ZKIZ Archives


蔡運華六合彩處女報:從未想過會上C1

1 : GS(14)@2015-09-23 02:19:24

無綫J2台接棒亞視播出六合彩,新一代六合彩之女,係前主持兼舞台劇演員,35歲的蔡運華(Shirley),大家對佢嘅表現都頗為滿意,而蔡運華睇嚟對自己第一次主持六合彩都好緊張,前晚都係facebook一路更新。昨日一早亦share本報嘅即時新聞表示:「謝謝蘋果,從未想過,一把年紀會上到C1頭條和即時娛樂焦點,看一眾好友相約看直播的雀躍,實在可愛。因為這次,而與很多舊相識從新連繋,也是有趣 It's a special summer~」





來源: http://hk.apple.nextmedia.com/entertainment/art/20150803/19241174
PermaLink: https://articles.zkiz.com/?id=292518

C1精讀班 江美儀

1 : GS(14)@2017-01-02 17:03:38

2016-12-14 EW

「江美儀遭網民圍剿無有怕」、「江美儀鬧拍檔譏魚販犯眾憎」……

上周三(十二月七日),江美儀登上了多份報章娛樂版的C1頭條,內容主要指網民鬧爆她主持《街市遊樂團》時,經常責罵「街僮」、新人顧紀筠兒子陳浚霆,又狂轟她說話涼薄,一時嫌魚檔劏魚只賺到二百六十元,一時又指剝蝦殼的工作自甘墮落。

忽然成為了C1女郎,她說,這是自己入行二十年以來的第一次。「C1喎,不嬲都係好大件事先會做㗎嘛,估唔到今次小妹竟然被寵幸,畀人擺咗上去,哈哈哈!」

然而,始終這單頭條新聞,牽涉到個人人格問題啊,難道不怕形象因此受損嗎?「對我嚟講,呢件事只係茶杯裏嘅風波,我只不過係做咗被批評嘅對象,有啲觀眾唔係集集睇開,咪會對我有呢啲誤會同批評囉,如果我當中真係有啲表現令到人覺得唔舒服,咁真係唔好意思!

「我相信,我入行以嚟一直所做嘅嘢,都應該夠去釐定番,我係一個點嘅人!」

不過,說到底,這趟上C1,對江美儀來說,也不是沒有得着。「我直情係感恩啦!因為我學識咗完全冇怪任何人,學識咗點去處理呢件事!而且,冇呢啲C1,我今日就唔會多兩個呢啲訪問啦!幾好呀!係咪先?」

說罷,她仰天大笑,繼續向來豪邁的作風。

自甘墮落

至於被網民狂轟說話刻薄,她則解釋:「我同麥包(麥長青)、滕麗名、『街僮』喺節目第一集,已經有句口頭禪形容自己,就係『麻雀耍樂、吃喝玩樂、自甘墮落』,呢啲係節目嘅形象設定,原意係要我哋呢啲咁嘅人去體驗吓,街市裏面默默耕耘工作嘅人嘅辛苦。

「我話剝蝦殼係『自甘墮落』,只係攞番句口頭禪嚟笑自己。喂!人哋要用十斤蝦肉,先曬得嗰十五両蝦乾;我哋剝啲殼時,真係剝到手指頭痛,啲皮皺晒㗎,可想而知日日做呢件事嘅人幾辛苦呀!

「我哋喺個魚檔,腳又踎到痺,手又脹晒,嗰度又濕,啲魚又腥又臭,去幫手劏魚片去曬,曬曬埋埋一斤先賣得二百六十蚊, 但魚檔嗰兩公婆呢,就日日都係咁,竟然願意去做呢啲嘢喎,我覺得佢哋好偉大㗎!

「我哋夏天去拍賣菜,嗰個檔口又熱又焗又濕,我哋只係企一日,個個啲衫都未曾乾過,跟住個個都出晒熱痱,你諗吓賣菜啲人長時間係咁,幾攞命呀!」

縱使成了被抨擊對象,上了C1,但江美儀仍覺得這節目讓她賺凸。「喂,買蔥搭菜,收我五蚊,一陣又三百蚊賣兩隻嘉美雞畀我,哈哈!我哋幾個 家去到街市,多咗好多朋友,個個都會主動走嚟同我哋傾偈,好開心、好有人情味㗎!」

你走開啦

江美儀因為主持《街市遊樂團》而遭網民圍剿,對於被網民指責在節目中經常惡言對新人陳浚霆「街僮」,她笑着說:「『街僮』做『下靶位』,係事前嘅角色設定,成個團隊,包括佢自己都知。

「我諗啲觀眾係唔明,點解我哋成日叫『街僮』走開囉!事源係之前我哋去訪問一間凍肉舖,『街僮』突然問老細:『如果我唔食肉,咁我可以喺度賣到乜?』(一個反白眼表情)哈哈哈!喺凍肉舖問人唔食肉賣到乜?我除咗叫佢走開,我都唔知可以點應佢呀!哈哈哈!不過呢段片最後被剪走咗,觀眾唔知頭唔知路,咪只係見到每次『街僮』問問題時,我哋都叫佢『你走啦!』其實就係咁咋嘛!」

