ZKIZ Archives


怕你有牙

2013-09-05  NM
 
 

 

誠哥壇大埔慈山寺,早前搞到滿城風雨,承建商俊和仲告上法庭,指長實要求多多,工程大幅改動,令費用颷升,故向對方追討三億三千多萬元工程費。及後長實話要告番俊和轉頭,但原來單嘢係無下文,俊和至今都未收到呢封律師信。法律界仲傳聞,雙方已達成協議和解,俊和會終止入稟。

俊和嗰邊本週二覆話未有新進展,而長實回覆嗰句,則由大半個月前講到而家:「擬於日內提出申索。」 講番俊和,夠膽同誠哥打官司嘅本地商人,真係少之又少,現時喺俊和揸fit嘅彭一庭及彭一邦兄弟,心口有個勇字。佢哋一○年先接棒,當年佢哋伯爺、俊和之創辦人彭錦俊仙遊,二人接手分別做主席及副主席。伯爺同誠哥關係幾好,俊和原本仲係李家御用建築商之一,就連誠哥深水灣道大宅重建,都係佢哋搞嘅。彭老先生離世大半年後,彭氏兄弟仲接到慈山寺呢個project。今年四十一歲嘅彭一庭,拎住紐約大學法律博士銜頭,喺華爾街律師行打工兩年,性格外向,活躍於政商界各大小商會;而三十八歲嘅彭一邦,為人謹慎,係MIT嘅土力工程碩士,對數字及工程特別敏感。兩兄弟一凹一凸,還怕你誠哥有牙?只可惜兩代情誼,最終可能一朝了。

港樂知音何處覓?

香港「麥當勞之父」伍日照兩週前與世長辭,終年七十有六;同佢一齊創立香港麥當勞嘅馮秉芬爵士兒子馮慶炤,對好友離世相當sad。 佢同小宗回憶起時說:「當初一齊搞麥當勞,一做就好成功。當年我哋將同美國麥當勞簽嘅合同放喺夾萬,唔記得晒內容。後來美國嗰邊提起,先知佢哋有權買番我哋股份。」九十年代中,美國總店從他們手上買回股權自行發展,伍日照淡出快餐界後,進而貢獻特區之古典音樂。佢係名副其實嘅文藝復興人;出身工程師,又係創辦香港麥當勞嘅生意人,更加有構思出「巨無霸指數」(Big Mac Index)嘅經濟學家頭腦,而一生熱愛古典音樂。佢一喺麥當勞退下火線,即走去紐約學指揮,顯見古典音樂先至係佢嘅至愛。除咗幫手催生「亞洲青年管弦樂團」,年來佢更默默支持香港交響樂團,籌款之餘更落手落腳幫手策劃安排;最是難得者,係但凡港樂有表演,佢差不多必定捧場。現今伍先生大去,今後港樂又知音何處覓呢?令人神傷也。

爆料者另有其人

上禮拜小宗話有間經紀行嘅老臣子爆料,踢爆公司cut資源、cut樓層、cut佣金,搞到大家鬼殺咁嘈 ,小宗亦隨之搵來老牌經紀張天生,講吓打工之道。點知,單嘢喺中環好大回響,張天生仲即刻打電話來狂呻,話俾人誤會佢係文中之「老臣子」。原來好多經紀同客仔打俾佢,問佢做咩咁傻大爆料。小宗在此澄清,爆料者另有其人,絕非張天生;因為消息來源絕對保密,小宗也不是傻的!

本週「一哥」

一號車牌,咁多年來都係由警務處處長呢位一哥「繼承」,代代相傳。有位仁兄竟然能自創「一哥」車牌,佩服也。據資料,車主住九龍塘,車牌拍賣價盛惠一萬二千大元。

Give me a break落dragon-i食點心?

落dragon-i,唔係夜蒲,而係去食點心?位於中環雲咸街嘅dragon-i,晚晚十點半後變身勁歌熱舞嘅夜場,連環境係點都無人睇得真。但原來中下午的清閒時段,特設「All you can eat dim sum」午市自助餐,一百八十八元加一可任食廿幾款中式點心。日光日白所見,內裡放滿梳化椅,紅紅黑黑,十分之dragon-i。兼且燈光昏暗,又播住快歌,都係似Club多過似餐廳。雖然午餐係中式點心,不過顧客就「鬼多過人」,員工識少句英文都唔得。點心即叫即做,都尚算可以,尤其是餐廳推介的「冬筍鮮蝦餃」,雖然一籠得三隻,但勝在足料夠大件,一隻蝦餃有成四五隻蝦,相當鮮美。任食亦有包茶水五揀一,十二點開始,兩點九last order,不過唔會趕人走,歎吓點心吹吓水都幾開心。如果強勁嘅音樂聲量,能降低番少少,就更似置身高檔酒樓。呢個自助餐逢週一至週六都有,仲會定期換餐牌,增加新鮮感。dragon-i午市過後就只得小食和酒類,傍晚六點到十點半有晚餐時段,主打中日食品,一個蝦仁炒蛋盛惠二百五十大元,相當揦脷。十點半後,當然變身Clubbing啦!蒲友二十四小時唔走出dragon-i,一樣無餓死!

金牙大狀講嘢環保署同議員洗腦

打鼓嶺堆填區沉積之垃圾污水外漏,環保署有隱瞞之嫌。監管有責,九名立法局議員由是到現場實地巡視,睇個究竟。環保署稱外漏污水為垃圾汁。香港人從來都知道汁係美食精華之所在。由細到大,邊個冇食過滷水汁雞翼?上茶樓,邊個冇歎過豉汁排骨、鮑魚雞汁撈麵?口渴,邊個唔想整番杯冰凍檸汁可樂或者西瓜汁?滋味如葡汁春雞,大家唔在講梗係汁都撈埋。甜品唔可以錯過薑汁撞奶,雞尾酒Bloody Mary,千祈要記得落喼汁。食薯條,更加係茄汁不可少。而友報《蘋果》就日日都有「蘋果汁」過癮新聞奉客。故此但凡見到個汁字,大家腦海中莫不泛起美好之滋味聯想,點會同臭氣熏天、中人欲嘔之堆填區扯上任何關係?打鼓嶺明明係漏出污染度極高之垃圾污水,環保署美其名為垃圾汁,此又豈無混淆視聽、洗腦之嫌?

PermaLink: https://articles.zkiz.com/?id=74749

Next Page

ZKIZ Archives @ 2019