會德豐（020）主席吳光正Peter近排認真黑仔，旗下九倉（004）嘅時代廣場過去15年出租公眾地方，搞到畀政府告上法庭，之前袋袋平安嘅租金隨時要 上繳庫房。一波未平，一波又起，前日大行摩根大通落井下石，出份報告唱淡會德豐，加上市況唔就，會德豐噚日股價急挫逾半成，累Peter單日賬面身家唔見 14億。話說時代廣場之前最高以日租12.4萬出租公眾地方，鶽條財路15年來都相安無事，俾人揭發之後唔只見財化水，之前落咗袋嘅錢分分鐘要畀番政府。
摩通估計，鶽筆數唔會多過5000萬美金，即係約3.9億港銀，對九倉濕濕碎。不過摩通認為，九倉阿媽會德豐家吓嘅股價，對資產折讓太窄，所以狠手將投資 評級由增持調低幾級到減持，目標價由23.85蚊降到20.77蚊，以噚日收市價22蚊計，仲有差唔多半成調整空間。
單日賬面身家唔見14億
俾 政府告單嘢未收科，自己旗艦又俾人唱淡，會德豐噚日股價跌咗1.2蚊，據會德豐舊年年報，Peter揸住12.05億股，即係單計噚日賬面身家就蒸發咗 14.45億銀。Peter屬狗，佢今年運程應該唔錯，不過今年6、7月嘅運程麻麻，某位堪輿學家著作度仲批屬狗嘅人喺6月生意唔好，要慎防因一些地方出 了小錯，引起一連串難以解決嘅問題，希望醜嘅唔靈好嘅靈。[email protected]
中環在線：港交所董事掌邦盟滙駿(8158) 李華華
2008-06-24 Appledaily 創 業板公司邦盟滙駿（8158）呢排變動好大，上個月尾，原大股東兼主席盧華威，買番邦盟滙駿嘅主要業務之後，就將自己揸住嘅股份賣咗畀另一家上市公司必美 宜（379）。既然老闆換咗人，咁主席好自然都會變。新嚟嘅主席叫黃世雄，一般讀者可能未必識佢，但金融界對佢就好熟悉。佢係前中銀國際英國保誠資產管理 行政總裁、現時身兼港交所（388）獨立非執行董事。港交所董事做上市公司非執董，唔算新事，但做上市公司主席，華華記憶所及，黃世雄應該係第一位。港交 所董事會一向被視為政府同外資基金爭位嘅角力，喺股壇長毛David Webb上個月辭任港交所獨立非執董之前，黃世雄屬Webb同陸恭蕙嘅反對派陣營，同夏佳理、范鴻齡等保皇黨抗衡。幫中銀保誠做開荒牛 論 戰績，要數佢喺中銀國際英國保誠資產管理做行政總裁嗰5年。01年黃世雄接手做開荒牛，到佢走時，間公司客戶已超過30萬個，管理嘅資產規模達250億港 銀以上。今次佢雖則係非執董身份，但掛上主席個名，嚟緊會唔會再造奇迹，真要下回分解啦。佢任期初步為一年，收10萬董事袍金，冇份分紅。
中環在線：步步高成大陸股壇神話 李華華
2008-06-27 AppleDaily踏 入今年，香港差唔多隻隻新股都潛水，不過，大陸就唔同，據《新浪財經訊》嘅統計，6月份總共有12家公司喺大陸中小板度掛牌，當中以步步高嘅股價表現最理 想，被形容為延續中小板神話，上市唔夠兩個禮拜，股價急升78%，但大家唔好將馮京當馬凉，呢家唔係香港人熟悉生產DVD機嗰家，呢家步步高係經營超市連 鎖店，兩家公司完全唔同老闆。 呢家啱啱上市、經營超市嘅步步高，全名步步高商業連鎖股份，大股東叫王填，同太太張海霞共同持有公司50.6%股權，以噚日 46.46蚊人仔收市價計，家陣兩公婆身家總共有31.8億銀。至於嗰家賣DVD嘅步步高，老闆叫段永平，佢曾經喺06年，以62萬美金（約484萬港 紙），贏得同股神畢菲特食晏，成為一時佳話。根據07年《胡潤中國富豪榜》，段永平同王填同樣以25億銀人仔並列328位，不過家步步高超市股價表現咁 好，睇怕王填嘅身家已經跑贏段永平。
