2010-04-02 AD
| ||||||
| 一位讀者「地產 G」睇完本欄最近講地產及租務市場，來電郵告知：「我專做ibanker山頂南區半山比較大碼嘅租，略知一二。搵十二萬租嘅租客唔難，睇地段。西九區雖然 係新豪宅區，但大部份單位都唔大，所以少見大租客。半山新地收租嘅帝景園第二座，2680呎低層都要十三四萬，仲要係full晒咁濟。啱啱有間嘉富麗苑極 高層2809呎，都可以租到十五萬。始終住慣半山南區嘅鬼佬高層都唔會搬去九龍站。呢幾個月ibanker肯俾多D錢租樓，租都升咗唔少，不過同零八年 比，仲係差10%到。地產G」 多謝地產G提供資料。近星期「名城」開賣，好多住在沙田嘅朋友都收到地產經紀電話，叫朋友們換樓，HR（人力 資源）專家I去到大陸公幹，手機響起，竟然係叫佢去大圍買名城嘅。人力I當然話唔得閒啦，但都佩服啲經紀為咗佣金，call客call到咁落力，呢個世界 若冇咗佣金呢回事，你估啲經紀會唔會在星期日打麻將而唔去帶客人睇樓呢？經紀S又係call客去買名城，點知個客話：「不如睇駿景園啦！」明知生意未必做 得成，但經紀S那敢怠慢，立即周圍撲，搵咗啲715-822呎嘅駿景園單位畀人客在星期日下午睇樓，做生意最緊要變通，順住人客口味去辦事，賺佣機會就大 啲，用把口去說服人客，梗係辛苦多啲啦！ 做工賺錢，如要多勞多得，好少話唔辛苦嘅，一位啱啱八十後嘅年青律師搵左丁山商量 某件事，自動報上佢嘅資歷、工作職位與年薪，左丁山聽完，對佢講：「你嘅薪酬多過啲二十九歲嘅畢業生，以平均計，起碼有三至四倍，自問係唔係好醒？」世姪 答：「夠運啫，讀書時成績名列前茅，俾國際律師樓睇中，畢業後入律師樓至今，足足七年幾，未曾試過有一晚早過九點鐘可以放工o架。」睇真啲佢個樣，似乎有 三十歲咁成熟，唔怪得仲未有女朋友，長期係咁捱，私人生活幾難多姿多采，紅簿仔啲儲蓄存款個個月飆升，都唔知有冇心靈安慰作用。國際律師樓啲企業財資部門 律師，搞上市併購財務重組，最紅最賺錢，嗰種勤勞法，幾似湯告魯士年青時做主角嗰部電影《The Firm》嘅男主角，少啲意志力都捱唔掂。（按：《The Firm》係講律師樓嘅故事，純屬虛構小說。） | ||||||
2010-04-03 AD
| ||||||
| 地產S間公司係 私人公司，十分低調，佢唔講起自己背景，左丁山根本唔識。呢日地產S在上海總會請吃午飯，叫左丁山點一味餸，自己不假思索，叫咗「龍鬚桂魚」。呢款菜式， 上海總會做得好好，地產S吃得津津有味，連聲稱讚，左丁山問佢：「乜你未食過咩？」地產S話：「我本來係蘇浙常客，因蘇浙買咗中環中心對面嘅威亨大廈兩 層，不日搬遷，但由我寫字樓行去威亨要十分鐘，行嚟南華大廈只不過兩分鐘，所以咪加入上海總會做會員囉，目前來得少一啲，第日會時時嚟。」唔怪得，蘇浙在 萬年大廈好多年，長期交租，現在卒之自置物業，大概係趁住利息低，供樓好過交租之故。上海總會對於買樓一事，理財有道，十分精明，早在物業低迷之年，買入 南華大廈一二三樓，現時零負債，會員唔使交月費，乃會所之中十分十分罕見之舉。同枱吃飯之博士L係FCC、日本會、馬會會員，每月交會費三千幾蚊，聽到上 海總會不收月費，大嘆：「乜咁筍盤。」 食食吓，地產S收到電話，朋友來電告知女兒突然有事想話入跑馬地著名醫院，醫院竟然勸佢送女兒到瑪麗 醫院？又會咁嘅？名醫院可以收幾萬銀至十萬銀都唔制？地產S話十成係醫院已經爆滿，想收都收唔到。