋啲『鳥能』嘢，賣乜嘢牛大力，猪耳朵，羊尾巴。平平實實，股票就股票，期指就期指，一樣掂。諗埋啲乜嘢『紅豆熱檸蜜華田』分分鐘唔入得口，食到痾添呀。
啲Blog友問阿牛：幾時入市好呀？
其實幾時想番嚟檔口開工搵食，咪返嚟換件開工衫，著番對水鞋，郁手囉。你話等飯市校到準先開工，固然喺好，但喺根本亦無必要，隨時開工都喺好嘅。
阿牛啲原理，檔次其實好低㗎咋。
搵兩餐啫大佬！
Next Page