中環在線：彤叔撐楊受成純官話睇定先 李華華
2008-07-22 AppleDaily
英皇鐘錶（887）噚日上市，夜晚就喺君悅搞慶祝晚宴，華置（127）大劉劉鑾雄、賭王何鴻燊、有線（1097）吳天海同黃玉郎都有到場，不過最畀面係新世界（017）彤叔鄭裕彤同純官鄭家純兩父子，佢哋先後腳到。
純官一早到場，有記者問純官有冇抽英皇鐘錶，佢回應話冇，因為諗住多人抽，佢唔會抽中。華華心諗，純官要貨，英皇鐘錶大股東楊受成點會唔畀，使乜同街外人爭？當記者繼續追問佢會唔會喺市場掃貨時，佢就話要睇定啲先，要睇大圍經濟先諗入唔入，純官買嘢明顯冇老父彤叔咁爽手。
後 尾到場嘅彤叔，華華問佢有冇入股英皇鐘錶，佢好爽快咁話「有。」咁入咗幾多呢？「有幾多入幾多囉。」賺得多唔多呀？「未賺夠，諗住長揸。」問佢點睇個市？ 佢答話：「今日個市升，都係因為英皇鐘錶上市。」仲話：「你哋問英皇鐘錶好唔好，我實話好o架。」得喺佢身邊嘅楊受成鬼咁開心。不過英皇鐘錶招股書冇講 到彤叔係策略性股東，咁即係彤叔揸住英皇鐘錶唔夠5%股權，唔使披露確實股數，可以隨時沽貨。問到點睇後市？彤叔只係話會一路平平穩穩，至於睇幾多點？佢 話：「呢啲問四叔啦。」彤叔同楊受成不嬲老友鬼鬼，好似彤叔嘅周大福，06年尾就曾經以1億銀入股英皇國際（163）。
電郵：
[email protected]
中環在線：筆克遠東二千萬搞奧馬廁所 李華華
2008-07-22 AppleDaily
距 離奧運日子越來越近，香港辦奧運馬術比賽嘅籌備工作，正進行得如火如荼，有份搞「奧馬」場地臨時裝置嘅筆克遠東（752），梗係唔敢怠慢，嗰份價值 2000萬嘅流動廁所合約，有關工程已經完成得八八九九，估計今個禮拜可以交到貨。睇流動廁所嘅外觀，同以往所見嘅冇乜大分別，都係由貨櫃改裝而成，共 200個，仲特別有貴賓廁，另有兩種顏色，分別係綠同埋白，但並唔係男女之分。據講，綠色廁所會放喺賽道附近，白色嗰款就放遠啲，咁做主要避免影響參賽馬 匹表現。無他嘅，奧運參賽馬閒閒哋每隻至少值三幾百萬，貴則千幾二千萬都有，如果有乜頭暈身㷫，辦唔好「奧馬」就弊！月初國家副主席習近平到訪，向煲呔曾 面授機宜，喺「奧馬」重大問題上要「親自掛帥、親自過問」，唔知呢個世紀偉大發明、家家戶戶梗有一兩個嘅必需品，會唔會都要由煲呔親自過問呢？
中環在線：師奶撐領匯 李華華
2008-07-23 AppleDaily
領 匯（823）呢個多月嚟，股價由19.66蚊跌到噚日得番17.34蚊，喺咁嘅波動市，跌一成幾其實唔算多，企得咁硬淨原因好多，其中一個原來係有班 die hard粉絲──師奶兵團撐住。噚日領匯搞記招兼祝捷會，佢哋同創興銀行（1111）出嘅聯營信用卡，自上年10月發卡至今已超過12388張，創興業務 運作處總經理陳凱傑話，呢個發行量比創興其他聯營卡高20%，唔少申請人係屋邨師奶，不過佢冇數據喺手，講唔到師奶佔幾多。
其實大家都明嘅，領匯旗下商場 主要係大型屋邨，去是但一個場行一轉，就知師奶顧客有幾多，而唔少師奶都係家中財務大臣，買餸打斧頭加埋私己錢，山大斬埋有柴。難怪陳凱傑話呢類客分分鐘 好有錢，所以即使師奶冇入息證明，都特設批核程序畀佢哋，始終大客嘅生意點可以唔做？
中環在線：中國富豪消費顯身價 李華華
2008-07-24 AppleDaily
追 蹤內地富豪嘅《胡潤百富》，噚日公佈「2008中國新貴族消費門檻」，要成為內地新貴族，身家至少要8299萬銀人仔，比起舊年3800萬銀人仔入場費， 增加1.2倍，估計全國約有5萬名新貴族達標。呢個新貴族消費門檻計算方法，係以一個生活喺上海，擁有家庭嘅44歲成功男士生活成本計算。呢班新貴族消費 能力一啲都唔嘢小，佢哋主要嘅生活開支係房屋方面，佔8299萬資產嘅五成；住嘅係上海湯臣高爾夫別墅，一幢別墅閒閒哋要2500萬銀人仔，此外，揸車都 要揸價值708萬銀人仔嘅勞斯萊斯Phantom。
