Can Bank：菠蘿包賣20蚊好貴?
1 :
GS(14)@2017-02-07 05:14:10美食車先導計劃終於會去到實行階段，呢個由前財爺在財政預算提出嘅計劃，基本上由概念開始已經俾人批評，直到今日成事都有人覺得佢哋賣啲嘢唔夠local，又嫌佢賣得貴。筆者覺得菠蘿包都稱得上係本土嘅，唔係下下都要魚蛋同雞蛋仔嘅，至於價錢方面，前財爺就話菠蘿包20元貴。大家不妨計計數，老闆目標每日賣900個，以20元一個計，一日營業額有1.8萬，一個月營業30日，為期兩年嘅先導計劃，可以做到嘅生意額1,296萬元；以食物成本佔30%計，撇除有關成本，溢利係907.2萬元。當然仲有其他成本啦，美食車需支付場地服務費，8個場地當中，金紫荊廣場收費最高，每個月2.2萬或收入15%，以較高者為準，換言之，菠羅包需要支付8.1萬，與此同時，啟德郵輪碼頭有車位提供予營辦商，在非營業時間時停泊，月租4,000元。再加上美食車成本約100萬元，兩年計劃期間，可賺603.2萬；呢個數未計任何借款相關利息，或者每年有幾日因場地安排不能營業嘅影響。換言之，粗略估計，一個月賣菠蘿包可以賺25萬元，即係一個包賺9.3元，算唔算貴？抑或係成本每個10.7元貴啲？散子本欄逢周二刊出
來源:
http://hk.apple.nextmedia.com/financeestate/art/20170207/19919919
Can Bank：樓市炒家玩埋今年
1 :
GS(14)@2017-03-22 00:45:59美國聯儲局上周才剛加息，並預示今年再會加多兩次，步伐已經較市場預期慢，而本港銀行在今次美息上調之後，按揭不加之餘仲要減，樓市好難不火上加油，一如所料，過去周末，新盤銷售超過1,000伙，成交金額達到110億元，以金額計是自2013年新盤銷售條例生效以來最高。今次美國加息，本港銀行並無跟隨之餘更大條道理指銀行體系資金充裕。究竟結餘有多充裕？事實上，本港銀行體系結餘於2000至2008年間，大部份時間均不超過100億元，而平均值只有55億元，而金管局數字，截至上周五，銀行體系結餘雖然比高峯期近4,000億少，但仍有近2,600億元。本港跟貼美國加息時期已要數到千禧年，當時銀行體系結餘情況與目前相距甚遠，參考價值不大。而最近一次在2004年6月，當時銀行體系結餘算是金融危機前的高位，但亦不過1,000億，當時本港銀行要到2005年3月才進入加息周期，較美國遲足9個月。雖然在加息前後，港滙確實受壓，但仍未需金管局出手，彈藥充足，再參考上次加息的經驗，除非美國今年餘下兩次加息幅度極大，加上經濟走勢極好，資金起勢暴走，否則本港遲美國9個月才加息亦屬合理預期，換言之，本港加息周期有可能要到明年才會展開。以財政司司長陳茂波在網誌內所說：「根據以往經驗一旦香港利率上升，本港樓價不久之後便會下跌。」以此推論，炒家最少可以玩埋今年。散子〈曾淵滄專欄〉暫停一天
來源:
http://hk.apple.nextmedia.com/financeestate/art/20170321/19964639
Can Bank：美軍突襲敍利亞的啟示
1 :
GS(14)@2017-04-12 22:40:09上任僅三個月的美國總統特朗普決定向敍利亞開火，理由是當地有小鎮被化武沙林毒氣襲擊，軍事學家就話，今次侵侵出手恐嚇性質居多，又正值中美領導人會見之時，所以佢哋覺得今次行動警告對象係中國、俄羅斯同北韓；點解係中國？大體上意思就係你唔同我同一陣線嘅，我自己都有本事搞掂佢。講到我哋熟識又有啲陌生嘅中國，大家都估到，咁易被嚇到嘅就一定唔係中國，因為你唔容易嚇倒而唔嚇你嘅都唔係美國。換言之，呢類嘅突發式發炮，相信會陸續有來。美國前總統奧巴馬辛辛苦苦喺過去幾年逐步削減軍事預算至低於6,000億美元水平，一下子就被侵侵推番上去6,000億美元以上。侵侵本人接受傳媒訪問嘅時候，亦都放風表示美國核武已經相對落後，相信預算未來只會有增無減。畀個概念大家，今次美軍所用嘅戰斧巡航導彈，一支價值120萬美元，今次用咗59支即係總值7,080萬美元，目的係恐嚇一下。