📖 ZKIZ Archives

排隊 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20140128/18607328
吃飯當然不是每餐都要超過450元，否則何來儲蓄？例如議員S請左丁山吃早餐，佢就鍾意去「太興」食套餐，但吃晚飯呢，佢可以好講究㗎。一間以日本懷石著名嘅日本餐廳，每個人頭收兩張金牛，你話貴呀，訂位唔該排隊一兩個星期。擺花街有間日本鐵板燒，地方不大，有日本廚師壓陣，消費以人頭計，千五至千七元差不多嘞，訂位又係請排隊，最好預早，要預得好早㖭。香港有個新趨勢（其實都新咗幾耐），愈係貴價有型嘅新式食肆，不論地方如何偏僻，一定係生意做唔切。平民化嘅餐廳，例如和富道阿鴻，不設預訂，日日門前排隊排到你冇晒耐性，難得餐飲M有閒情，係要排到為止，呢日排到腳軟之後，攞到張中枱，潮州親戚立即由司機揸車趕到，吃潮式鹵水鵝片，餐飲M失聲曰：「好耐未食過咁靚鹵水鵝片。」點知佢嘅潮州親戚講得仲誇張：「我成世都未食過咁靚嘅鵝片！」後來見到阿鴻現身，潮州親戚用鄉下話問阿鴻：「點解會整得咁靚㗎？」點知阿鴻眼睩睩咁答：「我唔係潮州人嚟㗎！」
聽講話機場都有間阿鴻噃，但餐飲M警告：「只可到和富道阿鴻，機場唔駛去。你可以去排隊試吓。」排隊？咪搞我，食嘢箒，點解要咁辛苦一輪先，早一個月訂位都冇所謂，要企街一小時輪隊入去，勢係假。
不過有時唔排隊唔得，完全冇選擇，譬如去睇醫生，睇眼醫為例，隨時等足兩小時，如果你位醫生叫做林順潮，等三小時都唔奇，而且還有城中大名人陪你一齊等。有云眼睛係靈魂之窗，眼睛唔掂，極度不便，唔睇唔得，不過香港人好奇，好多人去驗身，去洗牙順便驗牙，但專登去驗眼，睇吓眼睛有冇事嘅人，比較少見，於是去睇眼之人，十居其九都係已經眼睛開始出現問題嘅嘞，照計有啲眼病係可以防患於未然嘅，例如青光眼，五十幾歲以後嘅人士應該去驗一驗眼壓先，過往科技未昌明，老人家七八十歲時突然失明，不知是何原因，其實好可能係一早眼壓太高，日積月累，釀成青光眼之故。住在農村就話箒，生活在香港就係驗眼有着數，排隊都要啦。
PermaLink: https://articles.zkiz.com/?id=90495
Next Page
ZKIZ Archives @ 2019