據佢所知，香港有名氣嘅私家醫院淨係做大陸產婦都做唔 切，其他本地病人要入院都冇辦法，所以政府先至批出四幅地作醫院用途！私家醫院收費咁貴都缺乏空置床位，醫院咪賺到笑？但醫院就話唔係，大部份錢係俾名醫 賺咗，但啲名醫反過嚟就話私家醫院房租、手術房租金太高。究竟邊個可信啲，好難講。 中文大學方面就話希望在大埔申請醫院用地開辦私家醫院兼 作教學用途，如果得到政府批准，相信會受到大埔粉嶺居民歡迎，不過「中大私家醫院」唔會好似其他私家醫院咁猛收內地產婦吖嘛？內地產婦雖係條財路，都要照 顧吓其他病人需要嘅。 | ||||||
| ||||||
| 記者B做咗年幾 記者之後，卒之知道記者人工低，一個人住在香港，交租之後，所餘無幾，而且前途茫茫，於是幾個月前就辭咗職，周圍遊覽，最近去完泰北，在緬甸邊境森林、河 流遊玩之後，決定到美國碰機會。唔少八十後出生之男女就有呢種選擇自由，一來當年在美國出世（記唔記得八十年代有不少香港媽咪跑到美加生細路？記者B父母 不屬此類，但在留學時期生咗B女），揸美國護照，二來父母唔使兒女養家，任佢哋想點就點，故此佢哋嘅自由度非常高，唔似得左丁山一代一出身就要在香港搏命 做事，身不由己。 記者B平時在蘭桂坊及蘇豪區與同學飲慣，臨走前，拎出不少照片畀表哥睇，表哥即刻投訴：「乜你啲朋友咁靚女o架，平時又唔 見介紹畀我識？」記者B大笑：「鬼知你唔識得自己去搵嘅咩，有一樣嘢可以鼓勵你，我哋呢班留美同學全部來自香港國際學校，個個讀書好叻，但我哋落到酒吧， 連我都有男孩子走過嚟傾偈，但我哋最靚最靚嗰位，竟然從來冇男仔行埋佢度，佢去咗上海半年，亦無男仔打電話搵佢，真奇！」表哥亦是八十後，對此有解釋： 「我哋好怕食檸檬嘅，對太靚嘅女仔就冇乜必勝信心，搵你咁嘅樣貌嘅就比較有把握啲噃？」記者B話：「你哋啲男仔冇鬼用，正怕死鬼，做女仔原來要做 second best先至多人追！」 真靚女難搵人追，真叻女亦然。另一位八十後肥仔H讀完副學士就在地盤工作，已經升到 做科文，日常除咗買股票及返工之外，別無他事。肥仔H認為打工唔會發達，長遠要靠長期持有股票，於是個個月出糧就用咗一半錢去買股票，參加咗一個月供計 劃。乜唔使交租、養父母咩？肥仔H嘅父母與細佬已經返咗鄉下長住，唔會再返香港，而父親以前將所住公屋買下，現在留低畀肥仔H一個人住，幾舒服啫，所以佢 從來都唔想話供樓買樓，只係想搵女朋友。佢老闆同佢講：「有無留意到我哋公司啲年青女職員，凡係已經升到經理嘅，都冇拍拖o架？」肥仔H諗吓，又係噃，三 位八十後女經理，做事又叻又勤力，但真係一日到晚在公司工作，究竟因為工作太忙唔得閒拍拖吖，還是冇男朋友，所以眼中只有工作？老闆話：「肥仔H，你夠膽 就去追啦，公司啲年青男同事怕女經理們太叻，唔敢妄動呀。」 | ||||||
| ||||||
| 美國財長蓋特納 突然訪港，四月八日早上與前特首董建華會面，跟住到禮賓府見曾特首與財政司長曾俊華，之後與前金管局總裁任志剛見面。 蓋特納到印度訪問之 後，經香港往北京見王岐山，據講並非事先安排，大概係臨時要與負責金融事務嘅副總理王岐山摸吓杯底先，希望中國在人民幣滙率方面稍作讓步，以便奧巴馬在華 府與胡錦濤見面時（香港時間星期一晚上），就人民幣滙率問題，可以唔使講到僵晒，攞番少少面子，向國會民主黨議員交到差。 蓋特納香港活動之 新聞見諸電視時，左丁山正與一班銀行前輩吃午飯，大家都以為蓋特納來港唔見陳德霖，太無禮貌。