美國海軍一艘巡航母艦載70架各類型飛機，裝備300至400支戰斧，一場區域戰爭通常用6艘母艦，各類飛機超過400隻，導彈逾2,000支，淨計導彈都值24億美元，都未計飛機同母艦。再舉例：波斯灣戰爭，美軍共出動超過20艘艦艇。與其喺香港搵啲唔係太關事嘅軍工股，不如去美國搵機會，大家不妨留意吓軍工股Lockheed Martin，佢最大客戶就係美國政府，亦都係美國及英國政府部門最大供應商；另一隻係Raytheon，呢間正係戰斧導彈嘅生產商，兩者近年股價走勢均穩中有升。散子本欄逢周二刊出
來源:
http://hk.apple.nextmedia.com/financeestate/art/20170411/19986501
Can Bank：猛男＋炸雞＝Sell幻想
1 :
GS(14)@2017-05-18 02:06:03現代商業化社會，唔少節日都被商業化，好似聖誕前夕咁，筆者一直都唔明點解商場要倒數。唔明還唔明，有時睇到佢哋廣告招數，都真係要寫個服字。好似今年母親節，KFC就出咗個廣告（美國版），有個猛男赤裸上半身，手執一本小說，同大家講故事。猛男未開聲之前，齋睇畫面，少女們會充滿幻想，開聲後，頓覺猛男聲線充滿磁性，但一了解內容就……容筆者將句說話翻譯成中文：「這個母親節，請讓桑德斯上校為媽媽們送上Tender Wings of Desire《嫩翼的渴求（？）》，以照顧媽媽們的幻想。」猛男手上這本書正是Tender Wings of Desire，書嘅封面係一幅熟識嘅面孔，無錯，就係佢，肯德雞叔叔（肌肉版），抱着一位手執炸雞嘅美女，書嘅左下角，又點少得一桶肯德雞呢。廣告中呢位猛男，揭開本書讀咗少少內容，之後向鏡頭問：「你想唔想自己係媽媽呢？」事實上，呢本個名充滿雞味嘅書，係真係有其書，大家可以喺kindle下載，講嘅係肯德雞叔叔與Madeline Parker嘅愛情故事。呢本書係KFC母親節廣告系列的一部份，筆者無睇過本書，但睇書評就話本書係充滿炸雞味。唔知各位對呢個廣告有咩感覺，筆者睇完真係打咗個冷震。可能係文化唔同嘅關係，真係唔太理解母親節點解要送本愛情小說畀阿媽（主角仲要係肯德基叔叔），睇完更加唔會令你想買桶雞食，不過就好欣賞佢嘅反傳統（傳統廣告一味影住人食雞，睇得多都會滯），而呢個廣告可能會令人想睇下本小說，同時一定會與朋友分享，宣傳效果比一般買嘢有折大好多。散子本欄逢周二刊出
來源:
http://hk.apple.nextmedia.com/financeestate/art/20170516/20022412
Can Bank：葡萄牙Uber的服務是這樣的
1 :
GS(14)@2017-06-10 12:39:21筆者放假正身在南歐，今次旅程主要去兩個國家，分別是葡萄牙及西班牙。Uber司機被拘捕在香港鬧得熱哄哄，不如趁機寫Uber。
Uber在葡萄牙盛行，在西班牙情況則與香港同樣是被禁止。只有在馬德里，Uber可以在牌照數目上嚴重受限的情況下營運（約30個的士牌才發出一個類似的士牌，即係Uber營運牌），Uber在去年已經重新在馬德里展開業務，在急速增長之下，在上月底又再被當地的士司機罷工抗議。先談談在里斯本的Uber，由於怕受的士大哥氣，加上Uber明碼實價，故此，筆者與友人在里斯本機場叫Uber，司機五分鐘內已經出現在筆者面前，除幫忙搬行李之外，上車後，更以流利英語表示，支裝水在兩旁車門，現在我們在聽是本地電台，亦可轉插至你iPod，換聽你喜愛的歌曲；最後再開啟透明天窗，讓你多角度感受這個城市。單是這幾個舉動已經令你覺得錢付得很爽，但這只是開始，車駛到城內，司機哥哥（幾靚仔）會向你介紹沿途知名建築，又會向你介紹某條路線電車必坐，還會介紹餐廳（還以為他有回佣），原來他自己亦沒有去過，只是他友人向他表示，如果接載遊客，必定要介紹這餐廳而己。十多分鐘的車程來到尾聲，他還小心叮嚀筆者與友人，「里斯本是安全城市，但你們是遊客，背包背在身前是有需要的。」這樣全方位的服務，只需要3.5歐元……。至於西班牙這數一數二高價的的士服務，字數所限，下期再講。散子本欄逢周二刊出