而事實上,即使是「街僮」媽咪顧紀筠,也沒有介意兒子在節目中成為下靶位。「我都係呢個節目先識『街僮』,有次佢爹哋媽咪喺日本約埋我食飯,我問過顧老闆(顧紀筠)介唔介意我哋咁對佢個仔,佢話:『冇嘢呀!OK呀!』仲同我講,個仔自從做咗呢個節目,返到屋企會同佢講番拍嘢時啲嘢,顧老闆覺得佢開心咗好多。呢單C1新聞出咗,都係『街僮』同我講嘅,我都同顧老闆講唔好意思,佢話佢完全明白乜嘢事,反而叫我唔好咁介懷!」

冇人理我

而另一則C1 內的新聞,便重提了她拍劇集《親親我好媽》,越權投訴劇本致停廠四日,兼逼走無綫戲劇製作高層曾勵珍愛將、監製關永忠,令劇集成了倉底貨的傳聞;有說她因此連拍新劇《同盟》,亦由主角淪為七線角色。

「話《同盟》我由主角淪為配角,咁講對監製、公司、同劇其他演員都唔公平。監製阿Jazz(文偉鴻)係我恩人,佢搵我,我都會二話不說應承佢,呢啲係交情、義氣同信心,唔關個角色事。」

當說到《親》劇的傳聞時,她坦言拍攝期間確實不太開心。「我冇帶隊去投訴鬧個劇本!嗰個唔係我,我亦唔知係邊個!呢隻死貓都幾大隻,幾難啃!

「喂!TVB喎!第一次做女主角喎,幾難得呀!但劇本有問題,又有好多不利嘅傳聞,點解人哋做女主角可以一帆風順?點解我做就會遇到呢啲嘢呢?有冇人理過我感受呢?冇!係完全冇!好多人叫我放鬆啲,你試吓去放鬆呀!你估真係咁容易咩?」

慶幸的,是她跟關永忠卻沒有因此反目。「我喺陳曼娜嫁女時見過關永忠,我有同佢道歉,佢話:『喂!冇嘢呀真係!嗰陣個個都大壓力啫!我好明白嘅!』然後仲話,我同佢係一世嘅朋友,我真係當堂釋懷晒㗎!」說到這裏,終於見她見笑番——咁咪幾靚女。

死十八次

除了主持《街市》被網民批評,當日C1的新聞,也有提及她曾演出的舞台劇《嬉春酒店》近日再度公演,但因她上次演出對監製朱仲銘無禮而被飛。「係囉!我樣衰囉!哈哈哈哈!我講嘢倔,可能係有啲言語上嘅誤會囉。點都好啦, 家又唔係淨係唔用我,係咪?你話如果上次啲人用番晒,淨係唔用我就講得通啫,但 家重演,都唔係要番晒之前啲演員,同埋我上次演嗰個角色,今次係由伍姑娘做,我都想睇吓佢做成點㗎!」

那有否因被飛感到不開心呢?「嘩!如果吓吓我都唔開心,咁我咪要自殺十八次?我收咗十四場錢,但只係演咗十場,咁我係咪應該要多謝人呀?如果冇《嬉春》,我上年就唔會做到《羅生門》,唔會識到李居明師傅。李師傅好錫我㗎!佢唔做DBC(數碼電台),去咗商台開咪,都搵埋我過去;佢每次搞活動,都會搵我幫手做司儀、唱歌,你話嘞,係咪要感恩呀?」

貪字得個禪

江美儀說,拍《親》劇那段不開心的日子,整個人充滿着怨氣。「我嗰陣成日係咁問點解要擺我上枱,點解個個都要話我,好多『點解』,然後就覺得好唔忿氣!」

結果,一直有在慈山寺做義工的她,參加了一個兩日一夜的禪修活動,終於淨化了她的心靈,更啟發了她在微博,寫下了「道歉信」。「呢次禪修令我明白到,我同一般人一樣,當有事發生,就會第一時間怪人哋唔啱,將人哋嘅缺點放大,但最終煩嗰個又咪係自己!而且我仲明白咗,唔好因為人哋講自己,牽動到自己嘅情緒,跟住就產生一啲憎人嘅念頭,係好深㗎,但我學緊囉!

「其實之前我會咁唔開心,都係因為我自己貪咋嘛!如果我當初唔睇得『女主角』三個字咁重,咁我就唔會要求多咗、唔會壓力大咗、唔會失望、唔會對周圍嘅嘢唔滿意囉!講到尾,所有問題又咪係嚟自自己!

「嗰篇『道歉信』,我係衷心咁寫出嚟,可能我過往真係有好多嘢對人做錯咗,但我又未必知,咁不如同大家講聲『唔好意思』,希望由嗰日開始做一個重新嘅自己啦!」

難怪向來率性的她,即使成了C1女郎,今天依然見她氣定神閒。

撰文☆周彩霞 攝影☆梁比利 髮型☆Ivan Lee 服裝☆Laurèl 設計☆美術組
PermaLink: https://articles.zkiz.com/?id=321109

Next Page

ZKIZ Archives @ 2019