佢本人與任志剛有私交，一啲都唔奇，私人拜訪冇話唔得，但大 官出巡作官式訪問，要依足國際禮儀，到禮賓府見曾特首、曾司長，係啱嘅，在君悅酒店見董先生，因董先生自掏腰包成立中美交流基金，發動民間外交，對北京有 影響力，蓋特納同佢私人會面，有其道理，但為甚麼不到金管局與陳德霖總裁傾幾句，反而要見前總裁呢？唔通陳德霖病咗？不在香港？假如曾俊華到美國，見完蓋 特納就搵格林斯潘飲茶，不理會伯南克，你估美國會有何反應？美國人做事往往粗枝大葉，最近奧巴馬秘密訪問阿富汗，到訪前一小時先至通知阿富汗總統 Karzai，已經冇禮貌，但基於保安理由，還可以理解，但奧巴馬與K總統見面之時，語帶教訓之詞，當足自己係大阿哥，令總統冇晒面子，於是K總統私底下 對人講如果美國咁樣對待佢，佢不如加入塔利班！你估白宮點反應呢？白宮發言人Gibbs竟然話K總統於五月十二日到華府訪問，白宮要評估奧巴馬與K總統會 面是否會有建設性，言下之意，就係可以畀檸檬K總統食。 美國成日話要清除塔利班，靠乜呀？靠得罪阿富汗政府和當盟友係臭四乎？奧巴馬等人似 童子軍多過似上戰場嘅陸戰隊。寫寫吓，賓架前輩來電，佢話唔忿氣蓋特納咁冇禮貌，亦唔敢相信，於是周圍問，卒之俾佢探到陳德霖於四月八日已人在北京，到人 民銀行開會，所以唔同蓋特納會面；係唔係王岐山一早搵定佢去briefing呀？前輩話：「大家可以運用想像力，或者事有湊巧啫。」 | ||||||
| ||||||
| 離任金管局總裁 任志剛獲頒2009年傑出領袖獎（工商金融），可說實至名歸。任總裁今年六十三歲，自一九七六年由統計主任調職為經濟主任，八二年就做首席助理金融司，九 一年為外滙基金管理局副局長，九三年四月做第一位香港金融管理局專員，至二○○九年九月離任，前後二十七年在政府處理金融事務，任期之長，經驗之豐富，無 人能及，以一位非政務官出身嘅官員嚟講，可說異數，故此報紙頒呢個獎由佢攞，邊個會反對呀？三月三十日頒獎之日，中國人民銀行行長周小川向任志剛致送賀 詞：「欣聞任志剛先生榮獲2009年香港工商/金融界別傑出領袖榮譽稱號，謹向任志剛先生致以我個人的衷心祝賀。祝任志剛先生再接再厲，繼續為香港和國家 的發展做出更大貢獻。」 不止此也，仲有人專程自北京來港，在頒獎儀式上照本宣讀，以示隆重，唔怪得任總笑容可掬，在曾特首手上接過獎狀之 後，比陳四萬還要四萬。任四萬跟住講感想，台下一聽，大為感動。任四萬以堅定穩重的語氣，一字一句咁慢慢講：「我考過第一。我贏過三Ｔ。但我感到最快慰 嘅，還是在街上碰到市民走埋嚟同我握手，話我做得好，請我繼續做落去！」 嘩，大家感動晒，是晚君悅酒店大堂，坐滿威水工商界人士，大概一定 有人讀書時考過第一（左丁山都試過，就係小學四年班留級之時，上學期考過一次第一，之後未試過咯），但有冇其他人中過三Ｔ呢？相信未必，在馬場中三Ｔ真係 比考試考第一還要艱難，任總以其天聰睿智，偵破三場馬嘅複雜形勢，中三Ｔ咁厲害，直情係左丁山及廣大馬迷偶像，點似得現任金管局總裁陳德霖，只識金融，從 未見在馬場出現呀！ 識中三Ｔ，證明任總腦袋精明，唔怪得可以打大鱷。但可惜吖，頒獎俾佢嘅曾特首，竟然違反民意，唔畀佢繼續為市民服務喎， 仲話過咗六十歲就可以退休o忝！任總致辭時又講及夏鼎基對佢影響好深，夏鼎基講預算案好有理論基礎，某年預算案讀咗四個半小時，內容翔實，因為有理論，公 共政策先至可以得到認同。聽任總咁講，我哋立即周圍望，如果見到曾司長在座就有意思啦，可惜搵勻唔見人，而曾特首亦唔知幾時閃咗咯。 | ||||||
| ||||||