97年主權移交至今，香港前進還是倒退？「蘋果」與你細數廿載風雨。【回歸二十年】專頁：
http://hksar20.appledaily.com.hk
來源:
http://hk.apple.nextmedia.com/financeestate/art/20170606/20045738
Can Bank：樓價跌三成就上到車？
1 :
GS(14)@2017-07-05 03:40:59近期市場出現不同形式的銀主盤，有16按亦有15釘，除證明之前財仔做樓按，日子有功之外，不少人都認為樓市升得差不多，即使未見頂亦不遠矣。雖然新盤仍然加價，劏盤依舊不絕。大行早前已經先發制人下調未來12個月對樓價的預測，普遍由原來預測不升不跌，轉為下調跌一成，最淡的是交銀預計跌三成，理據是兩大「水源」將會流走，包括美國不再QE兼要縮表，北水在內銀貸款歸表之下亦需要回朝，有興趣的讀者可以搜尋相關報道。實際上，跌三成是否代表樓價變得可以負擔？單看數字，三成似乎是不小的數字，但樓價實際上由2008年至今升兩倍，換言之，原來100萬的住宅，至今已升至300萬，回調三成，需要210萬。但實際上在2008年普通住宅樓價是100萬的兩至三倍，換言之，當年300萬的住宅，（假設）在樓價下跌三成後的明年，則需要630萬。根據統計處的數據，1980-1984年出生擁有學位學歷的人，在20-24歲時，每月收入平均為13,000元，25-29歲時平均為22,100元；30-34歲時平均為29,600元。以這個數據計算，15年來不吃不喝可以儲到388.2萬，減回630萬樓價的三成即189萬作為首期。餘下199.2萬元，換言之，過去15年平均每年可以用13.2萬元，每個月平均可以用1.1萬元（當然不是在20多歲時已經每月用1.1萬元）。如果閣下是上述這一批人，亦一直努力儲錢的話，恭喜您，機會來了！但閣下要有心理準備，層樓要供到退休！散子本欄逢周二刊出
來源:
http://hk.apple.nextmedia.com/financeestate/art/20170704/20077890
Can Bank：金仔玩飛彈玩上癮
1 :
GS(14)@2017-09-17 12:32:56近期北韓金仔玩飛彈都玩得幾頻密，上個星期先有支導彈飛過日本，星期日又試射氫彈，今次係金正恩上台以來第四次核試，而發射飛彈方面，單計今年已經有成廿次。港股在升完又再升之下，已經迫近大時代高位，對於成日玩飛彈嘅金仔，無視程度亦隨飛彈次數增加，目前效力大概維持到一日，聽日分分鐘又唔記得核試是甚麼。中、美、日應付金仔玩飛彈嘅策略仍然係處於制裁階段，金仔就越玩越投入，最新又有消息傳出，佢正準備新一輪洲際彈道導彈試射。事實上，這幾次飛彈又好、導彈又好、核彈都好，從發射次數而言，似乎有啲過度頻密，北韓又好、美國又好、中國都好，相信大家共識都係，真係打起上來對大家都無好處。金仔玩咁多次都無事，一定會再玩落去，不過咁，既然飛彈嘅嘢，講埋畀你聽係試，仲要係北韓，你信唔信佢會次次無事？有時啲嘢，唔怕佢有心，最怕佢無意，支飛彈唔知去咗去邊度，令到有人可以大條道理用武力解決。恒指雖然兩萬八有一定阻力，但跌唔落去亦都係事實，叫大家走晒啲貨，根本唔合邏輯，無人會知大市會以咩原因調整，但金仔嘅舉動一定要留意，如果越演越瘋狂嘅，大家不妨適量減磅。散子
來源:
http://hk.apple.nextmedia.com/financeestate/art/20170905/20142748
Can Bank：農地憧憬真的可以無限？
1 :
