【馮仁昭四圍超】沈卓盈冧新歡「佢好gentleman」
1 :
GS(14)@2016-03-08 00:08:32【搭膊頭】■沈卓盈前晚俾疑似新歡搭膊頭好受落，但佢仲死撐話唔係拍拖。
沈卓盈舊年中同圈外男友Ray分手之後，感情生活一直都冇着落，前晚終於見到佢同疑似新歡男友喺銅鑼灣行街，仲蹺住手食雪條。佢位疑似新歡戴住眼鏡，警覺性好高，不停周圍望，起初仲企開幾個身位，之後入咗雪糕店買雪條食，佢哋揀咗個靠牆死角位坐，不時頭貼頭傾偈。其間沈卓盈有拎手機出嚟自拍，仲好快擺咗上Ig，當然就冇男伴份啦！大約半個鐘之後離開，對方仲好細心蹺住沈卓盈過馬路。兩人之後去咗睇眼鏡，跟住繼續喺銅鑼灣一帶行街，但每當去到人多地方就特別有戒心，分開幾丈遠，不過一過馬路或者去到窄路，新歡有好幾次都會攬住佢行，夠晒體貼。
【食雪條】■兩個人行到最入嘅死角位坐低食雪條。
【想拖手】■疑似新歡男友行到暗處，仲想趁機會拖下沈卓盈手仔。
■沈卓盈出門個時仲風騷揈頭髮。
多人地方要保護
沈卓盈之前單身嘅一段日子，成日黐住好姊妹徐淑敏一齊玩，間中約吓閨蜜嘆茶，又話要工作為先，點知原來已經靜靜雞拍拖。沈卓盈噚日回覆本報同新歡行銅鑼灣食雪條，當然例牌否認有新戀情：「都話唔係咯，朋友呀！朋友出街食飯行吓街，佢好gentleman，多人地方都護一護。咁我單身嘛，朋友出街食飯正常社交。」撰文：馮仁昭
來源:
http://hk.apple.nextmedia.com/entertainment/art/20160307/19519113
馮仁昭四圍超：揀父母紀念日註冊何潤東娶老婆 晒婚環
1 :
GS(14)@2016-03-11 13:30:53■何潤東同Peggy帶上鑽戒及婚環宣佈結婚，仲好有意思咁揀正同父母同日註冊。
現年40歲嘅「岡本男神」何潤東同女友Peggy拍拖8年，噚日喺台北登記結婚，何潤東晏晝喺微博宣佈喜訊：「婚戒不如自己老婆親手設計的婚環來的有新意。明年的今天是我爸媽結婚50年，也會是我結婚一周年。」噚日原來仲係父母嘅結婚49周年，揀呢日註冊鋪定路下年同父母一齊慶祝，何潤東亦都希望可以好似父母咁白頭到老。
■Peggy專誠設計婚環紀念與何潤東喺28歲相識。互聯網圖片
未定時間擺酒
早喺前年父親節，何潤東已經答應爹哋會喺兩年內結婚生仔，而家就行出第一步。據知，何潤東婚後先陪老婆一星期，月中會去內地開工，稍後會喺台北補辦喜酒，何潤東話：「還沒正確決定在甚麼時候！因為目前手頭上還有一部電影。」Peggy仲為自己設計嘅手環創立咗個名為「28women」嘅品牌，原來呢個名都有特別意思，用嚟紀念自己28歲嗰年遇上何潤東，佢話：「在28歲的那年遇上了他，28歲時最開心的時刻。因為喜歡畫女人的側臉。」Peggy又解釋手環嘅概念嚟自啞鈴，代表運動，做運動就代表健康，真係有心思。撰文：馮仁昭
來源:
http://hk.apple.nextmedia.com/entertainment/art/20160311/19524534
馮仁昭四圍超：脹爆齊昕伴母遊美睇星
1 :
GS(14)@2016-03-16 14:28:13■齊昕（中）前日被發現同媽咪唐青儀遊美國洛杉磯星光大道，戴住黑框眼鏡素顏嘅佢，精神幾好。讀者提供圖片
【爆相爆片】上年特首女梁齊昕出盡風頭，踏入新一年，齊昕好似冇晒蹤影，原來近呢幾個月，佢先後去咗澳洲、英國同美國旅行。噚日《蘋果》讀者陶小姐將前日影到齊昕同媽咪唐青儀去咗美國洛杉磯旅行嘅相透過本報「爆相爆片」開心share，見到齊昕同媽咪仲專登去咗當地著名嘅星光大道。
■相中齊昕（右）肥咗一個碼，有指係因為食藥副作用所致。
匆匆收線
