澳洲公司Telstra出售CSLNW予香港電訊，作價24.25億美元，大概只係收回成本價。2000年PCCW收購香港電訊之後，分兩次（2001年2月及2002年7月）將旗下嘅流動電訊業務（CSL）賣曬俾Telstra，作價21億幾美元，後來CSL又合併咗新世界流動嘅業務，組成CSLNW，現在一併賣番曬俾香港電訊，一來一回，其實冇乜賺頭，Telstra只係在香港賺咗十三年錢啫，資本增值就冇乜咯，但以Telstra公司角度而言，過去所積累到嘅經營利潤，似是無本生利，其實幾過癮。
香港電訊又搞邊科？應該係當年PCCW以槓桿式收購香港電訊之後，立即面對沉重債務壓力，第一優先係將一啲有價值嘅資產出售，套現償還部份債務，令銀行安心，眨眼過咗十三年，香港電訊脫離PCCW成為獨立性嘅商業信託（Business Trust），本身已陸續償還不少債務，又有資格再向銀行（渣打還債）借款，向Telstra買番CSL，亦鞏固香港電訊嘅流動電話電訊業務，市場佔有率一下子由12.8%擴大至43%，全港最大，勢力完全唔同，李澤楷、艾維朗及背後財務顧問之財技功力，實在非同凡響。
但財技雖高，仍要Telstra肯制，先至有得玩嘅啫。澳洲公司點解肯制？一來賺咗十三年錢之後，完全一筆過收回原來投資資金，計IRR（內部回報率）仍然可觀，二來澳洲公司大概睇得到，梁振英政府係要收回三分一3G頻譜拍賣，明益中移動，有呢隻超級大老虎入場，將來未必砌得佢贏，此外一旦失去三分一3G頻譜，削弱本身實力，不如趁住有人吼中自己，一筆過賣曬，退出香港市場算數，此舉好乾手淨腳啫。Telstra賣CSLNW予香港電訊已是一家便宜兩家著，皆大歡喜。外資撤離香港，轉戰中國漸已成為趨勢，有報導話，外資廣告公司開始離開香港，搬去上海，廣告業在香港會持續萎縮。Telstra賣番CSL俾原來主人，在此時刻，別有另類意義！ 