📖 ZKIZ Archives

阿仙奴週記：悶贏，和雲佩斯的慶祝 人在中環

http://manincentral.blogspot.hk/2013/11/blog-post_25.html
第十二週英超比賽，阿仙奴主場二比零贏修咸頓。

場波我覺得其實幾悶的。阿仙奴既發揮，也許比上週對曼聯既時候爽了一點，但同「高峰」相比，卻肯定有一大段距離。兩個入球，都唔係特別漂亮，而且主要係因為對手犯錯所致。如果唔係主隊球迷，要忍得住九十分鐘唔樁眼瞓，其實都有啲難度的。

不過，我卻喜歡呢一場勝仗。咁樣既勝利，我反而覺得更紮實。

係人都知，阿仙奴如果狀態好既時候，球員打到好似上身一樣，乜隊都打得贏的。問題係，「上身」既日子同見到陳妍希變番索女既機會率其實差唔多，都係好似買大細一樣。一隊波，排面陣容幾強都好，成個球季流流長，肯定係有一定數量既比賽，係冇辦法「上到身」的。如果隊波上唔到身，就贏唔到波的話，咪話贏咩錦標啦，前四都危呀。

上一季既阿仙奴，就肯定係屬於「一唔上身就冇把握贏」果類。佢最後既成績亦「有目共睹」。今季響呢方面，係明顯有改善的。其中一個原因，早幾個禮拜寫過，應該係因為由新球員加盟所帶來既信心；另一個原因，我覺得係一個成熟咗既龍門。列文之後，阿仙奴試過用唔少門將把關，當中既共通點係「唔夠班」。現在企穩正選既施錫斯尼，上季尾比雲加雪咗幾場之後，當堂個人好似醒番咁。或者以佢既資歷嚟講，佢既級數都仲有待提升，但今季so far佢既表現，最起碼做到唔應該輸既波，佢就真係唔輸。雖未至於拍案叫絕，但話佢算得上係穩健，應該冇人會反對吧。

龍門往往好似屋企裡面既女人一樣，假如佢能打理得屋企井井有條既話，男人先能夠無後顧之憂咁出去搏。大家不妨「回味」吓之前幾季，阿仙奴個龍門係點樣？真係前面贏幾多都唔夠後面輸。

*****

贏修咸頓之前，卻「再一次」輸俾曼聯。

唔知大家同唔同意，但係果場波，只係開波五分鐘，大概我地就已經feel到，呢一場，贏唔到的。又係果個講咗N次既argument，對曼聯，過去幾季既對賽往績令到「信心」方面輸咗幾條街的，即使今季對手已經今非昔比，但心中既恐懼，我諗係必須有一次乾淨利落既勝仗才能克服的。再加埋幾日前先硬撼完多蒙特，班球員搏到七七八八，果場波，要贏都真係幾難。

贏唔到，但和都守唔住，原因又係因為雲佩斯。其實轉會之後既雲佩斯，對親兵工廠都有波入的。分別係，之前兩次佢都仲肯「守孝」唔慶祝的。今次入波，卻興奮到忘晒形。

對母會入波唔慶祝，唔知係由幾時開始流行既「習俗」。我比較有印像既，係好多年前，阿根廷名將巴迪斯圖達，由效力多年既科倫天拿轉會羅馬，倒戈入球之後，忍唔住掉下眼淚既畫面。那一刻，感覺好真，亦真切地感受到，球員對母會嗰份情。時而勢易，足球圈亦變得越來越商業化。球員對一手栽培自己既母會，其實真心講有幾多感情？好多球員倒戈入球之後刻意唔慶祝，有幾多係出自真心？還是只出於公關考慮？

雲佩斯倒戈入球慶祝，我雖然不覺得這個個畫面太順眼，但倒覺得其實沒有甚麼大不了。球迷總是要move on的，有些球員走了，就真的是走了。大家也許曾經有過美好的時光，但人家就像變了心的女朋友一樣，心也不會再在這裡了。