有指齊昕情緒經常起伏，要keep住食藥，搞到有副作用致暴肥，相中齊昕的確肥咗成個碼，不過精神唔錯。至於行喺前面嘅阿媽，就拎住個膠袋，睇嚟兩母女啱啱shopping完。馮仁昭噚日越洋致電齊昕，問佢係咪同媽咪去咗美國散心，佢就話：「……唔，係……Sorry，我唔方便講！」然後就匆匆收線。仲記得齊昕喺舊年萬聖節當街激摑阿媽震撼全城，事隔幾個月，兩母女俾人影到喺中環酒吧消遣，搭膊頭又蹺住手，母女果然冇隔夜仇。
來源:
http://hk.apple.nextmedia.com/entertainment/art/20160316/19530959
馮仁昭四圍超：王傲山宣佈 未婚妻陀猴B
1 :
GS(14)@2016-03-18 23:56:27■王傲山同Janny噚日宣佈有喜三個月，兩人開心迎猴B。
保險才俊王傲山大前年同有線主播劉明軒閃婚閃離，回復單身之後即遇上任職證券公司嘅Janny Lam，兩個相識幾個月已經談婚論嫁，王傲山早前被踢爆向Janny成功求婚，噚日王傲山喺facebook貼出兩人照片，再加馬騮拎住香蕉嘅相，以英文話：「我們很高興讓你們知道」分享未婚妻陀猴B嘅消息。
■王傲山同女友Janny相戀後，不時拍拖出埠旅行。
剪臍帶似剪豬腸
馮仁昭噚日致電王傲山，佢好興奮話：「多謝，而家啱啱有咗3個月，預產期係10月，我都心急想BB出世，到時一定陪入產房剪臍帶。」又話到時必陪Janny入產房，又搞笑話知剪臍帶似剪豬腸：「而家開始買啲喺屋企練習吓。」王傲山為冧Janny，打算月底復活節假期帶Janny去韓國血拼，趁機買啲BB仔用品，王傲山指Janny生仔、生女都一樣鍾意，將來都會幫手湊B。王傲山同Janny未拉埋天窗，佢計劃待Janny產後坐完月、BB百日宴時，同婚禮一齊舉行，實行雙喜臨門。撰文：馮仁昭
來源:
http://hk.apple.nextmedia.com/entertainment/art/20160318/19534106
【馮仁昭四圍超】S.H.E澳門騷賀壽 Hebe要Ella生B
1 :
GS(14)@2016-03-28 14:16:15台灣女子組合S.H.E前晚喺澳門開騷，今次係任家萱（Selina）月初宣佈同老公張承中離婚後，首次同兩個隊友陳嘉樺（Ella）、田馥甄（Hebe）合體演出，Selina出場即有歌迷大讚佢靚女，又叫佢加油，Selina就笑住喺台講多謝。今年係S.H.E組隊15周年，Ella喺台上話呢15年對佢哋好重要，又話佢哋唔會令歌迷失望，由於後日係Hebe生日，兩位好姊妹即場唱生日歌送畀佢，Selina仲用廣東話唱「恭祝你福壽與天齊」，演唱會最後唱到10點，但歌迷全部唔肯走，不停大叫encore，大會要六度廣播兼開燈，觀眾先肯離開。
■S.H.E前晚合體喺澳門開騷，散場要六度呼籲歌迷先肯走。
■Selina宣佈離婚後首前晚次演出，狀態唔錯，歌迷不斷喺台下叫佢加油。
Hebe鞋踭勾爛裙
而Hebe前晚喺澳門做完騷，噚日搭船嚟咗香港，出席佢6月紅館個唱嘅記者會，着住4吋高踭鞋嘅Hebe，上台時條裙俾自己鞋踭勾住幾乎仆倒，就連裙邊都勾爛埋，現場歌迷就用廣東話唱生日歌同佢預祝生日，Hebe就話生日願望係家人同姊妹們幸福快樂，Ella今年順利生B。提到Selina而家嘅心情，Hebe話：「心情應該由她來說，多謝大家關心，我們15年在一起，會陪着她。」問佢會唔會介紹男朋友畀Selina？Hebe就講笑話：「我也自身難保，順其自然。」至於紅館演唱會，佢話兩位姊妹唔會做嘉賓。撰文：馮仁昭
來源:
http://hk.apple.nextmedia.com/entertainment/art/20160328/19546922
Next Page