ZKIZ Archives


又擺索羅斯上枱

2014-04-17  NM
 
 

 

號稱全球最大嘅內地豬肉股萬洲國際(288),今個星期二(15日)開始招股,集資額四百多億,規模三年來最大,主要用來償還上年收購美國豬肉加工企業Smithfield的債項。萬洲「土豪式」請咗成廿九間投行做承銷團,真係人多「摟」死象!市場傳聞索羅斯都有入飛添!

不過計小宗話,咪聽到「索羅斯」三隻字就撲入市。上年尾徽商銀行(3698)上市,一樣傳佢入咗飛,散戶跟到足,點知過幾日,就傳索羅斯抽咗飛噃!成單嘢,傳來傳去,佢老人家由始至終都無出過聲。望嚇近年「傳」過索羅斯入飛嘅徽商銀行和周大福(1929),股價仲潛緊水,真係「認真便輸了」。講番萬洲,喺中、美、歐都有自己品牌,小宗老友去過佢中國品牌「雙匯」嘅清遠屠宰場,老遠都聞到一陣豬肉味,工人話最忙時每日殺三千隻豬,依家每日殺二千四百隻左右。有基金經理話,萬洲市值成一千六百幾億,有機會入恆指成分股,所以都會入飛,但叫價唔會高囉。 其實今年以嚟新股表現麻麻,廿二隻新股上市,十七隻仲潛緊水;近排上市的四隻新股仲要認購不足!新股潮冷卻,基金就話要追貨,被迫要買啫,散戶都係睇定啲好!

職場秘笈裁員不能解決問題

港大建築系畢業,由一個小小的項目經理,扶搖直上,升任至富豪國際(78)、百利保(617)及世紀城市(355)的董事。他每期分享不同的職場經驗及秘笈;要上位,無往不利。很多公司發現生意有虧損,第一反應就是裁員減省開支,小弟其實並不太認同,當然若公司太大,冗員太多,裁員無可厚非,但上市公司因要有亮麗成績表而裁員,就可能有很多反效果。須知道一間公司要運作出色及成功,人才是第一個因素,裁員是可以減到短期開支,但長遠而言,公司出品的質素因而降低會引致顧客離棄,損失更大。公司培育一個職員,要花上大量金錢、時間及其他無形的費用,一旦裁員,以前投資於職員身上的資金,便化為烏有,就算公司回覆正常,想再請回同一職員,他也有陰影,不願回巢。剩下的僱員亦人人自危,惶恐不已,在這種陰影下,他們又怎會盡力做嘢?只會盡力搵工!結果能搵到工的,都是一些最有實力、資歷及能力的員工,他們搵到工後辭職,令公司承受進一步的人才損失!大公司裁員前,應要考慮外界對裁員行動的看法,比方公司年年賺錢,但一發現虧損,便馬上裁員,這只會引起外界對員工的同情,認為公司沒有履行社會責任,不能和員工共渡難關,若然公司有工會發起鬥爭,外界可能一面倒支持員工,令公司變成一個「資本魔鬼」。其實公司還有其他方法節省開支:1.確定每天最後走的員工關掉所有燈,熄了所有冷氣(這個可用簽log book的形式)。2.影印要有密碼才能影,並要登記影印的紙張,交由上級簽署作實,以防員工私自影印不是公司的文件。3.取消所有OT。4.員工不能私自上網,因上網的capacity太大,網絡公司的收費會跳級上。5.辦公室面積可縮小,例如二人一房變成三人一房,不必要的文件存倉。6.大公司請客應酬,儘量改在公司裡(很多大公司有自己的小型廚房)。7.新請的員工假期可縮短,比如有14天工作天改作10天工作天。8.商務旅遊及無謂的seminar儘量減少,因商務而住酒店的檔次亦要降級(不用五星級,三四星以下可以。)我個人意見,若公司環境不好,裁員是最後方法,其次是減薪,員工知道公司有困境都不裁員,必然心存感激!當對公司更有歸屬感,更加忠誠及賣命,這些無形資產的增長,實非裁員所省下的開支能夠代替!

福記鬥福記

楊貫一嗰間富臨飯店,被有八十間食肆嘅「街坊」富臨,打到落花流水!富豪飯堂,真係愈來愈難捱矣。就好似福臨門七哥徐維均,佢間「家全七福」,最近開宗明義搶舊檔生意。 只要食客帶住滙豐銀行白金卡,再加上福臨門VIP卡,去家全七福幫襯,得享八折!兩間都有幫襯嘅富豪楊國佳,好開心話:「最好福臨門迎戰,俾個七折,大家鬥劈就為之very good啦!」真正漁人得利。

唐唐uncle當年情

前政務司長唐英年uncle唐驥千(Jack),今個月二日喺美國聖地牙哥逝世,終年八十六歲。唐驥千早年繼承父親唐炳源嘅南海紗廠,仲係香港總商會首位華人主席、及做過滙豐銀行董事,但係商界較為津津樂道的,卻係佢同太太Joanna Poon嘅一段情。 Joanna比唐驥千年輕最少廿歲,前夫竟然係另一紡織巨擘、南洋紗廠嘅太子爺榮智權。佢同中信泰富前主席榮智健分屬堂兄弟。無獨有偶,唐驥千弟弟、現年七十五歲嘅唐騮千(Oscar),早年與身為瑜伽教練嘅妻子離婚後,去年喺美國迎娶細佢三十三年嘅華裔女考古學家徐心眉,開展第三段婚姻。加埋曾爆出「感情缺失」嘅唐英年,似乎唐氏公子對年輕女性來講,仲有一定吸引力!

職場秘笈未有大茶飯食

開放市場、擴大投資者嘅選擇,從來都係好事而非壞事。故此李克強批准港滬股市互聯互通,絕對值得舉腳贊成。唯其如此,先至有機會做大個餅,等大家有啖好食,係咪?雖然唔少人詬病以2,500億人民幣為互聯互通嘅總額、105億人民幣為每日上限,格局太細,冇乜肉食。但幾冇肉食都好,總好過冇吖,係咪?何況依家只係個試驗,做落去如果冇問題,冇理由唔增加額度啩。不過有上限之設,即係互聯互通隨時會被喝停,變成不聯不通,落咗疊嘅人分分鐘可能坐艇。有此戒心,要做大個餅,談何容易?點解要整個上限?驚俾國際大鱷狙擊囉,故此無論資金出入都要設限。於此可見,一日人民幣資本賬未完全開放,要吃大茶飯,難矣哉!革命尚未成功也。

PermaLink: https://articles.zkiz.com/?id=96497

Next Page

ZKIZ Archives @ 2019