唯有期望沒有他，我們的日子，反而會過得比你在時還要好。

阿仙奴週記：那隻杯仔為何讓我感動 人在中環

http://manincentral.blogspot.hk/2014/05/blog-post_19.html
okok，我知道足總杯既份量早已今非昔比，我亦知道決賽嗰場波，即使面對次級對手依然贏得咁險唔係啲咩上佳表現，我更加知道，贏咗呢隻杯仔返嚟，唔代表隊波實力好強冇問題，我當然知道，呢支所謂足總杯冠軍隊，同早排吞咗車路士六隻光蛋係同一隊人。得得得，我們其實都係現實的，隊波仲係未掂，我哋每一個阿記既球迷其實都心裡有數，但經歷九年無冠之後，今次捧杯，我還是覺得有點感動的。

阿仙奴管理層響呢九年既方向正唔正確，領隊雲加究竟做得好唔好，坊間意見好分歧。但姑勿論意見如何，如果我話，過去九年，阿仙奴呢間球會其實係「捱」緊，我諗唔會有太多人會反對。球員被有錢球會撬走，建新球場讓球會負債纍纍…你可以質疑佢地可以處理得更好，但佢地要面對重重既困難，倒係鐵一般既事實。

近年響比賽場上面見到既阿仙奴，係一隊嚴重缺乏信心既球隊。球隊從前打法水銀瀉地，現在既打法呢，即使面對低自己幾皮既對手，都不斷地打橫差嚟差去。得得得，我知你想串我唔識嘢，呢啲打法叫做possession，但sorry，打possession如果打得有信心，「視覺效果」唔會係咁既款的。呢個球季，即使自認作die hard 粉絲既我，有唔少場比賽都睇到我樁眼瞓。遇上強隊例排遲入局；遇上強隊加埋作客=被人大炒。呢隊係一隊充斥住國腳級球員既球隊，球員質素冇可能差過其他強隊咁多。或者你可以歸咎雲加臨場戰述太渣 + 傷兵太多 +板凳深度唔夠呢一大堆理由，但我更相信，球隊以至球員既信心，經過九年食白果之後，係脆弱到近乎不堪一擊。每一場比賽，戰情只要稍為偏離「劇本」，成隊波就會腳軟，然後俾人肆意凌辱。

每個人都總會有一點心魔。但心魔有幾影響你，視乎你將呢隻心魔養到幾大。人同心魔既交戰，永遠唔會完結，像阿仙奴，呢隻心魔養咗九年，一年復一年地「壓佢唔住」，呢隻「鬼仔」，其實已經惡到不得了…甚至有唔少人相信，球會最終會被呢隻「妖怪」殺死，永遠都起唔返身。呢個係一個惡性循環，情況通常只會越嚟越壞，要矯正亦會越嚟越難。今日球會拎返隻杯仔，最大既意義，我覺得係讓大家再一次相信「我地還沒有死去」。心魔縱使很惡很難纏，但鬥贏佢既希望仍然存在。

呢幾年，我對呢隊球隊既「沉迷」程度，一年比一年嚴重。我認識有唔少同我一樣既小生意人，居然都同樣係阿記既粉絲。做阿記既球迷，肯定係唔過癮的，但我地對球隊之所以不離不棄，我主觀地覺得，球隊過去既有些處境，總係會讓我們有點感同身受。在這支近乎「落難」既球隊身上，我們多少看到一點點自己。

幾個月後，球隊在新球季裡好快又要再跟這個心魔惡戰了。大家都明白，一次勝利代表不了甚麼，但凡事總有開始，而人生也總需要好幾個轉捩點的。

File#596 返港週記之《尖沙咀依時遲》

原載《東Touch》1062期 (06Oct2015)