| 上市公司洪良國 際（Hontex 00946）涉嫌造假帳一事，好得人驚，震動會計界，好影響香港嘅國際金融中心聲譽。洪良呢間公司，寂寂無名，由台資擁有，經營紡織布料生意，去年十二月 四日招股，每股定價二元一角五仙，十二月二十四日上市，收市價係一元九角七仙，集資九億九千七百萬元，在三月三十日就俾證監會指示停牌，停牌前收報二元六 仙。三個月交易期間，股價最高係二元六角三仙，最低係一元八角三仙。 四月八日，廉政公署宣佈落案起訴一名畢馬威會計師行高級經理梁思哲，三 十二歲，指梁於二月二十二日與另外一名人士向畢馬威另一名僱員提供十萬元作為擬備供洪良上市帳目嘅報酬。證監會指洪良招股書嚴重誇大了公司的財政狀況。 據 講，畢馬威負責新股上市嘅有一隊人，到公司核數嘅係另一隊人，有人透過內部檢舉熱線揭發，畢馬威自動向證監會報告，於是證監會在三月二十九日向法院申請凍 結洪良上市所得款項。 上市保薦人係台資兆豐資本Mega Capital (Asia)，律師係Sidney Austin，公關係iPR Ogilvy，收款銀行（receiving bank）係東亞。收款銀行嘅工作最簡單，一切代人辦事，依指示收取集資銀碼，奉命凍結款項而已，但係保薦人與核數師就責任重大咯，睇番時序，證監會在三 月二十九日前已知道洪良出事，呢件事肯定屬於「股價敏感資料」，但秘而不宣，到三月三十日先至指示洪良停牌。假如有散戶在停牌前買入股票，豈非喊咁口？證 監會要求別人以第一時間宣布股價敏感資料，但係調查洪良一事幾個星期，散戶被蒙在鼓裏，公唔公道呀？又另外一件事，廉署在四月八日落案起訴梁思哲，係幾時 拘捕佢嘅呢？點解唔公開呀？早啲公開咗，散戶知道就唔會買洪良股票啦！如果話廉署拉人係機密行動，起訴前不能公開嘅話，點解拘捕陳志雲就哄動全港，搞到街 知巷聞？對陳志雲公唔公道？另外一間公司聯康生物科技（00960）在三月九日發通告，表示廉署於三月一日搜查公司，拘捕CFO，三月八日拘捕主席，呢啲 肯定係重大股價敏感消息，但遲咗八日先至公布，做香港投資散戶真係慘情！廉署以後帶走上市公司高層，請以陳志雲案為藍本，即時公開，以免投資者死得寃枉。 | ||||||
| 2010-04-15 AD | ||||||
| ||||||
| 商界名人徐展堂 於四月二日早上十一時在北京協和醫院逝世，聞者惜之。據講徐展堂在中風昏迷前一晚，與幾位老友記在北京豪飲上等靚酒，可能飲得太多導致腦中風，飲乜靚酒 呢？消息講係頂級正牌貴州茅台，並非凡品，平時飲茅台係用細杯仔，徐先生等酒中仙就用紅酒杯盛酒，飲到興高采烈，怎知第二日就出事。 左丁山 唔識飲酒，以前在本報寫過，有高人指點，市面上充斥偽貴州「茅台」，試驗真茅台一個方法係將少許茅台倒在掌背，用手擦乾，再以鼻聞之，聞到一啲豉油味，就 係真酒正牌嘞，高人搵啲「真酒」叫左丁山試驗吓，果然係假的真不了，真的假不了。但茅台酒精濃度極高，近五十度，飲一啖已經唔掂啦。一位老同學到廣州傾生 意，廣州公司一位老總對佢講，「先飲三杯，先飲為敬，生意可以慢慢至傾。」同學惟有捨命陪老總，三小杯一飲而盡，五分鐘後自知不妙，借尿遁，去咗廁所，半 個鐘頭都出唔番嚟。老總派人入廁所查看，原來同學暈到企唔起身，坐在廁板上！到大陸傾生意，飲酒係搵命博，中小企老闆L同左丁山講過好多次，在內地猛飲紅 酒白酒（茅台），返港後最好睇吓肝病專家。 徐展堂生前係古董文物藝術收藏家，一定知道藝術品真偽之別，唔止識飲真茅台。