中環在線：光大唐雙寧俾員工辣㷫 李華華
2008-07-24 AppleDaily光大近幾個月發生咗單前職員訴訟案，據內地《金融時報》報道，光大旗下光大銀行西安分行前行長徐倫忠，向西安市蓮湖區人民法院提出訴訟，要求光銀撤銷對佢嘅開除處分，恢復工作，支付薪金同埋訴訟費。
可能大家唔清楚事件來龍去脈，話說07年5月中，徐倫忠擅離職守，冇向總行請假，私自出境去澳洲，後尾光銀西安分行喺徐倫忠貸款審批中，發現一筆1.19億銀人仔嘅不良貸款，損失咁大，光銀總行就開除徐倫忠。
家吓徐倫忠向光銀提出訴訟，現任光大集團、光大銀行兼本港上市光大國際（257）董事長嘅唐雙寧，對於徐倫忠提出訴訟呢件事梗係㷫啦。
據報道，唐雙寧曾先後三次批示呢單徐倫忠訴訟，指受理呢單訴訟本身就係一個「天大的笑話，不能手軟，要向當地政法委滙報」，指示部門要「主動出擊，商司法機關依法處理」，要畀社會一個負責任嘅交代咁話。
中環在線：鄧聲興回應婚外情傳聞「我同老婆分開咗」 李華華
2008-07-24 AppleDaily
近 期股市雖然大反彈，但日日gap up，散戶難玩。中環金融圈啲老友寧願關心八卦新聞多過股市。噚日嘅熱爆話題梗係出名青靚白淨、好識保養皮膚嘅股評人鄧聲興（Kenny）背住結婚十幾年 嘅老婆，大搞婚外情嘅傳聞啦，女友仲係24歲青春無敵嘅財經公關。華華噚日傍晚打電話搵到鄧聲興，之前仲預咗俾佢快快冚線，唔會正面回應。點知佢心情出奇 地靚，話大半年前已經同老婆Angela分開咗，家同財經公關Maggie正式拍拖，就係咁簡單。
期間，鄧聲興講嘢冇口震震，冇哦哦；亦都冇快快收 線，絲毫冇迴避之意。對於有雜誌大爆，鄧聲興幾年前曾經同一位前電視台女記者拍拖，搞過婚外情，佢冇承認亦冇否認，只係承認識佢，已經好多年冇聯絡呢名女 記者。有冇搞婚外情，真係當事人至知。
事實上，散戶或者喺金融圈工作嘅人，唔多唔少都應該識得鄧聲興，佢今年38歲，做咗股評人十幾年，經常喺報紙寫專 欄、上電視台同電台講股，散戶經常問佢攞貼士。基本上，佢份人十分隨和，對傳媒有求必應，又唔講人壞話，與傳媒、同行關係好。財經界唔少人都知佢老婆 Angela係一位小學教師，兩人關係良好，基本上，你傾開偈問吓佢同老婆嘅嘢，佢都會講，冇乜所謂。不過，佢之前就冇同人提過同老婆分開嘅事，無端端因 為性格不合而分開，真係世事難料。電郵：
[email protected]
中環在線：方卓如唔撈CEO選議員 李華華
2008-07-25 AppleDaily
財 經專欄作家、以筆名方卓如行走江湖嘅龔耀輝（Ronald），由於要競逐今年立法會選舉會計界功能界別議席，噚日辭去中國金融租賃集團（2312）行政總 裁兼執行董事，專心為嚟緊立法會選舉拉票，公司通告指佢嘅職務仲未搵到人接手，暫時由執董陳志鴻做住署理行政總裁先。Ronald辭職唔難理解，事關04 年佢亦有參選會計界功能界別議席，對手同樣係今年有參選嘅譚香文同陳茂波，當年Ronald輸個馬鼻得第三，今次捲土重來，不容有失，佢出書自揭方卓如身 份都係為咗提高知名度。
棄15.3萬月薪
會計出身嘅Ronald舊年先放棄做咗十幾年嘅老本行，辭去均富會計職務，轉去中國 金融租賃做CEO，華華記得當時佢出席公司記者會時，對新工作雄心勃勃，將公司轉名（前稱金豐21投資），業務亦由證券投資，轉型主攻中國金融租賃市場， 估唔到家陣做唔夠1年就唔撈。華華睇番中國金融租賃07年年報，由於Ronald 10月先過檔，做得3個月，以月薪計袍金連薪津，1個月約15.3萬銀，同立法會出年嘅6.5萬蚊人工相比，真係差一大截，雖然話立法會議員有153.4 萬銀實報實銷津貼，但都只係用嚟畀議員請助理同租辦事處，今次Ronald放棄一切擁抱立法會，仲未必得緊，佢都算好大勇氣，睇嚟政治真係有莫大嘅魔力。 電郵：