老樓週記：難得發聲　向胡應湘致敬

1 : GS(14)@2012-10-27 14:42:12

http://hk.apple.nextmedia.com/financeestate/art/20121027/18049762
終於有發展商出聲話樓價貴過頭，這便是合和主席飛俠哥頓胡應湘。他指出一個事實，並有感而發，狂炳運輸及房屋局局長張炳良，要佢快啲諗計解決樓市問題，否則香港下一代，就只可以住籠屋同劏房了。
工程師堅持理念
哥頓胡呢幾十年搞香港和內地公路建設，投放了好多心機和資源，雖然回報並非像與其他同業般賺咁多錢，但他一直敢言和坦率，就是工程師那份堅持和理念，絕非政客和商家的想法。
老樓在2003年曾聽哥頓談起興建港珠澳大橋計劃，當年他表示，「無論大橋的回本期是三年，甚至是三百年，他都有興趣投標」。
這個計劃的構想最初在1983年由胡應湘及珠海市提出，當初稱之為伶仃洋大橋。
原來初時只預算連接香港和珠海，由香港的屯門爛角咀起始，經過內伶仃島、淇澳島，到達珠海的金鼎，珠海甚至已於其境內興建了大橋的一部份，即淇澳大橋。
後來香港的青嶼幹線通車，胡應湘又提出香港應善用青馬大橋等基建設施；於是大橋的香港起點改為大嶼山，原本的伶仃洋大橋計劃擱置；並再加入澳門（單Y方案）和深圳市（雙Y方案），香港政府最後選擇了單Y方案，並改名「港珠澳大橋」。
胡應湘童年時期於灣仔長大，因此對灣仔的感情濃厚。1970年代末期起，他先後收購灣仔皇后大道東舊式樓宇進行重建，先後發展合和中心及胡忠大廈，前者更一度為全香港最高建築物。
然而，胡應湘構思的第三個發展項目Mega Tower Hotel（中文暫稱作合和酒店）因環保人士及部份居民反對規模過大，計劃十多年一直未能成事，月前削減了規模終於過關，不是每個人都有這份勇氣和堅持。
胡應湘的言行，也反映了張炳良的無知和無能。
劉兆昌

---

老樓週記：自住用家冇有怕 劉兆昌

1 : GS(14)@2013-09-08 13:58:37

http://hk.apple.nextmedia.com/financeestate/art/20130908/18413497

                新盤浴血戰，二手靜局，與此同時九肚山地只以低價成交，二手相當大壓力，尤其假豪宅過去以太高溢價開售，加上近兩年辣招壓縮了成交量，豪宅跌勢開始湧現。因自2003年由豪宅作為大市火車頭，一般中小型單位被帶動，升勢甚勁，縱使碰上兩次算大規模的調整仍能頂得住，還累積以倍計的升幅，這有賴曾蔭權政府當年停止賣地的惡果和美息低企產生的連鎖反應。
身邊有朋友在沙士期間入市，手上累積了一定的資金，供樓亦好輕鬆，對今明兩年的樓市關鍵時刻無動於衷。「如樓價真的下跌，會吼位再入市」，相信有個別已在物業上擁有第一桶金的幸運兒，不排除擁有同樣心態，這批實力派將會是未來樓市上升週期最受惠人士，任何時間入市的風險，相對近年高位接棒的業主為低。

樓市仍有強大承接力

                在土地供應真空期間，若未有外圍太大衝擊，今年樓價跌幅不一定如外界般那般慘烈，美國本月議息或會對退市有較具體的時間表和減債規模，但不代表短期內有加息的需要，故近月碰上調整市初期亦未有大規模的放血斬倉事件，落價一成以內便開始有強大承接力，證明購買力仍強勁反而購買慾卻低。當然若自己得層自用樓，不應受到樓市波幅影響心情，況且賣樓後都要找地方住，一動不如一靜，睇變化再謀後略。