現在祖國同胞發得厲 害，在拍賣會出手買文物書畫等等，絕不手軟。一位收藏家F對左丁山慨嘆：「現時我哋好難同祖國同胞爭，邊度敢舉手呀！」價錢還是其次，據講市面上有不少偽 造名人畫作出售，隨時連鑑別專家都呃埋，你知道啦，中國連地溝油、假雞蛋、假奶粉都夠膽推銷，中國有咁多唔出名嘅畫師，搵人偽造古今名師嘅作品，有乜咁難 吖，慘得過名畫有價！即使徐展堂今天要買，都可能有人夠膽以假嘢向佢埋手o架。收藏家F對佢之死，有啲感慨。據講，徐展堂好念舊，一位老人家係老愛國，入 咗公立醫院，徐知道後將佢轉入公立醫院私家房，話明負擔一切私家房、醫療開支，點知呢位老先生猶在病房休養，徐已經不在了！ | ||||||
2010-04-19 AD
| ||||||
| 老友奧馬勝 （Matthew Oram）嫁女，四月九日中午在堅道天主教總堂行禮，晚上在深灣遊艇會擺酒，好不高興。奧馬勝係紐西蘭名門大族之後，但自細在英國讀書，於劍橋大學讀歷 史，於是成為英國人，成個英國紳士款。左丁山識得英美商界人士不少，但講英文有奧馬勝咁有文采，可以隨時引經據典嘅，只識得佢一位，見到佢就有「生子當如 孫仲謀」之嘆，覺得大學生當如是也。好彩，唔係個個劍橋校友都可以出口成文嘅啫，否則我哋呢啲本地薑就要自慚形穢嘅咯。 奧馬勝娶菲律賓妻 子，女兒Natalaya在香港出世，得東方西方之長，成個大美人，讀完CIS小學就到英國讀寄宿學校，然後入劍橋修讀西班牙、意大利文學。讀讀吓，覺得 但丁神曲雖然百讀不厭，但畢業後如何搵工？於是轉攻法律，而今已是大律師，嫁給劍橋同學Andrew，令奧馬勝開心到飛起。 奧馬勝安排我哋 幾位愛馬之人坐在一圍枱，我哋首先恭喜L官搵到繼任人，就快「無官一身輕」，可以自由自在咁回歸佢喜愛嘅嗜好─跑馬與養馬！L官最怕講政治或聽政治八卦， 我哋呢晚專門同佢講馬，啱晒喇，對跑馬興趣冇咁大之鄭大班亦唯有照聽可也。 吃過頭盤，司儀請外父致辭，我哋以為聽五分鐘就會繼續食，點知奧 馬勝上台後越講越興奮，由個女出生嗰分鐘講起，中間引經據典，講愛情真諦，講紐西蘭欖球，由莎士比亞至米爾頓《失樂園》，好似給賓客上一課英國文學或是一 位莎劇演員在台上朗誦台詞，直情係一場「棟篤騷」，夠晒精彩，後來睇吓個鐘，吓，奧馬勝講咗起碼四十五分鐘，怕會創下外父在婚宴上講話最長紀錄！鄭大班相 當稱讚之餘，話要考慮在數碼電台啟播之日，請奧馬勝主持一個英文「談文論藝講馬」嘅一人脫口騷節目，夠晒高格調喇啩。咁又係，左丁山跟奧馬勝學曉點樣睇馬 匹血統，兼且學埋"A horse! A horse! My kingdom for a horse!"之典故（莎士比亞《李察三世》Act Ⅴ，Scene Ⅳ），連英文都進步埋。新郎與新娘結婚後決定以香港為家，奧馬勝亦自英國回流，以後左丁山有更多機會向佢請教咯。 | ||||||
2010-04-20 AD
| ||||||
| 特區政府為多謝 商界贊助香港參加上海世博，設晚宴招待贊助商，在會展君爵廳舉行，呢個大廳雖然樓底矮，有少許壓迫感，但地方不太大，擺十幾二十圍酒，啱啱好，而且呢個君 爵廳就在舊翼四樓升降機及電梯旁邊，人客疏散十分容易，好快就可以行落港灣道上車。呢個廳嘅最大特色就係食物中西兼備，玩盡fusion與 crossover。左丁山第一次嚟，係去年十一月初，參加日本富豪康本健守先生為太太生辰舉行嘅宴會，當晚吃過一頓fusion餐，頗為滿意，想唔到政 府酬謝贊助商，又係諗到呢條橋。 