中環在線：畢菲特幫銀行倒米？ 李華華
2008-07-03 AppleDaily 同 股神畢菲特食晏嘅網上拍賣，結果以211萬美金（即1646萬港銀）創紀錄價成交，呢個價，連畢菲特知道都嚇咗一跳，股神對《美聯社》記者講，「呢個 （價）讓我大吃一驚。」成交價雖高，但股神講明餐飯食三粒鐘，唔會加時。見完記者，畢菲特喺巡視旗下餐飲品牌D&Q時，仲一邊試飲新產品，一邊同 當地6名女童軍傾偈，呢班女童軍雖然年紀輕輕，但見到股神都識得把握時機，問佢大學生應該點樣理財。股神醒咗幾句至理名言話，最好多讀書，少碌卡。佢咁 講，即係幫銀行、信用卡公司倒米。股神話每日收到一大堆有財困嘅粉絲來信，佢將呢班人分成三類：一係失業，二係患有重病，三係因信用卡透支搞到欠債纍纍。 所以佢忠告年輕人盡量少碌卡，因為家陣利率高，學生容易孭到一身債。佢仲攞自己嚟做譬如，「如果我18、20歲時就借錢，家可能已經破產。」年輕人，聽 到未？
中環在線：維他奶唔打折靠變樣 李華華
2008-07-04 AppleDaily 維 他奶（345）創辦時標榜為「窮人的牛奶」，家香港又再通脹高企、百物騰貴，維他奶會唔會再一次同市民共度時艱，今年唔加價呢？維他奶執行主席羅友禮 話：「唔加價，但減少大平賣」，或者「畀少啲discount」。睇嚟共度難關呢家嘢，對於一家上市公司嚟講，真係有啲難度，羅主席都要同股東交代嘛！既 然唔可以大平賣，咁喺包裝宣傳上就要落啲心機嘞！用咗7年嘅包裝正式同大家say goodbye。為咗令品牌年輕啲、現代啲，特別用咗一年時間幫產品嚟個大變身，今個月推出全新「維他奶」標誌同埋產品包裝，連新廣告都喺前日開始播。不 過維他奶sell嘅仍然係「家庭感情」，羅友禮話，咁先體驗到維他奶「與時並進，膾炙人口」嘅一面，仲話「強調與市民成長，一起面臨挑戰」，咁，減吓價， 唔知算唔算一起面臨挑戰呢呵！
中環在線：四叔自傳（Part2）唔講楊國強 李華華
2008-07-08 AppleDaily 勤+緣（2366）行政總裁梁鳳儀執筆寫「四叔」李兆基第二本自傳，已經有好一段日子，好多四叔粉絲（包括華華在內）等到頸都長埋，希望本書快啲面世，話晒四叔首本自傳出版已經係1997年嘅事，到家前後相隔咗11年。 記載97後點滴 身 為四叔「御筆」嘅梁鳳儀噚日話，自傳個餡已經寫得七七八八，希望明年初可以出版。之不過，四叔旗下煤氣（003）等嘅公司枝節仲未起到貨，又未 update番四叔前排拉大隊到上海、北京幾間大學攞嗰啲榮譽銜頭……華華真係越聽越擔心，最驚喺個餡要加碼再加碼，寫埋近期四叔出面調解新地（016） 郭氏兄弟內訌紛爭、「億億聲」借錢畀好友碧桂園（2007）主席楊國強買電視廣播（511）等嘅香江軼事，咁就真係出書遙遙無期。梁鳳儀就大賣「才女」本 色，話本傳記係屬於報告文學，記載四叔喺回歸後嘅重要轉變云云，唔會寫今日借錢畀好友甲、聽日借錢畀夥計乙，搞到好似本數簿咁，呢啲內容都係留番畀寫實嘅 新聞工作者。其實作為四叔粉絲，等吓呢本part 2都係值得，因為呢短短11年，香江股市經歷咗唔少風風雨雨，地產致富嘅佢亦喺呢個時候冒出，04年佢私人揼本500億銀，成立投資旗艦「兆基財經」，資 產值翻幾番而晉身「股神」之列，讀者或者可以從書中參透一吓股神秘笈嘅精華，等待下一個牛市發揮所長。電郵： [email protected]
中環在線薄熙來：民企自生自滅30年 李華華
> | 2008-07-21 AppleDaily |