ZKIZ Archives


豐匯自由窗 當城規無到

2014-03-27  NM
 
 

 

深水埗嘅新盤豐匯,呢個禮拜尾就會開賣,作為長實今年第一個盤,想有個好開始,平價招數唔少得。一房單位四百萬以下有得揀,就咁搏到三千張入票。不過,小宗老友提醒,呢個盤第三座嘅C室單位,一律不設煤氣,同層嘅A同B室都有。既然煤氣管上到樓,何解單單唔入C室?樓盤設計認真硬膠。

豐匯硬膠嘅地方,又點只一個。揭開樓書,原來發展商為滿足城規會對環境評估報告嘅要求,將第一及二座、全部面向荔枝角道、桂林街及欽州街嘅窗戶,以噪音緩解措施為由,定為「固定窗戶」。「固定窗戶」平時無得開,樓書話只喺維修時,先可用「可拆式手抽」解鎖。睇番示範單位,個「可拆式手抽」,咪即係窗柄囉!咁住戶幾時開窗都無問題啦!由於城規會監察對象只係發展商,所以業主無責任要遵守。咁唔怪之得,長實賣樓時,半句都無提過啲窗唔開得啦,擺明當城規無到噃!

彤叔抱恙主家席凋零

周大福作為鄭裕彤家族嘅旗艦公司,每年喺會展搞嘅週年晚會,都儼如鄭家聚會。往年子孫都會同彤叔坐埋主家席,濟濟一堂,開心番晚。根據張枱嘅座位表,仲睇到受寵指數。兩年前,最得寵嘅孫仔鄭志剛,就坐正阿爺身邊,兩爺孫有講有笑,反而鄭家純被安排坐正喺背台位置,成晚悶悶不樂,而坐佢側邊嘅細佬鄭家成,則自顧自隊紅酒。上週二,又係周大福嘅週年晚會。彤叔抱恙,主家席即刻失去「意義」,得番彤嬸周翠英同鄭家純一家,坐埋都唔夠半圍。周大福獨立非執董鄺志強竟然「越級」坐喺鄭志剛隔籬,反而同為周大福執董嘅鄭志恆,同佢老豆鄭家成,就唔知被編到坐去邊度,直到上台敬酒時,先見到佢哋兩個;而喺周大福無職位嘅彤叔女婿杜惠愷亦「坐歪」,同老婆鄭秀霞坐喺主家席側邊張枱。彤叔病倒至今五百四十八日,親疏有別嘅座位編排,已睇到分家部署喎!

王英偉卸任「公職王」

藝發局主席王英偉,出咗名係公職王,政府搵得佢幫手,實無托手踭,所以佢嘅公職頭銜水蛇春咁長,範疇遍及藝術、電影、社會福利同教育等等。但最近佢同小宗講,今年六十有一,年紀大,會逐漸做少啲公職。唯獨電影,佢仲係放唔低,今年香港國際電影節剛剛開幕,自然又要四出宣傳。佢話今年港產片特別爭氣,「陳果嘅《那夜凌晨,我坐上了旺角開往大埔的紅van》,林超賢嘅《魔警》,同彭浩翔嘅《香港仔》都係本土製作,香港新一代接到棒啦!」咁佢個仔,喺無線做演員嘅王梓軒又點?佢笑笑口話:「好少睇喎!佢唱歌同做主持多!」講係咁講,但相信阿仔嘅演藝工作,佢最放唔低也!

職場秘笈幫老闆升職

做通才上期講如何升職,今期再續。今時今日專才氾濫,若要突出自己,一定要不斷「升呢」。比方說做一個地產項目,當中其實涉及銀行貸款、會計入數、承建商糾紛、市場銷售策略等等,過程非常繁複!我的年代是一腳踢,樣樣都要識。但現在的新紮師兄,只負責一兩個範疇,其餘則不理,最好不要煩到他!這樣的態度,最多換來人工跟通賬掛鈎,但升職就頗困難了!記錄成績及錯處將自己的成績或achievements記錄下來,在年尾虛心向公司反映!同時記錄大小犯錯事件,原因及後果,以免日後重犯。一般情況下,老闆會記得下屬犯的錯誤,多過功績,所以同一錯誤只可犯一次。留意談吐、言行要假設自己已升職,談吐、言行、舉止及衣著要比同事更專業、更大體、更穩重、更有遠見,老闆才覺自己有慧眼挑選了你。忌搞小圈子切忌搞小圈子,排擠競爭者以達升職目標,這樣你就不會專注自己工作。以陰招方法升職,不靠實力,很難爬上樹頂。幫老闆升職老闆交下工作,要在已定下的時間及預算內完成,因你老闆之上可能再有老闆,做得不好,就代表你老闆交唔到貨俾老闆。你老闆不升,你又點會升呢?總的來說,升職沒有捷徑!若做足還不能升,你公司就一定有問題,要另謀高就,祝大家好運!

港大建築系畢業,由一個小小的項目經理,扶搖直上,升任至富豪國際(78)、百利保(617)及世紀城市(355)的董事。他每期分享不同的職場經驗及秘笈;要上位,無往不利。

金牙大狀講嘢

超人李私讓套現李家之和黃賣四分一屈臣氏股權俾另一個李家之淡馬錫,作價440億港元。超人李話此舉並非撤資,而係將海外啲錢派番俾香港人——屈臣氏只有6%鋪頭喺香港,故此說話千祈唔好亂講。超人李原先想賣屈臣氏旗下之百佳,可惜唔成事。轉而求其次,想將屈臣氏上市,又有阻滯,方有兩個李傢俬讓之舉。即使唔係撤資,觀乎連番舉動,套現之意甚決也。即以賣屈臣氏而言,作價比市場估計有一成折讓;就算唔係賤賣,急於求售之意寫曬上幅牆上邊啦。賣屈臣氏長實派特別股息,此為創舉,更加派突13億元,超人李個人淨袋70億元。佢話自己唔等錢使,呢個冇人敢否定,但唔係等錢使至要急於套現o架,撤資都得啫?

PermaLink: https://articles.zkiz.com/?id=94389

Next Page

ZKIZ Archives @ 2019