                  劉兆昌

---

阿仙奴週記：風水總會輪流轉 人在中環

1 : GS(14)@2013-10-01 12:13:30

http://manincentral.blogspot.hk/2013/09/blog-post_30.html
英超第六週，阿仙奴作客2-1打贏史雲斯。

賽前既評論普遍預期，呢場會係一場so call「技術型」既高水準較量，原因係兩隊都擅長打地面戰，唔喜歡傳統英式既高Q大棍。講到咁，場波應該有啲睇頭啦掛？說實話，場波響下半場開紀錄之前，我幾乎悶到瞓著。我明白大家都係技術型，大家都擅長地面傳球，大家都著重控球…不過上半場俾我既感覺，係響四十五分鐘內不停響中圈附近傳黎傳去，如果唔係睇緊電視直播，仲以為班球員響度玩緊馬騮搶波。

我知道我呢個講法係膚淺的，possession呢樣野，響足球比賽上係極具戰略意義。不過俾咗幾舊水NOW去睇直播，自然想得到多一點觀能刺激…縱使我明白，阿仙奴不嬲其實係喜歡傳個波入網多過用力射入去的。

*****

場波打得好嗎？問心講，一般啦我覺得。真正讓我呢亭膚淺既球迷情緒高漲既，係呢場波以外既其他賽果：曼市兩隊齊齊俾相對弱既球隊砌低（曼聯仲要係響死響奧脫福呀大佬…），熱刺同車仔打和各跌兩分，阿仙奴響呢個禮拜既「全取三分」，則顯得特別有份量。

撇除第一場主場慘敗之後，過往果五個禮拜，阿記表現一直異常穩定。呢種穩定可以堅持幾耐？冇人能夠講得準。不過呢一刻，我地站在榜首卻係鐵一般既事實，而呢個暫時既榜首位置，係響有大量原本係正選既球員缺陣底下拿下的；亦因為呢個原因，我覺得份外珍貴。

*****

不久之前，我記得睇過一個非正式既統計，話呢個地球上，最多人談論既球隊，原來係阿仙奴。同阿仙奴相關既blog、twitter、微博等文章，亦冠絕整個球壇。出奇嗎？最多人談論既球隊，竟然唔係Fans更多既曼聯，又或者星光熠熠既皇馬，而係過去八年連杯仔都拎唔到一隻既阿仙奴。點解會咁既呢？

無他既，因為阿仙奴過去八年，真係唔多掂。掂既嘢，因為本身已經冇咩大問題，批評空間自然細。反正佢都已經咁掂，咁仲有乜嘢好評論呢？只有「唔掂」既嘢，先至能夠吸引到公眾既批評。面對住過去幾年既阿仙奴，有心既球迷會寫評論，去解構球隊唔掂既原因；認為自己醒過雲加既所謂「專家」，又會指指點點教球隊應該點做、買邊個又賣邊個；仲未計一班口多多既球迷，得閒抽下阿記水串佢又膠又窮又孤寒，志在過過口癮。加加埋埋，就造就咗佢「貴為」地上最多人談論既球隊了。

睇到呢個統計既時候，我不自覺地諗起有啲本地既政府官員，總係埋怨傳媒評論得佢地太多、太過份太刻薄。唉，理由其實一樣既遮，評論得你多，主要係因為你「唔掂」。當你掂既時候，對你既「批評」，自然會變得冇市場。我只係恐怕，到時你又會嫌傳媒對你既歌功頌德唔夠多了（如果真係咁既一日…）。

「風水輪流轉」這回事，有時真係唔到你唔信的。經過八年無冠既日子，今天領先既，「居然」係過去幾年俾人串爆既阿仙奴。緊隨其後既，則又係另一隊響過去幾年俾人笑到面黃既利物浦。我當然明白，響季初，一切都係言之尚早，但我隱約還是聞到一點，十年河東十年河西既味道。

未來幾年，最多人談論既球隊，唔知會唔會有機會由一隊倫敦球會，變成一隊來自曼徹斯特既球隊？

我們都拭目以待。

---