GS(14)@2017-10-09 02:52:53距離新特首林鄭月娥公佈上任以來首份施政報告只有不足一個月時間，在政府工作超過30年，加上又曾出任發展局局長，其房屋政策，可謂近期焦點，幸好上任特首除辣招之外，其他甚麼港人港地，對於港人上車暫時真係見唔到有咩大幫助，變相令今屆政府在房屋政策上創造力可以更大。本月初林鄭表示會在施政報告內公佈首置上車盤細節，又放風會考慮公私營合作，刺激農地王恒地（012）股價升完可以再升。雖然恒地相對於新地（016）及長實（1113），在賣樓的執行能力上真係非常一般，近年新盤除了劏得比人細之外，真係睇唔出有咩話題。不過，今時今日，賣樓何須執行能力？有新盤推，就自然有人排隊。截至去年底有4,480萬呎農地的恒地，即使首置上車盤到最後未能實現公私營合作也罷，其實政府只要加快補地價程序，恒地已足以受惠。不過，政府與商界合作容易被指官商勾結，相信在細則上未必對恒地絕對有利。從牌面上，恒地確實值得憧憬，但必需留意的是，四叔自今年初以約每股41元增持過之後已經無再增持，現時股價高過上次增持價超過三成，現階段再衝真係要諗清楚憧憬是否可以無限。
來源:
http://hk.apple.nextmedia.com/financeestate/art/20170919/20157062
Can Bank：中秋月餅概念股
1 :
GS(14)@2017-10-09 03:12:23本周四是中秋節翌日假期，以呢句開頭，除提醒打工仔今個禮拜仲有假放之外，主要係想趁大家剛過完long weekend仲有少少holiday mood嘅時侯，同大家分享一下月餅的事。放假期間，散子喺屋企聽到散子媽同佢個妹，即係散子姨閒談今年月餅難求，尤其是美心，除咗佢新出流心月之外，原來傳統月餅亦都好難買到。佢兩姊妹主要分享買月餅心得，內容唔詳細討論，相信每位母親都有唔同心得。呢件事又引起筆者聯想起8月底一單突發新聞，主要係有人帶120萬去買美心月餅券（詳情大家有興趣可以google一下）。可見月餅真係有價有市。其實月餅市場對於餅店來說一向都非常賺錢，有做餅店朋友都曾經同散子講過，其實大型餅店唔少都只係靠中秋已經賺夠成年錢，中秋都真係養起唔少人。無奈，香港無乜中秋概念股，大型餅店如大班並沒有上市，至於美心則由牛奶公司持有50%股權，而牛奶公司只在新加坡上市；傳統餅舖如恒香、榮華等均沒有上市，只有聖安娜由利亞零售（831）持有。本周為內地十一黃金周，雖然引起內地部份城市大塞車，但縱觀來港消費的旅客仍不少，消費零售似乎仍可期待。
來源:
http://hk.apple.nextmedia.com/financeestate/art/20171003/20170892
Can Bank：屯門及將軍澳點揀好？
1 :
GS(14)@2017-10-09 03:58:12大市噚日有個相對大嘅調整，最多跌成400點，但個別板塊跌到好似個市跌咗600、700點咁款，就好似之前熱炒嘅內房咁。唉，真係冇眼睇！只可以講，內房之前升幅大，經過今次調整之後，估值仍高，投資者要留意風險。除股市之外，新盤市場熱鬧，幾個大發展商將於不同地區有新盤開售，入場費約430至580萬，地點分別是屯門、將軍澳及啟德。以平均呎價計，以啟德Oasis Kai Tak最高，超過兩萬元，但這個是市區盤。Location、Location、Location！大家明嘅。散子身邊有不少朋友討論，屯門及將軍澳，兩個都係新界盤，究竟屯門抑或將軍澳好？真係一個幾深嘅問題。其實兩個位置上差距遠，真係好難比較。不過，屯門天生樓原本係舊樓重建項目，周邊發展完善，一落樓就有街市，斜對面就係V City，周邊有唔少醫務所，行十分鐘就會到屯門市中心，在區內算得上是方便。至於將軍澳晉海在日出康城，算是新區，周邊設施一定不及天生樓完善，有興趣嘅讀者不妨參考吓本報有關日出康城嘅報道，但不能否認的是，日出康城未來會發展成大型住宅區。至於出市區嘅距離，就真係睇閣下想去邊區。利申一下，散子就係住屯門、返將軍澳嘅異類。同場加映：或者有心水清嘅讀者同散子一樣，覺得天生樓這個名同新世界（017）近年新盤名有啲唔同。據了解，當年新世界同發叔傾買地嘅時候，條款之一就係要保留呢個名，紀念發叔嘅爸爸劉天生。散子
來源:
http://hk.apple.nextmedia.com/financeestate/art/20170926/20163951
Next Page