且看餐單，頭盤係：脆芝士豆腐，三菇蛋白糕，燒冬笋沙律，河蝦法包多士，烙鵝肝，花雕酒籽，羊肉茴香凍。 湯：海龍皇湯配香蒜饅頭，然後係洋葱鴨卷伴豌豆蓉及密柑汁。主菜：燴牛肋骨配豆醬燴雜菜。主菜之後仲有單尾：上海菜麪筋蟹粉天使麪，最後係三式甜點，o架 啡或茶。最特別嘅就係司儀宣佈：「今晚嘅白酒紅酒係主禮嘉賓唐英年司長之私人珍藏！」 本來唔想飲，但聽見係唐司長私人珍藏，唔飲唔畀面啫， 連飲開汽水嘅航空大姐Q都話要試吓紅酒先。大姐Q間航空公司贊助大量上海世博香港館工作人員嘅往來機票，以絕對優惠價廉售，令特區政府慳回一大筆機票費， 屬鑽石贊助商，由有香港李察基爾之稱嘅CEO上台接受唐司長頒授感謝狀。我哋拍掌之餘，淺嚐美酒，不經不覺食到好飽，唔好睇小呢類中西crossover 菜，每款好似份量好少，但全部食晒落肚，原來飽到上心口。餘興節目有一隊「一鋪清唱」（Yat Po Singers）上台表演無伴奏無音樂嘅清唱，呢班後生仔大概有七至八人，全部穿着白恤衫，黑短褲，黑短靴，賣相十分清爽醒目，佢哋嘅口部發音技術相當精 湛，好有節奏感，歌詞呢？我哋只係聽到ba ba ba、pa pa ba，ba，ba，pa，究竟有何藝術內涵？全場賓客大多係四十後至七十後，聽到一嚿雲，老鬼M寫張紙仔過嚟話：「This is a bit too avant-garde for an old rocker like me！」左丁山笑完對佢講：「下次會請Tom Jones表演！」 | ||||||
| ||||||
| 左丁山好耐以前 住在沙田第一城，現在有好多親友住在沙田第一城。據朋友告知，第一城嘅銀城商場已開始大裝修，租戶有出有入，相信大業主會有大動作。朋友係藝術教師，平時 睇教育版多過睇財經版，可能唔知道，沙田第一城商場嘅大業主就係在星加坡交易所上市嘅「置富產業信託」（Fortune REIT）（長實係大股東），已經申請咗在香港上市掛牌，正式名稱係雙重第一上市，英文就係Dual Listing），由4月20日星期二開始每日同時在星加坡與香港買賣，由聯席上市代理人DBS（星展）與摩通（JP Morgan）安排以介紹形式上市，編號778。 朋友唔明白甚麼是雙重第一上市，只係想知道778會唔會裝修第一城商場之後，大幅度加租， 趕走一啲服務街坊多年嘅舖頭，例如曬相舖。問到咁詳細，點答呀，索性轉個頭打電話畀樓神趙：「喂你係778主席，會唔會趕走一啲老舖呀？」樓神趙答：「我 哋知道邊啲租戶可以畀高租金，邊啲畀低租金嘅，商場租戶需要有一個合適組合（right mix），兼顧到各方面利益。」樓神趙素來識得講嘢，一啲可能會對股價敏感嘅消息，又唔敢問，於是問佢：「點解置富產業信託上市編號係778？」樓神趙 話：「我哋捐咗一百萬畀公益金，於是可以揀一個幸運號碼，778用廣東話講，似係『實實發』，用普通話講係『次次發』，你啱聽啩？」 啱 聽，不過最啱聽嘅就係有甚麼派息！睇番招股書，二○○九年派息三十二仙，香港上市前在星加坡作價約三元七角，周息率有近8.1%，在今時今日嘅低息環境， 有吸引力。青姐話畀左丁山聽，呢隻REIT在星加坡冇乜活躍買賣，市價低於資產淨值，未宣佈在香港掛牌之前，作價只係三元一角左右，宣佈後，立即急升，在 香港買入，息率可能降低一啲。都好啫，REIT其實即係收租股，左丁山對朋友話：「你住在第一城，驚商場加租嘅話，不如買入呢隻778做對冲，但股價有升 有跌，有風險，你諗吓啦！」 | ||||||