王維基假如有免費電視牌照，是否可以成功挑戰TVB，當然係一個未知數，或者佢會做做吓執笠，步佳視後塵都未定，畢竟要挑戰一個已壟斷電視業近四十年嘅無綫，任務極為艱巨，失敗機率一定高於勝利機率，假若左丁山有五十億現金，就一定唔會做如此傻事，但最令旁人氣頂嘅就係，如今有人願做唐吉珂德，政府竟然要在佢上馬前就打跛佢隻馬，梁振英錫住王維基副身家乎？香港難得有創業家有此傻勁，咪俾個機會佢去試吓囉，佢輸清輸乾銀紙嘅話，與我地何干，駛乜政府驚定先呀？
政府之真正目的就是打壓「非我族類」，凡不是西環的朋友就是中環的敵人，至於王維基為何不是朋友，被人視為黎智英一類人，絕對係一個謎，梁振英甘願與全港電視迷為敵，不會是無緣無故的，只是佢向來收收埋埋不少心事在心，林煥光等人那裏知得清楚。
梁振英老早得罪中產，現在又得罪埋電視觀眾，實不知如何管治下去。呢日在上海總會吃飯碰到一位會計師，自不然係一位中產，佢有滿肚怒火，話說二十幾年前他還是一位掙扎向上嘅中學畢業生，薪水不高，與父親薪水加埋，還未過申請居屋家庭入息上限，父親驚自己供唔起，要寫埋佢嘅名，一齊申請居屋成功，其實二十年來，呢位會計師只有代父供樓的份兒，自己在外居住，憑自己努力，考到會計師牌，自己買樓位於南區，最近想搬去沙田馬鞍山站上蓋樓盤，方便搭火車返工，以為樓換樓可以避免「辣招」，點知一翻查清楚，父親居住（已供完）之居屋，佢係佔了20%業權，於是變成「已有多過一間樓人士」，辣招不得豁免，SSD照俾，會計師不禁怨氣沖天：「二十年來我為父母，為自己不斷交稅，拼搏賺錢供樓，從不炒樓，算係一個孝順仔，點知一味交稅有份，福利冇份，連公立醫院都未入過，依家叫做換樓自住啫，又要交多幾十萬SSD，梁振英都廢嘅，我都要上街支持王維基，發洩吓！」哦，曾俊華話唔想辣招有漏洞喎，一於辣死香港啲中產先，中產唔識喊苦喊忽搵民粹派議員幫手嘈，政府懶得理你啦，中產，你的責任是交稅，其他免問。 