[email protected]
中環在線：大快活老細人工唔及大家樂 李華華
2008-07-28 AppleDaily
百 物騰貴，飲食業越嚟越難做，做快餐業嘅大快活（052）08年度業績賺咗1億銀，喺高通脹經濟放緩嘅環境下，盈利仍然有19.3%增長都算唔錯。大快活最 新年報，截至08年3月底計，主席兼執董羅開揚舊年人工亦增加13.8%，跑贏通脹成倍，董事袍金連薪津花紅748.1萬銀，單係花紅已經多賺80萬 銀。羅開揚嘅薪酬增幅好唔好？搵個同行比一比就知道。
相比起競爭對手大家樂（341），羅開揚嘅薪酬增幅原來唔算多，截至08年3月底，大家樂主席兼執董 陳裕光嘅薪酬，就錄得近兩成升幅，同07年嘅729.8萬銀相比，多145.7萬至875.5萬銀。咁又難怪嘅，論盈利，大家樂比大快活多超過3 倍，08年度達4.2億銀，較舊年增長13.6%，陳裕光多人工亦正常不過。
中環在線：25歲紹興少婦身家4億 李華華
2008-07-30 AppleDaily
一 位25歲少婦，身家起碼近4億，你會有乜聯想？大陸《每日經濟新聞》報道，紹興有位25歲嘅少婦，最近拋售2449萬股廣州白雲山企業股票，賺咗3500 萬人仔，由於佢賣出嘅股份，佔白雲山總股本5.22%，所以依例披露，咁先至俾大家認識呢個隱形富豪。呢位少婦富豪叫蔣菲，舊年用3.59億人仔入咗 4200萬股白雲山，平均每股8.5蚊，跟住喺7月1至20號，多次拋售合共2449萬股，平均價9.97蚊。
中國地大物博，有錢人亦唔少，25歲有4億 唔係新聞，不過，據報道嘅記者調查，蔣菲只係紹興商務電視綜合部一名文員，早前仲試過失業。屋企唔似大把，老竇係一名普通教師，老公做地盤監工，蔣菲個同 學話佢有3幢樓揸手，一幢自住兩幢放租。記者搵到蔣菲，問佢資金邊度嚟，佢話：「都是我自己的錢。」記者問會唔會有人用佢賬戶炒股？蔣菲好決絕話「沒 有」。華華最想知係，你估佢老公知唔知老婆有咁多私己錢呢呵？
要股票唔要人工 中環在線：彤叔掌櫃算盤打得響 李華華
2008-07-30 HKEJ
蒙 古能源（276）主席魯連城，一向有彤叔鄭裕彤掌櫃嘅稱號，做得彤叔掌櫃，數口梗係精，就睇佢點樣將前身係新世界數碼嘅蒙能，轉型成為基金愛股就知。噚日 蒙能刊發最新年報，魯連城08年薪酬急升近兩倍，咪以為佢加自己人工，其實佢呢三年都冇收董事袍金同薪金，只係攞福利收入，而呢兩年福利收入都冇變，只收 64.8萬銀，至於佢今年人工大增，係因為以股份為基礎嘅收入多咗127.9萬銀。據年報顯示，今年蒙能向魯連城授出嘅認股權，可以每股7.284蚊行使 價換購69萬股蒙能。
持有股份市值92億
收股份唔收cash，魯連城嘅算盤當然打得響。舊年食正潮流喺蒙古開煤礦，由科網股 變身煤礦股，股價短短幾個月急升三四十倍，其間雖然有傳媒質疑佢嘅煤礦，令股價急跌，但無損蒙能氣勢，今年5月，蒙能仲俾大摩睇中，納入MSCI香港指數 成份股，刺激股價急飆，PE一度高逾2000倍，雖然家吓市況唔就，但PE仍有341倍，神話依然未滅。華華仲記得，舊年散戶愛股阿里巴巴 （1688），PE都曾經去過300幾倍，成為一時佳話，但家陣得番43倍，神話早就幻滅。家吓魯連城揸住19.44%蒙能股權，以噚日收市價7.86銀 計，市值92億銀，計埋若行使認股權有嘅69萬股蒙能，市值542萬銀，人工多少唔重要，最緊要係蒙能股價掂。電 郵：
[email protected]
Next Page